25 июля.

Канон святым мученикам Проклу и Иларию.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1:

Боле́зньми святы́х, и́миже о Тебе́ пострада́ша,/ умоле́н бу́ди, Го́споди,/ и вся на́ша боле́зни исцели́,// Человеколю́бче, мо́лимся.

Кано́н му́чеников, гла́с 4.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святые му́ченицы, моли́те Бо́га о нас.

Соедини́вшеся с Бо́гом и боже́ственными заря́ми освеща́еми при́сно, до́блии страда́льцы, ду́шу мою́ просвети́те, пою́щу светоно́сное и честно́е ва́ше страда́ние умиле́нием се́рдца, блаже́ннии.

Припев: Святые му́ченицы, моли́те Бо́га о нас.

Воспери́ ва́с небе́сное жела́ние, те́мже вся́ кра́сная жития́, страда́льцы, вмени́сте уме́ты, манове́ньми к Бо́гу обожи́вшеся и всю́ безбо́жную кре́пость смири́вше.

Припев: Святые му́ченицы, моли́те Бо́га о нас.

Огне́м Богонача́льныя вже́гшеся Тро́ицы, злоче́стия разжже́ния угаси́сте, му́дрии, кро́вными тече́нии. Те́мже исцеле́ний чи́стыми одожде́нии страсте́й на́ших скве́рну отмы́йте.

Припев: Святые му́ченицы, моли́те Бо́га о нас.

Безпеча́льную жи́знь, небе́сную сла́ву, ра́йское наслажде́ние, све́т мы́сленный, кра́сное ра́дование, му́ченицы, взыску́юще, лю́тая претерпе́сте треволне́ния до́блественным умо́м.

Сла́ва Отцу́ и Сы́ну и Свято́му Ду́ху:

Небе́снии ли́цы ва́шему терпе́нию удиви́шася, му́дрии: бие́ния бо пло́ти, и многоплете́нныя му́ки, му́ченицы, доблему́дренно претерпе́сте, ра́дующеся и врага́ зло́бу сокруши́вше.

И ны́не и при́сно и во ве́ки веко́в. Ами́нь.

Богородичен: Яд уше́с прама́тере Евы Гаврии́л, Тебе́ провозглаша́я, — ра́дуйся, — вои́стинну оттрясе́, Влады́чице: еди́на бо Ты́ Посека́теля зло́бы зми́евы па́че ума́ же и сло́ва родила́ еси́.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею Ипоста́сною Му́дростию, Христе́: не́сть бо свя́т, па́че Тебе́, Человеколю́бие.

Припев: Святые му́ченицы, моли́те Бо́га о нас.

Прему́дростию слове́с боже́ственных нему́дрыя обличи́л еси́ и терза́ния плотска́я кре́постию ду́ха претерпе́л еси́, Про́кле всеблаже́нне, му́чениче богодохнове́нне.

Припев: Святые му́ченицы, моли́те Бо́га о нас.

Распя́ту тебе́ бы́вшу, неми́лостивно повеле́ дра́ти тя́ безу́мный, к Бо́гу душе́вныя о́чи простира́юща и терпе́нием ти́ удобря́ема.

Сла́ва Отцу́ и Сы́ну и Свято́му Ду́ху:

Сокруше́ние удо́в му́жески претерпе́л еси́, прему́дре, кро́вию же разжже́ние безбо́жия погаси́л еси́, Про́кле, укрепля́емь Боже́ственною благода́тию.

И ны́не и при́сно и во ве́ки веко́в. Ами́нь.

Богородичен: Разреши́, Де́во, соу́з зо́л мои́х, сосвяза́ющи мя́ любви́ из Тебе́ рожде́ннаго Сло́ва, Всенепоро́чная, и спаси́ мя, Влады́чице, моли́твами Твои́ми.

Седа́лен, гла́с 1.

