16 июля.

Канон второй преподобному Никодиму Кожеезерскому, пустыннику Хозьюгскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

От ца́рствующаго гра́да пресе́льник яви́ся/ и я́же в нем вели́кия оби́тели/ и, промышле́нием Боже́ственнаго ра́зума окормля́емь,/ к морски́м страна́м устреми́ся,/ всели́ся же в пусты́ню, уклоня́яся мирски́я молвы́,/ и си́лою Свята́го Ду́ха вооружи́лся еси́,/ кре́стным ору́жием враги́ своя́ прогоня́я,/ посто́м и непреста́нною моли́твою жизнь свою́ соверша́я,/ сревну́я вели́ким отце́м Анто́нию, и Ону́фрию, и Па́влу Фиве́йскому,/ с ни́миже Го́сподеви моли́ся, о́тче Никоди́ме,/ спасти́ся душа́м на́шим.

Тропа́рь, гла́с 4:

Я́ко безпло́тен, о́тче, пожи́л еси́ на земли́,/ смире́нием и в я́ме пребыва́нием с моли́твами превознося́щагося врага́ смири́л еси́,/ я́ко крин, вои́стинну процве́л еси́,/ избра́нный кинамо́н, и высо́кий кипари́с,/ и плодови́тая ма́слина, и фи́никс сла́дкий,/ и кедр благоуха́нный, и валса́м чи́стый,/ те́рние злостра́стия искорени́л еси́/ и жили́ще Всесвята́го Ду́ха был еси́,/ те́мже помина́й па́мять твою́ днесь пра́зднующих, Никоди́ме чудотво́рче,/ да вси ра́достными гла́сы воспева́ем Христа́ Бо́га на́шего,/ Иже тебе́ дарова́вшаго исцеле́ний благода́ть.

Кано́н иной, гла́с 4.

Пе́снь 1.

Ирмос: Триста́ты кре́пкия,/ Рожде́йся от Де́вы,/ безстра́стия во глубине́/ души́ трича́стное потопи́, молю́ся,/ да Тебе́, я́ко в тимпа́не,/ во умерщвле́нии телесе́/ побе́дное воспою́ пе́ние.

Припев: Преподо́бне о́тче Никоди́ме, моли́ Бо́га о нас.

Неизрече́нныя добро́ты и ра́дости неизглаго́ланныя наслади́вся, о́тче,/ вои́стинну помяни́ нас, преподо́бне, чту́щих тя/ и све́тло Боже́ственное твое́ торжество́ соверша́ющих.

Припев: Преподо́бне о́тче Никоди́ме, моли́ Бо́га о нас.

И́го Христо́во носи́,/ твое́ житие́ доброде́тельми укра́сил еси́,/ безмо́лвник, и смире́н, и кро́ток яви́лся еси́, преподо́бне,/ прозорли́в же был еси́, прозри́ бу́дущая,/ и чудотво́рец избра́нный.

Сла́ва Отцу́ и Сы́ну и Свято́му Ду́ху:

Ка́ко пожи́л еси́, преподо́бне, я́ко земны́й А́нгел,/ в таково́й тесноте́ в пусты́ни Хозью́ги,/ аз, смире́нный, ви́дя, удивля́юся,/ те́мже сподо́бился еси́ благи́х нетле́нных и жи́зни ве́чныя насле́дник был еси́.

И ны́не и при́сно и во ве́ки веко́в. Ами́нь.

Богородичен: От ко́рене Иессе́ова прозябе́ Отрокови́ца,/ из Нейже цвет – Христо́с без се́мене изы́де, Влады́ка вся́ческих,/ Его́же пою́т вся́ческая,/ Сего́ у́бо рука́ма Твои́ма носи́ла еси́.

Пе́снь 3.

Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною Му́дростию, Христе́,/ несть бо свят, па́че Тебе́, Человеколю́бче.

Припев: Преподо́бне о́тче Никоди́ме, моли́ Бо́га о нас.

Дар от Бо́га исцеле́ний прия́л еси́,/ ве́рных просвеща́я Боже́ственными чудесы́, преподо́бне о́тче Никоди́ме,/ те́мже, в па́мять твою́ соше́дшеся, почита́ем тя.

Припев: Преподо́бне о́тче Никоди́ме, моли́ Бо́га о нас.

