22 июля

Канон преподобному Гавриилу Афонскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь преподобнаго, глас 6:

От суетнаго и многомятежного мира удалився, / к немерцающему свету горы Афонския притекл еси, / чистотою и говением, / молитвами и трудом прославил еси Бога. / Храмы православныя во славу Трисвятаго имене Его воздвигл еси, / преблаженне Гаврииле, / мы же святых мощей твоих обретение празднующе, / с верою и любовию взываем: / моли Христа Бога, / да сотворит нас победители греха и храмы Духа Святаго.

Канон преподобнаго, глас 8.

Песнь 1

Ирмос: Посеченный несекомаго пресече, и виде солнце землю, юже не виде; лютаго врага вода потопи, и непроходимое пройде Израиль. Песнь же воспевашеся: Господеви поим, славно бо прославися.

Припев: Преподо́бне о́тче Гаврииле, моли́ Бо́га о нас.

Поем Господеви, прославляемому во святых и даровавшему нам таковаго молитвенника и теплого предстателя, посетившаго милостию люди своя, яже стяжал еси, славно бо прославися.

Припев: Преподо́бне о́тче Гаврииле, моли́ Бо́га о нас.

Помощника и Покровителя в житии своем Господа избрал еси, отче преблаженне Гаврииле, и всем сердцем к Нему Единому усердно прилепился еси; подвиги и труды своими стерл еси страстей супостаты, вопия Богу своему: славно бо прославися.

Сла́ва Отцу́ и Сы́ну и Свято́му Ду́ху:

Господу работати вожделев, во обитель святую вселился еси, отче Гаврииле, и бысть ти во спасение. Прошедшу же тебе жития сего море, введе тя Господь в небесное жилище, еже уготова любящим Его, идеже ты ныне Триипостасному Божеству поеши: славно бо прославися.

И ны́не и при́сно и во ве́ки веко́в. Ами́нь.

Богородичен: Прелестию праматернею человекоубийца вверже ны в море лютых бед и страстей; Тобою же, Дево Чистая, избавленни от работы чуждаго, Спасителю и Богу нашему поем: славно бо прославися.

Песнь 3

Ирмос: Утвердися сердце мое во Господе, вознесеся рог мой в Бозе моем, разширишася на враги моя уста моя, возвеселихся о спасении Твоем.

Припев: Преподо́бне о́тче Гаврииле, моли́ Бо́га о нас.

Сердцем своим чистым узрел еси Бога, отче богоносне Гаврииле, и творил еси суд и правду посреде земли, поя Ему выну: Свят еси, Господи.

Припев: Преподо́бне о́тче Гаврииле, моли́ Бо́га о нас.

Молитвою и богомыслием ум и сердце твое в Горняя вперивый, отче Гаврииле, и, еще на земли суща, купно с тезоименным Небесным благовестником воспевал еси благодарственне Христу Богу: Свят еси, Господи.

Сла́ва Отцу́ и Сы́ну и Свято́му Ду́ху:

Утвердися сердце твое во Господе, и любы твоя излияся преизобильно на люди тебе врученныя, упасл еси я жезлом кротости и правды, и явился еси домочадец усердный Владыки своего, на всяко время благоговейно взывая: Свят еси, Господи.

И ны́не и при́сно и во ве́ки веко́в. Ами́нь.

Богородичен: Преестественно заченши, Богоотроковице, Владыку и Творца Своего, прозревая страшное сие и спасительное таинство, из глубины сердечней воспевала еси кротце Христу Богу Твоему: Свят еси, Господи.

Седален, глас 2:

Земли Русския благое прозябение, / горы Афонския доброе произрастание, / Церкви Православныя цвете благоуханный, / Небесного вертограда маслина доброплодная, / Гаврииле отче священнейший, / величаем тя, молитвенника о душах наших.

Слава, и ныне, Богородичен:

Афонския горы Игумение Всечестная, / Пречистая Дево Богородице, / помяни удел Твой и люди Твоя, / щедроты и милости нам велия даруя.

Песнь 4

Ирмос: Пророк Аввакум умныма очима провиде, Господи, пришествия Твоя, тем и вопияше: от юга прииде Бог, слава силе Твоей, слава снизхождению Твоему.

Припев: Преподо́бне о́тче Гаврииле, моли́ Бо́га о нас.

Немощи человеческия презрев, отче люботрудне Гаврииле, неленостно Христу поработал еси, выну со пророком взывая: Господь Бог мой сила моя и учинит нози мои на совершение; слава силе Твоей, Господи.

Припев: Преподо́бне о́тче Гаврииле, моли́ Бо́га о нас.

Украситель обителей Божиих и храмоздатель всеусердный явился еси, отче Гаврииле, присно радуяся и веселяся о Бозе Спасе твоем, взывая Ему: слава силе Твоей, Господи.

Сла́ва Отцу́ и Сы́ну и Свято́му Ду́ху:

Услышал еси слух Господень, преподобне Гаврииле, и последовал еси Христу, труды и песньми непрестанно славяще Его: Боже, разумех дела Твоя, слава силе Твоей, Господи.

