20 июля.

Канон преподобному Фоме, иже в Малеи.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Кано́н преподо́бного Фомы́, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподо́бне о́тче Фомо́, моли́ Бо́га о нас.

Просвеще́ние Боже́ственныя благода́ти, сла́вне, в души́ прии́м, я́ко други́й Еги́пет, страсте́й мглу́ оста́вил еси́ и житие́ прия́л еси́ небе́сное.

Припев: Преподо́бне о́тче Фомо́, моли́ Бо́га о нас.

Све́тел, о́тче, в житии́ бы́в, на иноплеме́нники воздви́гл еси́ неисче́тны побе́ды и, мона́шествовав преподо́бно, полки́ де́монов победи́л еси́.

Сла́ва Отцу́ и Сы́ну и Свято́му Ду́ху:

Воздержа́тельно врагу́ спле́тся, посо́бием, преподо́бне, Боже́ственнаго Ду́ха смири́л еси́ сего́ и побе́ды с небесе́ вене́ц прия́л еси́.

И ны́не и при́сно и во ве́ки веко́в. Ами́нь.

Богородичен: Еди́на Бо́га, все́х су́щаго невмести́ма, Тебе́ вме́стна бы́вша за бла́гость, породила́ еси́, Отрокови́це, Его́же моли́ спасти́ пою́щия Тя́.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Преподо́бне о́тче Фомо́, моли́ Бо́га о нас.

Твои́ми прекло́нься Бо́г мольба́ми, руко́ю тя́ проро́ка у́з изба́ви и ше́ствовати благоизво́ли к боле́зненному труду́ воздержа́ния.

Припев: Преподо́бне о́тче Фомо́, моли́ Бо́га о нас.

Жития́ го́рькое оста́вив треволне́ние, ко приста́нищу приступи́л еси́ воздержа́ния и тишине́ боже́ственней, о́тче Фомо́, испо́лнився Ду́ха благода́тию.

Сла́ва Отцу́ и Сы́ну и Свято́му Ду́ху:

Столпо́м Изра́иля иногда́ пусты́ню, всеблаже́нне, проходи́ти наста́вивый, столпо́м тя́ о́гненным наставля́ше, прови́дяй души́ твоея́ благоро́дие.

И ны́не и при́сно и во ве́ки веко́в. Ами́нь.

Богородичен: Злату́ю я́ко и́стинно кади́льницу, и ста́мну ма́нны, и Боже́ственную го́ру, и пала́ту красну́ Бо́жию Тя́, Де́во, имену́ем.

Седа́лен, гла́с 4.

Яви́лся еси́, преподо́бне, благоугоди́в боже́ственными дея́нии, и житие́м чи́стым насле́дия сподо́бился еси́ безпло́тных, моли́ спасти́ся на́м.

Пе́снь 4.

Ирмос: Услы́шах, Го́споди, слу́х Твоего́ смотре́ния, и просла́вих Тя́, Еди́не Человеколю́бче.

Припев: Преподо́бне о́тче Фомо́, моли́ Бо́га о нас.

Воздержа́ния поже́гл еси́ огне́м боже́ственным те́рние грехо́вное и чуде́с заре́ю, о́тче, облиста́л еси́.

Припев: Преподо́бне о́тче Фомо́, моли́ Бо́га о нас.

Души́ твоея́ о́чи от страстны́я ти́ны очи́стив, незря́щия зе́ницы, о́тче, отве́рзл еси́.

Сла́ва Отцу́ и Сы́ну и Свято́му Ду́ху:

Са́м отчужди́лся еси́ мирски́х мяте́жей, богоно́се, и преми́рную тишину́ получи́л еси́.

И ны́не и при́сно и во ве́ки веко́в. Ами́нь.

Богородичен: Неискусобра́чная Влады́чице, Яже Бо́га без се́мене заче́ншая, напа́стей и печа́лей все́х изба́ви.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподо́бне о́тче Фомо́, моли́ Бо́га о нас.

Руководя́щаго тя́ к пусты́ням благоче́стно име́л еси́ Илию́, о́тче, Фесви́тянина, явля́ющася но́щию и тайноуча́ща боже́ственным тя́, преподо́бне.

Припев: Преподо́бне о́тче Фомо́, моли́ Бо́га о нас.

Яко в други́й Карми́ль, в Мале́йскую го́ру, му́дре, всели́лся еси́, виде́ний Боже́ственных наслажда́яся и чудотворе́ний благода́ть пресла́вно, блаже́нне, прие́мля.

Сла́ва Отцу́ и Сы́ну и Свято́му Ду́ху:

Простра́ннаго пути́ те́сный предпочита́я, дости́гл еси́ ра́достно широту́ рая́, и дре́ву жи́зненному, о́тче, невозбра́нно причаща́ешися, веселя́ся.

И ны́не и при́сно и во ве́ки веко́в. Ами́нь.

Богородичен: Уязви́вшееся прило́ги вра́жиими, Чи́стая, я́ко ми́лостива, исцели́ се́рдце мое́, на Кресте́ пло́тию Пригвозди́вшагося неизрече́нно ро́ждшая.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Преподо́бне о́тче Фомо́, моли́ Бо́га о нас.