Изря́дно твое́ житие́ в после́дняя времена́ пресла́вно яви́ся,/ те́мже воздержа́нию звезду́ и благоче́стию, ве́рнии, тя зна́юще, воспое́м:/ я́ко несть свят, я́ко Бог наш,/ и несть пра́веден, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Мирска́го треволне́ния избе́гл еси́, преподо́бне,/ в ти́хое приста́нище дости́гл еси́ Небе́снаго пребыва́ния,/ Христо́ви после́дуя и вопия́:/ я́ко несть свят, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: А́нгельский чин и челове́ческий род, непреста́нно сла́вим Тя,/ Сын у́бо Бо́жий, Еди́н от Святы́я Тро́ицы,/ от чи́стых крове́й Твои́х воплоти́вся, боголе́пно про́йде, спаса́я пою́щия:/ кто бог, я́ко Бог наш?

Седа́лен, гла́с 5.

Житие́ на земли́ пожи́л еси́ доброде́тельне,/ не уклоня́яся возду́шныя тя́гости и е́же по возду́ху паря́щих и оскорбля́ющих те́ло,/ воздержа́нием, о́тче преподо́бне, укра́сил еси́ жизнь свою́, я́ко кре́пкий адама́нт,/ подъя́л еси́ вра́жия кова́рствия,/ неподви́жим бо яви́ся душе́ю и неукло́нен пребыва́я те́лом, Никоди́ме Богому́дре,/ моли́ о и́же ве́рою и любо́вию чту́щих пречестну́ю па́мять твою́.

Сла́ва, и ны́не, Богородичен:

Лю́дем я́ко вои́стинну ти́хое приста́нище Христо́с Тебе́ яви́, Всенепоро́чная,/ и́же ве́рою и любо́вию Тя, и́стинную Богоро́дицу, испове́дующим,/ избавле́ние у́бо и мир изнесе́ нам, Де́во,/ скорбь нашу призира́ющи, уще́дри, я́ко Блага́я Ма́ти всем Творца́,/ и ми́лость пода́й Твои́ми моли́твами ко Ще́дрому Богу на́шему.

Пе́снь 4.

Ирмос: Неизсле́дный Бо́жий Сове́т,/ е́же от Де́вы, воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Припев: Преподо́бне о́тче Никоди́ме, моли́ Бо́га о нас.

Аки подви́жника тя и учи́теля благоче́стию позна́хом, о́тче Никоди́ме,/ восхва́лим, ублажа́юще ве́рно твое́ торжество́,/ сла́во отце́м и похвало́.

Припев: Преподо́бне о́тче Никоди́ме, моли́ Бо́га о нас.

Жизнь свою́ благоче́стно сконча́л еси́, Све́том Тро́ическим просвеща́емь,/ и от святи́теля и чудотво́рца Алекси́я в Небе́сныя кро́вы призва́н,/ с ни́мже тя ублажа́ем.

Сла́ва Отцу́ и Сы́ну и Свято́му Ду́ху:

Е́же на земли́ вре́менное житие́ свое́/ в безмо́лвии мно́зе и в труде́х по́стнически пожи́л еси́, Христо́ви поя́:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Непоро́чная Пречи́стая Влады́чице,/ ро́ждшая челове́ком Ко́рмчию и Го́спода, Со́лнце пра́ведное – Христа́,/ страсте́й мойх непостоя́нное и лю́тое отжени́,/ смире́ние и тишину́ пода́ждь се́рдцу моему́.

Пе́снь 5

Ирмос: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Припев: Преподо́бне о́тче Никоди́ме, моли́ Бо́га о нас.

А́ще и в ми́ре су́етная преоби́дел еси́,/ но в Небе́сных преми́рная и нетле́нная стяжа́л еси́, о́тче Никоди́ме,/ и ра́йское наслажде́ние.

Припев: Преподо́бне о́тче Никоди́ме, моли́ Бо́га о нас.

Гроб, иде́же положе́но бысть те́ло твое́, преподо́бне,/ же́ртва Бо́гу явля́ется,/ я́ко у́бо Авраа́м сы́на, свой ум ты приноси́л еси́.

Сла́ва Отцу́ и Сы́ну и Свято́му Ду́ху:

Освяти́ свое́ житие́, преподо́бне, вся́ческими доброде́тельми измла́да/ и жили́ще Всесвята́го Ду́ха бысть, приснопа́мятне.

