16 июля.

Канон преподобному Лонгину Яренгскому на перенесение мощей.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 1:

Свы́ше Боже́ственною благода́тию просвети́вся, Богому́дре,/ мно́гим терпе́нием во вре́менней жи́зни тече́ние соверши́л еси́,/ те́мже и по успе́нии источа́еши чуде́с благода́ть,/ и́же с ве́рою приходя́щим к тебе́, Ло́нгине всеблаже́нне./ Сла́ва Да́вшему ти кре́пость,/ сла́ва Просла́вльшему тя в чудесе́х,/ сла́ва Де́йствующему тобо́ю всем исцеле́ние.

Кано́н, гла́с 2.

Пе́снь 1.

Ирмос: Во глубине́ постла́ иногда́/ фараони́тское всево́инство преоруже́нная си́ла,/ вопло́щ шееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Припев: Преподо́бне о́тче Ло́нгине, моли́ Бо́га о нас.

Обогати́вся Боже́ственными доброде́тельми,/ бога́тство преоби́дел еси́ земно́е и Небе́сное улучи́л еси́./ Те́мже мя, обнища́вша, Бо́жия ра́зума обогати́ благода́тию,/ я́ко да твою́ воспою́ жизнь, о́тче, равноа́нгельную.

Припев: Преподо́бне о́тче Ло́нгине, моли́ Бо́га о нас.

Яре́м Госпо́день благи́й и ле́гкий, блаже́нне, от ю́ности ты подъе́м,/ по́стными боре́нии врага́ смири́л еси́,/ смире́нием Христо́вым бо ору́жся,/ и́миже вознесе́ся, Ло́нгине, на высоту́ Небе́сную.

Сла́ва Отцу́ и Сы́ну и Свято́му Ду́ху:

Ю́ношески страсте́й игра́ние умертви́л еси́,/ в ю́ности стяжа́ му́дрость ста́рческую,/ и́бо благоуста́вно, Ло́нгине блаже́нне, жела́нием прему́дрости вся чу́вства испра́вил еси́.

И ны́не и при́сно и во ве́ки веко́в. Ами́нь.

Богородичен: Емману́ила, вся́ческим Влады́ку, ражда́еши нетле́нно, пребы́вши Де́ва./ Его́же непреста́нно моли́ искуше́ний от враг изба́вити/ и́же под кров Твой прибега́ющих.

Пе́снь 3.

Ирмос: Процвела́ есть пусты́ня, я́ко крин, Го́споди,/ язы́ческая неплодя́щая Це́рковь,/ прише́ствием Твои́м,/ в не́и́же утверди́ся мое́ се́рдце.

Припев: Преподо́бне о́тче Ло́нгине, моли́ Бо́га о нас.

Ще́дрый Го́споди,/ Сам пречи́стыми Свои́ми усты́ рекл еси́/ те́сный и приско́рбный путь ше́ствовати на земли́./ Те́мже, Влады́ко, и́же сего́ ше́ствовавшаго/ в ра́йскую широту́ всели́л еси и в ра́дость неизглаго́ланную со А́нгелы.

Припев: Преподо́бне о́тче Ло́нгине, моли́ Бо́га о нас.

Ше́ствие свое́, свя́те Ло́нгине, до́бре на земли́ сконча́л еси́/ и, на Небеса́ возше́д, Престо́лу Влады́чню предстоя́,/ со А́нгелы ликовству́я, воспева́еши песнь немо́лчную,/ о нас моли́ся, торжеству́ющих па́мять твою́.

Сла́ва Отцу́ и Сы́ну и Свято́му Ду́ху:

Что шум пра́зднующих быва́ет и лю́дие све́тло торжеству́ют?/ Днесь бо обрето́шася честны́я мо́щи свята́го Ло́нгина,/ благоуха́ние испуща́юще неизрече́нное,/ и вси, ра́достно лику́юще, Христа́ прославла́ют.

И ны́не и при́сно и во ве́ки веко́в. Ами́нь.

Богородичен: Цари́цу Тя всех и Влады́чицу на́шу/ любо́вию сла́вим, Пресвята́я Чи́стая,/ просве́щшеся страстьми́ Сы́на Твоего́,/ и, позна́вше Сего́ всем Благода́теля, сла́вим бла́гость Его́.

Седа́лен, гла́с 4.

Бога́тство тле́нное и сла́ву мимотеку́щую, я́ко уме́ты, вмени́в,/ Небе́сное бога́тство восприя́л еси и сла́ву, о́тче, вои́стинну ве́чную, блаже́нне./ Те́мже ублажа́ем свято́е твое́ успе́ние/ и, торжеству́юще в нем, вопие́м ти:/ помяни́ нас, ко Го́споду име́я, Ло́нгине, дерзнове́ние.

