13 июля.

Канон иной собору святых славных и всехвальных двунадесяти апостолов.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь Собору славных и всехвальных 12-ти апостолов, глас 4

Апо́столов первопресто́льницы/ и вселе́нныя учи́телие,/ Влады́ку всех моли́те/ мир вселе́нней дарова́ти// и душа́м на́шим ве́лию ми́лость.

Велича́ние:

Велича́ем ва́с, апо́столи Христо́вы двуна́десяте, ве́сь ми́р уче́ньми свои́ми просвети́вшия и вся́ концы́ ко Христу́ приве́дшия.

Ин кано́н, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святые апо́столи, моли́те Бо́га о нас.

Верхо́внейшаго апо́столов дне́сь, Петра́, я́ко предстоя́теля Христо́вы Це́ркве и первопресто́льника, богодухнове́нными пе́сньми досто́йно воспои́м.

Припев: Святые апо́столи, моли́те Бо́га о нас.

На ка́мени твоего́ богосло́вия водрузи́ Влады́ка Иису́с Це́рковь непрекло́нну, в не́йже тя́, апо́столе Пе́тре, сла́вим.

Припев: Святые апо́столи, моли́те Бо́га о нас.

Якоже дре́вле, Христе́, десни́цею Твое́ю по воде́ пе́ша ходя́ща Петра́ спа́сл еси́, и мене́, потопля́ема бу́рею лю́тых напа́стей, спаси́, я́ко Милосе́рд.

Припев: Святые апо́столи, моли́те Бо́га о нас.

Егда́ Све́т узре́л еси́, возсия́вший на Фаво́ре, со́лнечныя покрыва́ющий лучи́, све́том, су́щим от Све́та, озари́лся еси́, Пе́тре, и ве́рныя просвети́л еси́.

Сла́ва Отцу́ и Сы́ну и Свято́му Ду́ху:

Три́жды отве́рглся еси́ Христа́, те́мже вопроше́нием трикра́тным исцеля́ет твое́ согреше́ние, Пе́тре пресла́вне, и утвержде́ние показу́ет мно́гих коле́блющихся.

И ны́не и при́сно и во ве́ки веко́в. Ами́нь.

Богородичен: Ты́, Пресвята́я Богома́ти, похвала́ Христо́вых апо́столов была́ еси́, му́чеников же сла́ва и проро́ков основа́ние, те́мже, ве́рнии, Тя́ вси́ достодо́лжно велича́ем.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святые апо́столи, моли́те Бо́га о нас.

Воспои́м, ве́рнии, Петро́ва сро́дника, Андре́я, Христо́ва ученика́: То́й бо, мо́ре мре́жами испыта́в иногда́, ры́бы улови́, ны́не же вселе́нную тро́стию ло́вит креста́, и язы́ки от пре́лести обраща́ет ко креще́нию, и, Христу́ предстоя́, про́сит ми́ра ми́ру и душа́м на́шим ве́лию ми́лость.

Припев: Святые апо́столи, моли́те Бо́га о нас.

Яко боже́ственнаго ученика́ и первозва́ннаго все́х Христо́вых ученико́в похваля́ем тя́ любо́вию, Андре́е апо́столе, и ве́рно вопие́м ти́: изба́ви па́ству твою́, е́йже от Бо́га вве́рился еси́, вся́кия ско́рби, и ну́жд, и вся́каго озлобле́ния.

Припев: Святые апо́столи, моли́те Бо́га о нас.

Первозва́ннаго апо́стола Христо́ва, Ева́нгелия свята́го пропове́дника, Росси́йския страны́ богодухнове́ннаго просвети́теля, Андре́я пресла́внаго пе́сньми восхва́лим.

Припев: Святые апо́столи, моли́те Бо́га о нас.

Неизрече́нную Твою́ добро́ту Андре́й предуве́дев, Иису́се, сро́дника призва́ све́тле: Пе́тре единокро́вне, обрето́хом Месси́ю, в зако́не и проро́цех пропове́даннаго, гряди́, прилепи́мся и́стинно жи́зни.

Сла́ва Отцу́ и Сы́ну и Свято́му Ду́ху:

Вожделе́вый креста́, Христо́в учениче́ Андре́е, получи́л еси́ кресто́м твои́м нетле́нное Ца́рство, к нему́же вся́ привле́кл еси́ кресто́м боготаи́нники, насле́дство подая́й богосло́вом Того́.

И ны́не и при́сно и во ве́ки веко́в. Ами́нь.

