В воскресенье, после 13 июля
Канон первый собору святых в земле Тверской просиявших
![Канон собору святых в земле Тверской просиявших Канон собору святых в земле Тверской просиявших](img_i/089.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, глас 4:
И́же в земли́ Тверско́й просла́вльшиися,/ святи́телие, му́ченицы,/ преподо́бнии, пра́веднии/ и вси святи́и,/ ве́рою, по́двиги благоче́стия,/ любо́вию, кро́тостию, сло́вом и житие́м/ Бо́гу благоугоди́вшии/ и венцы́ нетле́ния и сла́вы украси́вшиися,/ моли́те Христа́ Бо́га на́шего/ дарова́ти мир стране́ на́шей/ и душа́м на́шим в ми́ре спасти́ся.
Велича́ние:
Велича́ем вас,/ святи́телие Христо́вы,/ му́ченицы, за ве́ру Христо́ву и оте́чество пострада́вшии,/ преподо́бнии, пра́веднии и вси святи́и,/ в земли́ Тверско́й просия́вшии,/ и чтим святу́ю па́мять ва́шу,/ вы бо моли́те о нас/ Христа́, Бо́га на́шего.
Кано́н, гла́с 8.
Пе́снь 1.
Ирмос: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Припе́в: Святи́и вси Тверски́я земли́, моли́те Бо́га о нас.
Пра́зднующе ны́не па́мять всех святы́х, в земли́ Тверско́й просия́вших,/ ве́рою, любо́вию и благоче́стием благоугоди́вших Бо́гу,/ моли́твеннаго хода́тайства о нас пред Бо́гом усе́рдно про́сим.
Припе́в: Святи́и вси Тверски́я земли́, моли́те Бо́га о нас.
Пе́рваго Патриа́рха Всеросси́йскаго Святе́йшаго Отца́ И́ова,/ ве́рнии лю́дие, почти́м усе́рдно,/ я́ко моли́твенника на́шего и предста́теля пред Бо́гом за оте́чество на́ше.
Сла́ва Отцу́ и Сы́ну и Свято́му Ду́ху:
Ра́дуйся, пе́рвый епи́скопе Тверски́я епа́рхии,/ святи́телю о́тче Симео́не,/ положи́вый нача́ло духо́внаго правле́ния па́ствы Тверски́я.
И ны́не и при́сно и во ве́ки веко́в. Ами́нь.
Богородичен: Пресвята́я Влады́чице Богоро́дице,/ помоли́ся за ны Бо́гу со всем собо́ром Тверски́х святы́х,/ да спасе́т Госпо́дь ду́ши на́ша.
Пе́снь 3.
Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко нестъ свят, па́че Тебе́, Еди́не Человеколю́бче.
Припе́в: Святи́и вси Тверски́я земли́, моли́те Бо́га о нас.
Арсе́ние святы́й, святи́телю Христо́в,/ а́ще и челове́к естество́м, но а́нгельски на земли́ пожи́л еси́,/ от ю́ности Христа́ возлюби́в, душе́вною чистото́ю сия́я,/ и́стинным смире́нием украси́лся еси́.
Припе́в: Святи́и вси Тверски́я земли́, моли́те Бо́га о нас.
Вельми́ украси́л еси́ престо́л твой, святи́телю Арсе́ние,/ вели́кими бо чудесы́ преспе́л еси́ и житие́м, све́тлым,/ сего́ ра́ди Вели́кий Бог наш вельми́ Тя просла́ви.
Сла́ва Отцу́ и Сы́ну и Свято́му Ду́ху:
Врача́ изря́дна разли́чно неду́гующим/ и наставле́ние всем, прельще́нным злым сове́том,/ Христо́с тя дарова́ чудотво́рца земли́ на́шей, святи́телю Арсе́ние./ Те́мже тя ублажа́ем.
И ны́не и при́сно и во ве́ки веко́в. Ами́нь.
Богородичен: Пресвята́я Де́во, Ты нас спаси́ и не́мощем на́шим бу́ди Спаси́тельница,/ скорбе́й мно́гих и лю́тых нас изба́ви,/ да Тя сла́вим, еди́ну Богоро́дицу.
Пе́снь 4.
Ирмос: Ты моя́ кре́пость, Го́споди,/ Ты моя́ и си́ла,/ Ты мо́й Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Припе́в: Святи́и вси Тверски́я земли́, моли́те Бо́га о нас.
