18 июля.
Канон третий святой преподобномученице Елисавете.
![Святой преподобномученице Елисавете Святой преподобномученице Елисавете](img_i/048.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Кро́тость и смире́ние и любо́вь / всели́вши в ду́шу свою́, / усе́рдно послужи́ла еси́ стра́ждущим, / страстоте́рпице свята́я княги́не Елисаве́то, / та́же с ве́рою претерпе́ла еси́ страда́ния и сме́рть за Христа́, / ку́пно с и́нокинею Варва́рою. / С не́ю же моли́ о все́х с любо́вию почита́ющих ва́с.
Велича́ние:
Велича́ем тя́, страстоте́рпице свята́я княги́не Елисаве́то, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.
Кано́н, гла́с 4.
Пе́снь 1.
Ирмос: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зными Моисе́овыма рука́ма, Амали́кову си́лу в пусты́ни победи́л е́сть.
Припев: Преподо́бная княги́не Елисаве́то, моли́ Бо́га о нас.
Благи́ми наде́ждами утверди́вся у́м тво́й, преподобному́ченице Елисаве́то, и к Бо́гу вознесе́ся от кратковре́менных, тебе́ во оби́тели в моли́тве и труде́х пребыва́ющей.
Припев: Преподо́бная княги́не Елисаве́то, моли́ Бо́га о нас.
С любо́вию прихожду́ к тебе́, преподобному́ченице честна́я, твои́ми мольба́ми жите́йския суеты́ мя спаси́, и страсте́й мои́х смуще́ние утиши́.
Сла́ва Отцу́ и Сы́ну и Свято́му Ду́ху:
Му́дростию и благода́тию просве́щшуся уму́ твоему́, Елисаве́то, мучи́телей преще́ний не устраши́лася еси́, преподобному́ченице свята́я, Боже́ственною си́лою укрепля́ема.
И ны́не и при́сно и во ве́ки веко́в. Ами́нь.
Богородичен: Вопло́щшагося из Тебе́, Богоневе́сто, и кре́ст и сме́рть прии́мшаго, позна́хом я́ко Го́спода и пое́м Его́ я́ко Изба́вителя ро́да на́шего, Тя́ ублажа́юще.
Пе́снь 3.
Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.
Припев: Преподо́бная княги́не Елисаве́то, моли́ Бо́га о нас.
Отве́ргшися ми́ра и пло́ти мудрова́ния, милосе́рдием и труды́ в моли́твах оби́тели Ма́рфы и Мари́и стяжа́ла еси́ Христа́, вку́пе со сестра́ми, я́же тебе́ от Бо́га вручи́шася.
Припев: Преподо́бная княги́не Елисаве́то, моли́ Бо́га о нас.
Яко сто́лп непоколеби́м стоя́ла еси́ во вре́мя тя́жких обстоя́ний, уби́йцу прости́вши и о мучи́телех моля́щися, княги́не блаже́нная.
Сла́ва Отцу́ и Сы́ну и Свято́му Ду́ху:
Ни о́гнь, ни ме́чь, ни уничиже́ния, ни ро́в жесто́кий, ни мучи́телей суровство́ не возмого́ша отлучи́ти тебе́ от любве́ Бо́жия.
И ны́не и при́сно и во ве́ки веко́в. Ами́нь.
Богородичен: Сло́во Отчее, о Чи́стая, предочи́стившися ду́хом, родила́ еси́ на спасе́ние поги́бшаго ро́да на́шего.
Седа́лен, гла́с 7:
Страстоте́рпице свята́я княги́не Елисаве́то, / егда́ тя́ жи́ву во алапа́евскую ша́хту вверго́ша, / ку́пно со святы́ми му́ченики ца́рския кро́ве, / я́же бя́ху кня́зие Се́ргий, Иоа́нн, Константи́н, Игорь и Влади́мир, / та́кожде му́ченица Варва́ра, / и святы́й му́ченик Фео́дор, / изнемога́ющим же надо́лзе все́м от ра́н, / облегча́ла еси́ е́ле жи́ва су́щи страда́ния умира́ющих, / воспева́ющи свяще́нная песнопе́ния, я́же слы́шаху мимоходя́щии. / Сего́ ра́ди мо́лим тя́: моли́ся Христу́ Бо́гу / прегреше́ний оставле́ние дарова́ти пра́зднующим любо́вию святу́ю па́мять твою́.
Сла́ва, и ны́не, богоро́дичен, гла́с то́йже:
Егда́ предста́ну пред лице́м Созда́теля моего́, в де́нь пра́веднаго Суда́ Его́, тогда́, Влады́чице, бу́ди ми́ хода́таица пред Ни́м, ве́чныя му́ки избавля́ющи мя́, да не сни́ду во а́д, но да спасу́ся Твои́м, Пречи́стая Богоро́дице, заступле́нием.
