13 июля.

Канон преподобному Петру, царевичу Ордынскому, Ростовскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Оте́чества своего́, блаже́нне Пе́тре, удали́вся, и богоме́рзкую ве́ру отню́д возненави́дев, от тмы́ во све́т прише́л еси́ и всели́лся еси́ во сла́вный и многонаро́дный гра́д Росто́в, в не́мже житие́ че́стно пожи́в, це́рковь во и́мя святы́х апо́стол Петра́ и Па́вла воздви́гл еси́ Христо́вою благода́тию, и сию́ чу́дными ико́нами, я́ко неве́сту, украси́в, святи́теля же, и кня́зя, и вся́ лю́ди житие́м свои́м удиви́л еси́, те́мже и по сме́рти твое́й Христо́с да́ром чуде́с обогати́ тя́. Помина́й на́с, чту́щих пресве́тлую па́мять твою́, преподо́бне о́тче Пе́тре, и моли́ Христа́ Бо́га спасти́ся душа́м на́шим.

Велича́ние:

Ублажа́ем тя́, преподо́бне о́тче Пе́тре, и чте́м святу́ю па́мять твою́, наста́вниче мона́хов и собесе́дниче Ангелов.

Кано́н свята́го Петра́ Царе́вича, гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Преподо́бне о́тче Пе́тре, моли́ Бо́га о нас.

Ве́сь ты́ Творцу́ возложи́ себе́, вседуше́вное жела́ние излия́в Тому́, сего́ ра́ди духо́вную благода́ть восприя́л еси́, све́том благода́ти озаря́яся, блаже́нне Пе́тре пресла́вне, ве́рою твою́ па́мять соверша́ющия просвети́ и от тмы́ грехо́вныя моли́твами твои́ми изба́ви.

Припев: Преподо́бне о́тче Пе́тре, моли́ Бо́га о нас.

Из мла́да Христа́ возлюби́л еси́, всеблаже́нне Пе́тре пресла́вне, всече́стне чудотво́рче, и Пречи́стую Его́ Богома́терь. Те́м просвеща́еши чудесы́, я́ко мо́лния, всю́ вселе́нную.

Сла́ва Отцу́ и Сы́ну и Свято́му Ду́ху:

Ны́не, преблаже́нне Пе́тре, душа́ твоя́ почива́ет на небесе́х, со Христо́м во Ца́рствии небе́снем, зде́ же честны́я твоя́ мо́щи подаю́т исцеле́ния приходя́щим с ве́рою.

И ны́не и при́сно и во ве́ки веко́в. Ами́нь.

Богородичен: Ра́дуйся, Пресвята́я Богоро́дице, Ангельское удивле́ние, проро́ческое пропове́дание, апо́стольская немо́лчная уста́, моли́ся Сы́ну Твоему́ и Бо́гу на́шему, да сохрани́т ме́сто сие́ и святу́ю оби́тель [сию́] блаже́ннаго моле́нием.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Преподо́бне о́тче Пе́тре, моли́ Бо́га о нас.

Яко светоза́рное сия́ние яви́ся ты́ Триипоста́снаго Божества́, Пе́тре блаже́нне, омраче́нных ду́ши просвеща́еши моли́твами твои́ми.

Припев: Преподо́бне о́тче Пе́тре, моли́ Бо́га о нас.

Из мла́да во́зраста восприя́л еси́ во Орде́ Христо́во повеле́ние, и ве́ру, и утвержде́ние, прише́л еси́ во гра́д Росто́в и сия́еши, я́ко сия́ние Триипоста́снаго Божества́, преблаже́нне.

Сла́ва Отцу́ и Сы́ну и Свято́му Ду́ху:

Креста́ Госпо́дня си́лою укрепля́емь, блаже́нне Пе́тре, преще́нием ве́рныя твоея́ моли́твы, стремле́ния бесо́вская на земли́ победи́ Бо́жиею си́лою.

И ны́не и при́сно и во ве́ки веко́в. Ами́нь.

Богородичен: Ра́дуйся, Влады́чице Де́во, це́рквам еси́ красота́, царе́м похвала́, князе́м держа́ва, непреста́нно моли́ся Сы́ну Своему́ и Бо́гу сохрани́ти гра́д се́й и лю́ди, моли́твами всеблаже́ннаго Петра́.

Седа́лен, гла́с 8:

Тве́рдостию ра́зума украша́яся, плотски́я тяготы́ отве́ргл, и горды́ню попра́л еси́, и бы́л еси́ оби́телище Ду́ху Пресвято́му, неукло́нным ра́зумом простира́яся ко Христу́ Бо́гу, многоко́зненнаго же стре́лы притупи́л еси́ и лу́ки сокруши́л еси́, всеблаже́нне Пе́тре: моли́ Христа́ Бо́га грехо́в оставле́ние пода́ти чту́щим любо́вию святу́ю па́мять твою́.