В пусты́ни безво́дней всели́лся еси́ и моли́тв одожде́нием твои́х, преподо́бне, во́ду всебога́тну Влады́ку источи́ти умоли́л еси́.

Припев: Преподо́бне о́тче Фомо́, моли́ Бо́га о нас.

Якоже Авраа́м дре́вле пра́ведный, во и́ну страну́ себе́ удали́л еси́, и Бо́гу прибли́жился, и в зе́млю кро́тких всели́лся еси́.

Сла́ва Отцу́ и Сы́ну и Свято́му Ду́ху:

Мона́х и́стинен бы́л еси́ и по погребе́нии исцеле́ний дарова́ния, о́тче Фомо́, тре́бующим источа́еши си́лою духо́вною.

И ны́не и при́сно и во ве́ки веко́в. Ами́нь.

Богородичен: Во́лею вся́ Соде́лавый, в ложесна́, восхоте́в, Неискусобра́чныя всели́ся, тле́нием неду́говавшия нетле́нием почести́ хотя́, я́ко Благосе́рд.

Конда́к Фомы́, гла́с 4.

Ве́лию побе́ду му́жески показа́л еси́, отону́дуже Боже́ственною любо́вию разгоре́вся, царя́ тле́ннаго и вся́ кра́сная преоби́дел еси́, на горе́ Мале́йстей вселе́ние соверши́в, от нея́же в небе́сная возше́л еси́ к Царю́ царе́й, Фомо́, моли́ непреста́нно о все́х на́с.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Преподо́бне о́тче Фомо́, моли́ Бо́га о нас.

Огнь страсте́й воздержа́ния росо́ю, о́тче, погаси́л еси́ и, просия́в, я́коже со́лнце, доброде́телей све́тлостию, все́х вопию́щих просвеща́еши сердца́, блаже́нне: благослове́н еси́, Бо́же оте́ц на́ших.

Припев: Преподо́бне о́тче Фомо́, моли́ Бо́га о нас.

Слепы́м е́же зре́ти и хромы́м, о́тче Фомо́, благотече́ние, ско́рбным избавле́ние и боля́щим исцеле́ние подая́ си́лою Христо́вою, взыва́л еси́: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Безмо́лвно твою́ соверши́л еси́ жи́знь, о́тче блаже́нне, нестяжа́нием просвеща́яся и воздержа́нием украша́яся, поя́ умиле́нием се́рдца Влады́це, пребога́те: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Де́во Чи́стая, Неискусобра́чная, благослове́нная, па́дающих исправле́ние, согреша́ющих избавле́ние, спаси́ мя, блу́днаго, спаси́ Сы́ну Твоему́ зову́ща: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Преподо́бне о́тче Фомо́, моли́ Бо́га о нас.

Стра́сти неудержи́мыя души́ воздержа́ния уздо́ю покори́в, невеще́ственным Ангелом уподо́бился еси́, вопия́: по́йте, дела́, я́ко Го́спода, и превозноси́те во вся́ ве́ки.

Припев: Преподо́бне о́тче Фомо́, моли́ Бо́га о нас.

Фесви́тянина Илии́ после́дуя, преблаже́нне, свяще́нному житию́, на го́ру возше́л еси́ бесе́довати к Бо́гу, посто́м у́м очища́я, поя́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Кро́ток и незло́бив я́влься, на земли́ кро́тких живе́ши, богому́дре, со все́ми преподо́бными и избра́нными поя́: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Живы́й су́щий исто́чник, я́ко во́ду жи́зни ро́ждшая, ду́шу мою́, иста́явшую грехо́вным пла́менем, Де́во Богоро́дице, напо́й, да Тя́ сла́влю во вся́ ве́ки.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Преподо́бне о́тче Фомо́, моли́ Бо́га о нас.

Ду́хом, о́тче, обнища́в, небе́сное Ца́рство восприя́л еси́ со все́ми избра́нными, сла́вы неизрече́нныя исполня́емь и боле́зней по́честь прие́мля, Фомо́, возда́ния. Сего́ ра́ди тя́ ве́рою и любо́вию ублажа́ем.

Припев: Преподо́бне о́тче Фомо́, моли́ Бо́га о нас.

Моще́й твои́х ра́ка ве́рно приступа́ющим источа́ет исцеле́ний ре́ки, стра́сти ду́ш потопля́ющая и теле́с боле́зни отъе́млющая, блаже́нне Фомо́, моли́твенниче ве́рою при́сно блажа́щим тя́.

Сла́ва Отцу́ и Сы́ну и Свято́му Ду́ху:

Совокупля́яся с преподо́бных све́тлыми ли́ки и сия́нием невече́рним мы́сленно, о́тче Фомо́, озаря́емь, боже́ственную твою́ па́мять творя́щия просвети́ ве́рно и улучи́ти спасе́ние моли́твами твои́ми сподо́би.

И ны́не и при́сно и во ве́ки веко́в. Ами́нь.

Богородичен: Облиста́ющая все́х чуде́с заря́ Твои́х, Богоблагода́тная Чи́стая, страсте́й и скорбе́й отъе́млет мглу́ и све́т весе́лия мы́сленный простира́ет Ма́терь Бо́жию Тя́ велича́ющим.

Молитва

О свяще́нная главо́, преподо́бне о́тче, преблаже́нне а́вво Фомо́, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.