И ны́не и при́сно и во ве́ки веко́в. Ами́нь.

Богородичен: От Бога Отца безлетно рождаяся, Превечное Слово, от Девы Чистыя воплощение приял еси, Боже, и изшел еси на спасение людей Твоих, спасти помазанныя Твоя пришел еси; слава силе Твоей, Господи.

Пе́снь 5

Ирмос: Мрак души моея разжени, Светодавче Христе Боже, началородную тьму изгнав бездны, и даруй ми свет повелений Твоих, Слове, да, утренюя, славлю Тя.

Припев: Преподо́бне о́тче Гаврииле, моли́ Бо́га о нас.

Беды и козни бесовския кротко претерпевающе и пламя злобы и клеветы человеческия росою миролюбия твоего угашающе, вопиял еси: Господи Боже наш, мир Твой подаждь нам.

Припев: Преподо́бне о́тче Гаврииле, моли́ Бо́га о нас.

Огнь молитвы твоея супостаты мысленныя попали, отче блаженне, и сладчайшее имя Божие именующе, во глубине сердца твоего непрестанно взывал еси: Господи Боже наш, мир Твой подаждь нам.

Сла́ва Отцу́ и Сы́ну и Свято́му Ду́ху:

О братии и пастве твоей всегда рачение имеюще и о Отечестве твоем присно моляся, среди нощи афонстей духом утреннююще, взывал еси: Господи Боже наш, мир твой подаждь нам.

И ны́не и при́сно и во ве́ки веко́в. Ами́нь.

Богородичен: Вратом затворенным преестественно прошел еси, Владыко, нерушив Девства Твоея Пречистыя Матери, Юже даровал еси роду нашему Предстательницу и Помощницу, воплотивыйся нас ради, Господи Боже наш, молитвами Ея мир Твой подаждь нам.

Песнь 6

Ирмос: Иону в ките, Господи, единаго вселил еси, мене же, связаннаго мрежими вражиими, яко от тли онаго, спаси.

Припев: Преподо́бне о́тче Гаврииле, моли́ Бо́га о нас.

Похоть плоти и очес, таже гордость житейскую отринувше, отче добропобедне Гаврииле, мертв был еси миру сему и сораспялся еси Возлюбленному, изводящему от тли Живодавцу.

Припев: Преподо́бне о́тче Гаврииле, моли́ Бо́га о нас.

Праздность духа и плоти отвергнувши, отче преподобне, смиренномудрием сокрушил еси презорливаго прелестника, победную песнь поюще изводящему от тли Живодавцу.

Сла́ва Отцу́ и Сы́ну и Свято́му Ду́ху:

Возлюбил еси благолепие церковное, блаженне, и о славе Божией ревнующе, показался еси храмоздатель радетельный, призывающе всех ко славословию изводящаго от тли Живодавца.

И ны́не и при́сно и во ве́ки веко́в. Ами́нь.

Богородичен: В скорбех, находящих на ны, вопием к Тебе, Богоблагодатная Владычице, услыши нас, под Кров Твой честный прибегающих и поклоняющихся спасшему нас от смерти и изводящему от тли Живодавцу.

Кондак, глас 1:

Стяжал еси дух мирен в житии твоем, / пожил еси желанием Божественным и любовию Господа твоего, / Гаврииле преблаженне, / от Него же венец приял еси, / и Христу со ангелы предстоя, / моли спастися нам.

Икос:

Возрадовастася сердце твое и плоть твоя о Бозе Живе, преблаженне отче Гаврииле, егда предображение сладости пребывания во дворех Отца Небеснаго в пещерах Киевских ощутил еси; вселением же в гору афонскую, восхождение в горняя в сердце своем положи, и, Духом водим, возрастал еси от силы в силу, и явился еси в ризах светлых пред Господем в превыспреннем Сионе, идеже ныне Ему с лики святых предстоиши, моляще спастися нам.

Песнь 7

Ирмос: На поле Деире иногда мучитель пещь постави на мучение Богоносных, в ней же три отроки песнословяху Единого Бога, троично воспеваху, глаголющи: отцев Боже, благословен еси.

Припев: Преподо́бне о́тче Гаврииле, моли́ Бо́га о нас.

Хваление приносим ти, отче приснопамятне, прославляюще добродетели и подвиги твоя, яже совершил еси силою Христовою, поюще Ему благодарне: благословен еси, Господи Боже отец наших, препетый и превозносимый во веки.

Припев: Преподо́бне о́тче Гаврииле, моли́ Бо́га о нас.

В горе афонстей виталище себе обрел еси, отче всехвальне Гаврииле, и о Отечестве своем пестунствуя, землю Российскую храмы и святынями вельми украсил еси, воспевающе благодеющему Богу: благословен еси в храме святыя славы Твоея, препетый и превозносимый во веки.

Сла́ва Отцу́ и Сы́ну и Свято́му Ду́ху:

Алтаря Господня служителю благоговейный, отче богочестне Гаврииле, Троицу Святую духом, яко ангел выну созерцающе, вопиял еси: благословен еси на Престоле славы Царствия Твоего, препетый и превозносимый во веки.

