23 июля.

Канон Положению ризы, яже есть хитон, Великаго Господа Бога и Спаса нашего Иисуса Христа.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Дне́сь притеце́м, ве́рнии, к боже́ственней и цельбоно́сней ри́зе Спаси́теля на́шего Бо́га, благоизво́лившаго сию́ пло́тию носи́ти и на Кресте́ святу́ю Свою́ кро́вь излия́ти, е́юже искупи́ на́с от рабо́ты вра́жия. Те́м, благодаря́ще, вопие́м Ему́: спаси́ архиере́ев, и гра́д, и вся́ лю́ди, честно́ю Твое́ю ри́зою защити́ и спаси́ ду́ши на́ша, я́ко Человеколю́бец.

Величание

Велича́ем Тя́, Живода́вче Христе́, и почита́ем вси́ боже́ственныя ри́зы Твоея́ честно́е положе́ние.

Кано́н, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Слава Тебе, Боже наш, слава Тебе.

Отве́рзем уста́, челове́цы, и язы́к уясни́м в наро́читый де́нь пра́здника на́шего, положе́ние боже́ственныя ри́зы Христа́ Бо́га на́шего све́тло сла́вяще.

Припев: Слава Тебе, Боже наш, слава Тебе.

Сказа́ти хотя́ Свою́ благода́ть Вы́шний и прия́т ра́бий о́браз на́с ра́ди, на увере́ние естества́ челове́ческаго честну́ю ри́зу Свою́ ве́рным дне́сь дарова́.

Сла́ва Отцу́ и Сы́ну и Свято́му Ду́ху:

Ри́зу Твою́ честну́ю, Христе́, дарова́л еси́ на́м, свяще́нное огражде́ние, вся́кое сопроти́вных настоя́ние при́сно побежда́ющую си́лою духо́вною.

И ны́не и при́сно и во ве́ки веко́в. Ами́нь.

Богородичен: Воздви́жена ви́дящи, е́же на Кресте́ Твое́ долготерпе́ние, рыда́ше Тебе́ Ро́ждшая, зову́щи: ка́ко суди́мь ви́дится, хотя́й все́м суди́ти сла́вы Госпо́дь?

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Слава Тебе, Боже наш, слава Тебе.

Влады́ко сы́й по существу́, соедини́лся еси́ рабо́м пло́тию и, на́ше де́тельствуя разли́чно спасе́ние, Христе́, е́же и ны́не промышля́я, Твое́ю боже́ственною ри́зою на́м чудоде́йствуеши.

Припев: Слава Тебе, Боже наш, слава Тебе.

Пло́тию на́с ра́ди явле́йся на земли́, боже́ственныя ри́зы Твоея́ приближе́нием на́с освяти́л еси́, е́йже покланя́ющеся, Христе́, Тя́ воспева́ем.

Сла́ва Отцу́ и Сы́ну и Свято́му Ду́ху:

Живо́те Ипоста́сный, ны́не вкуси́л еси́ сме́рти плотски́я, е́юже живо́т источи́л еси́ ме́ртвым, воста́нием Твои́м, Христе́, ны́не же, я́ко животу́ хода́тая, ри́зу Твою́ боготеле́снаго одея́ния пода́л еси́ на́м.

И ны́не и при́сно и во ве́ки веко́в. Ами́нь.

Богородичен: Из Тебе́, Де́во, обновле́ние я́ве яви́ся, вои́стинну Бо́г, пло́тию ражда́емь, и на Кре́ст возвыша́емь, низлага́я де́моны, Богора́дованная Влады́чице.

Седа́лен, гла́с 4.

Сше́дый с небесе́ за милосе́рдие ми́лости, Благоутро́бне Спа́се, пло́ти Твоея́ пресвяты́я дне́сь боже́ственную ри́зу гра́ду, чту́щему Тя́, и лю́дем христоимени́тым, сокро́вище пода́л еси́, я́ко тве́рдое всеору́жие, от нея́же почерпа́юще освяще́ние, сию́ ве́рою те́пле вси́ почита́ем.

Пе́снь 4.

