11 июля.

Канон чудотворцам и безсребренникам Киру и Иоанну.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Чудеса́ святы́х Твои́х му́ченик сте́ну необори́му на́м дарова́вый, Христе́ Бо́же, те́х моли́твами сове́ты язы́ков разори́, ца́рства ски́птры укрепи́, я́ко еди́н Бла́г и Человеколю́бец.

Величание:

Велича́ем ва́с чудотво́рцы сла́внии Ки́ре и Иоа́нне, и чте́м честна́я страда́ния ва́ша, я́же за Христа́ претерпе́ли есте́.

Стихи́ра, гла́с 1:

Светоза́рная и свята́я, и благообра́зная му́чеников Ки́ра и Иоа́нна, всепра́зднственная па́мять, я́же всю́ зе́млю просвеща́ющи, мра́к грехо́вный отгоня́ющи, лечба́м благода́ть источа́ет.

Кано́н святы́х, гла́с 8.

Пе́снь 1.

Ирмос: Истря́сшему в мо́ри мучи́тельство фарао́не и Изра́иля су́шею наста́вльшему, пои́м Христу́, я́ко просла́вися во ве́ки.

Припев: Святи́и чудотво́рцы Ки́ре и Иоа́нне, моли́те Бо́га о нас.

Показа́вшему в ми́ре чудотво́рцы и врачи́, Ки́ра честна́го и Иоа́нна му́ченика, все́м целя́ща стра́сти благода́тию, воспое́м, ве́рнии, и му́чеников почти́м па́мять.

Припев: Святи́и чудотво́рцы Ки́ре и Иоа́нне, моли́те Бо́га о нас.

Отве́ргшеся ны́нешних, бу́дущих рачи́тели кровьми́ и́стинному Рачи́телю после́доваша, те́мже в ра́нах стра́ждуще, до́блественне терпя́ху.

Сла́ва Отцу́ и Сы́ну и Свято́му Ду́ху:

Укре́пльшеся дерзнове́нием и утве́рждше ду́шу, научи́вшеся о Христе́, и с му́ченики пострада́ша му́жески, и венцы́ исплето́ша зако́нно.

И ны́не и при́сно и во ве́ки веко́в. Ами́нь.

Богородичен: Спаси́ мя, Ма́ти Истины, обурева́ема лю́те от страсте́й и ча́сто погружа́ема, и напра́ви мя́, Чи́стая, ко спасе́нию ти́хаго приста́нища.

Пе́снь 3.

Ирмос: Не́сть свя́т, я́ко Госпо́дь, и не́сть пра́веден, я́ко Бо́г на́ш, Его́же пое́т вся́ тва́рь: не́сть пра́веден, па́че, Тебе́, Го́споди.

Припев: Святи́и чудотво́рцы Ки́ре и Иоа́нне, моли́те Бо́га о нас.

Ве́рою обостри́л еси́ святы́я Твоя́, Христе́, наде́ждею искова́л еси́, любо́вию разже́гл еси́, треми́ всеору́жии треплете́нный вене́ц те́м испле́л еси́.

Припев: Святи́и чудотво́рцы Ки́ре и Иоа́нне, моли́те Бо́га о нас.

До́бле сопроти́в ста́ша к мучи́телем нечести́вым непобеди́мии му́ченицы, пре́лести ловле́ния невре́дно преше́дше: Христо́м бо вооружи́вшеся, с Ни́м и веселя́тся.

Сла́ва Отцу́ и Сы́ну и Свято́му Ду́ху:

Яко столпы́ богозда́ннии и основа́ния тве́рдая, на ка́мени водрузи́ша восхожде́ния ве́ры, от ка́мене пи́вше во́ду присноживо́тную, ю́же от ча́ши Христо́вы.

И ны́не и при́сно и во ве́ки веко́в. Ами́нь.

Богородичен: Ду́ху бы́сть жили́ще, Чи́стая, прии́мши исполне́ние всего́ Божества́ сыно́вне и ро́ждши Спа́са и Го́спода и Изба́вителя ро́да на́шего.

Седа́лен, гла́с 4.

До́лу влеку́щия стра́сти попра́вше, к муче́ния, страда́льцы, Боже́ственней высоте́ све́тло вознесо́стеся благода́тию, Ки́ре и Иоа́нне, вселе́нныя свети́льницы. Те́мже мо́лимся: тмы́ грехо́вныя и неду́г изба́вите на́с, Иже над все́ми Бо́га моля́ще.

Сла́ва, и ны́не, Богородичен:

Грехолюби́в сы́й, молю́ Тя́, безгре́шнаго Бо́га ро́ждшую, взе́млющаго грехи́ ми́ра, Пречи́стая, многогре́шную ду́шу мою́ уще́дрити и грехи́ моя́ мно́гия очи́стити: гре́шным бо Ты́ еси́ очище́ние, и спасе́ние ве́рным, и заступле́ние.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися, богови́дно усмотри́, и со стра́хом славосло́вяше си́лу Твою́.