Пе́снь 4.
Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.
Припев: Преподо́бная княги́не Елисаве́то, моли́ Бо́га о нас.
Стра́хом Бо́жиим огради́вшися, Бо́гу послужи́ла еси́, посто́м и жа́ждею смиря́ющи те́ло твое́, моли́твою же чи́стою ду́шу твою́ просвеща́ющи.
Припев: Преподо́бная княги́не Елисаве́то, моли́ Бо́га о нас.
Якоже честны́й би́сер твоя́ мо́щи предлежа́т, подаю́ще разли́чная исцеле́ния с ве́рою приступа́ющим и моля́щимтися.
Сла́ва Отцу́ и Сы́ну и Свято́му Ду́ху:
В ча́с мра́ка, одержа́щаго зе́млю Ру́сскую, Госпо́дь тя́ призва́ на по́двиг му́ченичества, Ему́ же ве́рна была́ еси́ до конца́.
И ны́не и при́сно и во ве́ки веко́в. Ами́нь.
Богородичен: Нескве́рная, небла́зная, оскверне́нное мое́ се́рдце помышле́ньми малове́рия и ле́ности возста́ви к моли́тве и покая́нию, моли́твами Твои́ми.
Пе́снь 5
Ирмос: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.
Припев: Преподо́бная княги́не Елисаве́то, моли́ Бо́га о нас.
Боголе́пно бы́сть вои́стинну житие́ твое́, челове́ком и Ангелом яви́ся сие́ любе́зно, слу́г же сатани́нских свире́пству непристу́пно показа́ся.
Припев: Преподо́бная княги́не Елисаве́то, моли́ Бо́га о нас.
На земли́ подвиза́вшися, всебога́тая, с сестра́ми твои́ми о Бо́зе, и вре́менныя боле́зни претерпе́вши, ны́не на небесе́х воздая́ния прие́млеши со Ангелы, му́ченице непобеди́мая.
Сла́ва Отцу́ и Сы́ну и Свято́му Ду́ху:
Презре́вши благоле́пие ми́ра сего́, яви́лася еси́ наста́вница заблу́ждшим, и приста́нище ве́рно спаса́емым, твои́ми же кровьми́ обагри́ла еси́ багряни́цу многоце́нную, е́юже ны́не на небесе́х оде́яна, Жениху́ предстои́ши.
И ны́не и при́сно и во ве́ки веко́в. Ами́нь.
Богородичен: Превы́шша естества́ Бо́га пло́тию породила́ еси́, Де́во, я́коже Са́м восхоте́. Те́м мы́ ве́рнии мо́лим Тя́, изба́витися на́м Рождество́м Твои́м ве́чнаго муче́ния.
Пе́снь 6.
Ирмос: Пожру́ Ти́ со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Припев: Преподо́бная княги́не Елисаве́то, моли́ Бо́га о нас.
Че́стен сосу́д яви́лася еси́ Боже́ственнаго Ду́ха, нося́щи в се́рдцы твое́м Боже́ственныя арома́ты, и услажда́ющи сердца́ ве́рно соверша́ющих па́мять твою́.
Припев: Преподо́бная княги́не Елисаве́то, моли́ Бо́га о нас.
Си́лою Ду́ха мы́сленных волко́в че́люсти сокруши́ла еси́, преподобному́ченице Елисаве́то, зарю́ невече́рнюю облиста́ющи, веди́ и на́с по стези́ неколеби́мыя любве́ Бо́жия.
Сла́ва Отцу́ и Сы́ну и Свято́му Ду́ху:
Всю́ Сиби́рь преше́дши в телеси́ ме́ртвеннем, моща́ми свои́ми посети́вши страны́ да́льния, дости́гла еси́ во Святы́й гра́д, в оби́тель, ю́же искони́ возлюби́ла еси́.
И ны́не и при́сно и во ве́ки веко́в. Ами́нь.
Богородичен: Глаго́лов Боже́ственных послушли́ва была́ еси́, Богоро́дице Пречи́стая, и Пребезнача́льнаго Сло́ва пло́тию родила́ еси́, безслове́сия на́с изба́вльшаго.
Конда́к, гла́с 4:
От сла́вы ца́рственныя, / взе́мши кре́ст Христо́в, / прешла́ еси́ к сла́ве небе́сней, моля́щися за враги́, / и обрела́ еси́ ра́дость ве́чную, / свята́я му́ченице княги́не Елисаве́то, / с Варва́рою му́ченицею, / те́мже моли́те о душа́х на́ших.
