12 июля.

Канон на перенесение мощей святаго великомученика царя Сербского, Стефана Уроша Третьего.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь свято́му Стефа́ну в Деча́нех, гла́с 8:

Ца́рскую диади́му обагри́л еси́ кро́вию твое́ю, богому́дре великому́чениче, за ски́птр кре́ст в ру́ку прии́м, яви́лся еси́ победоно́сец и я́ко же́ртву непоро́чну прине́сл еси́ себе́. От роди́телей твои́х о́чию зе́ницы лише́н бы́л еси́, и в заточе́нии пребы́л еси́, и от свои́х уда́влен еси́. И ны́не, ра́дуяся, предстои́ши Святе́й Тро́ице. Пра́зднуем ти́ дне́сь пренесе́ние честны́х моще́й твои́х и обновле́ние честна́го киво́та, блаже́нне Стефа́не, моли́ся о держа́ве сро́дник твои́х, благоуго́дней бы́ти и́м и сыново́м Се́рбским спасти́ся.

Кано́н свято́му Стефа́ну. Глас 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Великому́чениче Стефа́не, моли́ Бо́га о нас.

Досто́йными похвала́ми воспе́ти пресла́внаго чудотво́рца у́м и смы́сл да́руй ми́, Христе́ Бо́же, я́ко да воспою́, ра́дуяся, па́мять пренесе́ния моще́й и обновле́ние киво́та его́.

Припев: Великому́чениче Стефа́не, моли́ Бо́га о нас.

Пе́сньми и пе́ньми духо́вными восхва́лим блаже́ннаго и честну́ю его́ и многоцеле́бную ра́ку, киво́т обстоя́ще, любе́зно облобыза́ем и си́це вопие́м: ра́дуйся, оби́тели твое́й пресве́тлый свети́льниче, сла́вящим твое́ пренесе́ние.

Сла́ва Отцу́ и Сы́ну и Свято́му Ду́ху:

Богому́дре Стефа́не, а́ще тя́ и напосле́док ле́т новопросвеще́нная Се́рбская страна́ возрасти́, но дре́вних че́сти сподо́бился еси́, дарова́ние чуде́с досто́йно прие́м.

И ны́не и при́сно и во ве́ки веко́в. Ами́нь.

Богородичен: Зако́на кроме́ есте́ственнаго, Де́во, родила́ еси́ Законода́вца Бо́га, Челове́ка бы́вша, Того́, я́ко Бла́га, моли́, Всенепоро́чная, на́ша беззако́ния презре́ти.

Пе́снь 3.

Ирмос: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припев: Великому́чениче Стефа́не, моли́ Бо́га о нас.

Во ве́сь ми́р про́йде сла́ва чуде́с твои́х, блаже́нне, и́миже просвети́л еси́ вселе́нную, от все́х напа́стей избавля́я при́сно.

Припев: Великому́чениче Стефа́не, моли́ Бо́га о нас.

Благочести́ваго и венцено́снаго Стефа́на, соше́дшеся, по достоя́нию восхва́лим, я́ко чуде́с пода́теля оби́льнаго и Го́споду моля́щася о все́х на́с.

Сла́ва Отцу́ и Сы́ну и Свято́му Ду́ху:

Исто́чник чуде́с гро́б и киво́т тво́й яви́ся неисчерпа́емый, от него́же ре́ки исцеле́ний излива́еши ве́рно пренесе́ния твоего́ пра́здник творя́щим, блаже́нне.

И ны́не и при́сно и во ве́ки веко́в. Ами́нь.

Богородичен: Ты́ еди́на на земли́ преесте́ственных благи́х Хода́таица, Ма́ти Бо́жия, была́ еси́, те́м Ти́ — ра́дуйся — зове́м.

Седа́лен, гла́с 1.

