17 июля.
Канон первый благоверному князю Андрею Боголюбскому, Владимирскому.
![благоверному князю Андрею Боголюбскому, Владимирскому благоверному князю Андрею Боголюбскому, Владимирскому](img_i/097.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Я́ко благове́рен и пра́веден,/ за любо́вь Христа́ Бо́га от свои́х смерть прия́л еси́,/ кровь свою́ пролия́в,/ я́коже пре́жде сро́дницы твои́ и страстоте́рпцы Бори́с и Глеб,/ и́хже кро́вем совопие́т и твоя́ кровь, свя́те, к Бо́гу,/ я́коже А́веля и Заха́рии пра́ведных,/ благове́рный страстоте́рпче, вели́кий кня́же Андре́е,/ с ни́миже Христа́ Бо́га моли́ о стране́ на́шей, е́же Богоуго́дней бы́ти/ и сыново́м росси́йским спасти́ся.
Тропа́рь, гла́с 3:
Е́же во пло́ти житию́ твоему́ удиви́шася а́нгельстии чи́ни:/ ка́ко с те́лом к неви́димым сплете́нием изше́л еси́, пресла́вне,/ и уязви́л еси́ де́монския полки́./ Отону́дуже, Андре́е, Христо́с тебе́ воздаде́ бога́тыми дарова́ньми:/ сего́ ра́ди, о́тче, моли́ спасти́ся душа́м на́шим.
Кано́н первый. Глас 8.
Пе́снь 1.
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ песнь Бо́гови воспева́юща.
Припев: Благове́рне кня́же Андре́е, моли́ Бо́га о нас.
Сла́внейшаго Тебе́ Царя́ и Влады́ку Небе́сных сил и вся́каго созда́ния,/ Творца́ же и Го́спода, Триипоста́снаго и Единосу́щнаго Бо́га молю́:/ отве́рзи уста́ моя́ недосто́йная пе́ти раба́ Твоего́,/ вели́каго кня́зя и чудотво́рца Андре́я.
Припев: Благове́рне кня́же Андре́е, моли́ Бо́га о нас.
Богоспаса́емаго земна́го оте́чества быв сла́ва и глава́,/ Небе́снаго оте́чества насле́дник показа́лся еси́, благове́рный кня́же Андре́е,/ проли́тием кро́ве твоея́ непови́нныя,/ в не́мже лику́я со Ангелы, пое́ши Еди́но Божество́ Святы́я Тро́ицы.
Сла́ва Отцу́ и Сы́ну и Свято́му Ду́ху:
Гра́да Вы́шняго Сио́на в кро́вех водворя́яся,/ трисо́лнечнаго Божества́ сла́вы бога́тно наслажда́ешися,/ ея́же и нас прича́стники сотвори́ непреста́нными твои́ми ко Го́споду предста́тельствы,/ пою́щих тя, блаже́нне кня́же Андре́е.
И ны́не и при́сно и во ве́ки веко́в. Ами́нь.
Богородичен: Влади́мира гра́да Росси́йския держа́вы благочести́вый наро́д просвети́ла еси́,/ о Преблагослове́нная Богоро́дице Мари́е,/ Андре́евым принесе́нием чудотво́рнаго Твоего́ о́браза,/ его́же списа́ Богогла́сный евангели́ст Лука́.
Пе́снь 3.
Ирмос: Утвержде́ние мое́, Спа́се, еси́,/ прибе́жище мое́ и си́ла,/ поколеба́вшееся се́рдце мое́ утверди́ в стра́се Твое́м,/ я́ко несть свят, я́коже Ты, Бог наш.
Припев: Благове́рне кня́же Андре́е, моли́ Бо́га о нас.
Святы́я Богоро́дицы чудотво́рный о́браз/ я́ко непобеди́мое ору́жие на враги́ и покро́в тверде́йший во бра́нех име́л еси́, досточу́дне Андре́е,/ всю свою́ наде́жду на Первообра́зную полага́я,/ ве́дый Тоя́ всеси́льное заступле́ние.
Припев: Благове́рне кня́же Андре́е, моли́ Бо́га о нас.
Собо́рныя це́ркве Влади́мирския основа́тель и украси́тель был еси́, преблаже́нне,/ храм светоза́рен Го́сподеви име́я се́рдце твое́;/ хра́мы и нас соде́лай Ду́ху Свято́му/ непреста́нными твои́ми и богоприя́тными моли́твами, всече́стне.
