16 июля.

Канон второй святым благоверным князем Василию и Константину Ярославским.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 2:

Ва́ше оте́чество хва́лится обагре́нием крове́й ва́ших,/ Це́рковь же Бо́жия ра́дуется,/ прие́мши телеса́ ва́ша,/ лю́дие, пе́сненный лик соста́вльше,/ духо́вною цевни́цею вопию́т:/ лику́й, Васи́лие, ра́дуйся, Константи́не,/ Яросла́влю сла́во и всей Росси́и ра́досте.

Тропа́рь, гла́с 8:

Возвы́сившеся на доброде́тель, к жела́нию кра́йнему,/ и достиго́сте к Небе́сней высоте́,/ благове́рнии вели́цыи кня́зи Васи́лие и Константи́не,/ и безстра́стным житие́м украси́сте ду́ши своя́,/ поще́нием же изря́дно победи́сте бесо́вския полки́,/ и восприя́сте чи́стую со́весть,/ в моли́твах я́ко безпло́тнии пребы́сте,/ возсия́сте в ми́ре, а́ки со́лнце, пресла́внии,/ моли́те спасти́ся душа́м на́шим.

Велича́ние:

Велича́ем вас,/ страстоте́рпцы Христо́вы, благове́рнии кня́зи Васи́лие и Константи́не,/ и чтим честна́я страда́ния ва́ша,/ вы бо мо́лите за нас/ Христа́, Бо́га на́шего.

Кано́н иной, гла́с 8.

Пе́снь 1.

Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Припев: Благове́рнии кня́зи Васи́лие и Константи́не, моли́те Бо́га о нас.

Боже́ственными све́тлостьми́ удобря́еми,/ а́нгельскими венцы́ благове́рно украша́еми,/ сла́вою Святы́я Тро́ицы просвеща́еми, сла́внии кня́зи Васи́лие и Константи́не,/ Нача́льника, прему́дрии, моли́те о чту́щих вас.

Припев: Благове́рнии кня́зи Васи́лие и Константи́не, моли́те Бо́га о нас.

Все жела́ние к Бо́гу впери́сте от ю́ности/ и, к Нему́ иму́ще всю свою́ наде́жду,/ теле́сная риста́ния и страсте́м нахо́ды воздержа́нием пло́ти умертви́сте,/ страстоте́рпцы святи́и, Васи́лие сла́вне и Константи́не прему́дре.

Сла́ва Отцу́ и Сы́ну и Свято́му Ду́ху:

Це́рковь боговмести́тельная, блаже́ннии, бы́сте,/ по́стническими боле́зньми и по́двиги показа́сте веду́щия стези́ к доброде́телем,/ и́мже храни́тели бы́сте,/ тем и Бог всели́ся в вас, благода́ти исполня́я вы.

И ны́не и при́сно и во ве́ки веко́в. Ами́нь.

Богородичен: Преукраше́на красото́ю благода́ти, Богора́дованная Влады́чице,/ Я́же от Отца́ Сло́во Безнача́льное, от Тебе́ плоть прии́мшаго,/ благоутро́бием неизрече́нным, па́че ума́ и сло́ва, родила́ еси́, Благослове́нная,/ и пребы́вши Де́вою по рождестве́, Нескве́рная.

Пе́снь 3.

Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Припев: Благове́рнии кня́зи Васи́лие и Константи́не, моли́те Бо́га о нас.

Уподо́бистеся доброде́телей ра́ди Христо́вым апо́столом/ и тех сла́ву насле́довали есте́ проявле́нно,/ Богому́дрии, Васи́лие сла́вный и Константи́не прему́дрый, правосла́внии столпи́ церко́внии,/ благоче́стию бы́сте пропове́дницы.

Припев: Благове́рнии кня́зи Васи́лие и Константи́не, моли́те Бо́га о нас.

Зако́н исполня́юще Боже́ственный,/ И́же от Бо́га Бо́га Сло́ва, тварь всю му́дростию сотвори́вша,/ просла́вили есте́ Его́, Отцу́ Собезнача́льна и Ду́ху Сопресто́льна,/ Соде́теля бы́вших, благоуго́дно.

