18 июля.

Канон преподобному Афанасию Афонскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 3:

Еже во пло́ти житию́ твоему́ удиви́шася Ангельстии чи́ни: ка́ко с те́лом к неви́димым сплете́нием изше́л еси́, присносла́вне, и уязви́л еси́ де́монския полки́. Отону́дуже, Афана́сие, Христо́с тебе́ воздаде́ бога́тыми дарова́ньми, сего́ ра́ди, о́тче, моли́ спасти́ся душа́м на́шим.

Кано́н свята́го, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподо́бне о́тче Афана́сие, моли́ Бо́га о нас.

Безсме́ртия бы́в тезоимени́т, житие́м скончава́я, и́стиннаго яви́лся еси́, о́тче Афана́сие, безсме́ртия прия́телище, преше́д от вре́менных, но, Христу́ предстоя́, помяни́ на́с, помина́ющих тя́.

Припев: Преподо́бне о́тче Афана́сие, моли́ Бо́га о нас.

Благочести́в от мя́гких бы́в ногте́й, преподо́бне, к доброде́тели стяжа́нию роди́телей лише́ние тя́ ника́коже возбрани́, но все́ жела́ние все́ю си́лою и тща́ние обрати́л еси́ к еди́ному Соде́телю.

Сла́ва Отцу́ и Сы́ну и Свято́му Ду́ху:

От усте́н скве́рных хвалу́, дерзну́в, пою́ тебе́, и́же о тебе́ жела́ния прие́мник бы́в и любве́ сою́зник, но, о́тче, ми́лостив бу́ди и да́ждь по достоя́нию тебе́ сию́ принести́ хвалу́.

И ны́не и при́сно и во ве́ки веко́в. Ами́нь.

Богородичен: Мла́до Отроча́ па́че сло́ва родила́ еси́, Ве́тхаго де́ньми, но́ву на земли́ стезю́ доброде́тели показа́вша, Его́же уго́дник Тво́й при́сный Афана́сий, Отрокови́це, любо́вию снеда́емь, си́й хра́м Тебе́ созда́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, Еди́не Человеколю́бче.

Припев: Преподо́бне о́тче Афана́сие, моли́ Бо́га о нас.

От де́тства уже́ к Бо́гу любо́вию взя́т, све́рстныя от дете́й собира́я и ли́к составля́я, духо́вно вчита́л еси́, де́тския, прему́дре, си́х обы́чаи изыма́я.

Припев: Преподо́бне о́тче Афана́сие, моли́ Бо́га о нас.

Прему́дрости жела́нием преше́д, ко благоразу́мному гра́ду Константи́ню, богому́дре, доше́л еси́, я́коже пчела́ му́драя, и, любоде́льно чи́стая от слове́с совоку́пль, неполе́зная оста́вил еси́.

Сла́ва Отцу́ и Сы́ну и Свято́му Ду́ху:

Ве́трилом, о́тче, Креста́ душе́вный тво́й кора́бль окорми́в, благоути́шно же и легко́ жите́йскаго лю́таго потопле́ния избе́гл еси́ и к тишине́ боже́ственных извле́кл еси́ приста́нищ, ра́дуяся.

И ны́не и при́сно и во ве́ки веко́в. Ами́нь.

Богородичен: Иже пре́жде ве́к рожде́йся от Отца́ неизрече́нно напосле́док из утро́бы Твоея́ про́йде и обожи́ на́ше естество́, Ма́ти Де́во, Иже преподо́бных ли́ки я́ве изводя́й.

Седа́лен, гла́с 8.

От ю́ности вся́ оста́вль жите́йская, кра́сная же и ле́потная, усе́рдно после́довал еси́ Зва́вшему тя́, преподо́бне, и, на ра́мо взя́л Кре́ст Го́спода твоего́, в посте́х, о́тче, те́ло изнури́л еси́, те́м и па́стыря тя́ Свои́м овца́м до́бре устроя́ет Всеблаги́й Госпо́дь, Афана́сие блаже́нне. Моли́ Христа́ Бо́га прегреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Преподо́бне о́тче Афана́сие, моли́ Бо́га о нас.