Сла́ва Отцу́ и Сы́ну и Свято́му Ду́ху:
Апо́стольския про́поведи о Христе́ и оте́ческая уче́ния тве́рдо в се́рдце твое́м печатле́я,/ благоче́стием и ве́рою просия́л еси́, пресла́вне, па́че со́лнца,/ в те́хже моли́ и нам сохране́нным бы́ти до конца́ Того́ благода́тию.
И ны́не и при́сно и во ве́ки веко́в. Ами́нь.
Богородичен: Вели́кия та́йны чу́до на Тебе́ устро́ися, Богоизбра́нная Отрокови́це:/ Безнача́льнаго бо Отца́ Единосу́щное Сло́во де́йством Свята́го Ду́ха из Тебе́ воплоти́ся/ во спасе́ние на́ше и обновле́ние, Благода́тная.
Та́же седа́лен, гла́с 5.
Па́мять блаже́ннаго и пра́веднаго страстоте́рпца,/ вели́каго кня́зя Андре́я Боголюби́ваго, похва́льными пе́сньми возвели́чим:/ днесь бо предстои́т у Престо́ла всех Царя́, Христа́ Бо́га,/ и мо́лится непреста́нно Го́сподеви грехо́в оставле́ние и жития́ исправле́ние дарова́ти/ пра́зднующим духо́вно святу́ю его́ па́мять/ и ве́рно покланя́ющимся чудотво́рней ра́це моще́й его́.
Сла́ва И ны́не, Богоро́дичен:
Предста́тельство на́ше кре́пкое, и покро́в,/ и сте́ну непребори́мую воспои́м, Мари́ю Де́ву Всенепоро́чную:/ при́сно бо предстоя́щи/ Престо́лу Сы́на Своего́ и Бо́га,/ мо́лит Того́ дарова́ти благовре́менну по́мощь и спасе́ние всем, усе́рдно призыва́ющим Ю/ и ве́рно покланя́ющимся свято́му Ея́ о́бразу.
Пе́снь 4.
Ирмос: Услы́шах, Го́споди, слух Твой и убоя́хся,/ я́ко неизрече́нным Сове́том,/ Бог Сый Присносу́щный,/ от Де́вы проше́л еси́, вопло́щся./ Сла́ва снизхожде́нию Твоему́, Христе́,/ сла́ва си́ле Твое́й.
Припев: Благове́рне кня́же Андре́е, моли́ Бо́га о нас.
Це́ркви мно́гия созда́л еси́ во сла́ву Иису́са Христа́/ и Пречи́стыя Его́ Ма́тере, всеблаже́нне Андре́е,/ и в них непреста́нное славосло́вие приноси́л еси́, вопия́:/ сла́ва снизхожде́нию Твоему́, Христе́, сла́ва си́ле Твое́й.
Припев: Благове́рне кня́же Андре́е, моли́ Бо́га о нас.
Пе́рваго своего́ гражда́нства, су́щаго на Небесе́х,/ любе́зно возжела́л еси́, боголюби́вый кня́же Андре́е,/ сего́ ра́ди стра́хом Госпо́дним па́че ца́рскаго порфироно́сия оде́явся,/ земно́е жи́тельство проходи́л еси́.
Сла́ва Отцу́ и Сы́ну и Свято́му Ду́ху:
Иере́я дре́вле Вы́шегра́дскаго напра́вил еси́, преблаже́нне, спутеше́ствовати тебе́,/ па́че же чудотво́рному Богома́тере о́бразу;/ упра́ви и мене́, свя́те, ше́ствовати путе́м за́поведей Бо́жиих,/ по нему́же сам усе́рдно ходи́л еси́.
И ны́не и при́сно и во ве́ки веко́в. Ами́нь.
Богородичен: Све́том Боже́ственным испо́лни се́рдце мое́, Богоро́дице Де́во,/ е́же злых при́сно ми отвраща́тися,/ благи́х же неукло́нно держа́тися те́плыми Твои́ми к Бо́гу о нас моли́твами.
Пе́снь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х/ пути́ моя́ напра́ви, молю́ся.
Припев: Благове́рне кня́же Андре́е, моли́ Бо́га о нас.
Тезоимени́таго Тя ве́дуще первозва́нному ученику́ Христо́ву,/ сообра́зна тому́ ви́дим тя и в кончи́не твое́й, христолюби́вый кня́же:/ за пра́вду бо кровь свою́ излия́л еси́, я́ко а́гнец незло́бивый, закала́емь от тех,/ и́мже свой и благоде́тель был еси́.