Икос:
Возлюби́вши Христо́вы за́поведи, преподобному́ченице, и возненави́девши ми́ра сего́ наслажде́ние, притекла́ еси́ усе́рдно ко Го́споду, и просвеща́ющи зе́млю Ру́сскую блиста́нием духо́вным, привела́ еси́ к Нему́ ста́до де́в, наста́вленных тобо́ю в любви́ Бо́жией. Просвети́ на́ши о́чи серде́чныя, во е́же воспе́ти по́двиги твоя́, проще́ние, бде́ние, сле́зы, боле́зни, сострада́ние, блаже́нныя ра́ди жи́зни ве́чныя, ея́же ны́не наслажда́ющися, непреста́нно моли́ о душа́х на́ших.
Пе́снь 7.
Ирмос: В пещи́, авраа́мстии о́троцы, перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.
Припев: Преподо́бная княги́не Елисаве́то, моли́ Бо́га о нас.
Све́т непристу́пный досто́йно просвети́ ду́шу твою́, Елисаве́то преподобному́ченице, и свеща́ми све́тлыми озари́ пою́щия: Бо́же оте́ц на́ших, благослове́н еси́.
Припев: Преподо́бная княги́не Елисаве́то, моли́ Бо́га о нас.
Терни́стый пу́ть земна́го жития́ проше́дши, ма́ти преподо́бная, небе́снаго наслажде́ния дости́гла еси́, и ны́не со Ангелы лику́еши: Бо́же оте́ц на́ших, благослове́н еси́.
Сла́ва Отцу́ и Сы́ну и Свято́му Ду́ху:
Христа́ возлюби́вши все́м се́рдцем твои́м, в светле́йший черто́г небе́снаго Жениха́ всели́лася еси́, богоблаже́нная, и я́ко му́ченица непобеди́мая Тому́ зове́ши: Бо́же оте́ц на́ших, благослове́н еси́.
И ны́не и при́сно и во ве́ки веко́в. Ами́нь.
Богородичен: Хра́м свяще́ния су́щи, Всенепоро́чная, во святы́х Почива́ющаго родила́ еси́ Всесвята́го Бо́га, вся́ освяща́ющаго, и лю́тых изъима́ющаго.
Пе́снь 8.
Ирмос: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.
Припев: Преподо́бная княги́не Елисаве́то, моли́ Бо́га о нас.
Волну́ющееся мо́ре напа́стей му́к, воздвиза́емых безбо́жными гони́телями на ве́ру Христо́ву, невре́дно преплыла́ еси́, и ра́йскаго приста́нища дости́гла еси́, вопию́щи: свяще́нницы воспо́йте, лю́дие превозноси́те во вся́ ве́ки.
Припев: Преподо́бная княги́не Елисаве́то, моли́ Бо́га о нас.
Яко пра́вды свеща́ возсия́вши, мра́к безбо́жия разсе́яла еси́, богому́драя Елисаве́то, и ко Христу́ привела́ еси́ мно́жество же́н боголюби́вых, вопию́щих: свяще́нницы воспо́йте, лю́дие превозноси́те во вся́ ве́ки.
Сла́ва Отцу́ и Сы́ну и Свято́му Ду́ху:
Пресла́вно просла́ви тя́ Боже́ственная благода́ть, Елисаве́то княги́не с Варва́рою и́нокинею и мно́жайшими ины́ми му́ченики но́выми, и све́тло вопи́ти ва́с научи́вши: свяще́нницы воспо́йте, лю́дие превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Ка́пля Богото́чная, я́же от Тебе́ ро́ждшися, ми́р освяти́вшая, Богоро́дице Де́во, ка́плю ми́лости ми́ источи́, освяща́ющую ду́ши на́ша и помышле́ния.
Песнь 9
Ирмос: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.
Припев: Преподо́бная княги́не Елисаве́то, моли́ Бо́га о нас.
Доброде́тельми мно́гими укра́шена, человеконенави́стника ко́зни погуби́ла еси́, ко Христу́ любо́вию прилепи́вшися, и христолю́биц со́нм к Бо́гу приве́дши.
Припев: Преподо́бная княги́не Елисаве́то, моли́ Бо́га о нас.
Совокупи́вшися с беспло́тными ли́ки, сла́вная, и со страда́льческими собо́ры, моли́ Христа́ Бо́га о отсту́пльших и ненави́дящих Его́.
Сла́ва Отцу́ и Сы́ну и Свято́му Ду́ху:
Страны́ разли́чны прешла́ еси́ в житии́ твое́м вре́меннем, и ны́не блиста́нии Ду́ха просвеща́еши на́с, во мно́зех гра́дех и оби́телех тя́ сла́вящих.
