21 июля.

Канон праведному Прокопию Устьянскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Боже́ственною благода́тию просвети́вся,/ и по сме́рти да́руеши исцеле́ния/ притека́ющим к тебе́, прему́дре Проко́пие,/ те́мже и мы ны́не чтим честны́х моще́й твои́х явле́ние,/ веселя́щее вку́пе ду́ши и телеса́./ Тем вси вопие́м:/ сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.

Канон свята́го, гла́с 5.

Пе́снь 1.

Ирмос: Спаси́телю Бо́гу,/ в мо́ри лю́ди немо́крыми нога́ми ната́вльшему/ и фарао́на со всево́инством пото́пльшему,/ Тому́ Еди́ному пои́м, я́ко просла́вися.

Припе́в: Святы́й пра́ведный Проко́пие, моли́ Бо́га о нас.

А́гнче Бо́жий, Сло́ве, даждь ми сло́во, недосто́йному Твоему́ рабу́,/ да возмогу́ воспе́ти в па́мять явле́ния моще́й блаже́ннаго Проко́пия торжество́, взыва́я:/ Тому́ Еди́ному воспои́м, я́ко просла́вися.

Припе́в: Святы́й пра́ведный Проко́пие, моли́ Бо́га о нас.

Безве́стная и та́йная после́днему ро́ду явле́на бы́ша, честны́я мо́щи твоя́, прему́дре Проко́пие,/ к ни́мже прикаса́ющеся, освяще́ние прие́млем, Го́сподеви пою́ще:/ Того́ Еди́наго воспои́м, я́ко просла́вися.

Сла́ва Отцу́ и Сы́ну и Свято́му Ду́ху:

Всесве́тлая твоя́ па́мять возсия́ ми́рови, я́ко со́лнце,/ просвеща́ющи ду́ши благоче́стно пою́щих тя,/ в не́йже моли́ся, блаже́нне,/ пода́ти очище́ние грехо́в Го́сподеви зову́щим:/ Того́ Еди́наго воспои́м, я́ко просла́вися.

И ны́не и при́сно и во ве́ки веко́в. Ами́нь.

Богородичен: Богороди́тельнице Чи́стая, Небе́сный вхо́де,/ горо́ несеко́мая, две́ре непроходи́мая,/ апо́столом сла́во, му́чеником весе́лие,/ преподо́бным красото́,/ приими́ моле́ние на́ше, е́же Ти прино́сим/ в па́мять блаже́ннаго Проко́пия, Го́сподеви пою́ще:/ Того́ Еди́наго воспои́м, я́ко просла́вися.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м/ и пове́сивый неодержи́мо тяготе́ющую/ на недви́жимем, Христе́, ка́мени за́поведей Твои́х,/ Це́рковь Твою́ утверди́, Еди́не Бла́же и Человеколю́бче.

Припе́в: Святы́й пра́ведный Проко́пие, моли́ Бо́га о нас.

День пра́зднственный днесь пра́зднуют наро́ди,/ обрето́ша бо мо́щи блаже́ннаго Проко́пия, я́ко не́кое сокро́вище бога́тно,/ непреста́нно Христу́ зову́ще:/ Це́рковь Твою́ утверди́, Еди́не Бла́же и Человеколю́бче.

Припе́в: Святы́й пра́ведный Проко́пие, моли́ Бо́га о нас.

Естество́ тле́нное ни во что́же вмени́в,/ житие́ чи́стое на земли́ пожи́л еси́/ и сего́ ра́ди насле́довал еси́ Небе́сное селе́ние./ Моли́ и нам получи́ти та́мошнее блаже́нство, пра́зднующим твое́ явле́ние,/ да непреста́нно Христу́ зове́м:/ Це́рковь Твою́ утверди́, Еди́не Бла́же и Человеколю́бче.

Сла́ва Отцу́ и Сы́ну и Свято́му Ду́ху:

Житие́ твое́, я́ко со́лнце, в сердца́ ве́рных возсия́, зарю́ чуде́с испуща́юще,/ те́мже и нас невече́рним Све́том озари́, всечестно́е твое́ явле́ние почита́ющих,/ да непреста́нно Христу́ зове́м:/ Це́рковь Твою́ утверди́, Еди́не Бла́же и Человеколю́бче.

И ны́не и при́сно и во ве́ки веко́в. Ами́нь.

Богородичен: Зело́ лю́те погружа́емую ду́шу мою́ в пучи́не жите́йских страсте́й/ и бу́рею одержи́мую безме́рных согреше́ний,/ спасе́ния ми простри́ ру́ку, Пречи́стая, и изведи́ из глубины́ зол мои́х,/ да, ра́дуяся, сла́влю Тя, Всенепоро́чную.