Припев: Благове́рне кня́же Андре́е, моли́ Бо́га о нас.
Тща́нием кре́пким правосу́дию прилежа́л еси́, богорачи́тельный кня́же,/ не познава́я лица́ на суде́, ниже́ си́льнаго боя́ся,/ сего́ ра́ди от злоде́йственных ненави́стников, от ножа́ скончава́ешися.
Сла́ва Отцу́ и Сы́ну и Свято́му Ду́ху:
Написа́ся твое́ и́мя в кни́гах живота́ ве́чнаго на Небесе́х, чу́дный страда́льче,/ и нас та́мо впи́санных бы́ти хода́тайствуй,/ сла́вящих Христа́ в честне́м страда́льчестве твое́м.
И ны́не и при́сно и во ве́ки веко́в. Ами́нь.
Богородичен: Сие́ и мы прино́сим, Благода́тная Богоро́дице Де́во,/ е́же дре́вле Гаврии́л Арха́нгел принесе́ Ти, благода́рственно воспева́юще:/ ра́дуйся, Обра́дованная, Госпо́дь с Тобо́ю,/ благослове́н Пречи́стый Плод свята́го чре́ва Твоего́.
Пе́снь 6.
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припев: Благове́рне кня́же Андре́е, моли́ Бо́га о нас.
Все житие́ свое́ до́бре украша́л еси́, страстоте́рпче Андре́е,/ приле́жными моли́твами, посто́м и чистото́ю, правосу́дием и милосе́рдием,/ благоче́стно Го́сподеви служа́ день и нощь.
Припев: Благове́рне кня́же Андре́е, моли́ Бо́га о нас.
Свято́му Ду́ху дом бысть незло́бивое се́рдце твое́, Богоблаже́нне, чистото́ю крася́щееся,/ ея́же ра́ди ны́не зри́ши чи́сте Святу́ю Тро́ицу,/ озаря́я нас чуде́с луча́ми и исцеле́ний блиста́ньми.
Сла́ва Отцу́ и Сы́ну и Свято́му Ду́ху:
Благове́рному и боголюби́вому нра́ву прилежа́,/ Христа́ всели́л еси́ во благоразу́мную ду́шу твою́, досточу́дне,/ те́мже и нас боголюби́вому и благочести́вому житию́ ревни́тели покажи́/ и Небе́снаго Ца́рствия насле́дники, воспева́ющих тя.
И ны́не и при́сно и во ве́ки веко́в. Ами́нь.
Богородичен: Вели́кому милосе́рдию Сы́на Твоего́/ прича́стники сотвори́ нас, Богороди́тельнице,/ в день вели́каго и пра́веднаго Суда́ Его́,/ егда́ второ́е на зе́млю прии́дет со сла́вою стра́шною.
Конда́к, гла́с 8.
В ми́ре сем благоче́стно и пра́ведно пожи́в,/ моли́твою, ми́лостынею и благострада́нием Бо́гу угоди́л еси́,/ сего́ ра́ди и Бог по убие́нии твое́м просла́ви тя нетле́нием и чудесы́,/ Его́же, свя́те Андре́е, моли́ сохрани́ти оте́чество твое́/ и всех люде́й, благоче́стно тебе́ почита́ющих.
Икос:
Ве́рою и любо́вию послужи́л еси́ Христу́ Бо́гу во днех живота́ твоего́, сла́вне Андре́е,/ по страда́льчестей же кончи́не твое́й со святы́ми всели́лся е́си,/ нетле́нием же телесе́ и да́ром чудотворе́ний почте́н еси́ от Мздовоздая́теля./ Те́мже с любо́вию вопие́м ти:/ ра́дуйся, благопло́дная о́трасле от держа́внаго и свята́го ко́рене./ Ра́дуйся, благове́рия любе́зный рачи́телю;/ ра́дуйся, злоче́стия ре́вностный искорени́телю./ Ра́дуйся, любому́дрия приле́жный сниска́телю;/ ра́дуйся, целому́дрия непоро́чный храни́телю./ Ра́дуйся, милосе́рдия оби́льный раздая́телю;/ ра́дуйся, лука́вых духо́в прогони́телю./ Ра́дуйся, злостра́ждущих ско́рый исцели́телю;/ ра́дуйся, всеросси́йскаго ро́да предста́телю./ Ра́дуйся, христолюби́ваго во́инства побо́рниче;/ ра́дуйся, моле́бниче те́плый Христа́ о всех, благоче́стно тебе́ почита́ющих.
