17 июля.

Канон святителю Андрею, архиепископу Критскому Иерусалимскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ Яже веще́й Истина. Сего́ ра́ди стяжа́л еси́ смире́нием высо́кая, нището́ю бога́тая, о́тче Андре́е, моли́ Христа́ Бо́га спасти́ся душа́м на́шим.

Кано́н свята́го Андре́я. Глас 5.

Пе́снь 1.

Ирмос: Коня́ и вса́дника в мо́ре Чермно́е сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припев: Святи́телю о́тче Андре́е, моли́ Бо́га о нас.

Со́н от ве́ждей оттря́с, тебе́ сама́го Влады́це доброде́телию угото́вал еси́ све́тло жили́ще, богоявле́нне преподо́бне, и Боже́ственное поко́ище.

Припев: Святи́телю о́тче Андре́е, моли́ Бо́га о нас.

Пе́нием всесли́чным твою́ цевни́цу движа́, Христо́ву Це́рковь, песносло́вя, уясни́л еси́, Андре́е чу́дне, Свята́го Ду́ха оглаша́емь Боже́ственною благода́тию.

Сла́ва Отцу́ и Сы́ну и Свято́му Ду́ху:

Зако́ну богопи́санному му́дре повину́яся, теле́сныя стра́сти по́стнически умертви́л еси́, у́м же возвы́сил еси́ кре́пким твои́м жела́нием, поя́ пе́сни Бо́жия, всему́дре.

И ны́не и при́сно и во ве́ки веко́в. Ами́нь.

Богородичен: Ве́сь жела́ние и пречи́сто наслажде́ние, Сы́н и Бо́г Тво́й благи́х исполне́ние е́сть, Всенепоро́чная, Его́же моли́ изба́вити ве́рою ны́не к Тебе́ притека́ющия.

Пе́снь 3.

Ирмос: Водрузи́вый на ничесо́мже зе́млю повеле́нием Твои́м, и пове́сивши неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Припев: Святи́телю о́тче Андре́е, моли́ Бо́га о нас.

Упра́вил еси́ доброде́телию житие́ твое́, преподо́бне, и, боже́ственным жела́нием Бо́гу соединя́яся, орга́н яви́лся еси́ слове́сен, всю́ вселе́нную уясня́я пе́сньми, Боже́ственная сокро́вища почерпа́я.

Припев: Святи́телю о́тче Андре́е, моли́ Бо́га о нас.

Прему́дрости небе́сныя бы́л еси́ испо́лнен, душе́вная бо уста́ разшири́в, преподо́бне, всю́ прия́л еси́ я́ве зарю́ светоно́сную трисо́лнечныя све́тлости, я́ко священноде́йственник свяще́нен.

Сла́ва Отцу́ и Сы́ну и Свято́му Ду́ху:

Утверди́в душе́вныя си́лы твоя́, преподо́бне, и пло́ть удержа́в воздержа́нием, бы́л еси́ ве́сь пресве́тлая звезда́, украша́я Це́рковь правосла́вными твои́ми уче́нии и пе́сненными пе́нии.

И ны́не и при́сно и во ве́ки веко́в. Ами́нь.

Богородичен: Изба́вити мя́ стра́стнаго плене́ния ны́не молю́ Тя́, Ма́ти Бо́жия Всенепоро́чная, и грехо́вныя я́звы вся́ очи́стити, гре́х Взе́млющаго ми́ра пресла́вно ро́ждшая.

Та́же седа́лен Андре́я, гла́с 4.

Яко ка́мением, словесы́ твои́ми церко́вный, прему́дре, украси́в вене́ц, священноде́йственник свяще́нен, Андре́е, бы́л еси́. Те́мже по мно́гих в житии́ труде́х прия́л еси́ нестаре́емое Ца́рство и сла́ву, в не́мже помина́ющих тя́, о́тче, помина́й.

Пе́снь 4.

Ирмос: Боже́ственное Твое́ разуме́в истоща́ние прозорли́во, Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Припев: Святи́телю о́тче Андре́е, моли́ Бо́га о нас.

Сло́во Твое́, житие́м укра́шено, богосло́вия изве́стное пра́вило показа́лся еси́, чу́дне, Препе́тыя Тро́ицы сла́ву сказу́я я́сно.

Припев: Святи́телю о́тче Андре́е, моли́ Бо́га о нас.

Дея́нием виде́ния восхо́д показа́в, му́дре, и виде́нием объе́мся, жития́ о́бразом, Андре́е богогла́се, уподо́бился еси́.

Припев: Святи́телю о́тче Андре́е, моли́ Бо́га о нас.

Яко боже́ствен святи́тель, пребога́те, па́стырски побора́я, от Це́ркве отгна́л еси́ льво́в наше́ствия, Андре́е, му́жеству тезоимени́те.