Пренесе́ние от Звеча́на гра́да во святу́ю свою́ оби́тель в Деча́нех, твои́х честны́х моще́й, и обновле́ние прекра́снаго киво́та, положе́ние на́м бы́сть пра́зднества све́тла, великому́чениче Христо́в, Стефа́не прехва́льне, е́же хва́лим благоче́стно и ра́достно чту́ще тя́, све́та незаходи́маго Со́лнца, ве́рным добро́то, звезда́ многосве́тлая.

Сла́ва, и ны́не, Богородичен:

Непоро́чная Агница и нескве́рный черто́г, в до́м Бо́жий Богоро́дица Мариа́м с весе́лием вво́дится пресла́вно, Юже Ангели Бо́жии дорино́сят ве́рно и вси́ ве́рнии блажа́т при́сно и благода́рственно пою́т Ей непреста́нно ве́лиим гла́сом: на́ша сла́ва и спасе́ние, Ты́ еси́, Всенепоро́чная.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Великому́чениче Стефа́не, моли́ Бо́га о нас.

Заре́ю трисо́лнечныя благода́ти сия́я, све́тле тво́й пра́здник творя́щих озари́, стра́шнаго омраче́ния де́монскаго изба́ви, Стефа́не, царю́ пресла́вне.

Припев: Великому́чениче Стефа́не, моли́ Бо́га о нас.

Источи́л еси́ ре́ки чуде́с, блаже́нне, ве́рных напая́ющия сердца́ и му́тныя во́ды многобо́жия изсуша́ющия.

Сла́ва Отцу́ и Сы́ну и Свято́му Ду́ху:

Ца́рие, и кня́зи, и свяще́нницы, и́ноцы, и вельмо́жи, и ста́рцы, и младе́нцы, и ве́сь во́зраст, све́тло предыгра́йте, торжество́ пренесе́ния блаже́ннаго в пе́снех возвели́чите.

И ны́не и при́сно и во ве́ки веко́в. Ами́нь.

Богородичен: Чи́ны Ангельския удивля́ет, Богоро́дице, та́йны Твоея́ глубина́, бе́сы же смуща́ет Твоя́ ико́на, е́йже мы́ кла́няемся, чту́ще Тя́, Бо́жию Ма́терь.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Великому́чениче Стефа́не, моли́ Бо́га о нас.

Све́том Вы́шняго озаря́емь, му́чениче, мое́ се́рдце просвети́ и тму́ грехо́вную отжени́, да, ра́дуяся, пою́ твое́ свято́е пренесе́ние и обновле́ние киво́та.

Припев: Великому́чениче Стефа́не, моли́ Бо́га о нас.

Возсту́пль на ле́ствицу доброде́телей, блаже́нне, чудотво́рец яви́лся еси́ по все́й земли́, Стефа́не, и сего́ ра́ди от Зве́чана, от твоея́ оби́тели Деча́нския и́ноцы, и вси́ собо́ри Се́рбски, лю́дие твои́ прие́млют святы́я мо́щи твоя́.

Сла́ва Отцу́ и Сы́ну и Свято́му Ду́ху:

Досточу́дне великому́чениче, торжество́ твое́ возсия́ в Се́рбстей земли́, блаже́нне, и ра́достно ве́рных весели́т собо́ры.

И ны́не и при́сно и во ве́ки веко́в. Ами́нь.

Богородичен: Сы́й в зра́це Бо́жии Пребоже́ственнем, всели́ся во чре́во Твое́ и в зра́к Тво́й облече́ся Госпо́дь, Пренепоро́чная.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Великому́чениче Стефа́не, моли́ Бо́га о нас.

Отверзо́шася тебе́ две́ри Еде́мския, и несказа́нен све́т и трисия́нен возсия́, блаже́нне, в неподви́жимем Ца́рствии небе́снем, и пра́ведных весе́лие прия́л еси́, ра́дуяся.

Припев: Великому́чениче Стефа́не, моли́ Бо́га о нас.

