18 июля.

Канон преподобномученице великой княгине Елисавете и с нею преподобномученице Варваре.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1:

Смире́нием досто́инство кня́жеское сокры́вши/, богому́драя Елисаве́то,/ сугу́бым служе́нием Ма́рфы и Мари́и/ Христа́ почти́ла еси́,/ милосе́рдием, терпе́нием и любо́вию себе́ предочи́стивши,/ я́ко же́ртва пра́ведная Бо́гу принесла́ся еси́./ Мы же, чту́ще доброде́тельное житие́ и страда́ния твоя́,/ я́ко и́стинную наста́вницу усе́рдно про́сим тя:/ свята́я му́ченице вели́кая княги́не Елисаве́то,// моли́ Христа́ Бо́га спасти́ и просвети́ти ду́ши на́ша.

Кано́н, гла́с 8.

Пе́снь 1.

Ирмос: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,// я́ко Еди́н сла́вно просла́вися.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Пода́ждь, Го́споди, души́ мое́й просвеще́ние и уста́ моя́ недосто́йная отве́рзи, я́ко да воспою́ уго́дницу Твою́, преподобному́ченицу Елисаве́ту, в не́йже и́мя Твое́ свято́е сла́вно просла́вися.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

О свята́я преподобному́ченице Елисаве́то, кня́жеским досто́инством и сла́вою на земли́ украше́нная, ты, да́нный тебе́ от Бо́га тала́нт преумно́живши, Небе́сною сла́вою возсия́ла еси́, и себе́ я́ко дар многоце́нный Христу́ принесла́ еси́.

Сла́ва Отцу́ и Сы́ну и Свято́му Ду́ху:

Христа́ Подвигополо́жника при́сно в души́ твое́й иму́щи, му́ченице Варва́ро, Тому́ невозвра́тным по́мыслом после́довала еси́, и в послуша́нии во́ли Бо́жией да́же до сме́рти пребыла́ еси́.

И ны́не и при́сно и во ве́ки веко́в. Ами́нь.

Богородичен: Воспои́м сла́ву Пресвяте́й Де́ве Богоро́дице, приведо́шася бо Царю́ Христу́ вслед Ея́ де́вы и жены́, с ни́миже и святы́я преподобному́ченицы Елисаве́та и Варва́ра, Небе́снаго черто́га насле́дницы и ве́чери Госпо́дни прича́стницы.

Пе́снь 3.

Ирмос: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Оте́чество твое́ оста́вивши, в земли́ Ру́сской све́том правосла́вныя ве́ры просвети́лася еси́, иде́же лю́дем любо́вию и милосе́рдием послужи́вши, муче́ние и смерть Христа́ ра́ди претерпе́ла еси́. Сего́ ра́ди Госпо́дь Небе́снаго Оте́чества насле́дницу тя показа́.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Егда́ честны́я оста́нки му́жа рука́ма твои́ма во гроб полага́ла еси́, Елисаве́то многострада́льная, не ожесточи́ла еси́ се́рдца твоего́, ниже́ отча́янию предала́ся еси́, но, те́плую моли́тву Го́сподеви вознося́щи, безбо́жнаго уби́йцу ева́нгельски прости́ла еси́.

Сла́ва Отцу́ и Сы́ну и Свято́му Ду́ху:

За́поведь о любви́ к бли́жним испо́лнити возжеле́вши, красоту́ ми́ра сего́ и сла́дость вре́менную презре́ла еси́, Варва́ро богому́драя. Сего́ ра́ди во оби́тель милосе́рдия прише́дши и в послуша́ние настоя́тельнице себе́ преда́вши, стра́ждущим до́бре послужи́ла еси́.

И ны́не и при́сно и во ве́ки веко́в. Ами́нь.

Богородичен: О Пресвята́я Ма́ти Де́во! Ду́шу мою́, омраче́нную грехми́, све́том Сы́на Твоего́ ми́лостивно просвети́, да, Тобо́ю направля́емь, черто́га Небе́снаго дости́гну.

Седа́лен, гла́с 5:

От ю́ности Го́спода возлюби́вши, Тому́ после́довала еси́, благове́рная княги́не Елисаве́то, и яви́лася еси́ я́ко земля́ благопло́дная, в не́йже до́брое се́мя Правосла́вия стори́чный плод принесе́. Те́мже име́ющи дерзнове́ние ко Го́споду, моли́ безпло́дие серде́ц на́ших разреши́ти, да принесе́м Ему́ плоды́ покая́ния, любве́ и смире́ния, и Ца́рствия Небе́снаго сподо́бимся.