Сла́ва Отцу́ и Сы́ну и Свято́му Ду́ху:

Богоявле́нием извести́стеся Боже́ственному наказа́нию, страстоно́сцы сла́внии,/ та́инство богосло́вити извы́кше, Тро́ицу Святу́ю Присносу́щную,/ сра́сленную же и несозда́нную, пропове́дасте.

И ны́не и при́сно и во ве́ки веко́в. Ами́нь.

Богородичен: Мы́сленный сокруши́ся томи́тель,/ от Го́рняго неисце́льную я́зву прии́м Ка́мене честна́го,/ от чре́ва Твоего́ возсия́вша Христа́ Бо́га на́шего,/ И́же прише́д к нам и земна́я с Небе́сными совокупи́.

Седа́лен, гла́с 1.

Воздержа́нием увяди́вше ю́ность свою́ и стра́сти теле́сныя,/ я́ко пле́нника ху́да, связа́вше, ду́хови повину́ли есте́,/ и лю́ди своя́ воспита́сте во зла́це Боже́ственных наказа́ний,/ и жезло́м терпе́ния зве́ри отгна́сте ересе́м,/ и от ва́рварскаго нахожде́ния гра́ды своя́ соблюдо́сте,/ и сего́ ра́ди, Богому́дрый Васи́лие и Константи́не чу́дне,/ чудесы́ пресла́вными вас обога́щ/ Еди́н Прославля́яй святы́х Свои́х.

Сла́ва, и ны́не, Богородичен:

Бо́жию Тя Ма́терь вси и Де́ву вои́стинну по рождестве́ я́вльшуюся ве́мы,/ те́мже, любо́вию прибега́юще к Твое́й бла́гости,/ и́мамы Тя, гре́шнии, Предста́тельницу/ и Тебе́ вси стяжа́хом в напа́стех спасе́ние, Еди́ну Всенепоро́чную.

Пе́снь 4.

Ирмос: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.

Припев: Благове́рнии кня́зи Васи́лие и Константи́не, моли́те Бо́га о нас.

Му́жески на стра́сти вооружи́стеся и безстра́стнаго достиго́сте ве́рха,/ уго́дно бо бысть Бо́гу ва́ше житие́,/ и, высо́ким блаже́нством присети́в вас, вруча́ет вам па́ству Свою́, ве́рным наста́вником,/ и верне́йших показа́ вас.

Припев: Благове́рнии кня́зи Васи́лие и Константи́не, моли́те Бо́га о нас.

Вам зва́ние не от челове́к бысть, но от Бо́га, Иису́са Христа́,/ я́ко досто́йне вас призва́вшему к Вы́шнему гра́ду Иерусали́му,/ и ны́не, Того́ добро́ты наслажда́ющеся,/ при́сно сохраня́йте град свой и лю́ди, вопию́щия Ему́:/ си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Боже́ственней сла́ве сподо́бившеся, о святи́и Васи́лие и Константи́не,/ получи́ли есте́ Боже́ственную зарю́,/ е́юже ны́не досто́йно озаря́еми, соверша́ющим ва́шу па́мять, Богому́дрии,/ воспосыла́ете дар исцеле́ния, ве́рою Христу́ зову́щим:/ си́ле Твое́й сла́ва, Человеколю́бче.

И ны́не и при́сно и во ве́ки веко́в. Ами́нь.

Богородичен: С Бо́гом Тебе́ Предста́тельницу стяжа́хом,/ Ты бо Ма́ти Бо́жия бы́вши, Творца́ и Соде́теля,/ наш о́браз восприи́мшаго, Всенепоро́чная Влады́чице,/ Тебе́ бо ра́ди спасе́ мир от тле́ния и сме́рти,/ И́же Боже́ственною сла́вою Тя прославля́яй.

Пе́снь 5

Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.

Припев: Благове́рнии кня́зи Васи́лие и Константи́не, моли́те Бо́га о нас.