И ны́не и при́сно и во ве́ки веко́в. Ами́нь.

Богородичен: Ложесна Твоя, Богородице Владычице, прияша Егоже небо всуе вместити тщашеся. Мы же земнороднии низхождению Божию радующеся, взываем ликующе: благословен еси на тверди небесней, препетый и превозносимый во веки.

Песнь 8

Ирмос: Покрывая водами превыспренняя Своя, полагаяй морю предел песок и содержай вся, Тя поет солнце, Тя славит луна, Тебе приносит песнь вся тварь, яко Содетелю всех во веки.

Припев: Преподо́бне о́тче Гаврииле, моли́ Бо́га о нас.

Евангелие доброгласно проповедавый, тезоименному благовестнику уподобился еси, отче богомудре; мы же, просвещенни светом исправлений твоих, видяще добрыя и славныя подвиги твоя, прославляем Отца Небеснаго, глаголюще: Господа пойте дела и превозносите во вся веки.

Припев: Преподо́бне о́тче Гаврииле, моли́ Бо́га о нас.

Неописанному Творцу всяческих и Спасителю Богу нашему купно с премирными лики благодарственно воспевал еси: Господа пойте дела и превозносите во вся веки.

Сла́ва Отцу́ и Сы́ну и Свято́му Ду́ху:

Изнесл еси из сокровища сердца твоего добрая и соделался еси Троицы честное жилище, богоносне отче Гаврииле, ныне же со ангелы на Небеси ликующе, подвизаеши ны пети: Господа пойте дела и превозносите во вся веки.

И ны́не и при́сно и во ве́ки веко́в. Ами́нь.

Богородичен: Единородному Слову Безлетнаго Отца, вочеловечшемуся от Девы и воскресение даровавшему роду человеческому, славословие приносим: Господа пойте дела и превозносите во вся веки.

Песнь 9

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в них же посети нас Восток с высоты и направил ны есть на путь мира.

Припев: Преподо́бне о́тче Гаврииле, моли́ Бо́га о нас.

Илии огнеколесничнику уподобляяся, ревнуя поревновал еси по Господе Бозе Вседержителе, обители афонския расширивши и благочестие умноживши, стяжал еси нетленный славы венец и ублажаешися ныне с лики святых.

Припев: Преподо́бне о́тче Гаврииле, моли́ Бо́га о нас.

Любоблагоутробне авво Гаврииле, призре Господь на смирение и простоту сердца твоего и сотвори тебе величие в Церкви Своей Святей, сего ради ублажаешися ныне с лики святых.

Сла́ва Отцу́ и Сы́ну и Свято́му Ду́ху:

Иноком наставника, игуменом добропопечительное правило, священства Христова велелепное украшение, воспеваем тя, отче треблаженне, и ублажаем ныне с лики святых.

И ны́не и при́сно и во ве́ки веко́в. Ами́нь.

Богородичен: Истощивый Себе нас ради, Спасе наш Господи, благословен еси, яко посети и сотвори избавление людем Твоим, и Матерь Твою, Деву Чистую, даровал еси роду нашему неусыпную Молитвенницу, Юже присно боголепно ублажаем с лики святых.

Светилен:

Отче богопросвещенне Гаврииле, Трисиятельнаго Божества жилище, память твою светоносную совершающих, помяни у Престола Светодавца Господа, да просветит нас повелении Своими.

Слава, и ныне, Богородичен:

Заре нетварнаго присносущаго Солнца, Пречистая Богородице Дево, молися из Тебе Воплощенному, да просветит нас повелении Своими.

Молитва

О, преподобне и богоносне отче наш Гаврииле, угодниче Христов, теплый о нас молитвенниче и скорый помощниче! Се ныне мы, грешнии и недостойнии, с благоговением притекающе к раце мощей твоих, усердно молим тя: яко имеяй дерзновение ко Христу Богу, потщися богоприятным твоим ходатайством испросити у Господа сил, яко да пробавит великия и богатыя милости Своя на нас грешных, да подаст нам дух правыя веры, дух ведения и любве, дух мира и радости о Дусе Святе. Моли, отче священне, милосерднаго Бога, да возсияет свет благодати Его сущим во тьме лжеверия, и да познают Христа, Бога истиннаго, да возсияет свет сей блуждающим на распутиях раскола, да вразумятся и приидут во ограду Православныя Церкве, в нейже единой несомненно содевается вечное спасение верных. Помози нам, угодниче Божий, да призовет Господь народ наш к великому покаянию и плачу о гресех Отечества нашего, да не погибнем со беззаконии нашими, да утолит шатания и раздоры в земли нашей, оградит нас от гнева, убийства, вражды и злобы, да паки возлюбим друг друга и едино пребудем в Господе и Спасителе нашем, Емуже подобает всякая слава, честь и поклонение, со Безначальным Его Отцем, и Пресвятым и Благим и Животворящим Его Духом, ныне и присно и во веки веков. Аминь.