Сла́ва, и ны́не, Богородичен:

На Престо́ле Херуви́мстем седя́й и в не́дрех О́тчих водворя́яйся,/ я́ко на Престо́ле святе́м седи́т Свое́м, Влады́чице, в не́дрех Твои́х./ Вопло́щся бо, Бог и́стинно воцари́ся над все́ми язы́ки,/ и разу́мно ны́не пое́м Ему́,/ Его́же умоли́ спасти́ся рабо́м Твои́м.

Пе́снь 4.

Ирмос: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Припев: Преподо́бне о́тче Ло́нгине, моли́ Бо́га о нас.

От земны́х недр восприе́млем я́ко дар освяще́н/ честны́я твоя́ мо́щи, свя́те Ло́нгине,/ и от сих освяще́ние прие́млем, Христу́ воспева́юще:/ сла́ва си́ле Твое́й, Го́споди.

Припев: Преподо́бне о́тче Ло́нгине, моли́ Бо́га о нас.

Храм Свята́го Ду́ха от ю́ности был еси́, о́тче,/ сего́ ра́ди и по сме́рти соблюдо́шася честны́я твоя́ мо́щи нетле́нны./ И сих ра́достно лобыза́юще, вопие́м Ти, Христе́:/ сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Фарисе́йское тщесла́вие отри́нувше,/ со смире́нием и ра́достию целу́ем честны́я твоя́ мо́щи, свя́те Ло́нгине, Христу́ вопию́ще:/ сла́ва си́ле Твое́й, Го́споди.

И ны́не и при́сно и во ве́ки веко́в. Ами́нь.

Богородичен: Умерщвле́ния ко́жных риз совлече́ся пра́отец,/ и́бо Зижди́тель в онь облече́ся от Твои́х пречи́стых крове́й,/ вопло́щся па́че сло́ва, Всенепоро́чная.

Пе́снь 5

Ирмос: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю, Царю́ ми́ра,/ просвети́ мя сия́нием Твои́м,/ ино́го бо, ра́зве Тебе́, бо́га не зна́ю.

Припев: Преподо́бне о́тче Ло́нгине, моли́ Бо́га о нас.

Точе́ния сла́дка иска́паху, блаже́нне, по́тове твой,/ и ра́дование, и исцеле́ний то́ки в хвалу́ Христа́ Бо́га на́шего,/ просия́л бо еси́ пресла́вно Боже́ственными светлостьми́/ и уясни́л еси́ ве́рных совокупле́ния.

Припев: Преподо́бне о́тче Ло́нгине, моли́ Бо́га о нас.

Све́тлыми сия́нии провозсия́ша честны́я твоя́ мо́щи,/ от мног бо лет сокрове́нны,/ ны́не же, я́ко кади́ло благово́нно,/ благоуха́ние испуща́ют и освяща́ют пою́щих тя.

Сла́ва Отцу́ и Сы́ну и Свято́му Ду́ху:

Ра́дость, и весе́лие, и ра́дование неизрече́нно христоимени́тым лю́дем показа́ся/ обре́тение честны́х моще́й твои́х,/ в не́мже испроси́ нам оставле́ние грехо́в и ве́лию ми́лость.

И ны́не и при́сно и во ве́ки веко́в. Ами́нь.

Богородичен: Па́че со́лнца всем просия́вшая благода́ть/ о́блаки страсте́й и бед отго́нит, Де́во,/ и Богоразу́мия све́том просвеща́ет и́же любо́вию Тя сла́вящия/ и пою́щия непреста́нно Сы́на Твоего́, я́ко Влады́ку всех.

Пе́снь 6.

Ирмос: Ко Го́споду от ки́та Ио́на возопи́:/ Ты мя возведи́ из глубины́ а́да, молю́ся,/ да я́ко Изба́вителю во гла́се хвале́ния/ и́стины же Ду́хом пожру́ Тебе́.

Припев: Преподо́бне о́тче Ло́нгине, моли́ Бо́га о нас.

Освяти́ Госпо́дь из ложе́сн тя, блаже́нне,/ и к Сему́ ше́ствия твоя́ напра́ви,/ те́мже причте́ся преподо́бным, благоче́стно пожи́вшим,/ с ни́ми же обоже́ния наслажда́ешися, пресла́вне.

Припев: Преподо́бне о́тче Ло́нгине, моли́ Бо́га о нас.

Ны́не на тебе́ чу́до ве́лие зри́тся и у́жаса испо́лнь:/ ка́ко погребе́нныя вои́стинну мно́го лет соблюдо́шася нетле́нны, блаже́нне, твоя́ мо́щи,/ во гро́бе лежа́ще неразруши́мы, испуща́ют благоуха́ния,/ судьба́ми, и́хже весть Сам, прославля́яй тя.