Незаходи́мое Со́лнце в себе́ стяжа́в, Христа́ Бо́га на́шего,/ пресла́вный благове́рный вели́кий кня́же Михаи́ле,/ освяти́ ны, честну́ю па́мять твою́ почита́ющия.
Припе́в: Святи́и вси Тверски́я земли́, моли́те Бо́га о нас.
Я́ко по зако́ну ходи́в, смире́нную му́дрость восприя́л еси́,/ вели́кий страда́льче, кня́же Михаи́ле,/ со святы́ми Тро́ице предстоя́,/ моли́ся очище́ние нам дарова́ти, тебе́ восхваля́ющим.
Сла́ва Отцу́ и Сы́ну и Свято́му Ду́ху:
Яви́ся дне́сь заступле́ние гра́ду на́шему и лю́дем пречи́стое те́ло твое́ честно́е,/ е́же прии́мши Це́рковь Бо́жия,/ весели́т сердца́ пою́щих тя, Михаи́ле всеблаже́нне.
И ны́не и при́сно и во ве́ки веко́в. Ами́нь.
Богородичен: Засту́пнице скорбя́щих,/ наде́ждо ненаде́ющихся, Богоро́дице Всепе́тая,/ моли́ приле́жно изба́витися нам от бед и скорбе́й.
Пе́снь 5
Ирмос: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя е́сть чужда́я тьма́, окая́ннаго?/ Но обрати́ мя и к све́ту за́поведеи́ Твои́х/ пути́ моя́ напра́ви, молю́ся.
Припе́в: Святи́и вси Тверски́я земли́, моли́те Бо́га о нас.
Многоско́рбная вели́кая княги́не, преподо́бная А́нно Ка́шинская,/ чу́дным житие́м твои́м угоди́ла еси́ Христу́ Бо́гу,/ ны́не ра́дующися, и веселя́щися,/ и наслажда́ющися ра́йския красоты́ и блаже́нства,/ моли́ о нас Христа́ Бо́га на́шего,/ дарова́ти мир стране́ на́шей.
Припе́в: Святи́и вси Тверски́я земли́, моли́те Бо́га о нас.
Богому́драя Ксе́ние, ма́ти кня́зя-му́ченика свята́го Михаи́ла Тверска́го,/ моли́ся с сы́ном твои́м честны́м о нас ко Го́споду,/ да умири́т мир и спасе́т ду́ши на́ша.
Сла́ва Отцу́ и Сы́ну и Свято́му Ду́ху:
Благове́рная княги́не Новото́ржская Иулиани́е,/ целому́дрия ра́ди му́ченическую сме́рть прия́ла еси́./ Сего́ ра́ди от Христа́ Бо́га нетле́нным и ве́чным венце́м венча́вшися,/ ны́не с ли́ки му́ченик лику́еши./ Моли́ся Христу́ Бо́гу о всех нас,/ ве́рою и любо́вию страда́ния твоя́ почита́ющих.
И ны́не и при́сно и во ве́ки веко́в. Ами́нь.
Богородичен: Блажи́м Тя, Богоро́дице Де́во,/ Ты бо мо́лишися о нас Сы́ну Твоему́, Христу́ Бо́гу на́шему,/ во спасе́нии душ и́мя Твое́ призыва́ющих.
Пе́снь 6.
Ирмос: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Припе́в: Святи́и вси Тверски́я земли́, моли́те Бо́га о нас.
Мо́лим вас, святи́телие Христо́вы Тверски́я страны:/ Ака́кие, Фео́доре, Феокти́сте и Арсе́ние/ и вси Тверсти́и святи́телие и чудотво́рцы,/ да ва́шими святы́ми моли́твами пода́ст Госпо́дь ми́ру умире́ние.
Припе́в: Святи́и вси Тверски́я земли́, моли́те Бо́га о нас.
С ва́ми да помо́лятся и святи́тели первопресто́льнаго гра́да Москвы,/ Петр, Алекси́й и Киприа́н,/ и Каза́нстии чудотво́рцы, святи́и Варсоно́фии́, Ге́рман и Гу́рий, с Моисе́ем Новгоро́дским/ о спасе́нии душ на́ших.