Припев: Святи́и чудотво́рцы Ки́ре и Иоа́нне, моли́те Бо́га о нас.

Те́ло, и ду́шу, и у́м, и серде́чная вся́ Христу́ пожро́сте ве́рою и, мучи́телей суровство́ побе́ждше, зако́нно, святи́и, венча́стеся.

Припев: Святи́и чудотво́рцы Ки́ре и Иоа́нне, моли́те Бо́га о нас.

Мечу́ и огню́ те́ло преда́вше, же́ртвы прия́тны бы́сте Бо́гу и в воню́ благоуха́ния на трапе́зе та́йне принесо́стеся.

Сла́ва Отцу́ и Сы́ну и Свято́му Ду́ху:

Неугаси́ма заря́ возсия́ ми́ру — мо́щи Твои́х му́ченик, Благоде́телю, е́юже отгна́ся тма́ неразу́мия и в тоя́ ме́сто введе́ся благоразу́мие.

И ны́не и при́сно и во ве́ки веко́в. Ами́нь.

Богородичен: Влады́чице Чи́стая, Сло́ва Боже́ственнаго две́ри, Це́ркви Твое́й совоку́пленныя и Тя́, Пречи́стую, пе́сньми хва́лящия покры́й и соблюди́ от вся́ких зо́л.

Пе́снь 5

Ирмос: Утренююще вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́, ино́го не ве́мы.

Припев: Святи́и чудотво́рцы Ки́ре и Иоа́нне, моли́те Бо́га о нас.

Спу́тники де́вы стяжа́вше, страстоте́рпцы, взя́сте соверше́нный вене́ц побе́ды, ра́дующеся.

Припев: Святи́и чудотво́рцы Ки́ре и Иоа́нне, моли́те Бо́га о нас.

Боже́ственнаго сия́ния заре́ю просве́щшеся, му́ченицы прехва́льнии, и при́сно ми́р просвеща́ете.

Сла́ва Отцу́ и Сы́ну и Свято́му Ду́ху:

Страсте́м Госпо́дним подо́бящеся, страстоте́рпцы, боле́зни претерпе́сте доблему́дренно, непобеди́мии.

И ны́не и при́сно и во ве́ки веко́в. Ами́нь.

Богородичен: Ути́ши непостоя́нную бу́рю страсте́й мои́х, Яже Бо́га ро́ждши, Ко́рмчию и Го́спода.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Святи́и чудотво́рцы Ки́ре и Иоа́нне, моли́те Бо́га о нас.

Броня́ми ве́ры до́бре вооружи́вшеся, му́ченицы, тве́рдо уязви́сте сопротивобо́рца врага́ и супоста́та.

Припев: Святи́и чудотво́рцы Ки́ре и Иоа́нне, моли́те Бо́га о нас.

Па́мять святы́х Твои́х, Христе́, в пе́снех сла́вим и Тебе́, Бо́гу на́шему, поклоне́ние ве́рою прино́сим.

Сла́ва Отцу́ и Сы́ну и Свято́му Ду́ху:

Страсте́м Твои́м ревнова́вше, Христе́, сла́внии му́ченицы муче́ния претерпе́ша, и́хже моли́твами, Бо́же, спаси́ все́х на́с.

И ны́не и при́сно и во ве́ки веко́в. Ами́нь.

Богородичен: Це́рковь Тя́ Бо́жию, и ковче́г, и черто́г одушевле́н, и две́рь небе́сную, Богоро́дице, ве́рнии, возвеща́ем.

Конда́к, гла́с 3.

От Боже́ственныя благода́ти да́р чуде́с восприе́мше, святи́и, чудоде́йствуете в ми́ре непреста́нно, вся́ на́ша стра́сти рукоде́йствием изсеца́юще неви́димо, Ки́ре богому́дре со Иоа́нном сла́вным: вы́ бо су́щне боже́ственнии вра́чеве есте́.

Икос:

Са́ми себе́ Бо́гу возло́жше, святи́и, все́ искуше́ние лю́тое Его́ ра́ди претерпе́сте, уме́рше усе́рдно, му́ченицы до́блии, и по кончи́не все́м источа́ете Боже́ственная дарова́ния, су́щим в разли́чных неду́зех, и от мно́гих исцеля́ете зо́л, от ни́хже еди́н и пе́рвый е́смь а́з, окая́нный, те́лом бо и душе́ю от я́зв лю́тых болю́, и ве́рою ва́м вопию́: исцели́те мя́, вы́ бо боже́ственнии вра́чеве есте́.

Пе́снь 7.

Ирмос: Ангелом о́троки из огня́ спасы́й и гремя́щую пе́щь преложи́вый на ро́су, благослове́н еси́, Бо́же оте́ц на́ших.

Припев: Святи́и чудотво́рцы Ки́ре и Иоа́нне, моли́те Бо́га о нас.

