18 июля.
Канон иной преподобномученице великой княгине Елисавете.
![Святой преподобномученице Елисавете Святой преподобномученице Елисавете](img_i/047.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропарь, глас 4:
Кро́тость и смире́ние и любо́вь всели́вши в ду́шу свою́, усе́рдно послужи́ла еси́ стра́ждущим, страстоте́рпице свята́я княги́не Елисаве́то, та́же с ве́рою претерпе́ла еси́ страда́ния и сме́рть за Христа́, с му́ченицею Варва́рою. С не́ю же моли́ о все́х с любо́вию почита́ющих ва́с.
Кано́н, гла́с 8.
Пе́снь 1.
Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.
Припев: Преподо́бная княги́не Елисаве́то, моли́ Бо́га о нас.
Ве́ры броне́ю огради́вшеся страстоте́рпцы непобеди́мии, во́инов Христо́вых осмери́ца всечестна́я кресто́м на враги́ вооружи́шася.
Припев: Преподо́бная княги́не Елисаве́то, моли́ Бо́га о нас.
Не на кня́зи и сы́ны челове́ческия упова́ние свое́ возложи́вше, святи́и, но на еди́наго Бо́га, Тому́ ве́рно послужи́сте в преподо́бии и пра́вде.
Припев: Преподо́бная княги́не Елисаве́то, моли́ Бо́га о нас.
Сы́нове тмы́ беззако́ннии лиши́ша ва́с жи́зни и ца́рства вре́меннаго, оба́че небе́сному Ца́рствию устреми́лися есте́, иде́же твори́т Госпо́дь сы́ны све́та.
Сла́ва Отцу́ и Сы́ну и Свято́му Ду́ху:
Ве́лия ва́ша страда́ния и бо́льша дарова́ния: Царя́ Небе́снаго моли́те от тли́ и бе́д изба́витися соверша́ющим па́мять ва́шу ве́рно.
И ны́не и при́сно и во ве́ки веко́в. Ами́нь.
Богородичен: От де́л спасе́ния не́сть ми́, Влады́чице, грехи́ бо прилага́ю ко грехо́м, и к зло́бе зло́бу: моли́твою у́бо Твое́ю, Чи́стая, уще́дри и спаси́ мя.
Пе́снь 3.
Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.
Припев: Преподо́бная княги́не Елисаве́то, моли́ Бо́га о нас.
Возлюби́ла еси́ богоизбра́нный наро́д, преподобному́ченице богоблаже́нная, я́коже Ру́фь дре́вле, и глаго́лала еси́: Свята́я Ру́сь не поги́бнет! Иска́ла еси́ все́м спасти́ся и в ра́зум и́стины приити́.
Припев: Преподо́бная княги́не Елисаве́то, моли́ Бо́га о нас.
Жениха́ земна́го лиши́лася еси́, оба́че Небе́снаго обрела́, Его́же ра́ди отрекла́ся еси́ от ми́ра сего́ и вся́ я́же в не́м, глаго́ля: не́сть свя́т па́че Тебе́, Го́споди!
Припев: Преподо́бная княги́не Елисаве́то, моли́ Бо́га о нас.
Любо́вь ко враго́м стяжа́ла е́сть Елисаве́та милосе́рдная, не то́кмо сло́вом, но де́лом и и́стиною подо́бящися Бо́гу, об убива́ющих ю́ моля́шеся: прости́ и́м, не ве́дят бо что́ творя́т!
Сла́ва Отцу́ и Сы́ну и Свято́му Ду́ху:
Клевета́ша на тя́ лука́вии челове́цы, не ве́дяще я́ко клеветни́к е́сть диа́вол. Но я́ко смире́нная подража́тельница Христа́, вся́ в кро́тости претерпе́ла еси́.
И ны́не и при́сно и во ве́ки веко́в. Ами́нь.