В Боже́ственней ва́шей па́мяти/ наро́ди собра́шася христиа́нстии в це́рковь Бо́жия Ма́тере,/ кня́же Васи́лие и Богому́дрый Константи́не,/ ра́дующеся, пра́зднуют и пита́ются днесь духо́вно, церко́внии засту́пницы,/ словесы́ ва́шими, Богому́дрии му́ченицы.

Припев: Благове́рнии кня́зи Васи́лие и Константи́не, моли́те Бо́га о нас.

Соплете́ний нас пога́нских вся́ко разруши́ли есте́ су́етных ага́рян сою́з/ и к Боже́ственней ве́ре привлеко́сте ле́стию связа́вшихся,/ разве́рзше тех ум, му́ченицы святи́и, отверзе́нием слове́с,/ Васи́лие сла́вный и Константи́не Богоблаже́нный.

Сла́ва Отцу́ и Сы́ну и Свято́му Ду́ху:

Сердца́ ва́ша бы́ша, блаже́ннии, непоро́чна оправда́нием о́бщаго Влады́ки,/ Его́же возлюби́вше, плоть удержа́ли есте́/ и, чуде́с благода́тию связа́вше неду́ги,/ исцеля́ете душ на́ших и теле́с люте́йшия стру́пы.

И ны́не и при́сно и во ве́ки веко́в. Ами́нь.

Богородичен: Украси́шася, Де́во, де́вства Твоего́, Пресвята́я, добро́тами/ и́же пе́рвою я́звою из рая́ изгна́вшиися по́мыслом равнобо́жия,/ оде́жду нетле́ния тем дарова́,/ Христа́ ро́ждши, Богоблаже́нная.

Пе́снь 6.

Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Припев: Благове́рнии кня́зи Васи́лие и Константи́не, моли́те Бо́га о нас.

Пресла́вно просла́вистеся Боже́ственною благода́тию,/ самобра́тнии кня́зи, Васи́лие сла́вный и Константи́не прему́дрый,/ благоче́стию све́тло наказа́вшеся.

Припев: Благове́рнии кня́зи Васи́лие и Константи́не, моли́те Бо́га о нас.

Ю́ношески хра́брствовавше во оте́чествии свое́м,/ сла́вно и му́жески победи́сте моли́твою ва́шею лю́таго ратобо́рца,/ прокля́таго царя́ Баты́я,/ сла́вный Васи́лие ку́пно с Константи́ном прему́дрым,/ де́лом и сло́вом, побе́ды венцы́ от Христа́ прие́мше.

Сла́ва Отцу́ и Сы́ну и Свято́му Ду́ху:

Но́щи и тьмы сы́нове нареко́шася проти́внии,/ и ны́не вы, я́ко во дни све́та к Бо́гу пе́ние принося́ще,/ за оте́чество на́ше Бо́га моли́те,/ в ми́ре и тишине́ сохрани́ти е́ и побе́ды на сопроти́вныя дарова́ти.

И ны́не и при́сно и во ве́ки веко́в. Ами́нь.

Богородичен: Уясня́ются проро́честии гла́си,/ и́миже мы ны́не пое́м Тя, Богоро́дицу,/ ви́дяще сбытие́ на Тебе́ честны́х прорица́ний, Влады́чице,/ я́ко де́вства вои́стинну и чистоты́ вмести́лище.

Конда́к, гла́с 4.

Днесь Це́рковь разширя́ет не́дра своя́/ и прие́млет многоцеле́бныя мо́щи ва́ша,/ добропобе́днии страда́льцы,/ Васи́лие сла́вне и Константи́не Богому́дре,/ и, я́ко шипо́к благово́нный, напоя́ется пречу́дными арома́ты,/ бога́тными чудодея́нии от неистощи́мых сокро́вищ,/ от пресла́вных моще́й ва́ших,/ и ра́достно чад свои́х созыва́ет вопи́ти:/ ра́дуйся, дво́ице пречу́дная, оте́честву своему́ стено́ необори́мая.