Дне́сь собо́р Се́рбский торжество́м, великому́чениче Стефа́не кра́лю, вселе́нную весели́т, созыва́юще ве́рных в честну́ю оби́тель твою́, в не́йже ны́не ра́достию совоку́пльшеся, тя́ мо́лим: ага́рянскаго наше́ствия изба́ви лю́ди твоя́, пресла́вне.

Сла́ва Отцу́ и Сы́ну и Свято́му Ду́ху:

Сиро́т и вдо́в засту́пника и в беда́х непобори́маго помо́щника, пе́сньми Стефа́на в Деча́нех ублажи́м: пра́зднующих бо пренесе́ние моще́й его́ ве́село от бе́д избавля́ет и скорбе́й.

И ны́не и при́сно и во ве́ки веко́в. Ами́нь.

Богородичен: Святы́й Иису́с всели́ся во утро́бу Твою́, во святы́х, Де́во, почива́яй и прославля́яй ве́рою и и́стиною Сего́, Отрокови́це, сла́вящия.

Конда́к, гла́с 8.

Яко звезду́ тя пресве́тлу, Це́рковь похваля́ет и почита́ет, от восто́ка возсия́вшую и на за́пад прише́дшую, всю́ бо страну́ сию́ чудесы́ и добро́тою обогаща́еши и просвеща́еши, ве́рою чту́щия пренесе́ние моще́й и обновле́ние честна́го киво́та, великому́чениче, царю́ Се́рбский Стефа́не. Моли́ спасти́ оте́чество твое́ и вся́ правосла́вныя христиа́ны, притека́ющия к ра́це моще́й твои́х и ве́рно вопию́щия ти́: ра́дуйся, Стефа́не, му́чеников украше́ние.

Икос:

Вели́кий чудотво́рец яви́лся еси́ Се́рбския земли́, царю́ Се́рбский, блаже́нне Стефа́не, неви́димо Христо́вы лю́ди посеща́я и исцеле́ния подава́я бога́тно. И мы́ дне́сь, Се́рбский собо́р, в твое́й оби́тели, бога́тии и убо́зии, мона́си, свяще́нницы, све́тло торжество́ сотворя́ем, о́крест обступи́вше на прекра́снаго киво́та обновле́ние. И, к ра́це моще́й твои́х прикаса́ющеся, устна́м и сле́зам мольбу́ смеси́вше: Христо́в уго́дниче, ра́дуйся, лику́еши бо со Ангелы; ра́дуйся, о́блаче ро́сный, ве́рных мы́сли ороша́яй; ра́дуйся, те́мных страсте́й прогони́телю; ра́дуйся, земли́ засту́пниче; ра́дуйся, в беда́х ско́рый помо́щниче; ра́дуйся, Стефа́не, му́чеником украше́ние.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Великому́чениче Стефа́не, моли́ Бо́га о нас.

Яко звезда́, сия́я кра́сно, блаже́нне, заре́ю доброде́телей мно́гим бы́сть просвеще́ние, те́м и на́с просвети́, вопию́щих ти́: ра́дуйся, Стефа́не благоче́стне.

Припев: Великому́чениче Стефа́не, моли́ Бо́га о нас.

Ны́не сте́кшеся от все́х стра́н и градо́в, и́ноцы, свяще́нницы, и кня́зи, и вельмо́жи, бога́тии и убо́зии, и вку́пе вси́, ра́дующеся, хвалу́ воздади́м Христу́ и уго́днику Его́, Стефа́ну пресла́вному.

Сла́ва Отцу́ и Сы́ну и Свято́му Ду́ху:

Чудесы́ у́бо твои́ми, я́ко цве́т, процве́л еси́, блаже́нне, исцеле́ния подава́еши притека́ющим в кро́в тво́й, му́дре и досточу́дне.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, вопию́щим Ти́: благослове́нна Ты́ в жена́х еси́, Всенепоро́чная Влады́чице.

Пе́снь 8.

Ирмос: Царя́ Небе́снаго, Его́же пою́т во́и Ангельстии, хвали́те и превозноси́те во вся́ ве́ки.