Сла́ва Отцу́ и Сы́ну и Свято́му Ду́ху:

Мартиниа́на Палести́нскаго доброде́тели нося́,/ сподо́бися и дарова́ния того́ от Бо́га:/ не дельфи́ном, но ле́дами носи́мо по мо́рю,/ ко бре́гу прирази́ся честно́е те́ло твое́ це́ло и нетле́нно,/ от Го́спода прославля́емо.

И ны́не и при́сно и во ве́ки веко́в. Ами́нь.

Богородичен: Лю́тыми страсте́й наве́ты, Отрокови́це, обурева́емь/ и прило́ги грехо́вными преклоне́н,/ к Твоему́ неусы́пному и непобеди́мому заступле́нию любо́вию, Всепе́тая, прибега́ю:/ уще́дри мя и спаси́, Присноде́во.

Конда́к, гла́с 8.

Яви́стеся свети́льницы всесве́тлии, во пло́ти а́нгели,/ я́ко Живота́ дре́во ра́йское,/ поще́нием, и бде́нием, и ве́рою возраща́еми, процвели́ есте́./ Моли́твами свои́ми Небе́сную благода́ть прие́мше,/ вра́чеве же кре́пцыи я́вльшеся,/ исцеля́ете неду́жныя и ду́ши с ве́рою прибега́ющих к ра́це моще́й ва́ших,/ чудотво́рцы сла́внии, Иоа́нне и Ло́нгине,/ сего́ ра́ди вси ве́рою и любо́вию вопие́м:/ ра́дуйтеся, помо́рстей стране́ похвало́ и утвержде́ние.

Икос:

Свы́ше зва́ние прие́мше пресла́вно, безсме́ртную жизнь насле́довасте,/ с пло́тию бо на земли́ безпло́тных житие́ проше́дше,/ бы́ли есте́ страсте́м неприя́тни./ Те́мже восхваля́ем вас, отцы́ святи́и, сицева́я глаго́люще:/ ра́дуйтеся, све́тлая свети́ла и правосла́вным сла́во;/ ра́дуйтеся, целому́дрия столпи́ необори́мии./ Ра́дуйтеся, прему́драго ра́зума явле́ние;/ ра́дуйтеся, пра́вды рачи́тели изве́стнии./ Ра́дуйтеся, я́ко по́стными по́двиги умертви́вшии плотски́х дея́ний стремле́ния;/ ра́дуйтеся, умы́ наслажда́ющиися Небе́сных неизрече́нных благ./ Ра́дуйтеся, всю тварь благоче́стно удивля́ющии чудесы́, и́миже посрами́шася бе́сове;/ ра́дуйтеся, ору́жницы духо́внни, и́миже вся́ка страсть умертви́ся./ Ра́дуйтеся, исто́чницы исцеле́ний живо́тных вод;/ ра́дуйтеся, помо́щницы ве́рно восхваля́ющим вас и в мо́ре обурева́емым небу́рное приста́нище./ Ра́дуйтеся, чудотво́рцы достохва́льнии, Иоа́нне и Ло́нгине,/ помо́рстей стране́ похвало́ и утвержде́ние.

Пе́снь 7.

Ирмос: Купина́ в горе́ огненеопа́льная/ и росоно́сная пещь халде́йская/ я́ве предписа́ Тя, Богоневе́сто:/ Боже́ственный бо Невеще́ственный/ в веще́ственнем чре́ве О́гнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц на́ших.

Припев: Преподо́бне о́тче Ло́нгине, моли́ Бо́га о нас.

Кре́постию вжи́лився Живода́вца, пло́ти жела́ния удержа́л еси́, пребога́те,/ воздержа́нием ум впери́л еси́ к Небе́сным ликостоя́нием, поя́ кре́пко:/ благослове́н Бог оте́ц на́ших.

Припев: Преподо́бне о́тче Ло́нгине, моли́ Бо́га о нас.

Иоа́нну Ку́щнику ревнова́в,/ в ру́бищах ни́щих сокро́вище сокрове́нно яви́ся, Богодухнове́нне,/ Боже́ственную бо оде́жду возлюби́л еси́/ и, оде́явся, в черто́г Вы́шний вшел еси́, вопия́:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Иска́пающи сла́дость ра́ка моще́й твои́х бога́тых исцеле́ний,/ стра́сти отгоня́ет, Ло́нгине, ве́рою чту́щим тя/ и прогоня́ет бесо́в вся полки́ от взыва́ющих ве́рно:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Земля́ свята́я, из нея́же Христо́с прозябе́ – Клас жи́зни,/ и иста́явшее гла́дом назда́ челове́ческое естество́ от дре́вния зло́бы, Богома́ти Всенепоро́чная,/ те́мже Тя пое́м, Благослове́нную, Яже Бо́га пло́тию ро́ждшую.