Ила́рия, ве́рнии, и сла́внаго Про́кла, страда́вшия тве́рдо и врага́ низложи́вшия, согла́сно почти́м, Христа́ велича́юще: си́и бо чудесы́ страсте́й мглу́ отго́нят, просвеща́юще ве́рою к ни́м притека́ющия.

Сла́ва, И ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Пречи́стая, Иже из Тебе́ воплоще́нному безсе́менно моли́ся приле́жно о все́х рабе́х Твои́х, непреста́нно моля́щих Ти ся, Богоро́дице Пречи́стая, моля́щи Его́ при́сно согреше́ний оставле́ние дарова́ти воспева́ющим досто́йно сла́ву Твою́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Святые му́ченицы, моли́те Бо́га о нас.

После́дова твои́м словесе́м ве́щи тве́рдостное, и́бо кровоя́дец возбраня́ше ити́ к пре́дним, до́ндеже Христа́, все́х еди́наго Го́спода, испове́дал еси́, Про́кле, Бо́га пресу́щна.

Припев: Святые му́ченицы, моли́те Бо́га о нас.

Непобеди́мым дерзнове́нием и до́блим умо́м, страстоте́рпче Про́кле, ста́л еси́ пред суди́щем, воплоще́ние велегла́сно пропове́дуя излия́вшаго Себе́ да́же до ра́бияго о́браза, Изба́вителя на́шего.

Сла́ва Отцу́ и Сы́ну и Свято́му Ду́ху:

Безсту́дно у́бо гони́тель мудреце́м пока́зоваше му́к ви́ды и ну́жднейшую сме́рть, непобеди́мыя же ви́дя, дивля́шеся и, побежде́ние зря́ свое́, не домышля́шеся.

И ны́не и при́сно и во ве́ки веко́в. Ами́нь.

Богородичен: Сокруше́нное преступле́нием ру́к Твои́х творе́ние ущедря́я, Сло́ве, в ложесна́ Неискусобра́чныя все́лься, и во двою́ существу́ прише́л еси́, нетле́ния обновля́я пути́ ве́дущим Тя́.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святые му́ченицы, моли́те Бо́га о нас.

Ты́, Го́споди, кре́пость му́чеников и утвержде́ние, Ты́, Свя́те, святы́х, непоколеби́мая стено́ стра́ждущих усе́рдно.

Припев: Святые му́ченицы, моли́те Бо́га о нас.

Жела́нием боже́ственным ду́шу опаля́я, терпе́л еси́, свеща́ми опаля́емь, Про́кле преблаже́нне досточу́дне.

Сла́ва Отцу́ и Сы́ну и Свято́му Ду́ху:

Огня́ то́чию ужаса́юся ве́чнаго, — взыва́л еси́, опаля́емь, му́чениче Про́кле, повеле́нии мучи́теля и во́лею умерщвля́емь.

И ны́не и при́сно и во ве́ки веко́в. Ами́нь.

Богородичен: Кто́ мо́жет сказа́ти Твое́ та́инство, о Влады́чице Богоро́дице! Зижди́теля бо все́х несказа́нно воплоти́ла еси́.

Пе́снь 6.

Ирмос: Приидо́х во глубины́ морски́я, и потопи́ла мя́ е́сть бу́ря мно́гих грехо́в, но я́ко Бо́г из глубины́ возведи́ живо́т мо́й, Многоми́лостиве.

Припев: Святые му́ченицы, моли́те Бо́га о нас.

Ни о́гнь, ниже́ ра́ны, ни зве́рие, ниже́ сме́ртное искуше́ние, до́блии, ва́с разлучи́ти Бо́жия чи́стыя и непоро́чныя любве́ возмого́ша.

Припев: Святые му́ченицы, моли́те Бо́га о нас.

Зако́ном хва́льным не порабо́тает му́ченик вои́стинну до кро́ве му́жество, еди́н си́х сла́вяй Госпо́дь велича́ет я́ко уго́дники.