Сла́ва Отцу́ и Сы́ну и Свято́му Ду́ху:

Вели́ку похвала́м вину́, Богоро́дицу обре́т, тща́ние показа́л еси́ сугу́бо, превы́шшую похва́л хвала́ми многообра́зными почита́я, му́дре.

И ны́не и при́сно и во ве́ки веко́в. Ами́нь.

Богородичен: Кроме́ у́бо совокупле́ния зачала́ еси́ нетле́нно во утро́бе, и пре́жде боле́зни родила́ еси́, и по рождестве́ Де́вою, Бо́га пло́тию ро́ждши, сохрани́лася еси́.

Пе́снь 5

Ирмос: Одея́йся све́том, я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Припев: Святи́телю о́тче Андре́е, моли́ Бо́га о нас.

Ны́не крася́щиися твои́ми уче́нии и пе́сньми богодохнове́нными свяще́нно наслажда́ющеся, Андре́е всеблаже́нне, па́мять твою́ почита́ем.

Припев: Святи́телю о́тче Андре́е, моли́ Бо́га о нас.

Заре́ю просвеща́емь я́ве духо́вною, святы́х ликостоя́ния пресвя́то похвали́л еси́, с ни́миже ны́не ра́дуешися, Андре́е всеблаже́нне.

Сла́ва Отцу́ и Сы́ну и Свято́му Ду́ху:

Ны́не не чу́вствы тле́ннаго те́ла, ни мечта́ньми зри́ши Боже́ственная, у́мно же, прему́дре, душе́вными де́йствы соединя́яся лу́чшим.

И ны́не и при́сно и во ве́ки веко́в. Ами́нь.

Богородичен: Со слеза́ми припа́даю Ти́, зело́ моля́ся, мои́х согреше́ний ны́не изба́витися Тобо́ю, Всенепоро́чная, и ве́чныя ра́дости сподо́битися.

Пе́снь 6.

Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя, я́ко Благоутро́бен.

Припев: Святи́телю о́тче Андре́е, моли́ Бо́га о нас.

Вити́и обличи́л еси́ безбо́жныя усты́ све́тлыми, честны́х бо ико́н уясни́л еси́ вои́стинну, священнотаи́нниче, поклоне́ние.

Припев: Святи́телю о́тче Андре́е, моли́ Бо́га о нас.

Свяще́нно украси́л еси́ твою́, о́тче сла́вне, жи́знь: стра́стное бо смуще́ние угаси́л еси́ и к жи́зни безстра́стия прите́кл еси́.

Сла́ва Отцу́ и Сы́ну и Свято́му Ду́ху:

Добро́тами слове́с твои́х и уче́нии вси́ ве́рнии благоче́стно наслажда́ющеся, ра́дуются, ерети́к языкобо́лия побежда́юще.

И ны́не и при́сно и во ве́ки веко́в. Ами́нь.

Богородичен: Ве́сь примеша́ется ми́, Иже безнача́льно возсия́в от Отца́, воплоще́нием, Пренепоро́чная, из Тебе́ бы́вшим, Богоневе́сто.

Конда́к, гла́с 2.

Воструби́в я́сно боже́ственная сладкопе́ния, яви́лся еси́ свети́льник ми́ра светле́йший, све́том сия́я Тро́ицы, Андре́е преподо́бне. Те́мже вси́ вопие́м ти́: не преста́й моля́ся о все́х на́с.

Икос:

Восхвали́ти твое́, о́тче, житие́, окая́нный, хощу́, ве́дый ны́не, исправле́ний твои́х ра́ди, ищу́ отту́ду, я́коже дарова́ния, похвалы́ прия́ти твои́х украше́ний и честно́му верху́ твоему́, Андре́е, исплести́, е́же Ангели почита́ют, зовы́й: моля́ не преста́й о все́х на́с.

Пе́снь 7.

Ирмос: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Припев: Святи́телю о́тче Андре́е, моли́ Бо́га о нас.

Да све́тлость святы́х, преподо́бне, у́зриши, све́тлостию де́л просвети́л еси́ житие́ твое́, зовы́й: Бо́же, благослове́н еси́.

Припев: Святи́телю о́тче Андре́е, моли́ Бо́га о нас.

Те́лом обложе́н, безпло́тных чино́м поревнова́л еси́, преподо́бне, с ни́миже согла́сно, ра́дуяся, взыва́еши: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Иерусали́м ны́не све́тло весели́тся, свети́льника многосве́тла ми́ру тя́ возсия́в, блаже́нне, поя́: Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Иже пре́жде у́бо Безпло́тный воплоща́ется, Пречи́стая, за милосе́рдие безчи́сленное из ложе́сн Твои́х святы́х. Ему́же вси́ пое́м: Бо́же, благослове́н еси́.