Богородичен: Су́д при две́рех, суди́ще гото́во, угото́вися, смире́нная душе́, и возопи́й: внегда́ суди́ти Ти́, Сло́ве, не осуди́ мене́, моли́твами Ро́ждшия Тя́.
Седа́лен, гла́с 3:
Све́тло пра́зднуем дне́сь па́мять Алапа́евских страстоте́рпцев, и́же до́блественно пострада́ша, живопогребе́нни в ро́ве глубо́це, в непреста́ннем славословле́нии Христа́, диа́волю пре́лесть упраздни́ша и сме́рть попра́ша, вопию́ще: Христо́с воскре́се из ме́ртвых!
Богородичен:
Свята́я Де́во, Ма́ти Христо́ва, му́чеников сла́во и Ангелов ра́досте, с ни́ми моли́ Сы́на Твоего́, уще́дрити и спасти́ рабы́ Твоя́.
Пе́снь 4.
Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.
Припев: Преподо́бная княги́не Елисаве́то, моли́ Бо́га о нас.
Отце́м твои́м послуша́ния ревни́тельница су́щи, стяжа́ла еси́ ма́терь непоро́чныя моли́твы — глубоча́йшее смире́ние.
Припев: Преподо́бная княги́не Елисаве́то, моли́ Бо́га о нас.
Ма́рфа у́бо служа́ше Иису́су, Мари́я же седя́ше при ногу́ Его́. Ихже о́браз была́ еси́, преподобному́ченице, в дея́нии обрела́ еси́ виде́ния восхо́д во оби́тели твое́й.
Припев: Преподо́бная княги́не Елисаве́то, моли́ Бо́га о нас.
Иму́ще сердца́ моли́твою и слеза́ми очище́нныя, преподо́бныя жены́ Елисаве́то с други́нею Варва́рою, во Све́те Непристу́пнем зри́те Све́т.
Сла́ва Отцу́ и Сы́ну и Свято́му Ду́ху:
Ни сна́ дала́ еси́ очи́ма твои́ма, ниже́ ве́ждома дрема́ния, до́ндеже дости́гла еси́ любве́ благи́х, при́сно уча́щи ча́да твоя́: люби́те дру́г дру́га!
И ны́не и при́сно и во ве́ки веко́в. Ами́нь.
Богородичен: Объе́мь грехо́вныя плоды́, умертви́хся, и принося́ ду́шу непло́дну, зову́ Ти́: плодоно́сну покажи́, Яже Плодо́м Твои́м тле́ние потреби́вшая.
Пе́снь 5
Ирмос: Просвети́ на́с повеле́нии Твои́ми, Го́споди, и мы́шцею Твое́ю высо́кою Тво́й ми́р пода́ждь на́м, Человеколю́бче.
Припев: Преподо́бная княги́не Елисаве́то, моли́ Бо́га о нас.
Алчущих пита́тельницы, стра́нных уте́шительницы, неизлечи́мых больны́х посети́тельницы бы́ли есте́, сего́ ра́ди небе́сная насле́довасте.
Припев: Преподо́бная княги́не Елисаве́то, моли́ Бо́га о нас.
Сострада́тельная Елисаве́та потща́ся овча́та заблу́дшия взыска́ти, подража́ющи Па́стыря до́браго, Иже рече́: приидо́х спасти́ поги́бшаго.
Припев: Преподо́бная княги́не Елисаве́то, моли́ Бо́га о нас.
Кро́тость при́сную, смире́ние высо́кое, нелицеме́рную любо́вь, му́дрость же духо́вную стяжа́ла еси́, сего́ ра́ди тя́ ублажа́ем.
Сла́ва Отцу́ и Сы́ну и Свято́му Ду́ху:
Рыда́ние и го́ре неуте́шное пости́же оби́тель ми́рную, егда́ тя́ челове́цы зверонра́внии от среды́ ве́рных учени́ц твои́х отлуча́ху, ты́ же все́х утеша́ше.
И ны́не и при́сно и во ве́ки веко́в. Ами́нь.
