Шрифт

7 февраля.

[Поем им в неделю, ближайшую к 25-му числу.]

Святым Новомученикам и Исповедникам Российским.

Тропа́рь новому́чеников, гла́с 4:

Цве́ти Росси́йскаго лу́га духо́внаго / в годи́ну лю́тых гоне́ний ди́вно процве́тшии / новому́ченицы и испове́дницы безчи́сленнии: / святи́телие, ца́рственнии страстоте́рпцы и па́стырие, / мона́си и мирсти́и, му́жие, жены́ же и де́ти, / до́брый пло́д в терпе́нии Христу́ прине́сшии, / моли́теся Ему́, я́ко насади́телю ва́шему, / да изба́вит лю́ди Своя́ от безбо́жных и злы́х, / да утвержда́ется же Це́рковь Ру́сская / кровьми́ и страда́нии ва́шими / во спасе́ние ду́ш на́ших.

Стихи́ра, гла́с 6:

Воскресе́ния Христо́ва и́стиннии свиде́тели / яви́шася но́вии страстоте́рпцы и испове́дницы, / и́мже пра́здник се́й соста́вихом / ка́ко бы ти́и понесли́ кре́ст сво́й, / а́ще не бы́ зна́ли, / я́ко недосто́йни су́ть страда́ния ны́нешняго вре́мене, / к хотя́щей сла́ве яви́тися в ни́х.

Велича́ние:

Велича́ем вас,/ святи́и новому́ченицы и испове́дницы Росси́йстии,/ и чтим честна́я страда́ния ва́ша,/ я́же за Христа́// претерпе́ли есте́.

Новому́чеников кано́н, гла́с 6:

Пе́снь 1.

Ирмос: Волно́ю морско́ю скры́вшаго дре́вле, гони́теля мучи́теля — под земле́ю скры́ша спасе́нных о́троцы; но мы́ я́ко отрокови́цы, Го́сподеви пои́м, сла́вно бо просла́вися.

Припе́в: Святи́и Новому́ченицы и Испове́дницы Росси́йстии, моли́те Бо́га о на́с.

Го́споди Бо́же мо́й, помози́ ми́ смире́нно воспе́ти сла́ву новому́чеников и испове́дников росси́йских, и́мже за тя́жкия страда́ния любо́вию отве́рзл еси́ две́ри небе́сныя.

Го́споди Бо́же на́ш, сла́ву сию́ му́чеником от ве́ка бы́вшим дарова́вый, я́ко мо́щи и́х се́ются во хра́мех обновле́ния на́шего ра́ди, пода́ждь сла́ву сию́ и страстоте́рпцем но́вым, а́ще и неве́дома су́ть ме́ста погребе́ния и́х.

Ца́рства земна́го лише́нный, Царю́ же Небе́сному и в бе́дствиях свои́х до конца́ ве́рный, моли́ся Ему́, святы́й царю́ му́чениче Нико́лае, е́же не лиши́тися и на́м утеше́ния благода́тнаго в беда́х на́ших.

От руки́ священному́ченика Влади́мира древя́нный по́сох первопресто́льника святи́теля Петра́ прие́мый, взыщи́ мя́, овцу́ заблу́дшую, горохи́щную, о святы́й патриа́рше и о́тче на́ш Ти́хоне, обличи́телю сыно́в противле́ния.

Богородичен: Во успе́нии Твое́м ми́ра не оста́вила еси́, Влады́чице! Не оста́вила еси́ и страну́ Росси́йскую, но благоволи́ла еси́ прия́ти хвалу́ от но́вых святы́х страстоте́рпцев.

Пе́снь 3.

Ирмос: Тебе́, на вода́х пове́сившаго всю́ зе́млю неодержи́мо, тва́рь, ви́девши на ло́бнем ви́сима, у́жасом мно́гим содрога́шеся, не́сть свя́т, ра́зве Тебе́, Го́споди, взыва́ющи.

Ку́ю да́нь сло́ва принесе́м ва́м, ве́рнии свиде́телие сло́ва, до́блии страстоте́рпцы и па́стыре, вмени́вшиися, я́ко о́вцы заколе́ния.