Богородичен: Бо́га, Его́же родила́ еси́, Де́во Всенепоро́чная, моли́ о все́х, благоче́стно Тя́ чту́щих, с первозва́нным Андре́ем, улучи́ти Боже́ственнаго осия́ния Твоего́ Сы́на и стоя́ния избра́нных и святы́х, и́бо мо́жеши, я́ко хо́щеши.

Седа́лен, гла́с 4:

Свети́ла в конце́х, ученики́ Твоя́, Христе́, яви́л еси́, сия́ющия душа́м, су́щим во тме́, ра́зум Тво́й, Влады́ко, и, ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Сла́ва:

Всели́вшеся во Све́те непристу́пнем, я́ко жили́ще Све́та су́щии, хра́м ва́ш святы́й просвеща́ете при́сно Боже́ственными пропове́дании. Те́мже ве́рою вопие́м: тмы́ на́с избавля́йте, и вся́ческих бе́д, и лю́таго язы́ческаго наше́ствия, умоля́юще Зижди́теля, апо́столи.

И ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ ублажа́ем, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га согреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святые апо́столи, моли́те Бо́га о нас.

Апо́стол Христо́в бы́л еси́ избра́нный и Богосло́ву возлю́бленному бра́т единоро́дный, всехва́льне Иа́кове, испроси́ душа́м на́шим грехо́в оставле́ние.

Припев: Святые апо́столи, моли́те Бо́га о нас.

Пропове́дник Христо́в бы́в, боже́ственный Иа́кове, ты́, зва́н у́бо, ско́ро после́довал еси́, оте́ческую любо́вь презре́в и ве́чная измени́в теку́щими, те́мже неизрече́ннаго небе́снаго насле́дия сподо́бился еси́, блаже́нне приснопа́мятне.

Припев: Святые апо́столи, моли́те Бо́га о нас.

Све́тел тя́ о́блак Сло́ва, облиста́юща сла́вою обоже́на, на Фаво́рстей горе́ осени́, блаже́нне Иа́кове, и гла́с слы́шати Оте́ческий сподо́бился еси́, известву́яй Того́ Сыновство́.

Припев: Святые апо́столи, моли́те Бо́га о нас.

Ве́рно торжеству́ем пречестну́ю па́мять твою́, Иа́кове сла́вне, не Алфе́ева тя́ сы́на, но я́ко апо́стола Христо́ва почита́юще. Те́мже, Влады́чню престо́лу предстоя́, приле́жно моли́ся спасти́ся на́м.

Сла́ва Отцу́ и Сы́ну и Свято́му Ду́ху:

Приими́, богогла́се апо́столе Иа́кове, моле́бную пе́снь, ю́же ти́ прино́сим, твою́ пра́зднующе пречестну́ю и пресве́тлую па́мять: изба́ви от грехо́в рабы́ твоя́, верхо́вный Христо́в апо́столе.

И ны́не и при́сно и во ве́ки веко́в. Ами́нь.

Богородичен: Сове́та Вели́каго Ангел, от Де́вы Ма́тере я́влься ми́ру, пло́ть прие́м, я́ко доброде́тельми укра́шена ученика́ тя показу́ет и богогла́сника, Иа́кове, словеса́ Его́ вети́йствующа.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святые апо́столи, моли́те Бо́га о нас.

От ры́барей лове́ц челове́ков и Богосло́в бы́л еси́, му́дре Иоа́нне, пренебре́г оте́ческую и мирску́ю любо́вь, Влады́це Сло́ву жела́нием боже́ственных возсле́дуя.

Припев: Святые апо́столи, моли́те Бо́га о нас.

Небе́сных ра́зум прии́м богослове́снейше, Бо́га Сло́ва пропове́дал еси́, — в нача́ле бе́ Сло́во, и Сло́во бе́ к Бо́гу, и Бо́г бе́ Сло́во — благовеству́я, науча́л еси́.

Припев: Святые апо́столи, моли́те Бо́га о нас.

Якоже мо́лния све́тлая, проходя́щи, вселе́нней, блаже́нне Иоа́нне, яви́лся еси́, чистоты́ све́тлостию, де́вства же блиста́нием и благоче́стия догма́ты ми́р просвеща́я, возлю́бленне Христу́ Бо́гу.

Припев: Святые апо́столи, моли́те Бо́га о нас.