И ны́не и при́сно и во ве́ки веко́в. Ами́нь.

Богородичен: Во утро́бе Твое́й Сы́на Бо́жия заче́нши, Богома́ти, Чи́стая Де́во,/ родила́ еси́ Его́ несказа́нно/ и боле́зни избежа́ла еси́, Пречи́стая.

Пе́снь 6.

Ирмос: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ си́л.

Припев: Преподо́бне о́тче Никоди́ме, моли́ Бо́га о нас.

Пусты́нник, безмо́лвник и отше́льник, преподо́бный Никоди́м, Кожеезе́рский чудотво́рец,/ да восхва́лится от всех ве́рных Боже́ственными пе́ньми,/ сей бо вои́стинну свети́ло яви́ся све́тло.

Припев: Преподо́бне о́тче Никоди́ме, моли́ Бо́га о нас.

Е́же преставле́ние твое́ к Бо́гу, преподо́бне, пра́зднующим/ и твоя́ почита́ющим по́двиги/ да́руй мир и оставле́ние грехо́в моли́твами ко Го́споду, мо́лим тя, о́тче,/ страсте́й душе́вных и теле́сных изба́вити нас,/ да пла́мене ве́чнаго свободи́мся и Ца́рствие Небе́сное получи́м, преспева́юще доброде́тельми.

Сла́ва Отцу́ и Сы́ну и Свято́му Ду́ху:

Се́ти, стре́лы и прило́ги бесо́вския отри́нул еси́ дале́че, всебога́те,/ и претерпе́л еси́ мно́гажды поноше́ния от безу́мных люде́й,/ и непрекло́нен бысть, преподо́бне, и тверд, я́ко адама́нт,/ Боже́ственная бо благода́ть соблюда́ше тя невреди́ма.

И ны́не и при́сно и во ве́ки веко́в. Ами́нь.

Богородичен: Небе́сная во́инства пою́т Твое́ рождество́ безсе́менное, Де́во Всенепоро́чная,/ те́мже, вси ве́рнии, позна́хом спасе́ния стра́шное Боже́ственное та́инство,/ Тя, Пресвята́я Ма́ти, Присноде́во, кла́няющеся, велича́ем.

Конда́к, гла́с 8.

Укрепля́емь си́лою Креста́ и благода́тию,/ преоби́дев тле́нная и до́лу влеку́щая мудрова́ния, о́тче,/ бесо́в посрами́л еси́,/ к Вы́шнему тече́ние получи́л еси́,/ устреми́лся еси́ в Хозью́гу пусты́ню,/ Пресвяте́й Тро́ице жили́ще был еси́,/ Е́йже предстоя́, моли́ о нас, почита́ющих тя,/ да возопии́м ти:/ ра́дуйся, преблаже́нне Никоди́ме, о́тче наш.

Икос:

Упра́ви мя, Спа́се, на пути́ Твоя́ Боже́ственныя,/ укрепи́ мя твори́ти Твою́ во́лю,/ просвети́ о́чи мой восхвали́ти Твоего́ преподо́бнаго исправле́ния:/ сей у́бо вои́стинну яви́ся столп непоколеби́м, свети́ло пресве́тлое и неугаси́мое, воздержа́ния о́браз,/ А́нгелом бысть ра́дость, бесо́м па́губа, чудесе́м самоде́лец.24 / Житие́ у́бо, о́тче Никоди́ме, па́че челове́ка соверши́л еси́,/ вся бо, я́же в ми́ре сла́дкая и кра́сная, преоби́дев, после́довал еси́ Христу́,/ в Хозью́гу пусты́ню дости́гл еси́, Никоди́ме чудотво́рче,/ те́мже и от всех слы́шиши:/ ра́дуйся, преблаже́нне Никоди́ме, о́тче наш.

Пе́снь 7.

Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Припев: Преподо́бне о́тче Никоди́ме, моли́ Бо́га о нас.

Небе́снаго пребыва́ния сподо́бился еси́, преподо́бне о́тче:/ Сердцеве́дец Бог, тя прови́дя на земли́,/ чудесы́ просла́ви и на све́щнице свет положи́,/ те́мже возопие́м: благослове́н Бог оте́ц на́щих.

Припев: Преподо́бне о́тче Никоди́ме, моли́ Бо́га о нас.