Ирмос: Неизсле́дный Бо́жий сове́т, е́же от Де́вы, воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Припев: Слава Тебе, Боже наш, слава Тебе.

Яко многоце́нное сокро́вище стяжа́в, Христе́, чту́щий Тя́ гра́д Москва́ ри́зу Твою́, Влады́ко, ве́рою облобыза́ет и благода́ть прие́млет.

Припев: Слава Тебе, Боже наш, слава Тебе.

Ви́дите чу́дная, вси́ лю́дие, и духо́вно ны́не возвесели́теся, Христа́ пою́ще, дарова́вшаго на́м, я́ко многоце́нное бога́тство, боже́ственныя пло́ти Своея́ одея́ние.

Сла́ва Отцу́ и Сы́ну и Свято́му Ду́ху:

Боговиде́ния сла́вы дре́вле сено́вно, Твои́х за́дних сподо́бися ви́дети Моисе́й, просия́в. Мы́ же, но́вый Изра́иль, ны́не лице́м в лице́, Твою́ честну́ю ри́зу, Изба́вителя на́шего, ви́дим я́сно.

И ны́не и при́сно и во ве́ки веко́в. Ами́нь.

Богородичен: Раздра́ся рукописа́ние Ада́мово копие́м прободе́ну Ти́, Влады́ко, — Богоро́дица вопия́ше, у Креста́ предстоя́щи, Го́споди, и боле́зненно восклица́ющи.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Слава Тебе, Боже наш, слава Тебе.

Просвети́ся дне́сь правосла́вных со́нмище, ерети́ческий же по́лк да посрами́тся, покланя́емую ви́дя боже́ственную ри́зу Твою́, Влады́ко, пло́тию на́м я́вльшагося.

Припев: Слава Тебе, Боже наш, слава Тебе.

Ты́, Влады́ко, на́м, Твои́м рабо́м, дарова́л еси́ утвержде́ние, ри́зу боговочелове́чения Твоего́ Боже́ственное огражде́ние, и душа́м спасе́ние, и телесе́м исцеле́ние.

Сла́ва Отцу́ и Сы́ну и Свято́му Ду́ху:

Воспле́щем дне́сь рука́ми и воскли́кнем гла́сом хвале́ния Го́сподеви: се́ бо вои́стинну прии́де и яви́ся, вся́ озаря́я ве́рныя боже́ственныя ри́зы положе́нием.

И ны́не и при́сно и во ве́ки веко́в. Ами́нь.

Богородичен: Пло́тию, Его́же родила́ еси́, Сы́на, Богора́дованная, я́ко ви́де на дре́ве воздви́жена, пла́чем испо́лнися и долготерпе́нию Его́ дивля́шеся вои́стинну, те́мже велича́ше Его́ схожде́ние.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Слава Тебе, Боже наш, слава Тебе.

Ме́ртвым живо́т возсия́, слепы́м же све́т прише́ствова, немощны́м лю́те врачевство́ отве́рзеся, и все́м спасе́ние дне́сь прибли́жися.

Припев: Слава Тебе, Боже наш, слава Тебе.

Вода́м Тя́ животеку́щий исто́чник ве́мы, Влады́ко, и почита́ем боже́ственную ри́зу Твою́, от нея́же исцеле́ния всегда́, ве́рнии, почерпа́ем.

Сла́ва Отцу́ и Сы́ну и Свято́му Ду́ху:

Стра́нствует вся́к ра́зум, живоно́сныя пло́ти Твоея́ ви́дя боже́ственное одея́ние и просвеще́ние источа́ющее покланя́ющимся Тебе́.

И ны́не и при́сно и во ве́ки веко́в. Ами́нь.

Богородичен: Приста́нище бу́ди ми́, Всенепоро́чная, в пучи́не лю́тых пла́вающему, я́же бе́дствующую всю́ тва́рь Рождество́м Твои́м, Богороди́тельнице, спасла́ еси́.