Тебе́, о Влади́мире, первосвяти́телю дре́влия Ки́евския Це́ркве, соиме́нне свято́му просвети́телю Руси́, подоба́ше преднача́ти сла́вное по́прище боре́ния и страда́ний. Прево́диши ты́ боговенча́нный по́лк страстоте́рпцев, и да возда́стся ти́ пе́рвый вене́ц похвалы́.

Посреде́ ополче́ния до́бляго зри́м и тя́, свяще́нная главо́, первосвяти́телю гра́да свята́го Петра́, святи́телю Вениами́не, возлю́бленный па́ствою твое́ю, я́коже Иа́ковом тезоимени́тый ти́ дре́влий патриа́рх.

Пе́рвый в чи́не пресви́терстем новому́чеников ты́ яви́лся еси́, Иоа́нне пресви́тере, во Аме́рице пре́жде престо́лу Бо́жию предстоя́вый. Яко лю́тых безбо́жник в Ца́рском Селе́ обличи́теля, венча́ тя́ Госпо́дь венце́м му́ченическим, я́коже и друга́го Иоа́нна восторгоиме́ннаго, в сло́ве и в му́жестве пре́д мучи́тели ди́внаго, с ни́ми же, вси́ священному́ченицы но́вии, заступи́те на́с.

Богородичен: Премилосе́рдая Ма́ти, Пречи́стая Де́во, споболе́вшая Сы́ну и Спа́су Своему́, ве́мы тя́ Уте́шительницу чадолюби́ву: и оста́вльшимся во стране́ Росси́йстей и в разсе́янии су́щим рабо́м Твои́м.

Седа́лен, гла́с 8.

Не́мощию пло́ти на́м подобостра́стнии, ду́хом в ме́ру дре́влих отце́в тща́лися есте́, о непрекло́ннии священноиспове́дницы Росси́йстии, и́же в разоре́нную оби́тель Солове́цкую и во ина́я ме́ста заточе́ния ссыла́емии. Умножа́ющимся же страда́ниям ва́шим, избы́точествоваше та́йно и утеше́ние от Го́спода, и́м же ны́не и́стее утеша́етеся, в невече́рний де́нь дости́гше Ца́рствия Христо́ва, в не́м же не преста́йте, мо́лим ва́с, моля́щеся о спасе́нии ду́ш на́ших.

Сла́ва, гла́с 1:

Пресви́тер Алекси́й от ро́да крестозва́ннаго, ста́ростию Анне проро́чице ра́вный, во́лею за ю́на па́стыря соу́зника своего́ сме́рть прие́млет, я́ко Ева́нгелия послу́шатель. Пе́тр же иере́й скиптроиме́нный во уста́ своя́ от увеща́емаго и́м застреля́ется. Сла́ва Да́вшему мно́зем свяще́нником на безбо́жники кре́пость, сла́ва Наста́вившему и диа́коны му́ченики, сла́ва Да́рствующему таковы́м сугу́бую благода́ть моли́тися за ны́.

И ны́не, гла́с то́йже:

Ра́дуются новому́ченицы и испове́дницы ро́да на́шего, срета́юще Го́спода и Влады́ку своего́, Его́же иногда́ сре́те святы́й ста́рец Симео́н, приреки́й: ны́не отпуща́еши раба́ Твоего́, Влады́ко. Сподо́би, Го́споди, и на́м в ча́с исхо́да от жи́зни сея́ вре́менныя проще́нным бы́ти и отпу́щенным с ми́ром, моли́твами Пречи́стыя Влады́чицы на́шея Богоро́дицы и ны́не воспева́емых уго́дников Твои́х и все́х святы́х.

Пе́снь 4.

Ирмос: На Кресте́ Твое́ Боже́ственное истоща́ние прови́дя, Авваку́м, ужа́сся, вопия́ше: Ты́ си́льных пресе́кл еси́ держа́ву, Бла́же, приобща́яся су́щим во а́де, я́ко Всеси́лен.

Оскверне́нная де́лы безбо́жник земля́ кропле́нием крове́й ва́ших па́ки благословля́ется. Во́ды же морски́я и ре́чныя телеса́ потопля́емых святы́х, я́ко свяще́ние, влага́емое в ты́я, восприя́ша.