Гро́мов сы́н бы́в, челове́ком богосло́вил еси́, е́же в нача́ле бе́ Сло́во, апо́столе Иоа́нне, возлеги́й бо на пе́рси Влады́ки твоего́ и отту́ду поче́рп богосло́вия струи́, тва́рь всю́ напая́еши.

Сла́ва Отцу́ и Сы́ну и Свято́му Ду́ху:

Благове́стниче Иоа́нне, равноа́нгельне, де́вственниче, Богосло́ве, богонауче́нне, правосла́вно ми́ру пречи́стое ребро́, кро́вь и во́ду источи́вшее, пропове́дал еси́, и́мже ве́чную жи́знь обрета́ем душа́м на́шим.

И ны́не и при́сно и во ве́ки веко́в. Ами́нь.

Богородичен: Егда́ предста́ла еси́ с возлю́бленным ученико́м у Креста́ Сы́на Твоего́, услы́шала еси́ от Него́: се́ сы́н Тво́й! С ни́мже Тя́ вси́ пое́м, Богороди́тельнице Де́во.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святые апо́столи, моли́те Бо́га о нас.

Отчую тебе́ сла́ву Собо́ю показа́вый, Фили́ппе, ли́ку ученико́в тя́ Христо́с вчини́, твою́ прове́дый доброде́тель, богоблаже́нне.

Припев: Святые апо́столи, моли́те Бо́га о нас.

Тече́ние кра́сных твои́х но́г, Фили́ппе, возврати́в к ше́ствию небе́сному, возше́л еси́, ра́дуяся, и, Тро́ице предста́в, во Отце́ ви́диши Сы́на и Ду́ха Боже́ственнаго, сего́ ра́ди ве́рою всесвяще́нную твою́ и боже́ственную пра́зднуем па́мять.

Припев: Святые апо́столи, моли́те Бо́га о нас.

Со апо́столы все́ми честны́ми, и проро́ки, и страстоте́рпцы, Фили́ппе, преподо́бными, иера́рхи и пра́ведными, с Богоро́дицею моли́ разреше́ние грехо́в мно́гих и прегреше́ний да́ти очище́ние ве́рою светоно́сную и боже́ственную па́мять твою́ соверша́ющим.

Припев: Святые апо́столи, моли́те Бо́га о нас.

Прече́стна тя́ Ка́меня живота́ ка́мень показа́, на не́мже созда́ Це́рковь Свою́, Варфоломе́е, апо́столе Госпо́день. Те́мже тя́ чти́м и ублажа́ем.

Сла́ва Отцу́ и Сы́ну и Свято́му Ду́ху:

Кресто́м блаже́нную кончи́ну, сла́вне Варфоломе́е, прие́м, сообра́зен бы́л еси́ страсте́м Учи́теля твоего́ и прича́стник све́тлости, Боже́ственныя сла́вы, при́сно со Ангелы Тому́ предстоя́ и неизрече́ннаго све́та сподобля́емь.

И ны́не и при́сно и во ве́ки веко́в. Ами́нь.

Богородичен: Из Тебе́ па́че сло́ва Бо́г Сло́во роди́тися благоизво́ли пло́тию, Де́во, Ма́ти Чи́стая, ученика́ избра́в и служи́теля при́снаго, Варфоломе́я сла́внаго.

Конда́к, гла́с 2.

Ка́мень Христо́с ка́меня ве́ры прославля́ет све́тло, ученико́в преизря́дна, и с Па́влом ве́сь дванадесяточи́сленный собо́р дне́сь. Ихже па́мять соверша́юще ве́рно, си́х Просла́вльшаго прославля́ем.

Икос:

Всечестну́ю и преблаже́нную па́мять ва́шу творя́щии ны́не, в пе́снех приле́жно вопие́м к ва́м: пресве́тлая и богозра́чная свети́ла ми́ра, возлю́бленнии ученицы́ Христо́вы двана́десяте, я́ко иму́ще к Нему́ дерзнове́ние, моли́теся за ны́, ва́м бо дана́ е́сть благода́ть исцеле́ний и грехо́в проще́ния, приле́жно у́бо Его́ моли́те грехо́в и напа́стей изба́витися на́м, да еди́наго Человеколю́бца, ва́с просла́вльшаго, прославля́ем.

Пе́снь 7.

Ирмос: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святые апо́столи, моли́те Бо́га о нас.

Руко́ю любопы́тною Боже́ственная ре́бра испыта́в и гвозде́й я́звы, я́же Безсме́ртный на́с ра́ди подъя́т, и неве́рие преложи́в ра́достне во благове́рие, Фомо́, возопи́л еси́: Ты́ еси́ Бо́г мо́й и Госпо́дь.