Седа́лен, гла́с 5.

Пресве́тлая и светоно́сная, о́тче Богому́дре Проко́пие,/ приспе́ твоя́ па́мять, созыва́ющи ве́рных мно́жество/ просла́вити и пе́ти твое́ честно́е явле́ние,/ про́сим от Христа́ прия́ти ве́лию ми́лость.

Сла́ва, и ны́не, Богородичен:

Яви́лася еси́ вы́шши Небе́сных сил,/ Влады́ку и Го́спода ро́ждши, Богоро́дице:/ зе́мных естество́ возвела́ еси́, Богоневе́стная./ Те́мже Тя вои́стинну, Богороди́тельнице,/ се́рдцем и душе́ю, ве́рнии, сла́вим.

Пе́снь 4.

Ирмос: Дела́ смотре́ния Твоего́, Го́споди,/ ужаси́ша проро́ка Авваку́ма,/ изше́л бо еси́ на спасе́ние люде́й Твои́х,/ спасти́ пома́занныя Твоя́ прише́л еси.

Припе́в: Святы́й пра́ведный Проко́пие, моли́ Бо́га о нас.

Соедини́вся стези́ пра́вды,/ в Богоспаса́емый Боже́ственный град вшел еси́, Богоно́се преблаже́нне Проко́пие,/ спаси́тельным сия́нием обогати́вся.

Припе́в: Святы́й пра́ведный Проко́пие, моли́ Бо́га о нас.

Е́динообра́зный, преподо́бне Проко́пие, смысл богоно́сный ви́дев,/ Боже́ственными повестьми́ и Боже́ственною оде́ждею оде́ялся еси́.

Сла́ва Отцу́ и Сы́ну и Свято́му Ду́ху:

Се́рдце твое́ скрижа́ль очище́ну Свята́го Ду́ха благода́ть обре́тши, о́тче Проко́пие,/ написа́ соверше́нно безстра́стие, ве́ру и любо́вь нелицеме́рну.

И ны́не и при́сно и во ве́ки веко́в. Ами́нь.

Богородичен: Седа́й на престо́ле превознесе́нне херуви́мстем,/ я́ко престо́л Тя име́я, Мари́е Богоневе́сто,/ на руку́ Твое́ю почи́ препросла́вленный Бог наш.

Пе́снь 5

Ирмос: Окая́нную ду́шу мою́, нощеборю́щуюся со тьмо́ю страсте́й,/ предвари́в, уще́дри/ и возсия́й мы́сленное со́лнце днесве́тлыя звезды́ во мне,/ во е́же раздели́ти нощь от све́та.

Припе́в: Святы́й пра́ведный Проко́пие, моли́ Бо́га о нас.

Любо́вию чту́ще твое́ явле́ние, приле́жно тя мо́лим, прему́дре Проко́пие,/ не преста́й моля́ся Христу́ Бо́гу,/ да прии́мем грехо́в просты́ню/ и да озари́т нас в нощи́ свет.

Припе́в: Святы́й пра́ведный Проко́пие, моли́ Бо́га о нас.

Мно́жество наро́да, соше́дшеся днесь в твое́ явле́ние, блаже́нне Проко́пие,/ и прикаса́ющеся честны́м моще́м твои́м,/ от них исцеле́ния почерпа́ем, непреста́нно зову́ще:/ да озари́т нас в нощи́ свет.

Сла́ва Отцу́ и Сы́ну и Свято́му Ду́ху:

Не то́кмо в житии́ сый, но и по сме́рти/ мно́га чудеса́ от честны́я ти ра́ки содева́ются прихода́щим с ве́рою, всеблаже́нне Проко́пие,/ неду́ги прогоня́еши и от бед избавля́еши си́лою Христо́вою./ К Нему́же непреста́нно зове́м:/ да озари́т нас в нощи́ свет.

И ны́не и при́сно и во ве́ки веко́в. Ами́нь.

Богородичен: Он, вселука́вый, по вся дни к го́ршим влече́т мя,/ и в ров поги́бели влага́ет, и во отча́яние мя влече́т;/ но того́ мя ловле́ния, Чи́стая, исхити́,/ и твори́ти во́лю Боже́ственную Сы́на Твоего́ и Бо́га на́шего наста́ви,/ и в час стра́шнаго прише́ствия Его́ изба́ви мя вся́каго осужде́ния.

Пе́снь 6.

Ирмос: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.

Припе́в: Святы́й пра́ведный Проко́пие, моли́ Бо́га о нас.

Прииди́те, собери́теся, христоимени́тии лю́дие,/ све́тло пра́зднуем явле́ние моще́й блаже́ннаго Проко́пия,/ мо́лится бо Ко Влады́це и Бо́гу на́шему,/ да изба́вит нас от вся́каго озлобле́ния,/ к Нему́же, воспева́юще, глаго́лем:/ спасе́ нас десни́ца Твоя́, Го́споди.