Ермоге́ну Моско́вскому тезоимени́те, свети́льниче Тобо́льский священному́чениче но́вый, все́ житие́ твое́, я́ко пла́мень, его́же река́ Ту́ра ника́коже угаси́. Потопля́ем бо возше́л еси́ ко Го́споду твоему́, бие́м же по устна́ма до конца́ немо́лчно моли́лся еси́, мо́лишися же и ны́не за ны́.

Стра́шно е́сть слы́шимое о муче́ниих свята́го архипа́стыря Пе́рмскаго Андрони́ка, и́же не боя́ся му́к, повеле́ кля́тву изрещи́ на безбо́жную вла́сть. Святи́тель же Черни́говский Васи́лий со ины́ми по́сланными от Всеросси́йскаго Собо́ра уве́дети о убие́нии Андрони́ковом, тогда́ с ни́ми пострада́, вку́пе же вси́ Го́споду предстоя́т.

Святи́теля Ио́сифа дре́вле от ра́зинцев убие́ннаго просла́вивый, архипа́стырь Митрофа́н же́стоко но́щию умерщвля́ется. Тогда́ же и соепи́скоп его́ Лео́нтий пострада́. Та́ко еди́нем све́том Ца́рствия Небе́снаго си́и трие́ священному́ченицы Астраха́нстии озари́шася.

Богородичен: О, ко́ль мно́зи святы́я ико́ны ны́не рука́ми безбо́жных отъя́ты от ве́рных, но не исто́ргнется о́браз благи́я Уте́шительницы из серде́ц моля́щихся, свобо́ды лише́нных испове́дников святы́я ве́ры.

Пе́снь 5

Ирмос: Богоявле́ния Твоего́, Христе́, к на́м ми́лостивно бы́вшаго, Иса́ия, Све́т ви́дев Невече́рний, из но́щи у́треневав взыва́ше: воскре́снут ме́ртвии, и воста́нут су́щии во гробе́х, и вси́ земноро́днии возра́дуются.

Пе́тре и Кири́лле, испове́дницы вели́цыи и непрекло́ннии, нра́вом разли́чнии, но еди́ни в ве́ре и тве́рдости ду́ха, а́ще и со́слани бы́сте, оба́че всю́ пра́вду церко́вную удержа́ли есте́, ны́не же, я́ко насле́дницы Ца́рства небе́снаго, моли́те Бо́га о е́же сохрани́тися и на́м в пра́вде се́й.

Агафанге́ле, Ангеле Яросла́вльския це́ркве, ра́дуйся со дру́ги свои́ми. Отло́жение бо ва́ше от собра́тий, в пра́вде церко́вней не устоя́вших, ра́дость Ангелом бы́сть. Не восхоте́ли есте́ покори́ти себе́ нече́стию: сего́ ра́ди и изыдо́сте, на ско́рбь и лише́ния, кре́ст сво́й нося́ще.

Арсе́ние, Вели́каго Нова́града сла́во, еди́не от столпо́в Собо́ра Всеросси́йскаго, приско́рбна бе́ привре́менно душа́ твоя́, в темни́це ти́ су́щу, но просия́ вско́ре побе́дно ве́ра твоя́, побежда́ющая вся́ искуше́ния: и яви́лся еси́ до конца́ непрекло́нен.

Дамаски́ново житие́ да умили́т вся́ чту́щия. Ка́ко бе́ и на о́стровех Солове́цких, и в Казахста́не и во стране́ Сиби́рской, восходя́ к Голго́фе свое́й. Ка́ко мра́зом сиби́рским томи́м, при бре́зе реки́ неиму́щему иере́ю ве́рхнюю ря́су свою́ отдаде́. Са́м же в сту́же зи́мней на плоту́ Бо́гу ду́х предаде́, еди́н от те́х, и́хже ми́р ве́сь недосто́ин бе́.

Богородичен: Наста́внице святи́телей тве́рдых, Пречи́стая Де́во, наста́ви на́с мы́слити и глаго́лати, и де́яти то́чию пра́вая, ревну́юще не пожале́вшим себе́ испове́дником.

Пе́снь 6.