Сла́ва, и ны́не, богоро́дичен, гла́с то́йже:

Пресвята́я Богоро́дице Де́во, принеси́ моли́тву о нас к Сы́ну и Бо́гу Твоему́, погиба́ем бо от мно́жества прегреше́ний и вопие́м: Ты еси́ Хода́таица и Спору́чница всех, на Тя упова́ние возложи́вших.

Пе́снь 4.

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Но́вая Ма́рфа яви́лася еси́, преподобному́ченице Елисаве́то, убо́гим и неду́жным, я́ко Самому́ Го́споду, усе́рдно послужи́вши. Научи́ и нас в бли́жних на́ших о́браз Влады́ки Христа́ всегда́ зре́ти и Тому́ с любо́вию служи́ти.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Благу́ю часть избра́вши, Мари́и уподо́билася еси́, свята́я Елисаве́то, и, все помышле́ние твое́ ко Го́споду иму́щи, непреста́нно словесе́м Его́ поуча́лася еси́.

Сла́ва Отцу́ и Сы́ну и Свято́му Ду́ху:

Помоли́теся Го́сподеви о нас, преподобному́ченицы Елисаве́то и Варва́ро, вы бо, ева́нгельский путь служе́ния бли́жним избра́вша, Христу́ да́же до сме́рти ве́рны пребы́ли есте́ и зе́млю кро́тких насле́довали есте́.

И ны́не и при́сно и во ве́ки веко́в. Ами́нь.

Богородичен: Блаже́нна Ты в жена́х еси́, Пренепоро́чная Влады́чице, Тобо́ю бо к нам Зижди́тель всех сни́де, е́же возста́вити па́дший Ада́мов о́браз и возвести́ нас к пе́рвому блаже́нству.

Пе́снь 5

Ирмос: У́тренююще вопие́м Ти,/ Го́споди, спаси́ ны:/ Ты бо еси́ Бог наш,// ра́зве Тебе́ ино́го не ве́мы.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Неизрече́нным смотре́нием страда́ний причасти́вшися, свята́я Елисаве́то, Дух Боже́ственный в се́рдце твое́м стяжа́ла еси́, И́мже просвеща́ема, лю́дем моли́твою и милосе́рдием послужи́ла еси́.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Моли́твами твои́ми, преподобному́ченице, ду́ши неду́гующих и немощству́ющих врачева́ла еси́, и сестры́ оби́тели о́бразом жития́ твоего́ му́дре наставля́ла еси́.

Сла́ва Отцу́ и Сы́ну и Свято́му Ду́ху:

От ю́ности Го́сподеви себе́ преда́вши и Про́мыслу Бо́жию повину́ющися, вся в житии́ твое́м с благодаре́нием прия́ла еси́, преподобному́ченице Варва́ро, и по сме́рти венце́м му́ченическим венча́лася еси́.

И ны́не и при́сно и во ве́ки веко́в. Ами́нь.

Богородичен: Не и́мамы ины́я по́мощи, ни ины́я наде́жды, ра́зве Тебе́, Влады́чице, сего́ ра́ди к Тебе́ припа́даем, приими́ моле́ния на́ша, и принеси́ я́ к Престо́лу Сы́на Твоего́, Всенепоро́чная.

Пе́снь 6.

Ирмос: Ри́зу мне пода́ждь све́тлу,/ одея́йся све́том я́ко ри́зою,// Многоми́лостиве Христе́ Бо́же наш.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Ве́мы милосе́рдие твое́, преподобному́ченице Елисаве́то, я́ко не отвраща́лася еси́ скорбя́щих и нужда́ющихся, тако́ и нас недосто́йных не оста́ви твои́м заступле́нием, и моли́ся Го́споду о исправле́нии на́шего жития́.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

С любо́вию прие́млющи больны́я, си́рыя и кре́постию оскуде́вшия, благове́рная княги́не Елисаве́то, духо́вный глад и жа́жду тех утоля́ла еси́, та́ко и нас, воспева́ющих святу́ю па́мять твою́, не оста́ви моли́твами твои́ми.

Сла́ва Отцу́ и Сы́ну и Свято́му Ду́ху:

Ве́рна бы́вши нача́льнице твое́й в служе́нии бли́жним, Варва́ро преподобному́ченице, пребыла́ еси́ ве́рна ей и во страда́нии да́же до сме́рти, по сло́ву Подвигополо́жника Христа́: претерпе́вый до конца́, той спасе́н бу́дет.