Припе́в: Святы́й пра́ведный Проко́пие, моли́ Бо́га о нас.

Ра́ка моще́й твои́х, прему́дре Проко́пие, дража́йши сапфи́ра показа́ся,/ чудотвори́ва бо бе, исцеле́ния источа́ющи./ Тя ублажа́юще, ве́рнии, ра́достно от души́ Христу́ зове́м:/ спасе́ нас десни́ца Твоя́, Го́споди.

Сла́ва Отцу́ и Сы́ну и Свято́му Ду́ху:

Све́тлыми сия́нии обрето́шася честны́я твоя́ мо́щи, Проко́пие пречу́дне,/ ны́не, а́ки заря́ пресве́тлая, просвеща́ют и освеща́ют чту́щих тя ве́рно/ и ра́достно от души́ Христу́ зову́щих:/ спасе́ нас десни́ца Твоя́, Го́споди.

И ны́не и при́сно и во ве́ки веко́в. Ами́нь.

Богородичен: Тебе́, Чи́стую Де́ву Нескве́рную,/ еди́ну и́мам сте́ну непреобори́му,/ прибе́жище, и покро́в кре́пок, и ору́жие спасе́ния,/ да мя не пре́зриши, окая́ннаго,/ наде́ждо ненаде́жным, скорбя́щим ра́досте и заступле́ние.

Конда́к, гла́с 8.

Ве́рою и любо́вию/ твое́ честно́е явле́ние пра́зднующих, блаже́нне,/ сохрани́ и соблюди́ от вся́кия зло́бы и собла́зна змии́на,/ и́маши бо дерзнове́ние ко Влады́ке все́х, Христу́ Бо́гу./ Его́же моли́ спасти́ правосла́вныя лю́ди,/ моля́щия тя, да вси вопие́м ти:/ ра́дуйся, о́тче Проко́пие,/ всея́ Росси́йския земли́ удобре́ние.

Икос:

А́нгел на земли́ житие́м показа́вся,/ А́нгелы удиви́л еси́, бе́сы же устраши́л еси́/ и челове́ки просвети́л еси́ заря́ми чуде́с твои́х, Богоно́се и преблаже́нне о́тче наш Проко́пие./ И ны́не нас вразуми́ воспева́ти песнь к твоему́ хвале́нию,/ ра́достным гла́сом си́це глаго́лющих:/ ра́дуйся, оста́вивый тле́нное мудрова́ние и прие́мый нетле́нный вене́ц;/ ра́дуйся, терпели́вый душе́ю, и́же злоко́зненнаго врага́ под нога́ма стерл еси́;/ ра́дуйся, ни́жнее мудрова́ние оста́вль и Вы́шняго Ца́рствия дости́г;/ ра́дуйся, цели́телю боле́зней и отгони́телю страсте́й;/ ра́дуйся, о́тче Проко́пие, всея́ Росси́йския земли́ удобре́ние.

Пе́снь 7.

Ирмос: Огня́ гаси́лище– отроко́в моли́твы,/ ороша́ющая пещь, пропове́дница чудесе́,/ не опаля́ющи, ниже́ сожига́ющи/ песносло́вцы Бо́га оте́ц на́ших.

Припе́в: Святы́й пра́ведный Проко́пие, моли́ Бо́га о нас.

Уста́ви ны́нешнюю бу́рю, обдержа́щую нас, блаже́нне,/ и укроти́ моли́твами твои́ми,/ и ва́рварское нахожде́ние низложи́,/ и нас, раб твои́х, на супоста́ты укрепи́, да, ра́дующеся, пое́м:/ Бо́же, благослове́н еси́.

Припе́в: Святы́й пра́ведный Проко́пие, моли́ Бо́га о нас.

Фарисе́йски не лицеме́руем, но, со смире́нием и ра́достию прикаса́ющеся к честне́й ра́це твое́й, прему́дре Проко́пие,/ про́сим проще́ния грехо́в, Христу́ от души́ вопию́ще:/ Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Храни́тель бу́ди вели́кия Росси́и христолюби́вому наро́ду на́шему, Богому́дре Проко́пие,/ сохраня́яй от пога́ных наше́ствия и междоусо́бныя бра́ни, гла́да же и па́губы,/ да, моли́твами твои́ми изба́вльшеся, ра́достно от души́ Христу́ зове́м:/ Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Отча́явшимся еси́ ве́лие прибе́жище,/ обурева́емым ти́хое приста́нище еси́, Богоро́дице./ Те́мже и мы, припа́дающии, да не постыди́мся, Ма́ти Истиннаго Живота́, Тебе́ благодаря́ще и пою́ще:/ благослове́нна Ты в жена́х, Всенепоро́чная Влады́чице.