Ирмос: Я́т бы́сть, но не удержа́н в пе́рсех ки́товых Ио́на: Тво́й бо о́браз нося́, Страда́вшаго, и погребе́нию да́вшагося, я́ко от черто́га от зве́ря изы́де. Приглаша́ше же кустоди́и: храня́щии су́етная и ло́жная, ми́лость сию́ оста́вили есте́.

Еде́ма сладча́йшаго насле́дницы показа́стеся, новому́ченицы земли́ Ру́сския: блаже́ни есте́, я́ко от пла́ча ва́шего уте́шистеся на небеси́: возжада́ли есте́ пра́вды, ея́же насыща́етеся изоби́льно в Ца́рствии небе́снем.

Дще́ри царе́вы с ма́терию свято́ю в заточе́нии суро́вем утеше́ние себе́ от писа́ний святы́х оте́ц почерпа́ху и та́ко Христу́ уневе́стившася. Алекси́й же о́трок, бра́т и́х, рука́ма царя́ му́ченика внесе́н бы́сть та́мо, иде́же си́и ца́рственнии с четвери́цею сострада́льцев убие́ни бы́вше, я́ко же́ртвы одушевле́ннии за ро́д на́ш Бо́гу предста́ша.

Ша́хта гро́б бы́сть, в не́й же Елисаве́та преподобному́ченица сконча́ ца́рственный пу́ть сво́й с Варва́рою о Го́споде сестро́ю и с про́чими шестию́. Та́можде княги́ня страстоте́рпцу кня́зю Иоа́нну ра́ну обяза́. О святи́и Алапа́евстии му́ченицы осмочи́сленнии, уврачу́йте ны́не ра́ны ду́ш на́ших.

В стра́шныя дни́ си́и пострада́вшии во стране́ на́шей Росси́йстей уго́дницы Бо́жии, знамени́тии и неве́домии, мона́си, и́нокини, му́жи и жены́ со ча́ды, укрепи́те ны́ моли́твами ва́шими, е́же исправля́ти на́м пути́ на́ша пре́д Го́сподем, помина́юще по́двиг ва́ш.

Богородичен: Мно́жицею изба́вися от бе́д и зо́л ро́д на́ш, моля́щимся лю́дем пре́д Твои́ми, о Богома́ти, святы́ми ико́нами. Совокупи́ и ны́не, Влады́чице, вся́ моле́ния на́ша о избавле́нии от люте́йшия беды́, предста́тельством Твои́м.

Конда́к, гла́с 2:

Но́вии страстоте́рпцы Росси́йстии, / испове́днически по́прище земно́е прете́кшии, / страда́ньми дерзнове́ние прии́мшии, / моли́теся Христу́, ва́с укрепи́вшему, / да и мы́, егда́ на́йдет на ны́ испыта́ния ча́с, / му́жества да́р Бо́жий восприи́мем. / Образ бо есте́ лобыза́ющим по́двиг ва́ш, / я́ко ни ско́рбь, ни теснота́, ни сме́рть / от любве́ Бо́жия разлучи́ти ва́с не возмого́ша.

Икос:

Егда́ начина́хуся дни́е о́гненнаго искуше́ния Це́ркве Росси́йския и не благоволи́ Госпо́дь прия́ти от на́с всесожже́ния и же́ртвы, тогда́ мно́зи архиере́е и свяще́нницы не приложи́шася пло́ти и кро́ви, но уразуме́вше во́лю Госпо́дню, са́ми себе́ принесо́ша, я́ко непоро́чное заколе́ние. И всле́д Первосвяще́нника ве́чнаго и Хода́тая Но́ваго Заве́та внидо́ша си́и во святи́лище с кро́вию свое́ю, да очи́стятся греси́ людсти́и. Сла́вни су́ть имена́ ва́ша, му́жественнии страстоте́рпцы, о́браз бо на́м есте́, лобыза́ющим по́двиг ва́ш, я́ко ни ско́рбь, ни теснота́, ни сме́рть от любве́ Бо́жия разлучи́ти ва́с не возмого́ша.

Пе́снь 7.

Ирмос: Неизрече́нное чу́до: в пещи́ Изба́вивый преподо́бныя о́троки из пла́мене, во гро́бе ме́ртв бездыха́нен полага́ется, во спасе́ние на́с пою́щих: Изба́вителю Бо́же, благослове́н еси́.