Ум страсте́й влады́ку творя́, и боже́ственными зако́ны наставля́емь, и за́поведьми Бо́жиими уверя́емь, младе́нец бесе́дования, и скве́рных со́нмища, и пляса́ния бесо́в благоче́стно возрази́, я́ко прему́др лу́чшее избира́я.

Припев: Преподо́бне о́тче Афана́сие, моли́ Бо́га о нас.

Прие́м ле́гкое Спа́са и́го, и боже́ственным стра́хом составля́емь, и очи́щ те́ло и ду́шу, бы́л еси́ чистоты́ и целому́дрия вина́, и преде́л воздержа́ния, и печа́ть безстра́стия, и любве́ о́браз, Афана́сие.

Сла́ва Отцу́ и Сы́ну и Свято́му Ду́ху:

Проше́д е́же по на́с, и вне́шнее ты́ наказа́ние любому́дрия, прозяба́тельное и реши́тельное, ко́еждо прохожда́л еси́, пра́вдою огражда́емь, му́дростию и разсужде́нием, смире́нием и ра́зумом и ине́ми кра́сными дарова́нии.

И ны́не и при́сно и во ве́ки веко́в. Ами́нь.

Богородичен: Плещми́ херуви́мскими стра́шными носи́мь Влады́ка на престо́ле я́коже о́гненне, в Твою́, Чи́стая, всели́ся утро́бу и пло́ти прия́тием челове́ческое обожи́ существо́, я́ко учи́т изря́дный в преподо́бных Афана́сий, еди́на Всепе́тая.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Преподо́бне о́тче Афана́сие, моли́ Бо́га о нас.

Яви́лся еси́, я́коже магни́т, привлача́ сла́достию, о́тче, слове́с твои́х к наказа́нию и послуша́нию уче́нием, и́же рече́нным непреста́нно зре́ти и ви́дети честно́е твое́ и ра́достное лице́.

Припев: Преподо́бне о́тче Афана́сие, моли́ Бо́га о нас.

Зако́ном Боже́ственным после́дуя и повеле́нием повину́яся Сотво́ршаго, законополо́жник яви́лся еси́ мона́хом и пра́вило изве́стнейшее, наказа́тель безу́мным, и наста́вник заблу́ждшим и свети́льник во тме́, пресла́вне.

Сла́ва Отцу́ и Сы́ну и Свято́му Ду́ху:

Доброде́телей орга́н и благодарова́ний прия́телище Ду́ха Свята́го сы́й, свяще́нно и красно́ жили́ще созда́л еси́, вся́ко житие́ и жи́знь прора́сленно мона́хом предлага́я.

И ны́не и при́сно и во ве́ки веко́в. Ами́нь.

Богородичен: Вити́йская не мо́гут уста́ по достоя́нию Тя́ пе́ти, Всепе́тая, вы́шшу су́щу херуви́м и вся́кия тва́ри. Те́мже с боже́ственным Афана́сием Влады́ку о все́х на́с помоли́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподо́бне о́тче Афана́сие, моли́ Бо́га о нас.

Умертви́л еси́ плотски́я по́хоти воздержа́нием мно́гим, распя́л еси́ себе́ ми́ру и страсте́м, поще́ньми и слеза́ми, моли́твами и пе́сньми непреста́нными прилепля́яся Бо́гу.

Припев: Преподо́бне о́тче Афана́сие, моли́ Бо́га о нас.

Мона́шествующих наста́вник, су́щих в горе́ Афо́нстей, и о́браз и начерта́ние доброде́тельных дея́ний сы́й, украси́л еси́ я́же та́мо вся́ безсупру́жных пребыва́ния.

Сла́ва Отцу́ и Сы́ну и Свято́му Ду́ху:

Сла́док, пра́в и бла́г, кро́ток же и смире́н, благопристу́пен прибли́жник, ми́лостив бы́л еси́, ще́др и благосе́рд, ти́х о́бразы, Христо́в подража́тель нра́вы.

И ны́не и при́сно и во ве́ки веко́в. Ами́нь.