Конда́к, гла́с 4:

Одея́ние нетле́ния, спаси́тельнаго целе́ния все́м челове́ком, Влады́ко, дарова́л еси́, Твое́ боже́ственное сокро́вище — честну́ю ри́зу, я́же е́сть хито́н, е́юже живоно́сную и святу́ю пло́ть вочелове́чения Твоего́ оде́яти благоволи́л еси́. Сию́ жела́нием прие́млюще, све́тло пра́зднуем, стра́хом же и любо́вию, я́ко Благода́телю воспева́юще, зове́м Ти́, Христе́: сохрани́ в ми́ре архиере́ев, и вся́ лю́ди, по вели́цей Твое́й ми́лости.

Икос:

О, пресла́внаго чудесе́! Каково́ Бо́жие дарова́ние Росси́йстей земли́ дарова́ся? Ри́за, е́юже безгре́шный Госпо́дь оде́емь, сию́ неблагода́рнии лю́дие от да́льных стра́н, я́ко да́р не́кий, в ца́рствующий гра́д Москву́ принесо́ша. Тогда́ у́бо ю́ благове́рный ца́рь Михаи́л со отце́м свои́м Филаре́том патриа́рхом, не я́ко зе́млен да́р, но я́ко небе́сную жи́знь, вели́ким жела́нием и со свиде́тельством духо́вным ра́достно прия́ша и боголе́пным поклоне́нием Влады́це Христу́ Бо́гу на́шему благода́рственная хвале́ния возда́ша, си́це глаго́люще: сла́ва Ти́, Го́споди, я́ко премно́гия ра́ди бла́гости Твоея́ Росси́йскую страну́ на́шу назира́еши; сла́ва Ти́, Влады́ко, я́ко благи́м сокро́вищем святы́ни Твоея́ держа́ву, ю́же да́л еси́ на́м, обогаща́еши; сла́ва Ти́, Святы́й, я́ко боготеле́сную Твою́ ри́зу на спасе́ние на́м дарова́л еси́, по вели́цей Твое́й ми́лости.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Слава Тебе, Боже наш, слава Тебе.

Вся́к гра́д ра́дуется, пра́зднуя ве́рно с но́вым Сио́ном, ца́рие и кня́зи, бога́тии и убо́зии, я́вльшуся дне́сь боже́ственному Твоему́, Христе́, одея́нию светода́тельными исцеле́нии.

Припев: Слава Тебе, Боже наш, слава Тебе.

Черто́г Бо́жий избра́нный, в честне́м се́м черто́зе ве́рою ри́зу Твою́, Влады́ко, положе́ну архиере́йскими освяще́нными рука́ми, ю́же почита́ем, я́ко благочести́вый покро́в.

Припев: Слава Тебе, Боже наш, слава Тебе.

Обновля́ется вся́к, приступа́яй ве́рою и святы́й облобыза́яй ковче́г, держа́щий Твою́, Влады́ко Христе́, светови́дную оде́жду.

Припев: Слава Тебе, Боже наш, слава Тебе.

Скве́рны вся́кия душе́вныя чисти́тельна е́сть Твоя́, Влады́ко Христе́, боже́ственная оде́жда, покрыва́ющая живоно́сное и пречи́стое те́ло Твое́.

Сла́ва Отцу́ и Сы́ну и Свято́му Ду́ху:

Свяще́нницы, в пра́вду облецы́теся вси́, и преподо́бнии, возра́дуйтеся све́тло: се́ бо дарова́ на́м све́т Христо́с, святы́я пло́ти Своея́ оде́жду, душа́м и телесе́м во спасе́ние.

И ны́не и при́сно и во ве́ки веко́в. Ами́нь.

Богородичен: Богороди́тельнице Де́во, Тебе́ чту́щий гра́д гла́да, и тру́са, и озлобле́ния вся́каго спаса́й, и язы́ческаго нахожде́ния, и сопроти́внаго вре́да.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Слава Тебе, Боже наш, слава Тебе.

Соверше́н Сы́й по существу́ Бо́г, и Челове́к ви́ден бы́сть соверше́н, спаса́я по обоему́ Своя́ вои́стинну сво́йства: я́ко Бо́г бо, богочелове́ческий о́браз уверя́я, и боже́ственныя пло́ти Своея́ ри́зу на́м, я́ко сте́ну и покро́в, дарова́л е́сть.