Страда́ньми ва́шими Це́рковь Ру́сская сла́вится, му́ченицы но́вии, сро́дницы на́ши чи́на и сосло́вия вся́каго, за Христа́ от безбо́жных убие́ннии, во спасе́ние на́с пою́щих: Изба́вителю Бо́же, благослове́н еси́.

Ору́жие — кре́ст и щи́т — ве́ру во Христа́, страда́ния же и сме́рть прия́ли есте́, во спасе́ние на́с пою́щих: Изба́вителю Бо́же, благослове́н еси́.

Зло́бу слу́г сатани́нских, сожже́нную со́весть иму́щих, обличи́ сожига́емый си́ми святи́тель Иоа́нн Ри́жский, та́кожде и пове́шеннии: святи́тель Воро́нежский Ти́хон, и пресви́тер Симферо́польский Алекси́й и про́чии зверонра́вне уму́ченнии. Тебе́ же, о Го́споди, си́и в Ца́рстве Твое́м све́тлем взыва́ют: Изба́вителю Бо́же, благослове́н еси́.

Страстоте́рпцы младе́нцы убие́нныя, я́ко пти́цы чи́стыя в гне́зда небе́сныя прие́млет Го́сподь, непреста́нно в раи́ воспева́ющия: Изба́вителю Бо́же, благослове́н еси́.

Богородичен: Изба́вительнице люде́й Твои́х при́сная, умоли́ Сы́на и Бо́га Твоего́ па́ки изба́вити до́м Тво́й от люте́йшия все́х пре́жде бы́вших беды́, да со умиле́нием возглаго́лем Ему́, спасе́ннии Тобо́ю: Изба́вителю Бо́же, благослове́н еси́.

Пе́снь 8.

Ирмос: Ужасни́ся, боя́йся, Не́бо, и да подви́жатся основа́ния земли́: се́ бо в мертвеце́х вменя́ется в Вы́шних Живы́й, и во гро́б ма́л странноприе́млется. Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Испра́сте ри́зы ва́ша кровьми́ свои́ми, убели́сте же и́х кро́вию А́гнца, за челове́ки закла́ннаго, Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Ублажи́м святи́теля Ио́сифа Петрогра́дскаго, непоро́чности Це́ркве та́йныя ревни́теля, в прогна́нии ло́же свое́ ме́жду сви́ниями нечи́стыми име́вшаго, и слы́шим его́ на́м в слу́х се́рдца глаго́люща: страда́ньми свои́ми и ве́рностию превозноси́те Христа́ во вся́ ве́ки.

Сла́вны и в житии́ и в кончи́не свое́й святи́тели Серафи́м Угличский и Макси́м Серпухо́вский, о́н же и вра́чь, на та́йное епи́скопство благослове́нный. Многотру́дно е́сть служе́ние Це́ркве гони́мыя, его́же и соверши́вше си́и, предста́ша Христу́ Бо́гу, моля́ще Его́ о ста́де свое́м, сла́вяще же Его при́сно во ве́ки.

Небе́сныя хвалы́ ли́че неусы́пный, новому́ченицы добропобе́днии земли́ Ру́сския, ны́не при́сно причаща́етеся А́гнца присноживо́тнаго, за Него́же от безбо́жных убие́ни бы́сте, Его́же о́троцы благослови́те, свяще́нницы воспо́йте, лю́дие превозноси́те во вся́ ве́ки.

Богородичен: Пресвята́я Влады́чице, спаси́, свободи́ и поны́не стра́ждушия рабы́ Твоя́, да́руй и́м терпе́ние и кре́пость. В Тебе́ полага́ем наде́жду всю́, блажи́м Тя́ при́сно и превозно́сим Сы́на Твоего́ и Бо́га во ве́ки.

Пе́снь 9.

Ирмос: Не рыда́й Мене́, Ма́ти, зря́щи во гро́бе, Его́же во чре́ве без се́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́г, ве́рою и любо́вию Тя́ велича́ющия.

О, но́вии страстоте́рпцы, и́же по́двиг проти́ву зло́бы безбо́жных подъя́ша, ве́ру Христо́ву я́ко щи́т пре́д уче́нии ми́ра сего́ держа́ще и на́м о́браз терпе́ния и злострада́ния досто́йно явля́юще.