Богородичен: Но́в, я́коже Моисе́й, я́влься, устро́ил еси́, я́коже другу́ю ски́нию, огра́ду, всече́стне, ю́же и превозрасти́л еси́ боле́зньми и по́ты, и возложи́л еси́ Ма́тери Бо́жией.

Конда́к, гла́с 8.

Яко невеще́ственных суще́ств зри́теля изря́дна и де́ятельна сказа́теля всеи́стинна, взыва́ет тя́ ста́до твое́, богоглаго́льниче: не оскуде́й, моля́ о рабе́х твои́х, изба́витися напа́стей и обхожде́ний, вопию́щим ти́: ра́дуйся, о́тче Афана́сие.

Икос:

Свы́ше твое́ зва́ние прие́м пресла́вно, безсме́ртную жи́знь насле́довал еси́: с пло́тию бо на земли́ безпло́тных житие́ проше́д, бы́л еси́ страстьми́ неприя́тен. Те́мже тя́ хва́лим, о́тче: ра́дуйся, све́тлая мона́шествующих сла́во; ра́дуйся, я́сный целому́дрия сто́лпе; ра́дуйся, му́жества я́ве сказа́тельное позна́ние; ра́дуйся, прему́драго ра́зума явле́ние; ра́дуйся, пра́вило равностоя́тельное пра́вды изве́стие; ра́дуйся, сло́вом соверши́вшу ти́ дея́нием стремле́ния; ра́дуйся, у́ме, наслажда́яся мы́слей неизрече́нных; ра́дуйся, всю́ тва́рь благоче́стно уди́вль; ра́дуйся, и́мже посрами́шася де́мони; ра́дуйся, и́мже вся́ка стра́сть умертви́ся; ра́дуйся, исто́чниче живото́чных во́д. Ра́дуйся, спаси́телю ве́рно ти вопию́щих: ра́дуйся, о́тче Афана́сие.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Преподо́бне о́тче Афана́сие, моли́ Бо́га о нас.

Всю́ обтече́ отню́д тва́рь жития́ твоего́ исправле́ний веща́ние, о́тче, и в пресла́вную дости́гл еси́ высоту́, Бо́гу тя́ просла́вльшу и наро́чита все́м сотво́ршу.

Припев: Преподо́бне о́тче Афана́сие, моли́ Бо́га о нас.

Ни́щих строи́тель, вдови́ц предста́тель, промы́сленник си́рых, печа́льных ско́рая уте́ха, потопля́емых приста́нище, оби́димых заступле́ние бы́л еси́, твоему́, о́тче, подо́бяся учи́телю.

Сла́ва Отцу́ и Сы́ну и Свято́му Ду́ху:

Звезду́ всеми́рну и мона́шествующих свети́ло незаходи́мо, помо́щника в беда́х, гре́шников ве́лие прибе́жище ве́дый, хода́тая и моли́твенника предлага́ю Влады́це Христу́ тя, всече́стне.

И ны́не и при́сно и во ве́ки веко́в. Ами́нь.

Богородичен: Ви́дети жела́я Тво́й уго́дник Твоего́ Сы́на и Бо́га неизрече́нную сла́ву, Богороди́тельнице, Сего́ Честны́й Кре́ст на ра́му взе́м, после́дова живоно́сным Его́ и Боже́ственным стопа́м.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподо́бне о́тче Афана́сие, моли́ Бо́га о нас.

Юношески побежда́я нача́ла, Афана́сие, и вла́сти тмы́, вели́к учи́тель бы́л еси́ и наста́вник спаси́тельный, наве́ты, и ла́яния, и ле́сти те́х открыва́я, ста́до твое́ всего́ де́монов злоде́йствия невреди́мо соблюда́я.

Припев: Преподо́бне о́тче Афана́сие, моли́ Бо́га о нас.

На земли́ я́ко челове́к ходя́, житие́ на небесе́х я́ко вои́стинну стяжа́л еси́, Ангелом собесе́дник я́влься, житие́ и жи́знь соверша́я о́нех, с ни́миже воспева́еши ны́не: свяще́нницы, благослови́те, лю́дие, превозноси́те Христа́ во ве́ки.