Припев: Слава Тебе, Боже наш, слава Тебе.

Вознеси́ ро́г, Бо́жий Сло́ве, испове́дающих Тя́, Бо́га и Челове́ка, и боже́ственней ри́зе Твое́й покланя́ющихся, е́юже исцеле́ние все́м ве́рным дарова́ся, и упраздни́ пога́нская шата́ния неве́дущих Твоея́ си́лы Боже́ственныя.

Сла́ва Отцу́ и Сы́ну и Свято́му Ду́ху:

Све́тится Твоя́ собо́рная и апо́стольская Це́рковь положе́нием ри́зы Твоея́: сла́вы бо све́т на́м дарова́л еси́, Христе́, боже́ственныя пло́ти Твоея́ одея́ние, е́юже на́с просвети́ во спасе́ние, мы́ же ве́рою и любо́вию сию́ почита́ем.

И ны́не и при́сно и во ве́ки веко́в. Ами́нь.

Богородичен: Ви́девши усну́вша на дре́ве Христа́, все́м бо́дрость подава́ющаго боже́ственную и спаси́тельную, Ма́ти Всенепоро́чная восклица́нием пла́каше и взыва́ше: что́ сие́ но́вое чу́до? Обновля́яй вся́ умира́ет хотя́.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Слава Тебе, Боже наш, слава Тебе.

Пое́м Бо́гу пе́снь благода́рную, изво́лившему бога́тство превели́кое на́м пода́ти, сте́ну необори́мую и небла́зненное утвержде́ние, боже́ственныя пло́ти Своея́ одея́ние, е́же чту́ще, ве́рнии, велича́ем.

Припев: Слава Тебе, Боже наш, слава Тебе.

О, па́че ума́ чуде́с Твои́х, Го́споди, я́же сотвори́л еси́ на́м, на Тя́ наде́ющимся! Якоже бо име́вый неизрече́нное рождество́, та́ко стра́нно все́м показа́л еси́ боже́ственныя пло́ти Твоея́ ри́зу, ко исцеле́нию и просвеще́нию чту́щим Тя́.

Сла́ва Отцу́ и Сы́ну и Свято́му Ду́ху:

Предложи́ся ны́не честна́я ра́ка, держа́щи боже́ственную ри́зу Изба́вителя на́шего Христа́, и, я́ко исто́чник све́та, зарю́ исцеле́ний испуща́ющи, и тму́ неду́гов отгоня́ющи, ю́же любо́вию целу́ем.

И ны́не и при́сно и во ве́ки веко́в. Ами́нь.

Богородичен: Просвети́, Чи́стая, любо́вию чту́щих и велича́ющих Тя́, и разруши́ стра́сти на́ша, Отрокови́це, и бу́рю укроти́, и лука́ваго собла́зны от среды́ отжени́, ага́рянская ча́да Ты́, Богоро́дице, покори́ моли́твами Твои́ми.

Свети́лен:

Се́рдца моего́ стру́пы, от мно́гих грехо́в прозя́бшия, ми́ исцели́, Спа́се, я́ко душа́м и телесе́м Вра́чь, и, подая́ прося́щим прегреше́ний проще́ние и неду́гов все́х исцеле́ние, от честны́я Твоея́ и боготеле́сныя ри́зы благода́ти сподо́би, я́ко Бла́г и Всеми́лостив.

Молитва на Положение честной ризы Господа нашего Иисуса Христа

Благодарим Тя, Владыко Человеколюбче, Царя веков и Подателя благих, разрушившаго вражды средостение и мир подавшаго роду человеческому. Даруй и нам, рабом Твоим, мир ризою Твоею честною, вкорени во всех страх Твой и друг ко другу любовь утверди, угаси всякую распрю, вся разногласия и соблазны. Яко Ты еси мир наш, и Тебе славу возсылаем со Отцем и Святым Духом, ныне, и присно, и во веки веков. Аминь.