О, тве́рдости и му́жества полка́ му́ченик Христо́вых, за Христа́ убие́нных! Ти́и Це́рковь правосла́вную украси́ша и в стране́ свое́й кро́ви своя́, я́ко се́мя ве́ры, да́ша. Ку́пно со все́ми святы́ми досто́йно да почту́тся.

Слы́шим вси́, ка́ко чу́дная Лиди́я, в страда́ниих, а́ще и пла́чущи, тве́рдая, на сострада́ние Кири́лла подви́же, и́же и бы́сть е́й щи́т, ме́ч же мучи́телем зве́рствовавшим. И спасе́ Христо́с Кири́лла купе́лию кро́ве его́. Сия́ пове́давый Це́ркви Алекси́й и са́м пострада́. Моли́твами си́х трие́х, Бо́же, поми́луй на́с.

О святи́и, и́хже зде́ помяну́хом, и мно́жайшее мно́жество неве́домых! Прости́те убо́жество слове́с си́х, да напи́шутся еще́ похвалы́, ва́м подоба́ющия. Исчи́слити ва́с невозмо́жно е́сть. Все́х же моли́твами, да прии́мут чту́щия ва́с от Го́спода и Влады́ки живота́ на́шего благода́ть и ве́лию ми́лость.

Богородичен: О, Всепе́тая Ма́ти! А́ще и разори́ся от злы́х вели́кая це́рковь Твоя́ Пече́рская, в не́й же священному́ченик Влади́мир прибли́зившуся дни́ убие́ния его́, со мно́гим умиле́нием ака́фист чты́й, Тебе́ моля́шеся, но не оскуде́ет во ве́к к лю́дем ка́ющимся ми́лость Твоя́. Ра́дуйся, Обра́дованная, во Успе́нии Твое́м на́с не оставля́ющая!

Свети́лен:

Вельми́ све́тел яви́ся на́м по́двиг ва́ш, святи́и новому́ченицы и испове́дницы во дни́ сия́, малоду́шием омраче́нныя, оскуде́ бо ве́ра за умноже́ние беззако́ний на́ших, охладе́ любы́, поколеба́ся наде́жда, до́блесть же ва́ша озари́ сла́вою но́вою Ру́сскую Це́рковь.

Стихи́ры новому́чеников, гла́с 6.

Слы́ша стра́шну ве́сть / о гоне́ниих, на Це́рковь Бо́жию воздви́гнутых, / Всеросси́йский на́ш Собо́р, свяще́нный и вели́кий, / во еди́ну мы́сль собо́рну вся́ совокупи́ / и моле́ния уста́ви о гони́мых / и о убие́нных испове́дницех и му́ченицех / в де́нь святи́теля Влади́мира страда́ния и сме́рти. / Му́дрствуяй се́й де́нь со Це́рковию му́дрствует: / дни́е преставле́ния отше́дших к Бо́гу в му́ках / де́ньми рождества́ и́х нарече́ни бы́ша. / Сего́ ра́ди соверша́ем пра́здник се́й, / я́ко рождество́ Росси́йских но́вых страстоте́рпцев.

Первоубие́ннии за ве́ру и Це́рковь, / пе́рвии по и́мени поминове́ннии святе́йшим патриа́рхом: / о святи́телю Влади́мире, Пече́рский а́гнче, / и пресви́теры старе́йшии си́и: / Иоа́нне, Пе́тре же Ио́сифе и Па́вле, / преподобному́ченицы же Герва́сие, Гера́симе, / па́ки же священному́ченицы Па́вле, Пе́тре и Фео́доре, / Михаи́ле, и Влади́мире и Константи́не, / диа́коне Иоа́нне, послу́шниче Анто́ние и смотри́телю Иоа́нне / со мно́гим мно́жеством свяще́нных, и мона́хов, и мирски́х, / и́хже имена́ вся́ ве́сть Госпо́дь, / моли́те Его́ о е́же спасти́ся на́м.

Сти́х: Блаже́н му́ж боя́йся Го́спода, в за́поведех Его́ восхо́щет зело́.