Сла́ва Отцу́ и Сы́ну и Свято́му Ду́ху:
Святи́телю о́тче Ти́хоне, Воро́нежский и Задо́нский чудотво́рче,/ ты в Твери́ подвиза́лся еси́ на по́прищи просвеще́ния и учи́тельства в духо́вной шко́ле/ и в управле́нии Успе́нским О́трочим монастыре́м;/ во святи́тельстве же написа́л еси́ труд:/ Духо́вное сокро́вище, от ми́ра собира́емое./ Све́том Богопозна́ния просвети́ и на́ша сердца́.
И ны́не и при́сно и во ве́ки веко́в. Ами́нь.
Богородичен: В моли́твах Твои́х неусы́пную моли́твенницу, Влады́чице,/ и в предста́тельстве непрело́жное упова́ние ве́мы Тя, Богоро́дице./ Те́мже мо́лим Тя:/ спаси́ от бед любо́вию чту́щих Тя.
Конда́к, гла́с 4.
На земли́ благоче́стно пожи́вшии,/ святи́и, в земли́ Тверско́й просия́вшии,/ и ны́не на Небесе́х со А́нгелы ра́дуетеся/ и Тро́ицу Святу́ю – Отца́, и Сы́на, и Свята́го Ду́ха во Еди́ном Божестве́ прославля́ете./ Мы же, земноро́днии, моли́твенно ублажа́юще вас/ и святу́ю па́мять соверша́юще, мо́лим:/ принеси́те на́ша моли́твы к Небе́сному Престо́лу Го́спода Вседержи́теля,/ да Ва́шим хода́тайством/ да́рует мир и спасе́ние душа́м на́шим.
Икос:
Аз е́смь Лоза́, вы же ро́ждие, –/ рече́ Христо́с Свои́м ученико́м./ Та́кожде и вы, святи́и страны́ Тверски́я, яви́стеся ло́зы Христо́вы,/ благоукраси́вшия Святу́ю Це́рковь Ру́сскую плоды ве́ры и благоче́стия,/ и ны́не подае́те душа́м на́шим ра́дость, мир и ве́лию ми́лость.
Пе́снь 7.
Ирмос: Бо́жия снизхожде́ния/ огнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Припе́в: Святи́и вси Тверски́я земли́, моли́те Бо́га о нас.
Тверска́я похвало́:/ Арсе́ние святи́телю, Михаи́ле му́чениче/ и А́нно, гра́да Ка́шина сокро́вище, с Иулиани́ею – цве́том целому́дрия,/ о нас Христа́ Бо́га моли́те.
Припе́в: Святи́и вси Тверски́я земли́, моли́те Бо́га о нас.
Преподо́бнии Ни́ле Столобе́нский и Мака́рие Каля́зинский, чудотво́рцы пресла́внии,/ помина́йте чту́щих ва́шу святу́ю па́мять/ и моли́те Бо́га о нас.
Сла́ва Отцу́ и Сы́ну и Свято́му Ду́ху:
О́тче Ефре́ме, гра́да Торжка́ просвети́телю, со ученико́м твои́м Арка́дием,/ моли́те Бо́га пода́ти мир всему́ Правосла́вию/ и душа́м на́шим ве́лию и бога́тую ми́лость.
И ны́не и при́сно и во ве́ки веко́в. Ами́нь.
Богородичен: Не и́мамы ины́я по́мощи, ра́зве Тебе́, Цари́це Небе́сная,/ Ты нам помози́/ и изба́ви от находя́щих на ны бед и скорбе́й/ и от печа́лей мно́гих, обурева́ющих ны.
Пе́снь 8.
Ирмос: Седмери́мцею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Припе́в: Святи́и вси Тверски́я земли́, моли́те Бо́га о нас.
Свя́тче Паи́сие, постри́жениче преподо́бнаго Мака́рия, Каля́зинскаго чудотво́рца,/ а́нгельскому житию́ ревну́я, духо́вному отцу́ твоему́ подража́тель быв,/ многотру́дное житие́ яви́л еси́,/ и, чуде́с дарова́ние от Бо́га прия́в, преподо́бне,/ моли́ Христа́ Бо́га спасти́ся душа́м на́шим.
Припе́в: Святи́и вси Тверски́я земли́, моли́те Бо́га о нас.