Пе́снь 8.

Ирмос: В пещи́ отро́честей прообрази́л еси́ иногда́ Твою́ Ма́терь, Го́споди:/ о́браз же сия́ из огня́ изыма́ше неопа́льно входя́щия./ ю́же пое́м, я́вльшуюся Тобо́ю конце́м днесь,/ и превозно́сим во вся ве́ки.

Припев: Преподо́бне о́тче Ло́нгине, моли́ Бо́га о нас.

Зижди́телю присво́ився любо́вию Боже́ственною,/ прия́т Небе́сное насле́дие и дре́ва живо́тнаго прича́стник был еси́,/ обще́нием обожа́емь, благода́тию бог был еси́,/ со безпло́тными немо́лчно славосло́вя Христа́ во ве́ки.

Припев: Преподо́бне о́тче Ло́нгине, моли́ Бо́га о нас.

Жела́ние пло́ти своея́ посто́м и воздержа́нием обузда́в,/ стра́сти потопи́л еси́, я́коже други́я ны́не фараони́ты, пото́ки слез твои́х,/ руку́ же просте́ртием моли́тв мы́сленнаго Амали́ка победи́в,/ превознося́ Христа́ во ве́ки.

Сла́ва Отцу́ и Сы́ну и Свято́му Ду́ху:

Естество́ плотско́е победи́в,/ Христо́вым посо́бием ду́шу же просвети́л еси́/ и равноа́нгельну ту по естеству́ сотвори́л еси́,/ исцеле́ний же де́йство прия́л еси́, Ло́нгине,/ судо́м пра́ведным вся Управля́ющаго.

И ны́не и при́сно и во ве́ки веко́в. Ами́нь.

Богородичен: Добро́та честны́х и святы́х А́нгел,/ ра́дование челове́ком Ты еси́, Де́во Богоро́дице./ Ты мя к животу́ наста́ви и присносу́щному весе́лию,/ да Тя, Чи́стую, сла́влю во вся ве́ки.

Песнь 9

Ирмос: Весь еси́ жела́ние, весь сла́дость,/ Сло́ве Бо́жий, Де́вы Сы́не,/ Бо́же бого́в, Го́споди,/ святы́х Пресвяты́й,/ тем Тя вси с Ро́ждшею велича́ем.

Припев: Преподо́бне о́тче Ло́нгине, моли́ Бо́га о нас.

Го́споду просла́вльшу уго́дника Своего́ свята́го Ло́нгина,/ мно́гим бо лето́м преше́дшим сокрове́ны бы́ша честны́я его́ мо́щи,/ ны́не же вси я́ве зря́ще и согла́сно воспева́юще, Го́спода велича́ем.

Припев: Преподо́бне о́тче Ло́нгине, моли́ Бо́га о нас.

Ви́девше вси, почуди́шася,/ па́че же стра́хом и ра́достию объя́ти бы́ше,/ я́ко по толи́цех ле́тех обрето́шася честны́я мо́щи свята́го Ло́нгина це́лы и нетле́нны,/ и единогла́сно Го́спода просла́виша.

Сла́ва Отцу́ и Сы́ну и Свято́му Ду́ху:

Безве́стная и та́йная после́днему ро́ду явле́на бы́ша –/ честны́я мо́щи свята́го Ло́нгина, благоуха́ние ве́лие испуща́юще,/ и, сим прикаса́ющеся, исцеле́ния прие́млем, Христа́ велича́юще.

И ны́не и при́сно и во ве́ки веко́в. Ами́нь.

Богородичен: Ада́мов Соде́тель от крове́й Твои́х чи́стых зи́ждется и млеко́м пита́ется,/ пита́яй вся́ко дыха́ние, Богоро́дице Де́во./ Те́мже я́ко Бо́жию Тя сла́вим Ма́терь и велича́ем.

Свети́лен.

Псало́мски омака́я посте́лю слеза́ми, Ло́нгине,/ утеше́ние улучи́л еси́ нестаре́емое и ра́йское наслажде́ние,/ по́стническими же труды́ умертви́л еси́ стра́сти, к безстра́стию прите́кл еси́/ и мо́лишися о нас, Богоно́се.

Сла́ва, и ны́не, Богородичен:

Иере́и Богому́дрии, в це́ркви Тебе́ с людьми́ благочести́выми предстоя́ще,/ Твоея́ ча́ют, Богоро́дице, ми́лости:/ премени́ на ра́дость на́шу печа́ль,/ Ра́дость бо родила́ еси́, грехи́ всем челове́ком отпусти́вшаго.

Молитва

О свяще́нная главо́, преподо́бне о́тче, преблаже́нне а́вво Ло́нгине, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.