Богородичен: Наде́жду и утвержде́ние, и спасе́ния сте́ну недви́жиму иму́ще Тя́, Всепе́тая, неудо́бства вся́каго избавля́емся.
Пе́снь 6.
Ирмос: Ри́зу мне́ пода́ждь све́тлу, одея́йся све́том, я́ко ри́зою, Многоми́лостиве Христе́ Бо́же на́ш.
Припев: Преподо́бная княги́не Елисаве́то, моли́ Бо́га о нас.
Язвы Го́спода Иису́са на телесе́х ва́ших нося́ще, всю́ си́лу а́дову в терпе́нии покори́сте.
Припев: Преподо́бная княги́не Елисаве́то, моли́ Бо́га о нас.
Му́ченицы непобеди́мии, не отверго́стеся Поже́ршагося за вы́, но Тому́ же́ртву непоро́чную себе́ принесо́сте.
Припев: Преподо́бная княги́не Елисаве́то, моли́ Бо́га о нас.
На ка́мени за́поведей бе́ основана́ хра́мина ду́ш ва́ших, сего́ ра́ди неподви́жни пребы́сте, страстоте́рпцы осмочи́слении.
Сла́ва Отцу́ и Сы́ну и Свято́му Ду́ху:
Иже на земли́ изгна́ни бы́ша Христа́ ра́ди, ны́не небожи́телие блаже́ннии ра́дуются во вся́ ве́ки.
И ны́не и при́сно и во ве́ки веко́в. Ами́нь.
Богородичен: Препе́тая Влады́чице, во святы́х Почива́ющаго па́че сло́ва родила́ еси́, сего́ ра́ди Тя́ пе́сньми почита́ем.
Конда́к, гла́с 4:
От сла́вы ца́рственныя, взе́мши кре́ст Христо́в, прешла́ еси́ к сла́ве небе́сней, моля́щися за враги́, и обрела́ еси́ ра́дость ве́чную, свята́я му́ченице княги́не Елисаве́то, с Варва́рою му́ченицею. Те́мже моли́те о душа́х на́ших.
Икос:
Же́ртвы Бо́гу живопогребе́нныя в кладезеподо́бный ро́в низри́нутыя: пре́жде все́х Елисаве́та страстоте́рпица, к го́рним устремле́нная княги́ня милосе́рдная, би́сер правосла́вия в но́вем оте́честве обре́тшая, ева́нгельски уби́йцу му́жа своего́ прости́вшая, моли́твою и благотворе́нием Бо́гу угоди́вшая, безбо́жными же безпоща́дно уму́ченная, те́мже вопие́м ти́: ра́дуйся, се́рдцем в Бо́зе утвержде́нная; радуйся, с ве́рою и упова́нием поне́сшая кре́ст тво́й и Христу́ после́довавшая. Ра́дуйся, избра́нная Бо́гом на служе́ние стра́ждущим, неве́сто Христо́ва; ра́дуйся, отда́вших жи́знь на служе́ние бли́жним покрови́тельнице. Ра́дуйся, за́поведи Госпо́дни испо́лнити возжеле́вшая; ра́дуйся, ре́вность по Бо́зе в сердца́х на́ших воспламеня́ющая. Радуйся, презре́нных и отве́рженных не оставля́ющая; ра́дуйся мно́гия ду́ши от тмы́ грехо́вныя и поги́бели спа́сшая. Радуйся, приобщи́тися страсте́м Христо́вым удосто́ившаяся; ра́дуйся, в испове́дничестем по́двизе лю́ди росси́йския утвержда́ющая. Ра́дуйся, же́ртво непоро́чная, благоприя́тная, Бо́гу принесе́нная; ра́дуйся, со все́ми святы́ми земли́ на́шея торжеству́ющая. Ра́дуйся, преподобному́ченице Елисаве́то, моли́твенница о душа́х на́ших.
Пе́снь 7.
Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.
Припев: Преподо́бная княги́не Елисаве́то, моли́ Бо́га о нас.
Поже́рты бы́ша святи́и, я́коже а́гнцы, за прегреше́ния наро́да и́х, и безгла́сны ведо́шася на предлежа́щий и́м по́двиг, взира́юще на нача́льника ве́ры Иису́са.
Припев: Преподо́бная княги́не Елисаве́то, моли́ Бо́га о нас.
Яко трие́ о́троцы в пещи́, пе́снь побе́ды над сме́ртию воспева́ху в ша́хту вве́ржени, му́ченицы святи́и: Изба́вителю Бо́же, благослове́н еси́.
Припев: Преподо́бная княги́не Елисаве́то, моли́ Бо́га о нас.
Блаже́ни есте́, умира́ющии о Го́споде, отны́не да почи́ете от трудо́в ва́ших, дела́ бо ва́ша всле́д ва́с да хо́дят, рече́ Ду́х Святы́й, повелева́я и на́м вопи́ти: Бо́же, благослове́н еси́.
Сла́ва Отцу́ и Сы́ну и Свято́му Ду́ху:
Подоба́ет ва́м по́честь от Го́спода, пострада́вшим кре́пко, и обнажи́вшим хи́трости вра́жия, и пою́щим согла́сно: Изба́вителю Бо́же, благослове́н еси́.
И ны́не и при́сно и во ве́ки веко́в. Ами́нь.
Богородичен: Пода́ждь на́м ра́дость неча́янную, е́же — ра́дуйся — от Ангела прии́мшая, да гла́сом ве́лиим возопии́м: Изба́вителю Бо́же, благослове́н еси́.
Пе́снь 8.
Ирмос: Благослови́те, о́троцы, Тро́ицы равночи́сленнии, Соде́теля Отца́ Бо́га, по́йте снизше́дшее Сло́во, и о́гнь в ро́су претво́ршее и превозноси́те все́м жи́знь подава́ющаго Ду́ха Всесвята́го во ве́ки.
Припев: Преподо́бная княги́не Елисаве́то, моли́ Бо́га о нас.
Во́ини христолюби́вии, изне́сше свята́я телеса́ ва́ша из земли́, че́стию во гро́бы положи́ша, пе́снь надгро́бную пою́ще: свяще́нницы, воспо́йте, лю́дие, превозноси́те Го́спода во ве́ки.
Припев: Преподо́бная княги́не Елисаве́то, моли́ Бо́га о нас.
Возлюби́вши Сио́н, Бо́жие жили́ще, и возжела́вши ви́дети блага́я Иерусали́ма вся́ дни́ живота́ своего́, свята́я Елисаве́та, погребе́ние в не́м прия́т, иде́же свяще́нницы пою́т, лю́дие превозно́сят Христа́ во ве́ки.
Припев: Преподо́бная княги́не Елисаве́то, моли́ Бо́га о нас.
Земля́ положе́нием свяще́нных му́ченик моще́й освяти́ся: и́бо исто́чник источа́ющ исцеле́ний вся́ческих сия́ Боже́ственнаго стяжава́ет, стра́сти теле́сныя и душе́вныя непреста́нно исцеля́ющи превознося́щим Христа́ во ве́ки.
Сла́ва Отцу́ и Сы́ну и Свято́му Ду́ху:
Тро́ичен: Триипоста́сный Бо́же! Приими́ на́с, гре́шных, боле́зненный гла́с воздыха́ния серде́чнаго. При́зри на стра́ждущую страну́ на́шу, да и в то́й вы́ну свяще́нницы пою́т, лю́дие же воспева́ют Тя́ во вся́ ве́ки.
И ны́не и при́сно и во ве́ки веко́в. Ами́нь.
Богородичен: Просвети́ ми о́чи серде́чныя, Яже две́рь Све́та чи́стая, о́блак страсте́й и тму́ глубо́кую разгоня́ющи, да пою́т свяще́нницы, лю́ди же превозно́сят Тя́ во вся́ ве́ки.
