17 июля.

Канон преподобной Марфе, матере святаго Симеона Дивногорца.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, ма́ти, изве́стно спасе́ся, е́же по о́бразу: прии́мши бо кре́ст, после́довала еси́ Христу́, и, де́ющи, учи́ла еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бная Ма́рфо, ду́х тво́й.

Кано́н преподо́бныя, гла́с 8.

Пе́снь 1.

Ирмос: Истря́сшему в мо́ри мучи́тельство фарао́не и Изра́иля су́шею наста́вльшему, пои́м Христу́, я́ко просла́вися во ве́ки.

Припев: Преподо́бная мати Ма́рфо, моли́ Бо́га о нас.

Боже́ственным жела́нием уя́звена ве́чных бла́г, сла́ву тле́нную и пи́щу преоби́дела еси́. Те́мже и Ангельское, преподо́бная, житие́ пожила́ еси́ боже́ственне.

Припев: Преподо́бная мати Ма́рфо, моли́ Бо́га о нас.

Распала́ема боже́ственным рве́нием, богому́жно пожи́вши, родила́ еси́ свети́льника ве́рным и забра́ло, втора́го Саму́ила, и пусты́ни кра́сное воспита́ние.

Сла́ва Отцу́ и Сы́ну и Свято́му Ду́ху:

Прозябе́ние яви́ся воздержа́ния, возсия́вши на́м со́лнце многосве́тлое, и вели́ка целе́бника, прему́драго Симео́на, и восто́чней стране́ предста́теля же и сте́ну.

И ны́не и при́сно и во ве́ки веко́в. Ами́нь.

Богородичен: Земли́ исча́дие, Богоро́дице, сы́нове Бо́жии благода́тию Боже́ственною и неизрече́нным рождество́м Твои́м, пое́м Тя́ приле́жно, еди́ну вино́вну су́щаго спасе́ния.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.

Припев: Преподо́бная мати Ма́рфо, моли́ Бо́га о нас.

Пло́д прече́стен из утро́бы твоея́ Влады́це прине́сши, же́ртву соверше́нну, сама́ же себе́ воздержа́ния огне́м принесла́ еси́, Ма́рфо, песносло́вящи Его́.

Припев: Преподо́бная мати Ма́рфо, моли́ Бо́га о нас.

Же́ртву благоприя́тну и присноживо́тну Христу́ твоему́ принесла́ еси́, прозя́бшаго из ложе́сн твои́х, богоно́сице преподо́бная, ве́рных утвержде́ние, и сте́ну, и забра́ло.

Сла́ва Отцу́ и Сы́ну и Свято́му Ду́ху:

К высоте́ небе́сней впери́ла еси́ ду́шу с те́лом и была́ еси́ единожи́тельница му́дрым де́вам и боже́ственное изображе́ние ве́рою притека́ющим к Бо́гу.

И ны́не и при́сно и во ве́ки веко́в. Ами́нь.

Богородичен: На ка́мени, Пречи́стая, упова́ния моего́ души́ моея́ восхо́ды поло́жь, недви́жимь при́сно пребыва́я, хвалю́ и сла́влю Тя́, еди́ну Засту́пницу мою́.

Седа́лен Ма́рфы, гла́с 4:

Непреста́нно в моли́твах бдя́щи и ми́лостынею Бо́гу угожда́ющи, в Боже́ственныя хра́мы, прехва́льная, ча́сто ходя́щи, Ма́рфо, слеза́ми, и посто́м, и ве́рою моля́щися, прия́ла еси́ свяще́нно отроча́, с ни́мже моли́ся спасти́ся от бе́д на́м, любо́вию чту́щим тя́.

И ныне Сла́ва, богородичен:

Де́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, и́же ве́рою и любо́вию пою́щим Тя́ по до́лгу, еди́на Всепе́тая.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Преподо́бная мати Ма́рфо, моли́ Бо́га о нас.

Иму́щи Христа́ при́сно во уме́, любве́ тле́нных и жела́ния возгнуша́лася еси́ и сего́ ра́ди дарова́ния сподо́билася еси́, Ма́рфо, Того́ просла́вльши.