Сла́ва Отцу́ и Сы́ну и Свято́му Ду́ху:

Благопла́вно пучи́ну преше́дше лю́тых му́к, устреми́стеся к боже́ственному приста́нищу, е́же о Христе́, страстоте́рпцы му́ченицы, присносу́щнаго наслажде́ния.

И ны́не и при́сно и во ве́ки веко́в. Ами́нь.

Богородичен: Се́, Де́ва, — Иса́ия вопия́ше дре́вле, — Сове́та Ангела Вели́каго ражда́ет, Емману́ила, Бо́га и Го́спода, и Спа́са ду́ш на́ших.

Конда́к му́чеников, гла́с 4.

Яко денни́ца звезда́, возсия́ му́чеников Про́кла и Ила́рия честно́е страда́ние, предозаря́ющи на́с чуде́с светлостьми́. Те́мже пра́зднуем па́мять ва́шу: Христа́ Бо́га моли́те, да спасе́т ду́ши на́ша.

Пе́снь 7.

Ирмос: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Припев: Святые му́ченицы, моли́те Бо́га о нас.

Телеса́ ра́нам преда́вше, любо́вию вопло́щшагося Сло́ва, му́ченицы, от Сего́ вене́ц пра́вды прия́сте в ле́поту.

Припев: Святые му́ченицы, моли́те Бо́га о нас.

Све́том Боже́ственным у́м просве́щше, ве́рою муче́ния тму́ претеко́сте, вопию́ще, прехва́льнии: оте́ц на́ших Бо́же, благослове́н еси́.

Припев: Святые му́ченицы, моли́те Бо́га о нас.

Тече́нием твои́х усте́н медото́чных слове́с, преблаже́нне Про́кле, я́ко боже́ственным исцеле́нием напоя́еши пою́щия: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Си́лою Боже́ственною у́м укре́пль, му́к го́рькия ви́ды претерпе́л еси́, зовы́й, Ила́рие: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Яко вы́шши все́х тва́рей, ражда́еши все́х Зижди́теля, пребы́вши Де́вою, Нескве́рная, Благослове́нная, еди́на при́сно Препросла́вленная.

Пе́снь 8.

Ирмос: Изба́вителю все́х Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся́ дела́, благослови́те, по́йте Го́спода.

Припев: Святые му́ченицы, моли́те Бо́га о нас.

По мно́гих му́ках стреля́нию свире́пый вра́г тя́ предае́т, от ни́хже ссеца́емь, всехва́льный Про́кле, ра́дуяся, в ру́це Бо́жии пре́дал еси́ ду́х тво́й.

Припев: Святые му́ченицы, моли́те Бо́га о нас.

Уязви́ся честно́е те́ло твое́ непреста́нными стреля́нии, свя́те, и неисце́льно уязви́ враги́ безпло́тныя, не пою́щия: благослови́те, вся́ дела́ Госпо́дня, Го́спода.

Припев: Святые му́ченицы, моли́те Бо́га о нас.

Просвеща́емь заре́ю благода́ти, я́коже ка́мень, на земли́ валя́емь, сокруши́л еси́, Ила́рие, утвержде́ние пре́лести, поя́ в кре́пости: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Ка́пли крове́й твои́х, поте́кше, нече́стия о́гнь угаси́ша, ве́рныя же напои́ша, пою́щия непреста́нно: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Вопло́щся от чи́стых крове́й Твои́х, Бо́г, сотвори́вый и созда́вый мя́, Богороди́тельнице Влады́чице, обнови́ ми́р, вопию́щий: благослови́те, вся́ дела́ Госпо́дня, Го́спода.

Песнь 9

Ирмос: Ева у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Те́м Тя́ вси́ велича́ем.

Припев: Святые му́ченицы, моли́те Бо́га о нас.

Се́ светоза́рная, и свяще́нная, и благонаро́читая му́ченик па́мять возсия́, всю́ зе́млю просвеща́ющи, мра́к зло́бы отъе́млющи, и о́блак душа́м отгоня́ющи, и исцеле́ний благода́ть точа́щи.