Пе́снь 8.

Ирмос: Ороси́вшаго пещь и о́троки Сохра́ншаго посреде́ горя́щаго пла́мене,/ о́троцы, славосло́вите,/ свяще́нницы, благослови́те,/ лю́дие, превозноси́те во вся ве́ки.

Припе́в: Святы́й пра́ведный Проко́пие, моли́ Бо́га о нас.

Моли́твенника тя те́пла стяжа́вше и ско́раго помо́щника,/ и я́ко сте́ну тве́рду, и забра́ло недви́жимо и необурева́емо,/ не забу́ди моли́твенник твои́х, избавля́й нас от вся́кия ну́жды и печа́ли,/ да, ра́дующеся, Христу́ зове́м:/ лю́дие, превозноси́те Его́ во ве́ки.

Припе́в: Святы́й пра́ведный Проко́пие, моли́ Бо́га о нас.

Чуде́с исто́чник ра́ка твоя́ яви́ся, Проко́пие преблаже́нне,/ от нея́же оби́льно вси притека́ющии прие́млют телесе́м здра́вие и душа́м спасе́ние твои́ми моли́твами,/ да, ра́дующеся, Христу́ зове́м:/ лю́дие, превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Ше́ствие твое́ до́бре сконча́л еси́, и мирски́й мяте́ж, а́ки безбу́рное приста́нище, преплыл еси́,/ и а́нгельски на земли́ пожи́л еси́, плоть твою́ ду́хови повину́л еси́./ И ны́не на Небесе́х предстоя́ всех Царю́ Христу́,/ помина́й чту́щих твое́ явле́ние, Ему́же зове́м:/ лю́дие, превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Ще́драго и Человеколюби́ваго Спа́са ро́ждши, Чи́стая,/ Того́ моли́ уще́дрити раба́ Твоего́, и к покая́ния пути́ наста́ви,/ лука́ваго собла́зны от се́рдца моего́ отжени́, и того́ изба́ви ловле́ния,/ и огня́ ве́чнаго исхити́,/ я́ко да непреста́нно пою́ Тя, Чи́стую, во ве́ки.

Песнь 9

Ирмос: Иса́ие, лику́й,/ Де́ва име́ во чре́ве и роди́ Сы́на Емману́ила,/ Бо́га же и Челове́ка, Восто́к и́мя Ему́,/ Его́же велича́юще, Де́ву ублажа́ем.

Припе́в: Святы́й пра́ведный Проко́пие, моли́ Бо́га о нас.

Исто́чник исцеле́ния испуща́ющи, врачева́ние же безме́здно,/ ковче́г свяще́ния твои́х моще́й ра́ка яви́ся,/ от нея́же почерпа́ем здра́вие присноживо́тное, притека́ющии ве́рно, блаже́нне Проко́пие,/ и тебе́ Дарова́вшаго в пе́снех велича́ем.

Припе́в: Святы́й пра́ведный Проко́пие, моли́ Бо́га о нас.

Возвели́чил еси́ на земли́ твоего́ Влады́ку,/ тем и в твое́ явле́ние глубину́ чуде́с показа́ и струю́ неоскудева́ему, ра́ку моще́й твои́х, Проко́пие прему́дре,/ слепы́м е́же ви́дети дарова́ся, прокаже́нным очище́ние,/ и одержи́мыя нечи́стыми ду́хи целому́дренны твори́ши./ Те́мже тя велича́ем.

Сла́ва Отцу́ и Сы́ну и Свято́му Ду́ху:

Недосто́йною мое́ю руко́ю принесо́х ти таково́е сло́ва изви́тие, Богому́дре Проко́пие,/ не пре́зри, но приими́ сие́ с любо́вию и моли́ за мя Творца́ твоего́, Влады́ку и Го́спода/ та́мошняго мя изба́вити муче́ния и ми́лость обрести́ в день стра́шнаго испыта́ния.

И ны́не и при́сно и во ве́ки веко́в. Ами́нь.

Богородичен: Влады́чице ми́ра, Богоро́дице,/ во глубине́ зол поги́бели мене́ погруже́ннаго злоу́мно сластьми́ плотски́ми/ и пристра́стием вещьми́ жития́,/ изведи́, Пресвята́я Де́во, Твои́м милосе́рдием,/ и́бо не и́мам наде́жды,/ весь бо есмь, Чи́стая, во отча́янии, да Тя непреста́нно велича́ю.

Молитва

О, святы́й уго́дниче Бо́жий пра́ведне Проко́пие, по́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал еси́ Госпо́дь всем лю́бящим Его́; те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.