Припев: Преподо́бная мати Ма́рфо, моли́ Бо́га о нас.

Попали́вши страсте́й, Ма́рфо, треволне́ние, угаси́ла еси́ звере́й ди́виих наше́ствия, мы́сленнаго же Амали́ка многоплете́нныя се́ти посрами́ла еси́.

Сла́ва Отцу́ и Сы́ну и Свято́му Ду́ху:

Была́ еси́ ве́рных предгра́дие и стена́, чи́стою любо́вию тя́ чту́щим и святу́ю твою́ па́мять творя́щим, богоблаже́нная, ве́рных помо́щнице.

И ны́не и при́сно и во ве́ки веко́в. Ами́нь.

Богородичен: Яви́лася еси́ мы́сленный о́блак, Богоро́дице, нося́щи Самаго́ Со́лнца сла́вы с пло́тию, озаря́ющаго всю́ тва́рь све́том Боже́ственныя благода́ти.

Пе́снь 5

Ирмос: От но́щи неве́дения богове́дением просвети́вый концы́, просвети́ мя у́тром человеколю́бия Твоего́, Го́споди.

Припев: Преподо́бная мати Ма́рфо, моли́ Бо́га о нас.

На не́бо зря́щи твое́ прозябе́ние, столпо́м вознесе́на, сего́ боже́ственными дея́нии, Ма́рфо, Вы́шняго воспева́ла еси́ Христа́.

Припев: Преподо́бная мати Ма́рфо, моли́ Бо́га о нас.

С небесе́ отве́т, богоблаже́нная Ма́рфо, прия́т я́ве и зачала́ еси́ от Боже́ственнаго открове́ния вели́каго служи́теля.

Сла́ва Отцу́ и Сы́ну и Свято́му Ду́ху:

Твое́ прозябе́ние, преподо́бная, Антиохи́йский у́бо гра́д предлага́ет те́пла предста́теля, и сте́ну, и прибе́жище су́щим в ско́рбех.

И ны́не и при́сно и во ве́ки веко́в. Ами́нь.

Богородичен: Же́зл си́лы Тя́ наде́ющиися на Тя́, Богоневе́сто, иму́ще, побежда́ем супоста́тныя полки́.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Преподо́бная мати Ма́рфо, моли́ Бо́га о нас.

Вся́ческих Цари́цу от души́ вожделе́вши, украси́лася еси́ сама́ чистото́ю и дарова́ния Ея́ ра́ди, Ма́рфо, улучи́ла еси́.

Припев: Преподо́бная мати Ма́рфо, моли́ Бо́га о нас.

Ста́рей му́дрости твое́й, честна́я, удиви́шася Ангели, и челове́цы пою́т вся́ческих Творца́, тя́ просла́вльшаго.

Сла́ва Отцу́ и Сы́ну и Свято́му Ду́ху:

Яко дре́во благора́слено же и красно́, себе́ украси́ла еси́ и зерца́ло была́ еси́ нескве́рно явле́нием Свята́го Ду́ха.

И ны́не и при́сно и во ве́ки веко́в. Ами́нь.

Богородичен: Тишину́ Тя́ в бу́ри страсте́й и скорбе́й, Влады́чице, при́сно предзря́, во приста́нище спасе́ния притека́ю.

Конда́к Ма́рфы, гла́с 2.

В моли́твах Го́сподеви предстоя́щи, Пречи́стей Де́ве Богоро́дице пе́ние и хвалы́ принося́щи, Ма́рфо честна́я, породила́ еси́ свяще́нное отроча́, Симео́на преди́внаго, свети́льника всеми́рнаго, с ни́мже моли́ при́сно о все́х на́с.

Пе́снь 7.

Ирмос: В нача́ле зе́млю основа́вый и небеса́ сло́вом утверди́вый, благослове́н еси́ во ве́ки, Го́споди, Бо́же оте́ц на́ших.

Припев: Преподо́бная мати Ма́рфо, моли́ Бо́га о нас.