Сла́ва, и ны́не, Богородичен:

Яко де́ву [и] еди́ну в жена́х, Тя́, безсе́мене ро́ждшую Бо́га пло́тию, вси́ блажи́м, ро́ди челове́честии: о́гнь бо всели́ся в Тя́ Божества́, и, я́ко младе́нца, дои́ши Зижди́теля и Го́спода. Те́мже, Ангельский и челове́ческий ро́д, досто́йно сла́вим пресвято́е Рождество́ Твое́, и согла́сно вопие́м Ти́: моли́ Христа́ Бо́га согреше́ний оставле́ние дарова́ти, воспева́ющим досто́йно сла́ву Твою́.

Пе́снь 4.

Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.

Припев: Преподо́бне о́тче Пе́тре, моли́ Бо́га о нас.

Иже на земли́ степе́нь ца́рственный име́л еси́, всеблаже́нне Пе́тре, свои́ми моли́твами ми́рное Ца́рство восприя́л еси́ и ны́не на небесе́х со Христо́м ца́рствуеши.

Припев: Преподо́бне о́тче Пе́тре, моли́ Бо́га о нас.

Исцеле́ния содева́ет, блаже́нне, боже́ственный гро́б тво́й, Пе́тре, отгоня́еши бо неду́ги и ду́хи лука́выя от челове́к и укрепля́еши мудрова́ния и́х, е́же восхваля́ти труды́ твоя́, всече́стне.

Сла́ва Отцу́ и Сы́ну и Свято́му Ду́ху:

Со враго́м дре́вле бо́ршися воздержа́нием, ны́не кре́пкую получи́л еси́ побе́ду, блаже́нне Пе́тре, пресла́вне чудотво́рче, му́ченически претерпе́в труды́ и низложи́в бесо́вския ополче́ния.

И ны́не и при́сно и во ве́ки веко́в. Ами́нь.

Богородичен: Христа́ на́м родила́ еси́, Пречи́стая Богоро́дице Влады́чице, Богора́дованная Де́во, спаси́ гра́д и лю́ди, к Тебе́ прибега́ющия, Богоро́дице Пренепоро́чная.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Преподо́бне о́тче Пе́тре, моли́ Бо́га о нас.

Зако́нно моли́твами и посто́м всегда́ подвиза́лся еси́, блаже́нне Пе́тре, безме́рно покори́л еси́ плотски́й ра́зум, смири́в кре́постию Боже́ственнаго Ду́ха.

Припев: Преподо́бне о́тче Пе́тре, моли́ Бо́га о нас.

От ю́ности возжела́л еси́ о́браза мона́шескаго и от Христа́ восприя́л еси́ вене́ц златы́й и ри́зу нетле́нну, ны́не, всеблаже́нне Пе́тре, со Ангелы ра́дуется ду́х тво́й.

Сла́ва Отцу́ и Сы́ну и Свято́му Ду́ху:

Гро́б честна́го телесе́ показа́ся ве́рным лю́дем ду́ш и теле́с на исцеле́ние, и отгна́ние страсте́й от твои́х моще́й вси́ почерпа́ем.

И ны́не и при́сно и во ве́ки веко́в. Ами́нь.

Богородичен: Всесве́тлым укра́шена еси́ све́том, Богора́дованная Ма́ти: Ты́ бо породи́ все́х честне́йша Христа́ Бо́га на́шего, Его́же моли́, да изба́вит ны́ от все́х напа́стей.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Преподо́бне о́тче Пе́тре, моли́ Бо́га о нас.

Удиви́ся чудесе́м твои́м ве́сь ми́р, преблаже́нне Пе́тре, восприя́л бо еси́ от Христа́ вене́ц небе́сный, его́же сподо́би и на́с причасти́тися твои́ми моли́твами, всече́стне.

Припев: Преподо́бне о́тче Пе́тре, моли́ Бо́га о нас.

Лу́к си́льных сокруши́л еси́, бра́нь вся́ку неприя́зненну потреби́л еси́, всеблаже́нне Пе́тре, веща́ние пусти́л еси́ во всю́ вселе́нную.

Сла́ва Отцу́ и Сы́ну и Свято́му Ду́ху:

Всеблаже́нне Пе́тре, уго́дниче Бо́жий, на небесе́х предстоя́ престо́лу Бо́жию, мо́лишися о на́с, зде́ же честны́я мо́щи боля́щих исцеля́ют и от гре́х изыма́ют.