Вку́пе со святы́м царе́м на вся́к де́нь оскорбля́еми, / о святи́и цари́це страстоте́рпице и де́вы ца́рственнии, / о́троче же ца́рственный святы́й / и послужи́вшии ва́м сострада́льцы ве́рнии, / но́щию непра́ведне вси́ убие́ни бы́сте, / та́же, я́ко же́ртвы пра́вды всесожже́ни / хода́таи есте́ о на́с, я́ко кади́ло Бо́гу благово́нное. / С ва́ми же и во други́й де́нь в стра́шных му́ках живопогребе́ннии / со княги́нею свято́ю и други́нею ея́. / Ны́не же все́х спострада́вших предваря́я, о царю́ Нико́лае, / ро́да на́шего святы́й печа́льниче, / я́ко но́вый Иов, Го́спода моли́ прости́ти все́х.

Глас 8.

Сти́х: Свяще́нницы Твои́ облеку́тся в пра́вду, и преподо́бнии Твои́ возра́дуются.

Отреко́шася проси́ти ми́лости / осужде́ннии от безбо́жник свяще́нницы Бо́жии / и́хже благослови́ святы́й патриа́рх, / на му́ки и на сме́рть за Христа́. / Егда́ же воу́трие ведо́ми бы́ша на ка́знь, / не ве́дяху стра́жие, / ка́ко сре́тшия и́х ве́рныя отгони́ти. / Лобыза́ху бо лю́дие обрече́нным сме́ртником / и свяще́нныя ру́це и́х и оде́жды кра́й, / о́нем побе́дно пою́щим: / Христо́с воскре́се из ме́ртвых, / сме́ртию сме́рть попра́в. / Го́споди моли́твами священному́чеников си́х поми́луй на́с.

МОЛИТВА святы́м Новому́чеником и Испове́дником Росси́йским:

Святи́и новому́ченицы и испове́дницы Це́ркве Росси́йския, услы́шите усе́рдную мольбу́ на́шу! Ве́мы, я́ко не́ции от ва́с, еще́ о́троцы су́ще, послу́шающе о дре́влих страстоте́рпцех, в се́рдце свое́м помы́слиша, коли́ко прелюбе́зно и доброхва́льно е́сть таковы́м подража́ти, и́хже ни му́ки, ни сме́рть не разлучи́ша от любве́ Бо́жия. Бла́го же ва́м, я́ко после́довали есте́ ве́ре и терпе́нию те́х, о ни́хже слы́шасте и и́хже возлюби́сте. А поне́же на вся́кое вре́мя возмо́жно е́сть наити́ на ны́ испыта́нием неча́янным, испроси́те от Го́спода на́м му́жества да́р, и́же толи́ко благопотре́бен е́сть в житии́ челове́честем. Вся́ концы́ оте́чества на́шего страда́ньми свои́ми освяти́вшии, я́ко о́бщии за вся́ ны́ моли́твенницы, умоли́те Бо́га изба́вити лю́ди своя́ от и́га, ужа́снейшаго па́че вся́каго ино́го. И да отпу́стится на́м и всему́ ро́ду на́шему гре́х, на наро́де Росси́йском тяготе́ющий: убие́ние царя́, пома́занника Бо́жия, святи́телей же и па́стырей с па́ствою, и страда́ния испове́дников, и оскверне́ние святы́нь на́ших. Да упраздня́тся раско́лы в Це́ркви на́шей, да бу́дут вси́ еди́но, и да изведе́т Госпо́дь на жа́тву де́латели Своя́, си́есть да не оскудева́ет Це́рковь па́стырьми до́брыми, и́же и́муть просвеща́ти све́том и́стинныя ве́ры сто́ль вели́кое мно́жество люде́й, ве́ре ненауче́нных, или́ от ве́ры отврати́вшихся. Недосто́йни есмы́ ми́лости Бо́жия, оба́че страда́ний ра́ди ва́ших Христо́с Бо́г на́ш да уще́дрит и поми́лует все́х на́с, в по́мощь ва́с призыва́ющих. Мы́ же Ему́, Спаси́телю на́шему, со Отце́м и со Святы́м Ду́хом сокруше́ние о гресе́х и благодаре́ние за вся́ всегда́ да прино́сим, сла́вяще Его́ во ве́ки веко́в. Ами́нь.