Припев: Святые му́ченицы, моли́те Бо́га о нас.

Якоже два́ сосца́ духо́вна, пролива́юща исцеле́ний млеко́, му́ченицы, вся́ка напитава́ете сердца́, го́ресть неду́гов отгоня́ще и стра́сти лю́тыя исцеля́юще. Те́мже досто́йно блажи́ми есте́.

Припев: Святые му́ченицы, моли́те Бо́га о нас.

Ка́плями крове́й свяще́нных омочи́вше багряни́цу, пресла́внии, и сию́ красно́ нося́ще, со Христо́м ца́рствуете всегда́, еди́нем Царе́м и Бо́гом на́шим, о ми́ре моля́щеся.

Сла́ва Отцу́ и Сы́ну и Свято́му Ду́ху:

Земля́ благослови́ся ва́шими кровьми́ и моще́й положе́нием, перворо́дных Це́рковь Ду́хом боже́ственне светле́ется, в не́йже с му́ченики, я́ко му́ченицы, о ми́ре моли́теся.

И ны́не и при́сно и во ве́ки веко́в. Ами́нь.

Богородичен: Све́та жили́ще, Чи́стая, Твое́, Пречи́стая, бы́сть чре́во, Влады́чице, Тебе́ ра́ди Явльшагося в ве́щи зри́ме теле́сней и вся́ су́щия во тме́ Просве́щша. Те́мже Тя́ ве́рою ублажа́ем.

Свети́лен.

Ангельскаго жития́ жела́я, удали́л еси́ себе́ все́х кра́сных жития́, всели́лся еси́ во дво́рех за́поведей Госпо́дних и со Ангелы ра́дуешися.

Богородичен: Яже от Бо́га ми́рови пода́нным благи́м Ты́ вина́ еси́, Богоро́дице, но и ны́не ми́лостивна сотвори́ о о́бщем спасе́нии благопреме́ннаго Бо́га.

Молитва

Святи́и му́ченицы Христовы! При́зрите с Небе́снаго черто́га на тре́бующих ва́шей по́мощи и не отве́ргните проше́ний на́ших; но я́ко при́снии благоде́тели и хода́таи на́ши, моли́те Христа́ Бо́га, да человеколюби́в и многоми́лостив сый, сохрани́т нас от вся́каго лю́таго обстоя́ния: от тру́са, пото́па, огня́, меча́, наше́ствия иноплеме́нников и междоусо́бныя бра́ни. Да не осу́дит нас гре́шных по беззако́ниям на́шим, и да не во зло обрати́м блага́я, да́руемая нам от всеще́драго Бо́га, но во сла́ву свята́го и́мени Его́ и в прославле́ние кре́пкаго ва́шего заступле́ния. Да моли́твами ва́шими даст нам Госпо́дь мир по́мыслов, воздержа́ние от па́губных страсте́й и от вся́кия скве́рны; и да укрепи́т во всем ми́ре Свою́ еди́ну Святу́ю, Собо́рную и Апо́стольскую Це́рковь, ю́же стяжа́л есть честно́ю Свое́ю кро́вию. Моли́теся приле́жно, святи́и му́ченицы, да утверди́т Христо́с Бог во Святе́й Свое́й Правосла́вной Це́ркви живы́й дух пра́выя ве́ры и благоче́стия; да вси чле́ны ея́, чи́стии от суему́дрия и суеве́рия, ду́хом и и́стиною покланя́ются Ему́ и усе́рдно пеку́тся о соблюде́нии Его́ за́поведей; да мы вси в ми́ре и благоче́стии поживе́м в настоя́щем ве́це и дости́гнем блаже́нныя ве́чныя жи́зни на Небеси́, благода́тию Го́спода на́шего Иису́са Христа́, Ему́же подоба́ет вся́кая сла́ва, честь и держа́ва со Отце́м и Святы́м Ду́хом, ны́не и при́сно и во ве́ки веко́в. Ами́нь.