12 июля.

Канон на Повечерии святым первоверховным апостолам Петру и Павлу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Апо́столов первопресто́льницы и вселе́нныя учи́телие, Влады́ку все́х моли́те ми́р вселе́нней дарова́ти и душа́м на́шим ве́лию ми́лость.

Кано́н Петра́ и Па́вла. Гла́с 4.

Пе́снь 1.

Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.

Припев: Апо́столи Христо́вы Пе́тре и Па́вле, моли́те Бо́га о нас.

Пода́ждь ми́, Го́споди, Пресвята́го Твоего́ Ду́ха ка́пли дарова́ний, сло́во наро́чито, и возвеселю́ся, ве́рно похваля́я пе́рвых апо́стол Твои́х исправле́ния.

Припев: Апо́столи Христо́вы Пе́тре и Па́вле, моли́те Бо́га о нас.

Оста́вил еси́, прехва́льне Пе́тре, усе́рдно вре́менная и Христо́вым стопа́м после́довал еси́. Неве́рство же оста́вив, Па́вле, и Призва́вшему тя́ после́довал еси́.

Сла́ва Отцу́ и Сы́ну и Свято́му Ду́ху:

Благода́ть, апо́столи, суще́ственне наше́дшую ва́м, прие́мше Боже́ственнаго Ду́ха, проидо́сте зе́млю всю́, Пе́тре и Па́вле, уча́ще концы́.

И ны́не и при́сно и во ве́ки веко́в. Ами́нь.

Богородичен: Вити́йстии многовеща́ннии и мусики́йстии велегла́снии язы́цы Тя́ не мо́гут чти́ти или пе́ти, Чи́стая: па́че бо челове́ка соде́яшася в Тебе́ еди́ней Боже́ственная та́инства.

Пе́снь 3.

Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.

Припев: Апо́столи Христо́вы Пе́тре и Па́вле, моли́те Бо́га о нас.

Сро́дник, Пе́тре, тебе́ Андре́й проявля́ет Месси́ю Христа́, к Нему́же ве́рою приступи́л еси́. И ты́, Па́вле чу́дный, богоде́тельным креще́нием от Ана́нии просвети́лся еси́.

Припев: Апо́столи Христо́вы Пе́тре и Па́вле, моли́те Бо́га о нас.

Ле́стно и́же писа́нием зако́на па́дающий ро́д Изра́илев просвеще́нием благода́ти Пе́тр приве́д, язы́к же стада́ Па́вел от пре́лести изба́ви.

Сла́ва Отцу́ и Сы́ну и Свято́му Ду́ху:

На́ги и про́сты во язы́ки посла́л еси́ Твоя́ ученики́, вме́сто ору́жия Твое́ и́мя нося́ще свято́е, и ле́стную бра́нь, Христе́, ве́рою разруши́ша.

И ны́не и при́сно и во ве́ки веко́в. Ами́нь.

Богородичен: Испо́лнися, апо́столи, позна́ти Го́спода вся́ земля́, от Де́вы возсия́вшаго и ми́р обно́вльша боже́ственным ва́шим пропове́данием, Пе́тре и Па́вле прехва́льнии.

Пе́снь 4.

Ирмос: Неизсле́дный Бо́жий сове́т, е́же от Де́вы воплоще́ния Тебе́, Вы́шняго, проро́к Авваку́м усмотря́я, зовя́ше: сла́ва си́ле Твое́й, Го́споди.

Припев: Апо́столи Христо́вы Пе́тре и Па́вле, моли́те Бо́га о нас.

С кре́пкими у́бо немощни́и, с вити́ями же неве́жди спле́тшеся благоче́стно, Пе́тре и Па́вле, взе́мше побе́ду, Христо́вы апо́столи.

Припев: Апо́столи Христо́вы Пе́тре и Па́вле, моли́те Бо́га о нас.

Отсту́пника Си́мона, волхва́ лю́таго, я́ко златолю́бца обличи́ боже́ственный Пе́тр, и ны́не Па́вел му́дрый стези́ развраща́ющаго Христо́вы Ели́ма ослепи́л е́сть.

Сла́ва Отцу́ и Сы́ну и Свято́му Ду́ху:

Неве́жественно ры́барь и усма́рь сло́во иму́ще, но растворе́нно Боже́ственною со́лию, ду́ши любому́дрых услади́ша и Христу́ ве́рою приведо́ша.

И ны́не и при́сно и во ве́ки веко́в. Ами́нь.

Богородичен: Ре́чию богодохнове́нною пре́жде Авваку́м го́ру Тя́ чи́сту и присе́нну боже́ственный рече́, Приходя́щаго от ю́га и Тобо́ю Воплоща́ема, Влады́чице, возвеща́я явле́нно.

Пе́снь 5

Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.