Пе́снь 7.
Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Припев: Благове́рне кня́же Андре́е, моли́ Бо́га о нас.
Кня́зю боголюби́вому Андре́ю духо́вныя пе́сни принесе́м,/ соше́дшеся к цельбоно́сней ра́це нетле́нных моще́й его́,/ прося́ще грехо́в разреше́ния и ми́рнаго жития́/ у Христа́, Благослове́ннаго отце́в Бо́га.
Припев: Благове́рне кня́же Андре́е, моли́ Бо́га о нас.
Андре́ю, чудотво́рцу и му́ченику, усе́рдно возопии́м:/ моли́ о нас Человеколю́бца Бо́га, всеблаже́нне,/ торжеству́ющих па́мять страда́льчества твоего́ пресла́внаго и Христу́ пою́щих о́трочески:/ благослове́н еси́, Бо́же отце́в на́ших.
Сла́ва Отцу́ и Сы́ну и Свято́му Ду́ху:
Боголю́бовскому ме́сту любе́зно прилежа́,/ ча́сто та́мо водворя́лся еси́, Андре́е Богому́дре,/ иде́же сро́дницы твои́ и слу́ги люби́мии,/ му́жественное и свято́е твое́ те́ло изра́нивше, уби́ша,/ ты же сла́вил еси́ Благослове́ннаго Бо́га отце́в на́ших.
И ны́не и при́сно и во ве́ки веко́в. Ами́нь.
Богородичен: Сла́вному Влады́чню Престо́лу предстоя́щи, Сла́вная Влады́чице Богоро́дице Де́во,/ со блаже́нным Андре́ем моли́ Сы́на Твоего́ и Бо́га всем ве́чное спасе́ние дарова́ти,/ покланя́ющимся свято́му о́бразу Твоему́ и Христа́ пою́щим о́трочески:/ Бо́же, благослове́н еси́.
Пе́снь 8.
Ирмос: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припев: Благове́рне кня́же Андре́е, моли́ Бо́га о нас.
Чудотво́рцу и му́ченику кня́зю Рома́ну/ и бра́ту его́ Дави́ду сро́дник и подража́тель был еси́, Андре́е прехва́льне,/ вси бо вы му́ченическою стезе́ю востеко́сте в Небе́сныя оби́тели ко Христу́ Бо́гу,/ Его́же моли́те сохрани́ти нас от вся́кия напа́сти, покланя́ющихся Ему́ во ве́ки.
Припев: Благове́рне кня́же Андре́е, моли́ Бо́га о нас.
Влади́мирскому преде́лу самоде́ржец благочести́в яви́лся еси́, пра́ведниче, во пло́ти живы́й;/ ны́не в Небе́снем Ца́рствии со А́нгелы лику́я,/ посеща́й оте́чество твое́, чудеса́ от ра́ки и цельбы́ подая́ вопию́щим:/ вся дела́ Госпо́дня, Го́спода по́йте/ и превозноси́те во вся ве́ки.
Сла́ва Отцу́ и Сы́ну и Свято́му Ду́ху:
Трудолю́бием плоть свою́ изнури́л еси́, всече́стне,/ и безстра́стием боголюби́вую ду́шу твою́ возрасти́л еси́,/ в ня́же благода́ть Пресвяты́я Тро́ицы все́льшися,/ всего́ тя светоно́сна соде́ла, непреста́нно вопию́ща:/ о́троцы, благослови́те, свяще́нницы, воспо́йте,/ лю́дие, превозноси́те Го́спода во ве́ки.
И ны́не и при́сно и во ве́ки веко́в. Ами́нь.
Богородичен: Многогре́шнаго мя, Пресвята́я Богоро́дице, поми́луй,/ стрел лука́ваго избавля́ющи,/ и огнь страсте́й мои́х погаси́,/ и сподо́би мя при́сно име́ти житие́ ми́рное и безмяте́жное/ и Тебе́ со Единоро́дным Твои́м Сы́ном и Бо́гом пе́ти и превозноси́ти непреста́нно во вся ве́ки.
Песнь 9
Ирмос: Ужасе́ся о сем Не́бо/ и земли́ удиви́шася концы́,/ я́ко Богяви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,/ Ангелов и челове́к чинонача́лия велича́ют.
Припев: Благове́рне кня́же Андре́е, моли́ Бо́га о нас.