Сла́ва Отцу́ и Сы́ну и Свято́му Ду́ху:

Тя́, соше́дшеся дне́сь, досто́йно хва́лим и моще́й твои́х чти́м ра́ку, страсте́й избавле́ние, согреше́ний оставле́ние, вся́кая напа́сти и обстоя́ния разреше́ние прося́ще моли́твами твои́ми, святу́ю твою́ па́мять ве́рно и ра́достно соверша́юще во ве́ки.

И ны́не и при́сно и во ве́ки веко́в. Ами́нь.

Богородичен: Якоже Илия́ пе́рвее в Карми́ле всели́ся, та́ко и ты́, в горе́ Афо́нстей упражня́яся, возжела́л еси́ осо́бь бы́ти с Бо́гом и, богонача́льными озари́вся виде́нии, уго́дник яви́лся еси́ Чи́стей Богоро́дице, вопия́ Ей, — ра́дуйся, — со арха́нгелом.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподо́бне о́тче Афана́сие, моли́ Бо́га о нас.

В чистоте́ и целому́дрии, и в чи́сте пребыва́нии, и житии́ нескве́рнене, я́ко безпло́тен, на земли́ пожи́в, восте́кл еси́ к небе́сным стезя́м, и со все́ми ра́дуешися преподо́бными и пра́ведными, моля́ о все́х Христа́.

Припев: Преподо́бне о́тче Афана́сие, моли́ Бо́га о нас.

Вельми́ возвели́чил еси́ на земли́ твоего́ Влады́ку, и у́ды твои́ми виде́нием и де́телию Сего́ просла́вль пресла́вно, яви́лся еси́ взо́рен всю́ду и сла́вен бы́л еси́, богоно́се: доброде́тель бо ве́сть вои́стинну посрами́ти и супоста́та.

Сла́ва Отцу́ и Сы́ну и Свято́му Ду́ху:

Совокупи́лся еси́ со безпло́тными во́инствы, и преподо́бным лико́м сочета́лся еси́, и со избра́нными все́ми лику́еши, прича́щся и́стинным обоже́нием и безсме́ртною, о́тче, жи́знию. С ни́миже о ста́де твое́м непреста́нно твоего́ Влады́ку моли́.

И ны́не и при́сно и во ве́ки веко́в. Ами́нь.

Богородичен: Хра́м освяще́н, вме́стен Еди́ному от Тро́ицы сы́й, хра́м Тво́й, Влады́чице, уго́дник че́стен Афана́сий воздви́же в сла́ву Твою́ и че́сть, в не́мже непреста́нно не преста́й да́рующи по́мощь моли́твами Твои́ми.

Свети́лен:

Яко издале́ча возсия́л еси́ те́мным, сы́й светоно́сен, и мра́чныя страны́, Афана́сие, просвети́л еси́ твои́х доброде́телей све́тлостию, но не преста́й моля́ся о ми́ре Го́сподеви.

Сла́ва, и ны́не, Богородичен:

Умоле́на бы́вши, Всецари́це, мольба́ми Твоего́ честна́го Афана́сия, храни́ ста́до Твое́ неприкоснове́нно вся́каго супроти́вства, всегда́ Тя́ моля́щее, Предста́тельницу ми́ра.

Молитва преподобному Афанасию Афонскому

Преподобне отче Афанасие, изрядный угодниче Христов и великий Афонский чудотворче! Во дни земнаго жития твоего многия на путь правый наставивый и в Царствие Небесное мудре руководивый, скорбныя утешивый, падающим подавый руку помощи и всем любезен, милостив и сострадателен отец бывый, ты ныне, в Небесней пребывая светлости, наипаче умножавши любовь твою к нам, немощным, в мори житейстем различие бедствующим, искушаемым духом злобы и страстьми своими, воюющими на дух. Сего ради смиренно молим тя, святый отче: по данней тебе от Бога благодати помози нам творити волю Господню в простоте сердца и смирении, искушения же вражия победити и свирепое страстей море изсушити, да тако немокренно прейдем житейскую пучину и предстательством твоим ко Господу сподобимся достигнути обетованнаго нам Царствия Небеснаго, славяще Безначальную Троицу, Отца и Сына и Святаго Духа, ныне, и присно, и во веки веков. Аминь.