Припев: Святые апо́столи, моли́те Бо́га о нас.

Осия́н, апо́столе Фомо́, сла́вою Христо́вою, и, ребро́ животво́рное осяза́в, поче́рпл еси́ неизсле́димую богосло́вия пучи́ну, и ми́р обогати́л еси́.

Припев: Святые апо́столи, моли́те Бо́га о нас.

Христо́с, вели́кое Со́лнце, лучу́ тя́ многосве́тлую во Инди́ю посыла́ет, мра́чную ле́сть, таи́нниче, вско́ре разгоня́юща, Фомо́, прему́дре апо́столе, и лю́ди просвеща́юща Тро́ицу почита́ти Боже́ственную, Еюже вси́ сохраня́емся.

Припев: Святые апо́столи, моли́те Бо́га о нас.

Пе́рвый Христо́во Ева́нгелие написа́в и всю́ просвети́в подсо́лнечную тва́рь, Матфе́й, зело́ прему́дрейший и Христо́в таи́нник изя́щный, ны́не почита́емь свяще́нными пе́сньми, все́м отпуще́ния грехо́в про́сит, любо́вию чту́щим Того́.

Сла́ва Отцу́ и Сы́ну и Свято́му Ду́ху:

Евангели́ст от мыта́рства, я́ко после́дова Тебе́, Христе́, претвори́ся богоглаго́ливый всеси́льною Твое́ю кре́постию, Матфе́й всеизря́днейший.

И ны́не и при́сно и во ве́ки веко́в. Ами́нь.

Богородичен: Всепе́тую Де́ву написа́л еси́ боже́ственными твои́ми словесы́, Творца́ все́х ро́ждшую, апо́столе Матфе́е, Ему́же вси́ пое́м: препе́тый отце́в Госпо́дь и Бо́г, благослове́н еси́.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святые апо́столи, моли́те Бо́га о нас.

Иу́до, бра́тия твоя́ тя́ похваля́ют, бра́та я́вльшася, и непщу́ема я́вльшагося пло́тию Сло́ва преве́чнаго, от Присносу́щнаго возсия́вшаго, от Нерожде́нна Роди́теля.

Припев: Святые апо́столи, моли́те Бо́га о нас.

Апо́столе Иу́до, посыла́еши все́м челове́ком све́тлое и уче́ния ду́ха испо́лненно посла́ние, священноявле́нне, пречу́дне.

Припев: Святые апо́столи, моли́те Бо́га о нас.

Иу́до, апо́столе Христо́в, учени́к бы́в вопло́щшагося Бо́га на́шего, от Него́же, я́ко овча́ посреде́ волко́в, вои́стинну посла́лся еси́, сло́вом твои́м си́х претворя́я злоче́стие ко благоче́стию и боже́ственному разуме́нию Святы́я Тро́ицы. Те́мже восхваля́ем тя́.

Припев: Святые апо́столи, моли́те Бо́га о нас.

Ре́вности тезоимени́т нарече́нный, Си́моне досточу́дне, ре́вностию поревнова́л еси́ по Го́споде Бо́зе Вседержи́тели.

Сла́ва Отцу́ и Сы́ну и Свято́му Ду́ху:

Яко красны́, Си́моне, твои́ но́ги, благоле́пен е́сть и язы́к, глаго́лющ сла́ву Христо́ву, и научи́ зва́ти: Го́спода по́йте и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Вся́ Ангелов во́инства, Предте́че Госпо́день, апо́столов двоенадеся́тице, святи́и вси́ с Богоро́дицею, сотвори́те моли́тву, во е́же спасти́ся на́м.

Песнь 9

Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Припев: Святые апо́столи, моли́те Бо́га о нас.

Ученико́в двоенадеся́тых яви́лся еси́, исполня́я ли́к блаже́нный, из него́же преда́тель себе́ отве́рг, приобре́те го́рькое удавле́ние, на Христа́ воздви́г пя́ту, тайновеща́телю Матфи́е чу́дне.

Припев: Святые апо́столи, моли́те Бо́га о нас.

Светоза́рное, я́ко со́лнце, во ве́сь ми́р изше́дшее, веща́ние твое́ просвеща́ет язы́ческую Це́рковь благода́тию, чудоно́сче Матфи́е апо́столе.

Припев: Святые апо́столи, моли́те Бо́га о нас.