Иоа́нна Крести́теля воздержа́нию после́дуя,/ Иоа́нна же напе́рсника целому́дрию подража́я,/ Дави́довою кро́тостию оде́явся/ и Соломо́новою му́дростию облиста́вся,/ Илиину́ ре́вность и Петро́во испове́дание благоче́стием свои́м и правосла́вием стяжа́л еси́/ и Христу́ му́ченически спострада́л еси́, пребога́те.
Припев: Благове́рне кня́же Андре́е, моли́ Бо́га о нас.
Влади́мира гра́да и всея́ земли́ Росси́йския лю́ди/ сохраня́й, боголюби́вый и всесла́вный кня́же Андре́е, от бед и печа́лей,/ во правосла́вии и благоче́стии моли́твами твои́ми соблюда́я всех нас,/ пе́сньми тебе́ велича́ющих.
Сла́ва Отцу́ и Сы́ну и Свято́му Ду́ху:
Жи́теля мя су́ща земна́го,/ жи́теля сотвори́ и Небе́сна предста́тельством твои́м ко Го́споду, преблаже́нне,/ прие́мля убо́гое сие́ тебе́ песносло́вие,/ да тя, я́ко благоде́теля моего́, при́сно величя́ю.
И ны́не и при́сно и во ве́ки веко́в. Ами́нь.
Богородичен: Ни́ща и убо́га мя доброде́тельми, о Всечи́стая и Присноде́вствующая Богоро́дице, поми́луй,/ мрак печа́лей, уны́ния и отча́яния разгоня́ющи/ и доброде́тельное ми бога́тство подава́ющи,/ и ми́лостию Твое́ю спаси́ мя и всех, велича́ющих пресвято́е и́мя Твое́.
Свети́лен.
Я́коже со́лнце, блиста́я, просвеща́еши всех сердца́,/ твою́ сла́вную па́мять творя́щих ве́рно, преблаже́нне Андре́е,/ и спаса́еши от бед и бу́дущаго гне́ва.
Сла́ва: Све́ту невече́рнему предстоя́, страстоте́рпче, с му́ченическими ли́ки,/ не оста́ви си́ры воспева́ющия тя, засту́пниче наш,/ но от искуше́ний сохрани́ моли́твами твои́ми.
И ны́не, Богоро́дичен: Незаходи́маго Све́та Носи́тельнице, Присноде́во,/ просвети́вшаго седя́щих во тьме неведения,/ озари́ и нас, гре́шных, све́том Сы́на Твоего́.
Молитва
О, святы́й благове́рный вели́кий кня́же Боголю́бский Андре́е! Ра́бе Бо́жий ве́рный и Богославный, христиа́нине истовый и Богоревнивый, му́же доброде́тельный и Богому́дрый, во́ине всечестны́й и воево́до доброхва́льный, прави́телю держа́вный и дерзнове́нный! Ру́сь Святу́ю на уде́лы и кня́жества разобщенную, Бо́жиим хоте́нием хотя́щий во еди́ное Русское Ца́рствие собра́ти и единодержавно Е́ю пра́вити, да непреобори́ма пребу́дет от все́х вра́г ви́димых и неви́димых, возстаю́щих на правосла́вныя христиа́ны. Да не тщетны бу́дут твои́ святи́и дея́ния во сла́ву и че́сть Бо́га Христиа́нскаго, иде́же твое́ Богосве́тлое строе́ние Бо́гом люби́маго Ца́рства Правосла́внаго на Ру́сской Земле́ зри́м и велича́ем, егда́ сто́льный гра́д Влади́мир и Боголюби́вую оби́тель Пресвяте́й Богоро́дице воздви́гнувый, иде́же ты́ в не́й посреди́ но́щи неповинне злочестивыми и клятвопреступными свои́ми слуга́ми взя́тый и от ру́к и́х беззако́нно и жесточайшими меча́ми убие́нный, и честно́ю кро́вию свое́ю истекаемый, тве́рдое основа́ние Единодержавию Правосла́вной Руси́ та́ко положи́вый. И ны́не мы́, грешные рабы́ Бо́жии (имена́), в Богомощное небе́сное предста́тельство твое́ ве́руем, и́бо му́ченическим венце́м житие́ твое́ запечатлевшее, мо́лим тя́, да изба́вит на́с Госпо́дь от крамолы́ слу́г антихристовых и от кровавых жертвоприношений и жидовских обы́чаев, и да спасе́тся Земля́ Ру́сская от и́га сатани́нскаго, и́бо име́ем тя́, вели́каго уго́дника Бо́жия, неустрашимаго ра́тника Христо́ва, егда́ на поля́х земно́й