И ны́не и при́сно и во ве́ки веко́в. Ами́нь.

Богородичен: Богоро́дице Де́во, умоли́ Сы́на Твоего́, Христа́ Бо́га на́шего, да омы́ет скве́рну души́ моея́ и облече́т в оде́жду све́тлую, в не́йже предста́в пред Ним, не лише́н бу́ду черто́га бра́чнаго.

Конда́к, гла́с 2:

Вели́чие по́двига ве́ры кто пове́сть?/ Во про́пасти земне́й све́том Небе́сным осия́нная,/ страстоте́рпица вели́кая княги́ня Елисаве́та/ со А́нгелы во псалме́х и пе́ниих ра́довашеся/ и, убие́ние претерпева́ющи,/ о безбо́жных мучи́телех взыва́ше:/ Го́споди, прости́ им грех сей,/ не ве́дят бо, что творя́т./ Тоя́ моли́твами, Христе́ Бо́же,// поми́луй и спаси́ ду́ши на́ша.

Икос:

Ору́жие про́йде се́рдце твое́, благове́рная княги́не Елисаве́то, егда́ узре́ла еси́ убие́ннаго супру́га твоего́; те́мже кра́сная ми́ра сего́ оста́вивши, всю жизнь свою́ Бо́гу предала́ еси́ и, благочести́вых жен и дев во оби́тель Ма́рфы и Мари́и собра́вши, стра́ждущим лю́дем усе́рдно послужи́ла еси́. Егда́ же к страда́нию призва́ тя Госпо́дь, о безбо́жных мучи́телех взыва́ла еси́: Го́споди, прости́ им грех сей, не ве́дят бо, что творя́т. Тоя́ моли́твами, Христе́ Бо́же, поми́луй и спаси́ ду́ши на́ша.

Пе́снь 7.

Ирмос: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Согреши́хом, беззако́нновахом, непра́вдовахом пред Бо́гом, и сего́ ра́ди, лю́тыми скорбьми́ обурева́еми, в во́ли на́шей ходи́ти оста́влени бы́хом. Но моли́твами святы́я преподобному́ченицы Елисаве́ты и всех новому́ченик, умилосе́рдися, пощади́ и вразуми́ нас, Го́споди, да пое́м Ти: благослове́н еси́, Го́споди Бо́же, во ве́ки.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Злочести́вии лю́дие мно́гажды досажда́ху ти, свята́я преподобному́ченице Елисаве́то, ты же ве́рою бла́го за зло сим воздава́ла еси́. Сего́ ра́ди мы, ча́да твоя́, я́ко наста́вницу в житии́ христиа́нстем тя иму́ще, с тобо́ю воспева́ем: благослове́н еси́, Го́споди Бо́же, во ве́ки.

Сла́ва Отцу́ и Сы́ну и Свято́му Ду́ху:

Сохрани́, Го́споди, моли́твами достохва́льныя преподобному́ченицы Варва́ры всех, почита́ющих па́мять ея́ святу́ю и благоче́стно взыва́ющих: благослове́н еси́, Го́споди Бо́же, во ве́ки.

И ны́не и при́сно и во ве́ки веко́в. Ами́нь.

Богородичен: Восхва́лим, ве́рнии, Пресвяту́ю Богоро́дицу: Та бо, покро́в Сво́й святы́й над ми́ром распросте́рши, сугу́бую моли́тву о земли́ Ру́сской возсыла́ет, во е́же помощи́ лю́дем стра́ждущим и ве́рою зову́щим: благослове́н еси́, Го́споди Бо́же, во ве́ки.

Пе́снь 8.

Ирмос: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Егда́ в про́пасть земну́ю вве́ржена была́ еси́, свята́я Елисаве́то, не поколеба́ся ве́ра твоя́ и милосе́рдие не оскуде́, не оста́вила бо еси́ да́же до сме́рти служе́ния стра́ждущим, к Бо́гу вопию́щи: благослови́те, лю́дие, Го́спода и превозноси́те Его́ во ве́ки.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Научи́ нас досто́йно Го́споду служи́ти и в послуша́нии во́ли Его́ пребыва́ти, преподобному́ченице Елисаве́то, да не бу́дет нам и́го Его́ благо́е в скорбь, и бре́мя Его́ ле́гкое в тяготу́, но с ра́достию возопие́м: благослови́те, лю́дие, Го́спода и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Я́коже дре́вле му́ченицы свиде́телие Христо́вы в ми́ре безбо́жнем бы́ша, та́ко и вы, святы́я Елисаве́то и Варва́ро, ве́ру во Христа́ яви́ли есте́ и сме́ртию запечатле́ли есте́, вопию́ща: благослови́те, лю́дие, Го́спода и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Всеблага́я Богоро́дице, на спасе́ния стези́ наста́ви мя, оскудева́ют бо дни́е мои́ в суете́ и попече́нии о де́лех мирски́х, но покры́й милосе́рдием Твои́м не́мощь мою́ и спаси́ мя.