Икос:

Це́рковь Бо́жия днесь ве́село,/ я́ко в порфи́ру ца́рскую, одева́ется и ра́дуется, зову́щи:/ уясни́ся моя́ добро́та па́че вся́каго гра́да,/ се бо возсия́ша от землену́ боку́ два свети́льника пресве́тлии,/ честны́я и многоцеле́бныя мо́щи чу́дныя и пресла́вныя дво́ицы,/ Васи́лия благоро́днаго и Константи́на предо́бляго,/ вку́пе пострада́вших за ве́ру христиа́нскую от царя́ злоимени́таго./ Прииди́те у́бо, правосла́вных собо́ри,/ в ли́це ку́пно ста́нем о́крест многоцеле́бныя ра́ки на́ших засту́пников, исцеле́ния то́ки прие́млюще,/ и Христа́ просла́вим, сицевы́ми дарова́нии сих обогати́вшаго,/ и согла́сно возопие́м, глаго́люще:/ кто испове́сть си́лы Твоя́, Го́споди,/ или́ кий язы́к воспе́ти возмо́жет му́жество и тве́рдость ра́зума,/ е́же Тебе́ ра́ди пострада́ша добропобе́днии страда́льцы?/ Те́мже и мы, недосто́йнии, любо́вию вопие́м си́це:/ ра́дуйтеся, Богому́дрии преблаже́ннии,/ я́ко ца́рским венце́м, от ю́ности украси́вшеся бога́тыми дарова́нии и ми́лостию,/ ве́лия власть бы́сте своему́ оте́честву./ Ра́дуйтеся, це́рквам воздви́жение и и́ноком люби́телие./ Ра́дуйтеся, ни́щим пита́телие./ Ра́дуйтеся, бе́дным утеше́ние./ Ра́дуйтеся, вдови́цам и сирота́м засту́пницы./ Ра́дуйтеся, земли́ Ру́сстей утвержде́ние и князе́м правосла́вным помо́щницы./ Ра́дуйтеся, пра́выя ве́ры укрепи́телие./ Ра́дуйтеся, льсти беззако́нныя потреби́телие./ Но, о пречестна́я дво́ице, предстоя́ще Престо́лу Благода́теля всех Бо́га,/ приле́жно моли́теся дарова́ти побе́ду на враги́ оте́честву на́шему/ и обрести́ нам ми́лость в День Су́дный,/ да ра́достною душе́ю вопие́м:/ ра́дуйся, дво́ице пречу́дная, оте́честву своему́ стено́ необори́мая.

Пе́снь 7.

Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.

Припев: Благове́рнии кня́зи Васи́лие и Константи́не, моли́те Бо́га о нас.

Вся обтеко́ша страны́ жития́ ва́ша свята́я исправле́нии уче́ний,/ в пресла́вную бо достиго́сте высоту́, благове́рнии кня́зи Васи́лие и Константи́не,/ Бо́гу, вас просла́вльшу, вопию́ще:/ благослове́н Бог оте́ц на́ших.

Припев: Благове́рнии кня́зи Васи́лие и Константи́не, моли́те Бо́га о нас.

Ни́щим корми́тели и вдови́цам засту́пницы,/ печа́льным ско́рая уте́ха,/ потопля́емым приста́нище ти́хое и избавле́ние оби́димым бы́ли вы есте́,/ своему́ подо́бистеся Влады́це и Учи́телю, вопию́ще:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Зве́зды всеми́рныя бы́сте, и свети́ла незаходи́мая,/ и помо́щницы в беда́х, и гре́шником вели́кое прибе́жище,/ ве́дущим хода́таи вы и моли́твенницы о душа́х,/ предстоя́ще Влады́це Христу́, всечестни́и.

И ны́не и при́сно и во ве́ки веко́в. Ами́нь.

Богородичен: Ви́дети жела́юще Твои́ уго́дницы/ Твоего́ Сы́на и Бо́га неизрече́нную сла́ву, Богороди́тельнице Влады́чице,/ и Сему́ после́доваша, по Боже́ственным стопа́м Его́ ходи́ша.

Пе́снь 8.

Ирмос: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Припев: Благове́рнии кня́зи Васи́лие и Константи́не, моли́те Бо́га о нас.