Припев: Апо́столи Христо́вы Пе́тре и Па́вле, моли́те Бо́га о нас.

Яко су́ща тве́рда, Христо́с тя́ ка́мень нарече́, Пе́тре, и на тебе́ Це́рковь, ея́же а́довы врата́ не одоле́ют. Тебе́ же, Па́вле, сосу́д избра́н рече́, Сего́ пронести́ пред язы́ки и́мя.

Припев: Апо́столи Христо́вы Пе́тре и Па́вле, моли́те Бо́га о нас.

Пе́тр, отве́ргся Учи́теля три́жды, три́жды же люби́ти приглаше́нием присво́ися. Па́вел, и́же пе́рвее ху́льник сы́й, тя́жко же оскорбля́я ве́рныя, по́слежде пропове́даше, Его́же гоня́ше пе́рвее.

Сла́ва Отцу́ и Сы́ну и Свято́му Ду́ху:

Нетле́нно зва́ние и сла́ву присносу́щну Пе́тр от Христа́ обре́те с Па́влом: о́в у́бо ключи́ небе́сныя прия́т, се́й же в ра́й восхи́щся, глаго́лы неизрече́нныя навы́к па́че челове́ка.

И ны́не и при́сно и во ве́ки веко́в. Ами́нь.

Богородичен: От Боже́ственнаго Ду́ха Иса́ия испо́лнь, рождество́ без отца́ прорече́ из Тебе́, Де́во, ро́ждшагося Емману́ила, Иже е́сть с на́ми Бо́г, Его́же, Чи́стая, родила́ еси́, те́мже вси́ пое́м Тя́.

Пе́снь 6.

Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Припев: Апо́столи Христо́вы Пе́тре и Па́вле, моли́те Бо́га о нас.

Светла́ Петро́ва чудеса́, че́стна же и Па́влова зна́мения: и́бо ри́зы и се́ни и́х неду́ги боля́щих исцелева́ют, прилага́емии.

Припев: Апо́столи Христо́вы Пе́тре и Па́вле, моли́те Бо́га о нас.

Пе́тр вои́стинну сла́вный и Па́вел пои́стине чу́дный, дво́ица боже́ственная и честне́йша жили́ща Живонача́льныя Тро́ицы все́ми помина́ется.

Сла́ва Отцу́ и Сы́ну и Свято́му Ду́ху:

Боля́щих ду́ши и телеса́, я́ко боже́ственный вра́чь изря́ден, Пе́тр исцели́, Па́вел язы́ки озари́ и све́том Госпо́дним назна́мена.

И ны́не и при́сно и во ве́ки веко́в. Ами́нь.

Богородичен: Пе́ти Тя́ до́лжни есмы́, но вои́стинну по достоя́нию не мо́жем. Те́мже пое́м Тя́ молча́нием, чту́ще несказа́нное, е́же на Тебе́, Де́во, соде́янное та́инство.

Конда́к, гла́с 2:

Тве́рдыя и боговеща́нныя пропове́датели, ве́рх апо́столов Твои́х, Го́споди, прия́л еси́ в наслажде́ние благи́х Твои́х и поко́й: боле́зни бо о́нех и сме́рть прия́л еси́ па́че вся́каго всепло́дия, Еди́не, све́дый серде́чная.

Икос:

Уясни́ мо́й язы́к, Спа́се мо́й, разшири́в моя́ уста́ и испо́лнив я́, умили́ се́рдце мое́, да, я́же глаго́лю, после́дую и, я́же у́бо учу́, сотворю́ пе́рвее: вся́к бо творя́ и уча́, рече́, се́й вели́к е́сть. Аще бо глаго́лю, и не творю́, я́ко ме́дь звеня́щая вменю́ся; те́мже рещи́ ми подо́бная и твори́ти поле́зная да́руй, Еди́не, све́дый серде́чная.

Пе́снь 7.

Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.

Припев: Апо́столи Христо́вы Пе́тре и Па́вле, моли́те Бо́га о нас.

Ублажи́ся Пе́тр от Христа́, я́ко сему́ ре́кшу Сы́на Бо́га Жива́го, и Па́вел почте́ся, я́ко сосу́д благопотре́бен, и взыва́ху: отце́в Госпо́дь и Бо́г, благослове́н еси́.

Припев: Апо́столи Христо́вы Пе́тре и Па́вле, моли́те Бо́га о нас.

Законослуже́бники у́бо Пе́тр умудря́ше, я́коже завеща́ся ему́, Па́вел же — язы́чники; о́ба же благода́тию Христу́ привожда́ху и взыва́ху: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Яко преизря́ден Пе́тр Христо́в па́стырь, ста́до прия́т, Це́ркви же Па́вел учи́тель боже́ствен бы́сть, взыва́юще: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Всенепоро́чная Мари́е и изря́дная свя́тостию, Яже Бо́га пло́тию, Де́во, ро́ждши, Неискусобра́чная Чи́стая, Того́ моли́ от вся́каго на́с изба́вити наведе́ния и греха́.