Страстну́ю совле́кши ри́зу, в безстра́стную оде́жду оде́ялася еси́, и Жениху́ чи́сто, преподо́бная, обручи́лася Христу́, и угоди́ла еси́.

Припев: Преподо́бная мати Ма́рфо, моли́ Бо́га о нас.

Сто́лп о́гнен твое́ прозябе́ние яви́ся, Ма́рфо честна́я, просвеща́ющ, ми́р и я́же в ми́ре очища́я от неразу́мия те́мнаго и вся́каго ина́го гне́ва.

Сла́ва Отцу́ и Сы́ну и Свято́му Ду́ху:

Плотска́я погаси́ла еси́ возноше́ния, и мы́сленных вра́г кова́рствия возгнуша́лася еси́, преподо́бная Ма́рфо, и си́х сплете́ния на зе́млю низве́ргла еси́.

И ны́не и при́сно и во ве́ки веко́в. Ами́нь.

Богородичен: Ви́дети на́м сла́ву Сы́на Твоего́ и чи́сте ея́ наслади́тися, Тя́ жела́ющим и воспева́ющим, моли́ся приле́жно, Богоблагода́тная.

Пе́снь 8.

Ирмос: На горе́ святе́й просла́вльшася и в купине́ огне́м Присноде́вы Моисе́ови та́йну я́вльшаго, Го́спода по́йте и превозноси́те во вся́ ве́ки.

Припев: Преподо́бная мати Ма́рфо, моли́ Бо́га о нас.

Нището́ю вре́менных стяжа́ла еси́ бога́тство, Ма́рфо, ве́чное и сла́ву. И сего́ ра́ди любо́вию взыва́ла еси́: Го́спода по́йте и превозноси́те Его́ во ве́ки.

Припев: Преподо́бная мати Ма́рфо, моли́ Бо́га о нас.

Ве́дый Бо́г твое́ се́рдце и жела́ние, его́же родила́ еси́ от младе́нства, преподо́бная Ма́рфо, ве́рою серде́чною венча́ боже́ственне ве́рою вопию́ща Ему́ во ве́ки вся́.

Сла́ва Отцу́ и Сы́ну и Свято́му Ду́ху:

Све́тлый твоего́ пра́здника де́нь озаря́ет ве́рных мы́сли и просвеща́ет всю́ зе́млю, я́коже денни́ца, да́же до коне́ц земли́ всесия́я.

И ны́не и при́сно и во ве́ки веко́в. Ами́нь.

Богородичен: Иже естество́ на́ше созда́вый, из Тебе́ сие́ обле́к, Богоро́дице, вообража́ет и обновля́ет я́ко Человеколю́бец Тя́ песносло́вящия и славосло́вящия вои́стинну Богоро́дицу.

Песнь 9

Ирмос: Велича́ем Тя́, Ма́терь Бо́жию, и сла́вим Тя́, Богоро́дице Де́во, я́ко Спа́са ро́ждшую ду́ш на́ших.

Припев: Преподо́бная мати Ма́рфо, моли́ Бо́га о нас.

Единообра́зно, Ма́рфо, лику́ющи с сы́ном, моли́ Христа́ Бо́га на́шего о почита́ющих тя́.

Припев: Преподо́бная мати Ма́рфо, моли́ Бо́га о нас.

Благоче́стно пожи́вши, в труде́ му́жески подвиза́лася еси́ от него́же сокры́ла еси́ бога́тство небе́сное.

Сла́ва Отцу́ и Сы́ну и Свято́му Ду́ху:

Облобыза́ем твои́х моще́й ра́ку, Ма́рфо всечестна́я, из нея́же почерпа́ем исцеле́ний во́ды.

И ны́не и при́сно и во ве́ки веко́в. Ами́нь.

Богородичен: Па́че со́лнечных лу́ч моли́тва Твоя́ возсия́вши, просвеща́ет, Пречи́стая, Тя́ велича́ющия.

Молитва

О свята́я преподо́бная мати Ма́рфо. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.