И ны́не и при́сно и во ве́ки веко́в. Ами́нь.

Богородичен: Изсуши́ла еси́ сады́ безбо́жия, Пренепоро́чная Де́во, Свои́м Прозябе́нием, прозя́бшую во мне́ зло́бу искорени́, Богоневе́сто.

Конда́к, гла́с 4:

Яви́ся ве́лие со́лнце Христо́вой Це́ркви, просвеща́я уче́ния светлостьми́, всече́стне, я́ко черпа́лом златы́м, от кла́дязя неиско́паннаго чуде́с поче́рпл еси́, от исто́чника неистощи́маго, на па́мять успе́ния твоего́ прише́дшим, всеблаже́нне Пе́тре, ны́не все́м подава́еши грехо́в проще́ние, сла́во преподо́бным.

Икос:

Возлюби́в, преподо́бне, Христо́вы Боже́ственныя за́поведи и возненави́дев ми́ра сего́ наслажде́ние, прии́де усе́рдно к Тому́ и бы́сть свети́льник, просвеща́я концы́ блиста́нием духо́вным. Те́м, припа́дая, молю́ тя́: просвети́ мои́ о́чи душе́вныя, воспева́ти твоя́ по́двиги, поще́ние, бде́ние и сле́зы, боле́зни и изможде́ние те́ла блаже́нныя ра́ди бу́дущия жи́зни, ея́же ны́не наслажда́ешися, Пе́тре преблаже́нне, все́м подая́ грехо́в проще́ние, сла́во преподо́бным.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Преподо́бне о́тче Пе́тре, моли́ Бо́га о нас.

Блаже́нно твое́ житие́ и кончи́на, всече́стне, безсме́ртна, блаже́нне Пе́тре, сего́ ра́ди тя́ Христо́с свы́ше украси́ венце́м, и просвеща́еши ве́сь ми́р чудесы́, преподо́бне.

Припев: Преподо́бне о́тче Пе́тре, моли́ Бо́га о нас.

Яви́лся еси́ ны́не гра́ду Росто́ву, Пе́тре богоблаже́нне, сто́лп непоколеби́мый, и стена́ неруши́мая, и вели́кое прибе́жище, от тебе́ прие́млюще исцеле́ний благода́ть, пое́м: Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Хотя́ от мирски́х сла́достей отлучи́тися, стра́нен челове́ком яви́лся пло́ть нося́, бу́дущая и нетле́нная стяжа́в святы́й, соверши́в тече́ние богоно́сных оте́ц, я́влься о́бщник небе́сному Ца́рствию.

И ны́не и при́сно и во ве́ки веко́в. Ами́нь.

Богородичен: Без се́мене зачала́ еси́ Творца́ все́х, Христа́ Бо́га, и неизрече́нно родила́ еси́, Его́же моли́, дерзнове́ние иму́щи к Нему́, да и на́с спасе́т, вопию́щих: Бо́же, благослове́н еси́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Преподо́бне о́тче Пе́тре, моли́ Бо́га о нас.

Лику́ют на небесе́х чи́нове Ангельстии, всеблаже́нне Пе́тре, ве́рных же собо́ри, на земли́ твою́ па́мять похваля́юще, пою́т: Го́спода по́йте, дела́, и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Чудесы́, свя́те, твои́ми душе́вныя боле́зни исцели́, твои́ми моли́твами, Пе́тре пресла́вне, прося́щим отпуще́ние безчи́сленных зо́л испроси́, со безпло́тными си́лами Христу́ предстоя́, с ни́ми же пое́м непреста́нно: Го́спода воспева́йте, дела́, и превозноси́те Его́ во ве́ки.

И ны́не и при́сно и во ве́ки веко́в. Ами́нь.

Богородичен: Из пречи́стаго чре́ва, Богома́ти, небе́снаго дождя́ ка́пля на́м ука́ну, на отмове́ние скве́рнам, на здра́вие телеси́, на прогна́ние лука́ваго, те́мже Тя́ блажи́м, Чи́стая, во ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Преподо́бне о́тче Пе́тре, моли́ Бо́га о нас.

Удиви́ся во все́м ми́ре, Пе́тре, твоя́ па́мять: чудесы́ сия́еши, я́ко со́лнце, злы́я боле́зни исцеля́я все́м, те́мже моя́ стра́сти разжени́, молю́тися, прося́ мне́ отпуще́ния грехо́в, чудотво́рче Христо́в.