Пе́снь 8.

Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Припев: Апо́столи Христо́вы Пе́тре и Па́вле, моли́те Бо́га о нас.

Си́лою укре́плься Пе́тр Боже́ственною, уме́ршую Тави́фу воскреси́, Па́вел же Евти́ха, с высоты́ па́дша и умерщвле́нна, возста́ви, о́ба взыва́юща: Го́спода воспева́йте, дела́, и превозноси́те Его́ во вся́ ве́ки.

Припев: Апо́столи Христо́вы Пе́тре и Па́вле, моли́те Бо́га о нас.

Виде́нием ужа́сным и чу́дным Корни́лия у́бо Пе́тр просвети́, Па́вел же Га́ия, Кри́спа, и Пане́стия, и Стефани́на крести́, о́ба зову́ща: Го́спода воспева́йте, дела́, и превозноси́те Его́ во вся́ ве́ки.

Сла́ва Отцу́ и Сы́ну и Свято́му Ду́ху:

Блюдо́ма Петра́ свя́зана Христо́с у́бо Ангелом но́щию разреши́. Па́вла же и Си́лу, а́бие моля́щимся, в кла́де но́ги тве́рдо стя́гнуты, изведе́ и темни́цу потря́с. Те́мже воспое́м Христа́ во ве́ки.

И ны́не и при́сно и во ве́ки веко́в. Ами́нь.

Богородичен: Изба́ви страсте́й всепа́губных, плени́цы же согреше́ний ны́не расто́ргни, и́миже ко́ждо стя́жется: вси́ бо согреши́хом и очище́ния про́сим, су́ще пови́ннии. Еже пода́ждь, Богоро́дице, мольба́ми Твои́ми превознося́щим Христа́ во ве́ки.

Песнь 9

Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Припев: Апо́столи Христо́вы Пе́тре и Па́вле, моли́те Бо́га о нас.

Ве́сь всю́ду ми́р проидо́сте, я́коже крила́ти, и Ева́нгелие коле́ном все́м, язы́ком и страна́м Христо́во пропове́давше, вся́ привлеко́сте к ве́ре, Пе́тре преблаже́нный и чу́дный Па́вле апо́столе.

Припев: Апо́столи Христо́вы Пе́тре и Па́вле, моли́те Бо́га о нас.

Прини́к во глубо́кую ста́рость и естества́ до́лг, Пе́тре, исполня́я, Учи́теля твоего́ Христа́ подо́бием кре́ст претерпе́л еси́. Ты́ же во главу́ твою́, Па́вле, усе́чен бы́в, — о чу́до стра́шно! — вме́сто кро́ве млека́ источи́л еси́ пото́ки и неве́рныя обрати́л еси́.

Сла́ва Отцу́ и Сы́ну и Свято́му Ду́ху:

О, боже́ственная дво́ице, му́дре вручи́вшаяся всего́ ми́ра душа́м, и ко благоче́стию от нече́стия претво́рше, и по сме́рти спаса́юще еще́ ве́рных ду́ши, и ны́не на́с помяни́те и предста́вите Христу́, верхо́внии апо́столи.

И ны́не и при́сно и во ве́ки веко́в. Ами́нь.

Богородичен: Спа́се Благи́й, Иже естество́м Человеколю́бец и Многомилосе́рд, Препе́тыя Твоея́ Ма́тере Де́вы боже́ственными мольба́ми, Петра́ моли́твами и Па́вла, апо́стол Твои́х, ми́лость Твою́ и по́мощь с небесе́ на́м посли́.

Моли́тва

О пресла́внии апо́столи Пе́тре и Па́вле, ду́ши за Христа́ преда́вшии и кро́вию ва́шею па́жить Его́ удобри́вшии! Услы́шите чад ва́ших моли́твы и воздыха́ния, се́рдцем сокруше́нным ны́не приноси́мыя. Се бо беззако́ньми омрачи́хомся и того́ ра́ди беда́ми, я́коже ту́чами, обложи́хомся, еле́я же до́браго жития́ обнища́хом зело́. О си́льнии! Понеси́те не́мощи на́ша, не отлуча́йтеся ду́хом от нас, да не разлучи́мся вконе́ц от любве́ Бо́жия, но кре́пким заступле́нием ва́шим нас защити́те, да помилует Госпо́дь всех нас моли́тв ва́ших ра́ди, да истреби́т же рукописа́ние безме́рных грехо́в на́ших и да сподо́бит со все́ми святы́ми блаже́ннаго Ца́рствия и бра́ка А́гнца Своего́, Ему́же честь, и сла́ва, и благодаре́ние, и поклонение во ве́ки веко́в. Ами́нь.