19 июля.

Канон преподобному Сисою Великому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Пусты́нный жи́тель, и в телеси́ Ангел, и чудотво́рец яви́лся еси́, богоно́се о́тче на́ш Сисо́е: посто́м, бде́нием, моли́твою небе́сная дарова́ния прии́м, исцеля́еши неду́жныя и ду́ши ве́рою приходя́щих ти́. Сла́ва Да́вшему тебе́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Кано́н, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподо́бне о́тче Сисо́е, моли́ Бо́га о нас.

Страстьми́ умерщвле́на, оживи́ мя, о́тче, моли́твами твои́ми, Жи́зни ны́не живу́щих со дерзнове́нием мно́гим предстоя́.

Припев: Преподо́бне о́тче Сисо́е, моли́ Бо́га о нас.

Жела́нием, о́тче, боже́ственным раче́ние пло́ти отри́нув, после́довал еси́ любо́вию Зову́щему, Сисо́е блаже́нне.

Сла́ва Отцу́ и Сы́ну и Свято́му Ду́ху:

Зарю́ невеще́ственну, о́тче, вну́трь в се́рдцы прие́м, просвети́лся еси́ и всестра́стную мглу́ потреби́л еси́.

И ны́не и при́сно и во ве́ки веко́в. Ами́нь.

Богородичен: Спаси́ мя, в бу́ри все́х сласте́й обурева́емаго, Спа́са ро́ждшая, все́х тишину́, Пренепоро́чная.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Преподо́бне о́тче Сисо́е, моли́ Бо́га о нас.

Пло́ть покори́л еси́ по́мыслу кре́пко, преподо́бне, ду́шу же показа́л еси́ рабо́ты страстны́я свобо́дну.

Припев: Преподо́бне о́тче Сисо́е, моли́ Бо́га о нас.

Боле́зньми твои́ми бразду́ душе́вную, му́дре преподо́бне, до́бре де́лая, кла́с безстра́стия и чуде́с израсти́л еси́.

Сла́ва Отцу́ и Сы́ну и Свято́му Ду́ху:

В ме́ртвость оде́ялся еси́, Животво́рца Христа́, преподо́бне, стопа́м после́дуя, те́м возставля́ти тебе́ и ме́ртвыя благода́ть дае́т.

И ны́не и при́сно и во ве́ки веко́в. Ами́нь.

Богородичен: Ме́сто свяще́ния, и мы́сленну, Чи́стая, трапе́зу, хле́б, Христа́, жи́знь все́х прие́мшую, пое́м Тя́.

Седа́лен, гла́с 4:

Воздержа́нием житие́ украси́л еси́, и, у́ды умертви́в, победи́л еси́ страстна́я прирева́ния, Сисо́е блаже́нне, и преста́вился еси́ к Бо́гу в ве́чный живо́т, я́ко досто́ин насле́дник. Те́м не преста́й моля́ся спасти́ ду́ши на́ша.

Сла́ва, и ны́не, Богородичен:

Те́плая Предста́тельнице и непобеди́мая, упова́ние изве́стное и непосты́дное, стено́, и покро́ве, и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со Ангелы умире́ние да́ти ми́рови, и спасе́ние, и ве́лию ми́лость.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподо́бне о́тче Сисо́е, моли́ Бо́га о нас.

Одожде́нием благода́ти, о́тче, ре́ки чуде́с источи́л еси́, от скве́рны очища́я ве́рою, блаже́нне, к тебе́ притека́ющия.

Припев: Преподо́бне о́тче Сисо́е, моли́ Бо́га о нас.

Всено́щными мольба́ми и вседне́вными, преподо́бне, стоя́нии, ду́шу предочи́стив, Тро́ице до́м сию́ показа́л еси́.

Сла́ва Отцу́ и Сы́ну и Свято́му Ду́ху:

В пусты́нях удали́лся еси́, о́тче, бе́гая и ожида́я тя́ Спаса́ющаго, блаже́нне, от малоду́шия и озлобле́ния.

И ны́не и при́сно и во ве́ки веко́в. Ами́нь.

Богородичен: Несеко́мую го́ру Тя́ дре́вле Авваку́м прови́де, Всенепоро́чная, из нея́же Бо́г яви́ся и на́с, истле́вшия, обнови́л е́сть.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Преподо́бне о́тче Сисо́е, моли́ Бо́га о нас.

Хра́м трисо́лнечнаго Божества́ бы́в, страсте́й куми́ры твоея́ души́ потреби́л еси́.

Припев: Преподо́бне о́тче Сисо́е, моли́ Бо́га о нас.

Умертви́в пло́ти твоея́ мудрова́ние, богоно́се, ме́ртвыя воскреси́л еси́ де́йством Ду́ха.

Сла́ва Отцу́ и Сы́ну и Свято́му Ду́ху:

Духо́в нечи́стых отгони́тель яви́лся еси́, о́тче, Свята́го бо Ду́ха чи́стое жили́ще бы́л еси́ ты.

И ны́не и при́сно и во ве́ки веко́в. Ами́нь.

Богородичен: Со́лнца ро́ждши незаходи́маго, Богоро́дице, всего́ просвети́ омраче́на мя́ страстьми́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподо́бне о́тче Сисо́е, моли́ Бо́га о нас.

Ки́та мы́сленнаго всегуби́тельства избежа́л еси́, воздержа́ние, моли́тву, любо́вь нему́тну, держа́вное смире́ние и любле́ние тве́рдо, ко Христу́, о́тче, стяжа́в.

Припев: Преподо́бне о́тче Сисо́е, моли́ Бо́га о нас.