Песнь 9

Ирмос: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Ди́вна дела́ Твоя́, Го́споди! Преподобному́ченица Елисаве́та, в земли́ Алапа́евстей беззако́нно убие́нная, ны́не во святе́м гра́де Иерусали́ме я́ве моща́ми почива́ет и в первопресто́льнем гра́де Москве́ с че́стию прославля́ется. Ю́же моли́твенно почита́юще, с благодаре́нием взыва́ем: сла́ва Бо́гу, прославля́ющему святы́я Своя́.

Припев: Преподо́бная княги́не Елисаве́то и му́ченице Варва́ро, моли́те Бо́га о нас.

Ди́вна дела́ Твоя́, Го́споди! Преподобному́ченица Елисаве́та, во глубину́ про́пасти вве́рженная, на высоте́ горы́ Елео́нския во святе́м хра́ме упокое́ние моща́ми свои́ми прие́млет. Ю́же лю́дие моли́твенно почита́юще, с благодаре́нием взыва́ют: сла́ва Бо́гу, прославля́ющему святы́я Своя́.

Сла́ва Отцу́ и Сы́ну и Свято́му Ду́ху:

Ди́вна дела́ Твоя́, Го́споди! Преподобному́ченицы Елисаве́та и Варва́ра, в земне́м житии́ сою́зом любве́ связу́емыя, неразлу́чны во страда́нии бы́ша и по сме́рти не разлучи́шася. И́хже лю́дие моли́твенно почита́юще, с благодаре́нием взыва́ют: сла́ва Бо́гу, прославля́ющему святы́я Своя́.

И ны́не и при́сно и во ве́ки веко́в. Ами́нь.

Богородичен: Отжени́ от душ на́ших собла́зны и стра́сти грехо́вныя, Пресвята́я Де́во, да не поги́бнем в беззако́нниих, но да спасе́мся моли́твами Твои́ми и святы́х преподобному́чениц Елисаве́ты и Варва́ры.

Свети́лен:

В Гефсимани́йстей ве́си восхоте́ла еси́ погребе́на бы́ти, преподобному́ченице Елисаве́то, красоты́ ра́ди и свя́тости ме́ста сего́. Бог же благо́е жела́ние твое́ испо́лни, да просвети́тся свет твой пред челове́ки по сло́ву Госпо́дню.

Сла́ва, и ны́не, Богородичен:

Прему́дрость Ипоста́сную, Сло́во Пресу́щное и Врача́ душ и теле́с ро́ждшая, Де́во, исцели́ души́ моея́ боле́знь, и к жи́зни ве́чней наста́ви.

Молитва

О вели́кая княги́не, свята́я преподобному́ченице Елисаве́то, оте́чества на́шего похвало́, гра́да Москвы́ пресла́вное украше́ние и Святы́я Земли́ свяще́нное достоя́ние! Ты во дни жития́ твоего́ ве́ру, наде́жду, любо́вь нело́жно стяжа́вши, милосе́рдием к стра́ждущим све́тло просия́ла еси́. Терпе́нием же скорбе́й и искуше́ний о́браз смире́ния бли́жним яви́вши, изгна́нием и муче́нием житие́ увенча́ла еси́, и во Ца́рствии Небе́снем с преподобному́ченицею Варва́рою ны́не пребыва́еши. Сего́ ра́ди мо́лим вас, страстоте́рпицы святы́я, моли́твами ва́шими да́руйте нам се́рдце смире́нное и покая́нное, милосе́рдие неоскудева́ющее, служе́ние бли́жним же́ртвенное, терпе́ние непоколе́блемое, му́жество в ско́рбех и обстоя́ниих неослабева́ющее, в стра́шный же час сме́ртный упова́ние тве́рдое на Го́спода на́шего Иису́са Христа́, Ему́же подоба́ет вся́кая сла́ва, честь и поклоне́ние со Безнача́льным Его́ Отце́м, и со Пресвяты́м, Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.