Преподо́бнии отцы́: Анто́ние Краснохо́лмский, Некта́рие Бежецкий и Арсе́ние Новогру́дский/ и про́чии преподо́бнии всея́ Тверски́я страны́,/ вы есте́ сла́во и украше́ние святе́й Це́ркве Тверско́й.
Сла́ва Отцу́ и Сы́ну и Свято́му Ду́ху:
Преподо́бнии отцы́ и ма́тери, ве́домии и неве́домии ми́ру,/ в земли́ Тверско́й подвиза́вшиися и житие́м ва́шим Бо́гу благоугоди́вшии,/ моли́те Бо́га о душа́х на́ших.
И ны́не и при́сно и во ве́ки веко́в. Ами́нь.
Богородичен: Богоро́дице Де́во, упова́ние христиа́ном,/ сохрани́ гра́ды и ве́си Тверски́я страны́,/ и Це́рковь святу́ю в ми́ре соблюди́,/ и лю́ди правосла́вныя, на Тя упова́ющия, спаси́.
Песнь 9
Ирмос: Ужасе́ся о сем Не́бо/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ быстъ простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Припе́в: Святи́и вси Тверски́я земли́, моли́те Бо́га о нас.
Всем святы́м, земноро́дным сро́дником на́шим,/ в земли́ Тверско́й подвиза́вшимся, мо́лимся усе́рдно:/ да моли́твами их пода́ст Госпо́дь мир душа́м на́шим.
Припе́в: Святи́и вси Тверски́я земли́, моли́те Бо́га о нас.
О вси святи́и земли́ Тверски́я,/ уго́дницы Бо́жии, Ду́ха Свята́го сосу́ди честни́и бы́вше,/ благода́ть Боже́ственную восприя́сте,/ неиреста́нно моли́те о воспева́ющих и чту́щих святу́ю память ва́шу.
Сла́ва Отцу́ и Сы́ну и Свято́му Ду́ху:
Тро́ичен: Отца́, и Сына, и Свята́го Ду́ха,/ Святу́ю Тро́ицу во Еди́нице чтим, и покланя́емся, и со умиле́нием про́сим:/ да моли́твами всех Тверски́х святы́х сохрани́т Бог мир от вся́каго зла.
И ны́не и при́сно и во ве́ки веко́в. Ами́нь.
Богородичен: Не то́кмо земноро́дных, но и Небе́сных сил яви́лася еси́ Честне́йшая Херуви́м/ и Сла́внейшая без сравне́ния Серафи́м, Пречи́стая Де́во Богоро́дице,/ Бо́га бо родила́ еси́, Неискусобра́чная./ Того́ моли́ единомы́слие, мир и благостоя́ние ти́хое святе́й Це́ркви Правосла́вней дарова́ти,/ во спасе́ние душ на́ших.
Свети́лен.
Свет Тво́й, Христе́ Бо́же, возсия́ пра́ведникам, я́ко со́лнце незаходи́мое,/ просвеща́ющее Тверску́ю Це́рковь, прославля́емую святы́ми Твои́ми./ Тя бо сла́вяще, чтим и святы́я Твоя́, моля́щияся за ны.
Молитва
К вам, о святи́и вси Тверски́я земли́, я́ко путево́дным свети́льникам, дея́ньми свои́ми освети́вшим путь Небе́снаго восхо́да, аз многогре́шный смире́нно коле́на се́рдца моего́ преклоня́ю и из глубины́ души́ взыва́ю: умоли́те о мне Человеколю́бца Бо́га, да не попу́стит ми еще́ блужда́ти по распу́тиям греха́, но да просвети́т мои́ ум и се́рдце све́том благода́ти Своея́, я́ко да то́ю озаря́ем и подкрепля́ем, возмогу́ про́чее вре́мя земна́го жития́ пра́вою стезе́ю непреткнове́нно преити́ и хода́тайством ва́шим к Преблаго́му Го́споду сподо́блюся, поне́ вма́ле прича́стник бы́ти духо́вныя ва́шея трапе́зы в Небе́сном черто́зе Царя́ сла́вы. Ему́же со Безнача́льным Его́ Отце́м и Пресвяты́м, Благи́м и Животворя́щим Ду́хом бу́ди сла́ва, честь и поклоне́ние во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Канон собору святых в земле Тверской просиявших Канон собору святых в земле Тверской просиявших](img_b/089.jpg)