Бо́г твоя́ я́же к Нему́ напра́ви стопы́, Си́льный си́льна я́ве соде́ла, попира́юща змие́в и скорпи́й главы́, богоно́се всеблаже́нне.

Сла́ва Отцу́ и Сы́ну и Свято́му Ду́ху:

Манове́нием, е́же к Бо́гу, бо́г я́ве бы́л еси́, ко Све́ту все́ю любо́вию све́т бы́в, Ангел земны́й, богоно́се о́тче, небе́сный же челове́к.

И ны́не и при́сно и во ве́ки веко́в. Ами́нь.

Богородичен: Мари́е, чи́стый де́вства сосу́де, очи́сти мо́й у́м от страстна́го омраче́ния и испо́лни благода́ти и пра́вды се́рдце мое́, Всенепоро́чная.

Конда́к, гла́с 4.

Подвиза́вся, Ангел на земли́ ви́ден бы́л еси́, озаря́яй, преподо́бне, помышле́ния ве́рных богозна́меньми всегда́. Те́мже тя́ ве́рою, Сисо́е, почита́ем.

Пе́снь 7.

Ирмос: Отроцы евре́йстии в пещи́ попра́ша пла́мень дерзнове́нно и на ро́су о́гнь преложи́ша, вопию́ще: благослове́н еси́, Го́споди Бо́же, во ве́ки.

Припев: Преподо́бне о́тче Сисо́е, моли́ Бо́га о нас.

Всю́ Ду́ха зарю́ прия́л еси́ умо́м чи́стым и свети́льник ве́рно вопию́щих бы́л еси́: благослове́н еси́, Го́споди Бо́же, во ве́ки. [Дважды.]

Сла́ва Отцу́ и Сы́ну и Свято́му Ду́ху:

Боже́ственным огне́м воздержа́ния попали́л еси́ те́рние грехо́вное и к Све́ту мы́сленному преше́л еси́, взыва́я: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Спаси́ мя, Ма́ти Спа́са, содержи́ма глубино́ю согреше́ний, и вся́кия вра́жия исхи́ти зло́бы, да Твое́, спаса́емь, велича́ю заступле́ние.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Сисо́е, моли́ Бо́га о нас.

Непреста́нными прилежа́ моли́твами и мольба́ми, мра́к от души́ страсте́й отгна́л еси́ и ума́ твоего́ зри́тельное очи́стил еси́. Те́мже прозре́ти проро́чески сподо́бился еси́ бу́дущая, Сисо́е, благоче́стно воспева́я: лю́дие, превозноси́те Го́спода во ве́ки.

Припев: Преподо́бне о́тче Сисо́е, моли́ Бо́га о нас.

Ангельски пожи́л еси́ с те́лом, преподо́бне, и проти́вныя победи́л еси́ полки́. Те́мже в невеще́ственней жи́зни, иде́же Ангельския чи́ны, с весе́лием, о́тче, всели́лся еси́, с ни́миже взыва́еши: свяще́ннии, воспо́йте Го́спода, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Оляде́вшую страстьми́ ду́шу мою́ очи́сти твои́ми к Бо́гу свяще́нными моли́твами и содержа́щаго мя́ плене́ния изба́ви, о́тче богоно́се, да пою́ чи́сто: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Освяти́вшися Ду́хом, прия́ла еси́ во утро́бе Твое́й Соде́теля челове́ческаго естества́ и Сего́ несказа́нно родила́ еси́, Отрокови́це Чи́стая. Его́же непреста́нно воспева́юще, пое́м: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Устраши́ся вся́к слу́х неизрече́нна Бо́жия снизхожде́ния, я́ко Вы́шний во́лею сни́де да́же и до пло́ти, от деви́ческаго чре́ва бы́в Челове́к. Те́мже Пречи́стую Богоро́дицу, ве́рнии, велича́ем.

Припев: Преподо́бне о́тче Сисо́е, моли́ Бо́га о нас.

Яви́ся чу́до стра́шное в са́мое вре́мя успе́ния твоего́, па́че со́лнца твоему́ лицу́, о́тче, облиста́вшу, егда́ приидо́ша ли́цы Ангельстии, ду́х тво́й прие́млющии и Све́ту трисо́лнечному принося́щии.

Припев: Преподо́бне о́тче Сисо́е, моли́ Бо́га о нас.

Боже́ственными, блаже́нне, добро́тами наслажда́яся, и прича́стием обожа́емь, и просвеща́емь све́тлыми отту́ду сия́нии, светоно́сную твою́ ве́рно па́мять чту́щия твои́ми мольба́ми, му́дре, мра́чныя страсте́й па́губы изба́ви.

Сла́ва Отцу́ и Сы́ну и Свято́му Ду́ху:

Пра́веден, непоро́чен, вся́каго огреба́яся зла́, о́тче, бы́л еси́, преподо́бен, незло́бив, Бо́гу послужи́в в преподо́бии, те́мже почи́ла е́сть Тро́ица в се́рдце твое́м, Ея́же ны́не ясне́е наслажда́ешися све́тло, досточу́дне.

И ны́не и при́сно и во ве́ки веко́в. Ами́нь.

Богородичен: От де́л отню́д во мне́ спасе́ния не́сть, Всенепоро́чная: проти́вною бо ше́ствуя стезе́ю, тмы́ испо́лнихся. Но Све́т от Све́та на́м возсия́вшая, просвети́ и спаси́ мя, не пре́зри мене́, лю́те погиба́юща.

Молитва

О свяще́нная главо́, преподо́бне о́тче, преблаже́нне а́вво Сисо́е, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.