И ны́не и при́сно и во ве́ки веко́в. Ами́нь.
Богородичен: Гла́с вопие́м Ти́ вси́ Ангелов, Де́во, Пала́то, и Престо́ле Бо́жий: ра́дуйся, Еюже сподо́бихомся небе́снаго Ца́рствия, дре́вле отринове́ннии тле́нием, и добро́ту пе́рвую несмы́сленно погуби́вшии.
Свети́лен:
Укре́пльшися, преподобному́ченице, Елисаве́то, Кресто́м Го́спода твоего́, мучи́телей горды́ню погуби́ла еси́, пострада́вши му́жески, и от Христа́ прия́ла еси́ по́чести вене́ц, о на́с моля́щи, тя́ почита́ющих любо́вию.
Сла́ва, и ны́не, Богородичен:
Стоя́ще о́крест Тебе́ де́вы богому́дрыя, Богороди́тельнице Мари́е, я́ко Цари́це ро́да, Твоему́ Сы́ну приведо́шася, Пречи́стая, я́ко Царю́ вся́ческих, Его́же, Ма́ти Де́во, о на́с умоли́.
Стихи́ры, гла́с 8.
Яко на ка́мени тве́рде / во испове́дании Бо́жии извести́вшися, / Елисаве́то свята́я с Варва́рою, / пострада́ла еси́ в ро́ве алапа́евстем, / те́мже мы́сленнаго уби́йцу врага́ / в бе́здне потопи́ла еси́, / и вене́ц побе́дный / досто́йно прия́ла еси́.
Па́мять твою́ свяще́нную соверша́ем, / я́ко прие́мшую любо́вь Христо́ву, / и Того́ повеле́ния, / и пропове́давшую, преподобному́ченице, / душа́м спасе́ние. / Те́мже моще́й твои́х ра́ку, Елисаве́то, / ве́рою облобыза́ем, / источа́ющую благода́ть неоску́дную, / ве́рою и любо́вию притека́ющим.
Блаже́н Святы́й гра́д и оби́тель Гефсима́нская, / в ню́же дости́гли есте́, / преподобному́ченице Елисаве́то с и́нокинею Варва́рою, / честны́й же хра́м телеса́ ва́ша восприе́мый, / я́ко венце́м ца́рствия украси́ся; / храни́тельницы благоприя́тныя, / враги́ устраша́ющия / и дале́че от оби́тели и гра́да ва́шего отгоня́ющия, / моли́те спасти́ся душа́м на́шим.
В кня́жестем гра́де Дармшта́дте пу́ть сво́й наче́нши, / в ца́рствующий гра́д Москву́ дости́гла еси́, / се́рдцем же и умо́м взира́юще на го́рний Иерусали́м, / учреди́ла еси́ оби́тель Ма́рфы и Мари́и. / Егда́ же в ме́ртвеннем телеси́ твое́м / и́н пу́ть чре́з Сиби́рь и Кита́й прия́ла еси́ / я́коже принести́ся моще́м твои́м в до́льний Иерусали́м, / и во оби́тели Мари́и Магдали́ны возложи́тися, / о, сла́во му́чеников и похвало́, Елисаве́то приснопа́мятная!
Сла́ва, гла́с 3:
Дне́сь празднолю́бных собо́ри соше́дшеся, ра́достным лице́м и чи́стым се́рдцем, духо́вне соста́вим ли́к, похваля́юще Христа́, Бо́га на́шего, прославляю́щаго святы́я Своя́ страстоно́сицы: вели́кую княги́ню Елисаве́ту с и́нокинею Варва́рою, я́ко многоце́нное мѵ́ро — кро́вь свою́ прине́сшия Жениху́ своему́ Христу́, и воздая́ние прия́вшия вене́ц нетле́нен от Него́, преподобному́ченицы досточу́дныя.
И ны́не, богоро́дичен, гла́с то́йже:
Без се́мене зачала́ еси́ от Ду́ха Свята́го, и, славосло́вяще, воспева́ем Тя́: ра́дуйся, Пресвята́я Де́во.
Молитва святой преподобномученице великой княгине Елисавете
О святыя новомученицы Российския, великая княгине Елисавето и сестро ея крестовая пречестная инокине Варваро, купно путь свой во мнозех муках скончавшия, евангельския заповеди делом во Обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем, Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь. Молитва святой преподобномученице великой княгине Елисавете
О святыя новомученицы Российския, великая княгине Елисавето и сестро ея крестовая пречестная инокине Варваро, купно путь свой во мнозех муках скончавшия, евангельския заповеди делом во Обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем, Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святой преподобномученице Елисавете Святой преподобномученице Елисавете](img_b/048.jpg)