Излия́ся благода́ть во устна́х твои́х, сла́вне апо́столе Матфи́е, и бы́л еси́ свети́льник Це́ркве Христо́вы, уча́ слове́сныя о́вцы ве́ровати в Тро́ицу Единосу́щную и во Еди́но Божество́.

Припев: Святые апо́столи, моли́те Бо́га о нас.

Досади́тель и гони́тель Це́ркве бы́л еси́, Па́вле, всеблаже́нне, с небесе́ же зва́н бы́в, защити́л еси́ сию́ пресла́вно, е́йже ны́не моли́ изба́витися от бе́д и спасти́ся душа́м на́шим.

Сла́ва Отцу́ и Сы́ну и Свято́му Ду́ху:

Па́вле, уста́ Госпо́дня, основа́ние уче́ний, иногда́ у́бо гони́тель Иису́са Спа́са, ны́не же и первопресто́льник апо́столов бы́в, блаже́нне. Те́мже неизглаго́ланная ви́дел еси́, му́дре, да́же до тре́тияго небесе́ возше́д, и взыва́л еси́: прииди́те со мно́ю, и благи́х не лиши́мся.

И ны́не и при́сно и во ве́ки веко́в. Ами́нь.

Богородичен: Со святы́ми Ангелы, с боже́ственными апо́столы, со сла́вными му́ченики Твоего́ моли́ Сы́на и Бо́га, Богороди́тельнице Пречи́стая, от бе́д изба́вити ду́ши на́ша.

Свети́лен.

Ученико́в всечестну́ю двоенадеся́тицу ра́достно восхвали́ти стеце́мся, ра́дуйтеся, и́же всю́ подсо́лнечную обше́дше и язы́ков уло́вльше злове́рныя чреды́, научи́вшеся Боже́ственным.

Сла́ва:

Двоенадесяточи́сленный ли́к дне́сь восхва́лим, вси́ ве́рнии, я́ко утверди́вшеся от ни́х, и Христу́ возопие́м: моли́твами и́х, Спа́се, ми́р Тво́й умири́.

И ны́не, Богородичен:

Мы́ о Тебе́ хва́лимся, Богоро́дице, и к Бо́гу Тя́ и́мамы предста́тельство: простри́ ру́ку Твою́ святу́ю и сокруши́ враги́ на́ша, Твои́м низпосли́ рабо́м по́мощь от Свята́го.

Моли́тва:

Влады́ко Всемогу́щий, Го́споди Бо́же на́ш, избра́вый возлю́бленныя Своя́ ученики́ и апо́столы на про́поведь спасе́ния всему́ ми́ру, да́вый и́м вла́сть отпуща́ти грехи́! Приими́ хода́тайства и́х о ро́де челове́ческом, его́же и суди́ти с ни́ми и́маши, те́х са́мых, я́ко друго́в Твои́х, на́м зело́ честны́х, дерза́ем, недосто́йнии, в предста́тельство к Тебе́, многопоспешеству́ющее ко спасе́нию ду́ш на́ших приводи́ти, моля́ще и́х усе́рдно.

Святи́и первоверхо́внии апо́столи Пе́тре и Па́вле, евангели́сти Христо́вы Иоа́нне Богосло́ве и Матфе́е, первозва́нный учениче́ Андре́е, водруже́нием креста́ Росси́ю благослови́вый, апо́столи святи́и Иа́кове, бра́те Госпо́день, со други́м Иа́ковом, Фили́ппе, Варфоломе́е, Фомо́, Си́моне, Иу́до и Матфи́е! Вси́ святи́и богоизбра́ннии апо́столи, изря́днейшии уго́дницы Христо́вы, безбо́жия искорени́телие и ве́ры и́стинныя насади́тели! Помози́те на́м мо́щным ва́шим пред Го́сподем хода́тайством изба́витися от вся́каго зла́ и вра́жия ле́сти, тве́рдо же пре́данную ва́ми ве́ру Правосла́вную сохраня́ти, в не́йже ва́шим предста́тельством ни ра́нами, ни преще́нием, ни мо́ром, ни ко́им гне́вом от Созда́теля своего́ ума́лени бу́дем, но ми́рное зде́ поживе́м житие́ и сподо́бимся ви́дети блага́я на земли́ живы́х, сла́вяще Отца́ и Сы́на и Свята́го Ду́ха, Еди́наго в Тро́ице сла́вимаго и покланя́емаго Бо́га, ны́не, и при́сно, и во ве́ки веко́в. Ами́нь.