Припев: Преподо́бне о́тче Пе́тре, моли́ Бо́га о нас.

Да вхо́дят ны́не во святы́й хра́м се́й, к честно́му гро́бу твоему́, блаже́нне Пе́тре, цари́ и кня́зи, бога́тии и убо́зии, припа́дающе, про́сят от тебе́ почерпа́ти исцеле́ния, здра́вие и спасе́ние, те́м тя́ вси́ велича́ем.

Сла́ва Отцу́ и Сы́ну и Свято́му Ду́ху:

Ны́не помоли́ся ко Го́споду, всечу́дне Пе́тре блаже́нне, о и́же твоя́ честны́я мо́щи почита́ющих, всегда́ приходя́щих с ве́рою: слепы́м — прозре́ние, хромы́м — хожде́ние, боля́щим все́м здра́вие да́руй, да тя́ вси́ велича́ем.

И ны́не и при́сно и во ве́ки веко́в. Ами́нь.

Богородичен: Арха́нгели и Ангели, проро́цы и апо́столи и ве́сь ли́к преподо́бных оте́ц и священному́ченик, с преблаже́нным Петро́м ко Христу́ приле́жно, с Пречи́стою Его́ Ма́терию, за ве́сь ми́р моли́теся, да изба́вит на́с от все́х бе́д, Его́же вси́ велича́ем.

Свети́лен.

Мирска́го пристра́стия, я́ко от скве́рны, уклони́лся еси́, и, а́лчбою пло́ть увяди́в, обнови́л еси́ души́ кре́пость, преподо́бне, и сла́вою обогати́лся еси́ небе́сною, сла́вне. Те́мже моля́ о на́с не преста́й, о́тче преподо́бне

Сла́ва, и ны́не, Богородичен:

Истинную Богоро́дицу, Тя́ испове́дуем, Влады́чице, Тобо́ю спа́сшиися, Бо́га бо неизрече́нно родила́ еси́, разори́вшаго Кресто́м сме́рть, с Ни́мже Тя́, Де́во, восхваля́ем.

Молитва первая

О преподобне Петре царевиче, Ростовский чудотворче! Якоже из мрака языческаго во свет Евангельскаго учения Господь тя призва, тако умоли Его, да и нас по неизреченней Своей благости и человеколюбию измет всесильною Своею десницею из тьмы греховныя, и осияет сердца наша к деланию Его Божественных заповедей. Якоже ты избег мятежа мирских волнений, во ангелоподобное безпечальное житие сподобился еси достигнути, тако сподоби и нам грешным моря сего, влаемаго страстьми, пучину безмятежно преплыти, имея тя, отче, кормчаго о Господе нашем, и достигнути чистым покаянием ко пристанищу спасения вечнаго. И якоже имел еси споспешников тебе верховных Апостолов Петра и Павла в созидании обители, тако подвигни их умилосердитися и о нас недостойных, и даровати нам от сугубыя апостольския благости дерзновение ко Христу Богу. Веруем бо, яко аще мощи твоя святыя и сокровенны в земли, но ты царствуеши со избранными Божиими на небеси: исходатайствуй убо, да и нам грешным молитвами твоими отверзется дверь Царствия Небеснаго в безконечныя веки. Аминь.

Молитва вторая

О преподобне отче Петре царевиче, душею на небеси Престолу Божию предстоиши и Троичныя славы наслаждаешися, телом же на земли в Божественном храме сем почиваяй, и данною ти свыше благодатию различная источаяй чудеса, призри милостивым оком на предстоящия честней твоей раце люди и просящия умильно твоея помощи; се бо мы безмерными согрешении праведный гнев Божий на ся наведохом и всякия милости недостойни сотворихомся; тем же не смеюще вознести очеса наша к высоте небесней, ниже вознести молебный глас ко Господу, сердцем сокрушенным и смиренным духом тебе в ходатайство и на помощь призываем, испроси у Господа Церкви благостояние, воздуха благорастворение, земли плодоносие; избави всех, верою несомненною к Богу приходящих и к раце мощей твоих прибегающих, от всяких бед душевных и телесных; буди печальным утешитель, недугующим врач, напаствуемым помощник, вдовицам заступник, сирым защитник, младенцам питатель, странствующим путевождь, старым укрепление, плавающим кормчий; исходатайствуй всем, твоея помощи требующим, вся, яже ко спасению полезная, яко да твоими молитвами наставляеми, путь маловременнаго жития безбедне совершим, улучим на небеси вечный покой и прославим всех Благих Дателя, в Троице славимаго Бога, Отца и Сына и Святаго Духа, ныне и присно и во веки веков, аминь.