И́же в река́х и в мо́ри пла́вающии/ тя засту́пника те́пла призыва́ют, Никоди́ме чудотво́рче,/ и в боле́зни су́щии и в беда́х изба́вителя тя зна́ют,/ и нам, о́тче, помози́, зову́щим:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Христа́, И́же тобо́ю да́рующа здра́вие, о́тче, моли́/ душе́внаго и теле́снаго спасе́ния получи́ти ми,/ да не обря́щет мя, негото́ва, нощь глубо́кая и тьма отча́яния, молю́ся.

И ны́не и при́сно и во ве́ки веко́в. Ами́нь.

Богородичен: Пречи́стая Влады́чице,/ Тя, освяще́нное и Боже́ственное жили́ще,/ вси ве́рнии, зна́ем,/ покланя́емся и – ра́дуйся – возопие́м,/ благослове́нна Ты в жена́х, Деви́це Всенепоро́чная.

Пе́снь 8.

Ирмос: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Припев: Преподо́бне о́тче Никоди́ме, моли́ Бо́га о нас.

О блаже́нне Никоди́ме,/ блаже́нно поживе́ на земли́ и блаже́нну жизнь получи́л еси́,/ блаже́н вои́стинну был еси́ и научи́л еси́ пе́ти:/ благослови́те, вся дела́ Госпо́дня, Го́спода.

Припев: Преподо́бне о́тче Никоди́ме, моли́ Бо́га о нас.

И́же получи́ здра́вие тобо́ю разсла́бленный/ и други́й обре́теся цел нога́ма:/ от ото́ка повеле́ ему́ твое́й ра́це приступи́ти со мно́гим усе́рдием, вопию́щу:/ благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

От ми́ра избе́г, о́тче, смире́н, целому́др, пра́веден,/ Боже́ственным за́поведем храни́тель яви́ся, непреста́нно вопия́:/ благослови́те, дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Го́ру Тя проро́к Дании́л Боже́ственным Ду́хом нарече́, Де́во,/ из нея́же Ка́мень – Христо́с отсече́ся и сокруши́ истука́нныя./ Те́мже вопие́м:/ благослови́те, дела́ Госпо́дня, Го́спода.

Песнь 9

Ирмос: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови Благослове́ние процвела́ еси́./ Тем Тя вси велича́ем.

Припев: Преподо́бне о́тче Никоди́ме, моли́ Бо́га о нас.

Ми́ра у́бо оста́ви и и́же в ми́ре вся́кая,/ Христо́ви еди́ному после́дуя, избежа́л еси́ сете́й бесо́вских,/ чудотво́рец яви́ся избра́нный, Све́том Трисо́лнечным осия́емь,/ те́мже вси тя ублажа́ем.

Припев: Преподо́бне о́тче Никоди́ме, моли́ Бо́га о нас.

А́нгельски живы́й, о́тче, по́двиги и брань претерпе́л еси́,/ на всяк день, приснопа́мятне, копие́м бесо́в пробода́я,/ нося́, я́ко щит, моли́тву, я́ко лук, воздержа́ние и, я́ко меч, сле́зы.

Сла́ва Отцу́ и Сы́ну и Свято́му Ду́ху:

Ка́ко пе́ти тебе́ и восхвали́ти недоуме́ю, преподо́бне,/ пода́ждь ми у́бо свы́ше спасе́ние и избавле́ние, вся́кими уя́звлену стрела́ми,/ да ктому́ тя мно́жицею ублажа́ем.

И ны́не и при́сно и во ве́ки веко́в. Ами́нь.

Богородичен:А́ще и недосто́ин и многогре́шен,/ приношу́ моле́ния с пе́нием, Всепе́тая Пресвята́я Ма́ти Де́во,/ но, ве́рный и богобоя́зливый,/ приими́ у́бо рабо́в Твои́х моле́ния/ и от бед всех изба́ви и от му́ки, молю́ся.

Свети́лен.

Крест на ра́мо в житии́ взем, о́тче Никоди́ме,/ тем и ны́не, к нестаре́ющемуся преста́влен жела́нию,/ во све́те Небе́сных лико́в о Бо́зе сликовству́еши,/ при́сно к ним восхожде́ние подае́ши, свети́льниче и́ноком, Богому́дре.