Пе́снь 8.

Ирмос: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте и превозноси́те во вся́ ве́ки.

Припев: Святи́телю о́тче Андре́е, моли́ Бо́га о нас.

Но́ваго киво́та Це́рковь, о́тче, я́сно обвесели́л еси́, ли́ки соста́вль, взыва́я: вся́ дела́ Госпо́дня, Го́спода по́йте и превозноси́те во вся́ ве́ки.

Припев: Святи́телю о́тче Андре́е, моли́ Бо́га о нас.

Пе́ние но́вое в Це́ркви, блаже́нне, преподо́бно взыва́л еси́ Вседержи́телю: вся́ дела́ Госпо́дня, Го́спода по́йте и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Дая́ доброде́телию боголе́пно дела́, страда́ния воспе́л еси́, Андре́е прему́дре, все́х святы́х, дре́вле удивле́нных и соверше́нных Христу́ во ве́ки.

И ны́не и при́сно и во ве́ки веко́в. Ами́нь.

Богородичен: Прииди́те, Чи́стую Богоотрокови́цу воспое́м, глаго́люще, боже́ственными пе́сньми: ра́дуйся, Де́во, Ея́же ра́ди ра́дость даде́ся естеству́ челове́ческому, Преблагослове́нная.

Песнь 9

Ирмос: Иса́ие, лику́й, Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́, Его́же велича́юще, Де́ву ублажа́ем.

Припев: Святи́телю о́тче Андре́е, моли́ Бо́га о нас.

Глаго́л твои́х веща́ние всю́ обтече́ зе́млю, уче́ний же красота́ и све́тлость, Андре́е блаже́нне, те́мже Христо́с, Иже все́х Ца́рь, тя́ венча́л е́сть благоле́пия венце́м.

Припев: Святи́телю о́тче Андре́е, моли́ Бо́га о нас.

Соедине́нием лу́чшим наслажда́яся зари́ трисия́нныя, Андре́е, таи́нниче пачеесте́ственных, любо́вию творя́щих твою́ святу́ю па́мять свяще́нно, ны́не моли́твами твои́ми от бе́д сохрани́.

Сла́ва Отцу́ и Сы́ну и Свято́му Ду́ху:

Со безпло́тными чи́нми весели́шися ны́не на небесе́х: си́х бо на земли́ житие́ неукло́нно я́ко пожи́в и пра́выя ве́ры я́влься пропове́дник изря́ден, богоглаго́ливе досточу́дне.

И ны́не и при́сно и во ве́ки веко́в. Ами́нь.

Богородичен: Приноси́мое уста́вила еси́ сме́рти неуста́вное стремле́ние, ро́ждши пло́тски, вои́стинну па́че ума́, Жи́знь ве́чную, Ейже прирази́вся усты́, го́рький а́д упраздни́ся, Пресвята́я Де́во Ма́ти.

Свети́лен.

Ангельскаго жития́ жела́я, преподо́бне, те́мже покори́л еси́ стра́сти плотски́я му́жески, равноа́нгелен бы́в, богоно́се о́тче.

Богородичен:

Тя́ Предста́тельницу и́мамы, вси́ гре́шнии, о Пресвята́я Де́во! Ты́ благопреме́нна сотвори́ Твоего́ Сы́на ма́терними Твои́ми моли́твами.

Молитва святителю Андрею, архиепископу Критскому

О, пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Андрее! Предстоя у престола всех Царя и наслаждаяся света Единосущныя Троицы и херувимски со Ангелы возглашая песнь трисвятую, великое же и неизследованное дерзновение имея ко Всемилостивому Владыце, моли спастися паствы Христовы людем, благостояние святых церквей утверди, архиереи благолепием святительства украси, монашествующия к подвигом добраго течения укрепи, град сей и вся грады и страны добре сохрани, и веру святую непорочну соблюсти умоли, мир весь предстательством твоим умири, от глада и пагубы избави ны, и от нападения иноплеменных сохрани, старые утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующия исцели, и везде тепле призывающия тя и с верою притекающия к тебе от всяких напастей и бед ходатайством твоим свободи. Моли о нас (имена) всещедраго и человеколюбиваго Христа Бога нашего, да и в день страшнаго пришествия Его от шуияго стояния избавит нас и радости святых причастники сотворит со всеми святыми во веки веков. Аминь.

Молитва иная святителю Андрею, архиепископу Критскому

Великий архиерее, теплый наш заступниче, святителю Андрее! Услыши смиренную молитву раба твоего (имя). Приклони милосердие Божие ко мне и помози ми в скорби моей (содержание прошения). Да избавит Всемилостивый Господь нас от бед и напастей и радости святых причастники сотворит со всеми святыми во веки веков. Аминь.