Песнь 9
Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.
Припев: Преподо́бная княги́не Елисаве́то, моли́ Бо́га о нас.
Вы́, страстоно́сцы осмочи́слении, в ча́янии осьма́го дне́ пребыва́ли есте́ непоколе́блеми до сконча́ния вре́меннаго жития́.
Припев: Преподо́бная княги́не Елисаве́то, моли́ Бо́га о нас.
Ца́рственнии о́трасли достохва́льнии, па́че плотска́го благоро́дия духо́вное улучи́ли есте́. Го́рняго Ца́рствия возжеле́ли есте, идеже Христо́с ца́рствует.
Припев: Преподо́бная княги́не Елисаве́то, моли́ Бо́га о нас.
Бо́г бо е́сть Бо́г живы́х, глаго́лет Госпо́дь, посему́ не забу́дите ча́д ва́ших в разсе́янии су́щих и стра́ждушую страну́ Росси́йскую, да изба́вимся от лю́тых враго́в на́ших.
Сла́ва Отцу́ и Сы́ну и Свято́му Ду́ху:
Пред святы́ми моща́ми ва́шими в земне́м Иерусали́ме мо́лимся: пре́жде да́же до конца́ не поги́бнем, заступи́те на́с и введи́те в го́рний Иерусали́м.
И ны́не и при́сно и во ве́ки веко́в. Ами́нь.
Богородичен: Пред Держа́вною Твое́ю ико́ною, Влады́чице, моля́хуся страстоте́рпцы: не отыми́ от на́с покро́ва Твоего́!
Свети́лен.
Прииди́те, мучениколю́бцев собо́р, зде́ совоку́пльшеся в Гефсимани́йстей ве́си, припаде́м к честны́м моще́м страстоте́рпиц и в моли́тве те́плой испро́сим ниспосла́ти на́м ми́р и ве́лию ми́лость.
Богородичен:
Обо́лкся в мя́, про́йде из Тебе́ Бо́г, нетле́ния облече́ мя оде́ждою, злы́м нра́вом обна́жшася боже́ственныя оде́жды, Богороди́тельнице Влады́чице, все́х челове́ков прибе́жище, му́чеников венцено́сных утвержде́ние и стена́ и Ангелов ра́дование.
Молитва святой преподобномученице великой княгине Елисавете
О святыя новомученицы Российския, великая княгине Елисавето и сестро ея крестовая пречестная инокине Варваро, купно путь свой во мнозех муках скончавшия, евангельския заповеди делом во Обители милосердия совершившия, веры ради православныя подвизающися до смерти в последняя времена сия, и добрый плод в терпении страстей Христу принесшия! Молитеся Ему, яко победителю смерти, да утвердит Церковь Русскую Православную и отечество наше, кровию и страданьми новомучеников искупленныя, и не даст в расхищение врагом России достояния нашего. Се бо лукавый враг вооружися на ны, хотя нас погубити в междоусобных бранех, скорбех, нестерпимых печалех, болезнех, нуждах и бедах лютых. Умолите Господа низложити вся немощныя дерзости их; веру в сердцах людей российских укрепите, да егда найдет на ны испытания час, мужества дар восприимем вашими молитвами, отвергшеся себе и вземше крест свой, последуем, Христу, распинающе плоть свою со страстьми и похотьми. Сохраните нас от всякаго зла, освятите пути жизни нашея, даруйте покаяние нелицемерное, тишину и мир душам нашим, испросите у Господа всем нам мытарств горьких и вечныя муки избавитися и Небесному Царствию наследники быти со всеми святыми, от века угодившими Богу, да радующеся воздадим хвалу, честь и поклонение Отцу и Сыну и Святому Духу во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святой преподобномученице Елисавете Святой преподобномученице Елисавете](img_b/047.jpg)