Небе́сныя сла́вы рачи́тели бы́вше, страда́льцы Твои́, Го́споди, Ки́р и Иоа́нн вре́менную и тле́ющую сла́ву оста́виша.

Припев: Святи́и чудотво́рцы Ки́ре и Иоа́нне, моли́те Бо́га о нас.

Яко слове́сную же́ртву, преда́вше те́ло и, я́ко служе́ние, излива́юще Тебе́, Бо́гу, кро́вь, страда́льцы Твои́, Иису́се, всесожже́ни бы́ша.

Сла́ва Отцу́ и Сы́ну и Свято́му Ду́ху:

Яко стра́шен е́сть му́чеников собо́р, я́ко и по сме́рти ду́хи прогоня́ет и неду́гующим исцеле́ние подава́ет.

И ны́не и при́сно и во ве́ки веко́в. Ами́нь.

Богородичен: Па́че вины́ ражда́еши вся́ческих Вино́внаго, премно́гою бла́гостию Челове́ка бы́вша, те́мже согла́сно Тя́, Чи́стая, ублажа́ем.

Пе́снь 8.

Ирмос: От Отца́ пре́жде ве́к рожде́ннаго и от Ма́тере в после́дняя воплоще́ннаго, свяще́нницы, благослови́те, лю́дие, превозноси́те во вся́ ве́ки.

Припев: Святи́и чудотво́рцы Ки́ре и Иоа́нне, моли́те Бо́га о нас.

О и́дольских негодова́вше же́ртвах, духо́вны принесо́ша себе́ же́ртвы на небе́сней трапе́зе до́блии муче́нием.

Припев: Святи́и чудотво́рцы Ки́ре и Иоа́нне, моли́те Бо́га о нас.

Та́йныя слу́жбы священноде́йствующе, отсече́ние удо́в Тому́ принесо́ша, я́ко прия́тныя же́ртвы, те́ло и кро́вь на трапе́зе и ча́ши.

Сла́ва Отцу́ и Сы́ну и Свято́му Ду́ху:

Запина́теля прама́тере утаи́вшися, пи́щный объя́сте пото́к и от Боже́ственнаго дре́ва вкуси́сте, деви́цы, страда́ньми украси́вшися.

И ны́не и при́сно и во ве́ки веко́в. Ами́нь.

Богородичен: Проро́к прорече́ния, Пресвята́я, в Тебе́ коне́ц прия́ша Боже́ственный, ми́р ве́сь до́лжно Тя́ пе́ти, Чи́стая, убежда́ют.

Песнь 9

Ирмос: Велича́ем Тя́, Ма́терь Бо́жию, и сла́вим Тя́, Богоро́дице Де́во, я́ко Спа́са ро́ждшую ду́ш на́ших.

Припев: Святи́и чудотво́рцы Ки́ре и Иоа́нне, моли́те Бо́га о нас.

Христо́вы ору́жницы, неду́гующим вра́чеве, Ки́р и Иоа́нн, чуде́с благода́ть от Бо́га прие́мше, исцеля́ют все́х на́с.

Припев: Святи́и чудотво́рцы Ки́ре и Иоа́нне, моли́те Бо́га о нас.

Душе́вныя стра́сти, предста́вше, Ки́р и Иоа́нн до конца́ отгоня́ют ве́рою и си́лою Христо́вою, непобеди́мии.

Сла́ва Отцу́ и Сы́ну и Свято́му Ду́ху:

Бо́же Зижди́телю, Его́же пропове́даша иногда́ Ки́р и Иоа́нн, творя́щия па́мять те́х муче́ния вся́ уще́дри.

И ны́не и при́сно и во ве́ки веко́в. Ами́нь.

Богородичен: Ма́терь вси́ Бо́га на́шего Боже́ственно почти́м: Тоя́ бо ра́ди вы́шния сподо́бихомся че́сти, воспева́ющии Ю.

Свети́лен.

Чудоде́йственнии свети́льницы, Ки́ре со Иоа́нном, душе́вныя на́ша неду́ги и теле́сныя исцели́те, от Го́спода прие́мше благода́ть исцеле́ний.

Сла́ва, и ны́не, Богородичен:

Иже от Бо́га ми́ру пода́нным благи́м Ты́ вина́ была́ еси́, Богоро́дице, но и ны́не моли́ о о́бщем спасе́нии Благопреме́ннаго Бо́га.

Молитва бессребреникам мученикам Киру и Иоанну

О, святи́и уго́дницы Бо́жии, му́ченицы и безсре́бреницы Ки́ре и Иоа́нне! По́двигом до́брым подвиза́вшася на земли́, восприя́ли еста́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й ваш о́браз, ра́дуемся о пресла́внем сконча́нии жи́тельства ва́шего и чтим святу́ю па́мять ва́шу. Вы же, предстоя́ Престо́лу Бо́жию, приими́те моле́ния на́ша и ко Всеми́лостивому Бо́гу принеси́те, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством ва́шим, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.