Припев: Великому́чениче Стефа́не, моли́ Бо́га о нас.

Яко у́тро, я́ко де́нь све́тлый, тво́й пра́здник яви́ся — пренесе́ние моще́й му́ченика от Зве́чана во свою́ оби́тель, просвеща́я на́ша сердца́ и все́х, с ве́рою восхваля́ющих тя́, Стефа́не пресла́вне.

Припев: Великому́чениче Стефа́не, моли́ Бо́га о нас.

Де́нь спасе́ния и пра́здник весе́лия наста́, стеце́мся, ве́рнии, очи́стивше вку́пе ду́ши и телеса́, се́ бо на́с призыва́ет Стефа́н боже́ственный.

Сла́ва Отцу́ и Сы́ну и Свято́му Ду́ху:

Струя́ происхо́дит от ра́ки твоея́, Стефа́не, исцеле́ний вся́ческих, и омыва́ет скве́рны страсте́й, и гное́ний лю́тых очища́ет, и все́х ве́рных напая́ет сердца́ любо́вию, чту́щих тя́, пресла́вне.

И ны́не и при́сно и во ве́ки веко́в. Ами́нь.

Богородичен: Све́том мя́ Твоего́ милосе́рдия, во тме́ неразу́мия лежа́щаго, озари́, еди́на Светода́вца ро́ждшая, Изба́вителя и Бо́га, святы́х венча́вшаго.

Песнь 9

Ирмос: Вои́стинну Богоро́дицу, Тя́ испове́дуем, спасе́ннии Тобо́ю, Де́во Чи́стая, с безпло́тными ли́ки Тя́ велича́юще.

Припев: Великому́чениче Стефа́не, моли́ Бо́га о нас.

Яко светоза́рное, блаже́нне, со́лнце возсия́в от за́пада, всю́ заря́ми благоче́стия Се́рбскую зе́млю просвети́л еси́ и отгна́л еси́ тму́ глубо́кую ерети́чествующих, Стефа́не пресла́вне.

Припев: Великому́чениче Стефа́не, моли́ Бо́га о нас.

Святы́й тво́й пра́здник пренесе́ния и обновле́ния прекра́снаго киво́та, прикаса́ющеся моще́м, све́тло пра́зднуем, испо́лни ра́дости и весе́лия восхваля́ющия тя́, Стефа́не великоимени́те.

Припев: Великому́чениче Стефа́не, моли́ Бо́га о нас.

Незаходи́маго све́та луча́ми во тме́ су́щим сия́я, сла́вне, к просвеще́нию весе́лия наста́ви ны́, пою́щия тя́.

Сла́ва Отцу́ и Сы́ну и Свято́му Ду́ху:

Блаже́нне Стефа́не, ка́ко тя́ возмо́жем воспе́ти досто́йно? Не мо́жет бо язы́к челове́ческий глаго́лати твоя́ разли́чная исцеле́ния и мно́гая дарова́ния все́м челове́ком.

И ны́не и при́сно и во ве́ки веко́в. Ами́нь.

Богородичен: Яко у́тро те́мным и блудя́щим, Де́во, возсия́ пра́вды Со́лнце — Христо́с, Его́же на рука́х Твои́х носи́ла еси́, Чи́стая.

Свети́лен:

Свети́ло, на́м просия́вшее в после́днее вре́мя, просвети́ ны́, твоя́ певцы́, за пренесе́ние честны́х моще́й твои́х и обновле́ние прекра́снаго киво́та, святы́й великому́чениче Стефа́не, и моли́ за ны́ Го́спода, чту́щия торжество́ пра́здника твоего́.

Сла́ва, и ны́не, Богородичен:

Еди́на Чи́стая и Нескве́рная, оскверне́на мя́ вся́кими паде́ньми лю́тыми, изба́ви лю́тыя му́ки и тмы́ кроме́шныя.

Молитва

О святы́й уго́дниче Бо́жий, великому́чениче Стефа́не! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.