Сла́ва, и ны́не, Богородичен:

Пресвята́я Богоро́дице, родила́ еси́ Христа́, Его́же нося́щи на объя́тиих Свои́х,/ призыва́ющих Тя я́ко Ма́терь, поне́же утро́ба сла́дкая,/ и прибега́ющих к Тебе́ сохрани от вся́каго вре́да/ моли́тв ра́ди Твоего́ уго́дника.

Молитва

О преподо́бне, треблаже́нне, досточу́дне, всече́стне и благоуго́дне о́тче Никоди́ме, ты возжеле́л еси́ усе́рдно ше́ствовати вслед Влады́ки Христа́, вся мирска́я мудрова́ния отри́нув, мона́шества путь предъизбра́л еси́, теле́сная чу́вства во вну́тренних пусты́нях сих затвори́в, при вода́х всели́лся еси́, во слеза́х и труде́х пребыва́я, многоле́тное вре́мя в по́двизе, и терпе́нии, и озлобле́нии мно́зе а́нгельски житие́ препроводи́л еси́, сего́ ра́ди Свет невече́рний зре́ти сподо́бился еси́, Пресвяте́й Тро́ице со все́ми святы́ми предстои́ши, непреста́нно насыща́яся зре́ния Божества́ Трисве́тлаго. Помина́й чту́щих пресве́тлую па́мять твою́ и труды́ твоя́ и терпе́ние любоче́стне чту́щих, яже вседне́вно в пусты́ни сей за Христа́ подъя́л еси́. О всепреподо́бне о́тче наш, не премолчи́, Го́споду моля́ся о оби́тели, при не́йже подвиза́лся еси́ и честны́м и трудолю́бным твои́м моще́м положи́тися благоволи́л еси́, и не оста́ви, посеща́я нас, чад свои́х, но вразуми́, окорми́ и к пути́ спасе́ния наста́ви, к по́двигу укрепи́, уны́ние и ле́ность отжени́, Бо́жиим стра́хом серде́ц на́ших устуже́ние разжзи́, окамене́нное нечу́вствие и страстно́е души́ разслабле́ние уврачу́й, я́рость и двиза́ния теле́сная успи́, у́мную слепоту́ и омраче́ние просвети́ и к безстро́потней стези́ покая́ния напра́ви, все житие́ на́ше удобри́ и к преуспе́янию доброде́телей утверди́, ю́ныя целому́дрию накажи́, ста́рыя безраска́янно соверши́ти по́двиг вооружи́, во ско́рбех су́щия уте́ши и исцели́, напа́ствуемыя заступи́ и де́монское искуше́ние отврати́ и всем поле́зная да́руй, я́ко да возмо́жем, твои́м предста́тельством и моли́твами сохрана́еми, по́двига тече́ние непреткнове́нно соверши́ти, сла́вяще Святу́ю Тро́ицу, Отца́ и Сы́на и Свята́го Ду́ха, в Трие́х Ипоста́сех поклана́емаго Бо́га, ны́не, и при́сно, и во ве́ки веко́в. Ами́нь.

Молитва вторая

О преподо́бне и Богоно́сне о́тче наш Никоди́ме! Ве́лие име́я к Бо́гу дерзнове́ние, моли́ся вы́ну о всех нас, зане́ бу́ря мно́гих бед и скорбе́й обдержи́т ны: неду́зи теле́снии, боле́зни душе́вныя, прираже́ния вра́жия обурева́ют ны. Хо́дит бо враг наш, иски́й кого́ поглоти́ти, и ежеча́сно от того́ уловля́емся; о спасе́нии же свое́м нерадя́ще, не́смы досто́йни воззре́ти на высоту́ Небе́сную. Но ты бу́ди нам помо́щник ско́рый и изба́витель: я́ко сам искуше́н быв от врага́, победи́в же сего́ до́блественне, вразуми́ ны, да разуме́ем того́ ко́вы и прираже́ния. Пода́ждь у́бо нам па́мять сме́ртную, сле́зы покая́ния и наде́жду спасе́ния, да не во отча́яние впаде́м, ниже́ де́рзостным на милосе́рдие Бо́жие упова́нием, во гресе́х же пребыва́нием в коне́ц себе́ погуби́м, но да бу́дет нам па́мять грехо́в на́ших во исто́чник те́плых слез и сокруше́ния серде́чнаго, милосе́рдие же Бо́жие и благода́ть Его́, моли́твами твои́ми, во спасе́ние на́ше, ны́не, и при́сно, и во ве́ки веко́в. Ами́нь.