Юношски побежда́юще нача́ла и вла́сти тьмы,/ вели́цыи кня́зи, Васи́лие сла́вный и Константи́не Богому́дрый,/ уго́дницы бы́ли есте́ Святы́я Тро́ицы и наста́вницы ко спасе́нию,/ наве́та, и ла́яния, и льсти бесо́в отрева́юще/ и ста́до свое́ от тех злоде́йства невреди́мо соблюда́юще.

Припев: Благове́рнии кня́зи Васи́лие и Константи́не, моли́те Бо́га о нас.

Соше́дшеся днесь лю́дие в па́мять ва́шу, досто́йно вас хва́лят,/ я́ко страсте́й избавле́ние и согреше́ний оставле́ние/ прие́млют моли́твами ва́шими, Го́сподеви взыва́юще:/ благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

На земли́ я́ко челове́цы ходя́ще,/ житие́ на Небеси́ вои́стинну, я́ко А́нгели, стяжа́сте,/ и́мже собесе́дницы яви́стеся, пребыва́ние и жизнь соверша́юще о́нех,/ с ни́ми же воспева́ете ны́не:/ благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Я́коже вожделе́сте с Бо́гом бы́ти и Богонача́льными озари́вшеся виде́нии,/ уго́дницы яви́стеся Пречи́стей Богоро́дице Влады́чице./ Е́йже и мы вопие́м со Арха́нгелом:/ ра́дуйся, Де́во Пречи́стая, христиа́ном похвало́ и утвержде́ние.

Песнь 9

Ирмос: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Припев: Благове́рнии кня́зи Васи́лие и Константи́не, моли́те Бо́га о нас.

В чистоте́ и целому́дрии пребыва́юще,/ житие́ нескве́рное, я́ко безпло́тни, на земли́ пожи́сте,/ благове́рнии кня́зи Васи́лие и Константи́не,/ востеко́сте бо к Небе́сным стезя́м и со все́ми ра́дуетеся святы́ми,/ моля́ще Христа́ Бога о всех нас.

Припев: Благове́рнии кня́зи Васи́лие и Константи́не, моли́те Бо́га о нас.

Вельми́ возвели́чили есте́ на земли́ своего́ Влады́ку,/ у́ды свои́ми, пра́веднии страстоте́рпцы,/ виде́нием и де́тельми Сего́ просла́вили есте́ пресла́вно,/ и моли́те Его́, да пода́ст побе́ды нам на сопоста́ты.

Сла́ва Отцу́ и Сы́ну и Свято́му Ду́ху:

Совокупи́лися есте́ со Безпло́тными во́инствы и с пра́ведными ли́ки/ и со избра́нными все́ми лику́ете,/ с ни́ми же моли́те о гра́дех Росси́йских Христа́ Бо́га и Влады́ку,/ непреста́нно о всех нас.

И ны́не и при́сно и во ве́ки веко́в. Ами́нь.

Богородичен: О всех, Влады́чице, рабе́х Свои́х/ моли́ Сы́на Своего́ и Бо́га на́шего со уго́дники Свои́ми,/ соблюсти́ храм сей и сохрани́ти гра́ды и лю́ди от всех скорбе́й,/ да Тя непреста́нно велича́ем.

Свети́лен.

Я́ко цве́ти ра́йстии во удо́лии, процвели́ есте́ во гра́де Яросла́вли,/ всему́ оте́честву своему́ похвала́ и сро́дником сла́ва,/ вся страны́ све́том просвеща́ете ва́шим, доброде́телей светлостьми́,/ благочести́вии кня́зи Васи́лие и Константи́не,/ не преста́йте моли́тися о нас и о всем ми́ре Го́сподеви.

Сла́ва, и ны́не, Богородичен:

Ра́дуйся, ве́рным похвало́;/ ра́дуйся, Бо́жий раю́;/ ра́дуйся, кля́твы разреше́ние;/ ра́дуйся, све́те су́щим во тьме;/ ра́дуйся, Мари́е Преблагослове́нная.

Молитва

К вам, о святи́и благове́рнии кня́зи Васи́лие и Константи́не, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.