бра́ни со мно́гими врага́ми за Ве́ру святу́ю и Оте́чество сражавыйся, и сто́ль ди́вную сла́ву Бо́жиих побе́д все́й Ру́сской Земле́ показу́ющий. И ты́, я́ко держа́вный воево́до и святы́й му́ченик, и всегда́ дерзнове́нный о на́с моли́твенник, Боголюби́вый и неуста́нный созидателю Свято́й Руси́, во святы́х мощах ди́вно просла́вленный, и в по́мощь и в заступле́ние на́м оста́вленный, возстани за на́с проти́ву иноплеме́нных, чужеземных и зловре́дных супоста́т, и противоста́ни и́м со мнозими святими князьями-воинами, и пе́рвее со святим равноапо́стольным вели́ким князе́м Влади́миром и свято́й равноапостольной вели́кой княгиней Ольгой, и с вели́кими благове́рными князьями первомучениками-страстотерпцами Бори́сом и Гле́бом, и со святы́м во́ином преподобному́чеником Игорем Черни́говским, и святы́м благове́рным вели́ким князе́м Георгием Всеволодовичем Владимирским, вку́пе же и с Богосве́тлыми сына́ми твои́ми князьями-му́чениками Гле́бом Владимирским и храбрым Изяславом, да и́х по́мощию не позыблем пребу́дет До́м Пресвяты́я Богоро́дицы, все́й Руси́ Держа́вной Влады́чицы, и да просла́вится и просияет тобо́ю, кня́же Андре́е, во вся́ ве́ки Земля́ Ру́сская и напо́лнится благочести́вым христиа́нским ро́дом по благослове́нию Богоро́дицы, и Благода́тию Ея́ многочудотворных ико́н Влади́мирской и Боголюбской, и па́ки угобзится и укрепи́тся сла́ва Руси́ Правосла́вной, и просияет Невеще́ственным и Животво́рным све́том Бо́га Отца́, Сы́на и Свята́го Ду́ха. Ами́нь.
Молитва
О, святы́й благове́рный вели́кий кня́же Андре́е! Страстоте́рпче и му́чениче! Слуго́ Бо́жий ве́рный и Богославный, христиа́нине истовый и Богоревнивый, му́же любодобродетельный и Богому́дрый, во́ине всечестны́й и воево́до доброхва́льный, монарше Богоизбра́нный и Боголюбимый, прави́телю держа́вный и дерзнове́нный! Ру́сь Святу́ю, на уде́лы и кня́жества разобщенную, хоте́вый во еди́но ца́рствие собра́ти и единодержавно е́ю пра́вити, да непреобори́ма от вра́г и́стиннаго христиа́нства пребу́дет; за си́и дея́ния во сла́ву и че́сть Бо́га Христианского убие́нный и кро́вию свое́ю основа́ние Руси́ Свято́й с про́чими кня́зи-му́ченики укрепивший, да во ве́к незы́блема пребу́дет; даровавший Руси́ многочудныя ико́ны Богома́тери и То́ю па́че мно́гих ины́х за Благоче́стие и Богопочита́ние возлю́бленный. Сыновей возрасти́вший, и́же тя́, отца́ земна́го своего́, житие́м свои́м и Отца́ Небе́снаго кончи́ною свое́ю просла́виша. Оби́тель Боголюби́вую основа́вый и мно́зи хра́мы воздви́гнувый, в ни́х же досе́ле моля́щеся мы́, гре́шнии, про́сим твоего́ предста́тельства и Небе́сныя по́мощи; испроси́, свя́те Андре́е, у Го́спода Вседержи́теля ми́лости бога́тыя обездоленному ца́рствию ру́сскому и отпуще́ния мно́гих и тя́жких грехо́в народам христиа́нским, да да́рует Спаси́тель на́м прави́теля тебе́ подо́бнаго, и́же возмо́гл бы возроди́ти Оте́чествие на́ше земно́е и ко Оте́чествию Небе́сному привести́ на́с, иде́же ты́ ны́не, кня́же, во сла́ве Невече́рняго Све́та предстоя́ со все́ми святы́ми, восхваляеши в Тро́ице сла́вимаго Бо́га Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![благоверному князю Андрею Боголюбскому, Владимирскому благоверному князю Андрею Боголюбскому, Владимирскому](img_b/097.jpg)