7 февраля.

Канон иной преподобному Анатолию Оптинскому, Старшему

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глaс 3:

У́мныя моли́твы пресве́тлый свети́льниче,/ О́птины пу́стыни ди́вная похвало́,/ Це́ркве Ру́сския украше́ние,/ Небе́снаго Иерусали́ма граждани́не,/ о́тче Анато́лие преподо́бне,/ моли́ Христа́ Бо́га// спасти́ся душа́м на́шим.

Кано́н преподо́бнаго. Глас 4.

Песнь 1

Ирмос: Мо́ря чермну́ю пучи́ну/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма,// Амали́кову си́лу в пусты́ни победи́л есть.

Припе́в: Преподо́бне о́тче наш Анато́лие, моли́ Бо́га о нас.

Го́споди, благослови́ ны, досто́йно песнь воспе́ти и хвалу́ возда́ти па́че всего́ земна́го Тя возлюби́вшему и Тя еди́наго всем се́рдцем возжела́вшему, преподо́бному отцу́ на́шему Анато́лию.

Припе́в: Преподо́бне о́тче наш Анато́лие, моли́ Бо́га о нас.

Изде́тска в ве́ре воспита́нный, любо́вь к мона́шескому житию́ име́л еси́, Анато́лие, и, Бо́жиим про́мыслом води́мый, пу́стыни О́птинския дости́гл еси́, иде́же свя́то подвиза́яся, во град Небе́сный прише́л еси́.

Сла́ва Отцу́ и Сы́ну и Свято́му Ду́ху:

Тя́готы и ско́рби жития́ пусты́ннаго смире́нно поне́сл еси́, терпе́нием ду́шу твою́ укрепля́я, Анато́лие, и послуша́ния яви́л еси́ о́браз, зми́я дре́вняго кова́рство вои́стину посрами́в.

И ны́не и при́сно и во ве́ки веко́в. Ами́нь.

Богоро́дичен: Мо́ря жите́йскаго пучи́ну Тобо́ю храни́мому ро́ду христиа́нскому неврежде́нно преплы́ти помози́, Богоро́дице, от си́лы вра́жия рука́ма Твои́ма нас огражда́ющи, и́маже Сы́на Твоего́ и Бо́га носи́ла еси́.

Песнь 3

Ирмос: Весе́лится о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,// и прибе́жище, и утвержде́ние.

Припе́в: Преподо́бне о́тче наш Анато́лие, моли́ Бо́га о нас.

Теле́сныя неду́ги безро́потно терпя́, благодаре́ние Бо́гу за вся приноси́л еси́, блаже́нне Анато́лие, ча́да твоя́ сему́ науча́я.

Припе́в: Преподо́бне о́тче наш Анато́лие, моли́ Бо́га о нас.

На вся́ком ме́сте хвалу́ Го́споду воздава́я, се́рдце твое́ храм Свято́му Ду́ху соде́ял еси́, преподо́бне блаже́нне о́тче.

Сла́ва Отцу́ и Сы́ну и Свято́му Ду́ху:

Моли́тву непреста́нно соверша́я и и́мя Боже́ственное Сладча́йшаго Иису́са призыва́я, се́рдце твое́ чи́сто соде́лал еси́, богому́дре о́тче.

И ны́не и при́сно и во ве́ки веко́в. Ами́нь.

Богоро́дичен: О Тебе́ вси правосла́внии лю́дие ра́дуются, Пречи́стая Богоро́дице, вопию́ще: благослове́нна Ты в жена́х, Всенепоро́чная Влады́чице.

Седа́лен, глас 4:

До́брый па́стырю ста́да слове́снаго, свя́те Анато́лие, ду́ши немощны́я словесы́ твои́ми и де́лы исцеля́л еси́ и, и́нокини мно́гия оте́ческою любо́вию назида́я, неврежде́нны от собла́знов ми́ра сохрани́л еси́, и досто́йны Жениху́ Христу́ приве́л еси́. Его́же моли́ и нам Ца́рствия Небе́снаго сподо́битися.

Сла́ва, и ны́не, Богоро́дичен:

К Тебе́, Богоро́дице Пречи́стая, в ско́рбех и ну́ждах су́ще, прибега́ем недосто́йнии, Ты бо еди́на ско́рая Моли́твенница у Престо́ла Сы́на Твоего́ и тве́рдое на́ше Упова́ние. О Всепе́тая Ма́ти, Твои́м хода́тайством заступи́ и спаси́ нас, да не постыди́мся во ве́ки.

Песнь 4

Ирмос: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:// сла́ва си́ле Твое́й, Го́споди.

Припе́в: Преподо́бне о́тче наш Анато́лие, моли́ Бо́га о нас.

Прее́мник ста́рцев ве́лиих и учени́к досто́йный богому́дрых и сла́вных Мака́рия и Амвро́сия показа́лся еси́, преподо́бне Анато́лие досточу́дне.

Припе́в: Преподо́бне о́тче наш Анато́лие, моли́ Бо́га о нас.

Ду́хом пламене́я, да́ры духо́вными ду́шу бога́тно возрасти́л еси́, богому́дре Анато́лие, и ве́рный учени́к Го́спода твоего́ яви́лся еси́.

Сла́ва Отцу́ и Сы́ну и Свято́му Ду́ху:

Ни́вы духо́вныя се́ятель приле́жный был еси́, о́тче Анато́лие, и, пле́велы грехо́вныя прему́дре исторга́я, де́латель иску́сный показа́лся еси́.

И ны́не и при́сно и во ве́ки веко́в. Ами́нь.

Богоро́дичен: Пресвята́я Богоро́дице Де́во, превознесе́нну и преукра́шенну зрит тя Це́рковь Бо́жия, досто́йно взыва́ющи: Ты еси́ Ма́ти Го́спода и Спа́са на́шего.

Песнь 5

Ирмос: Ты, Го́споди мой,/ Свет в мир прише́л еси́,/ Свет Святы́й, обраща́яй из мра́чна неве́дения// ве́рою воспева́ющия Тя.

Припе́в: Преподо́бне о́тче наш Анато́лие, моли́ Бо́га о нас.

Богомы́слием просвеще́нный и в послуша́нии отцу́ духо́вному прилежа́вый, от Го́спода на враги́ неви́димыя си́лою моли́твы одоле́ние прия́л еси́, о́тче преподо́бне.

Припе́в: Преподо́бне о́тче наш Анато́лие, моли́ Бо́га о нас.

За́поведи Христо́вы усе́рдно исполня́я и любо́вию твое́ю всех благоче́стно согрева́я, попече́ния о себе́ ника́коже име́л еси́, свя́те Анато́лие.

Сла́ва Отцу́ и Сы́ну и Свято́му Ду́ху:

Боже́ственным Све́том лице́ твое́ озаря́шеся, преподо́бне о́тче Анато́лие, егда́ та́инство Святы́я Евхари́стии благоле́пно соверша́л еси́.

И ны́не и при́сно и во ве́ки веко́в. Ами́нь.

Богоро́дичен: Ты, Пречи́стая Де́во, Свет Невече́рний ми́ру яви́ла еси́, из тьмы грехо́вныя изводя́щий ве́рою Тя воспева́ющих.

Песнь 6

Ирмос: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися,/ ра́ди ми́лости от ребр Твои́х// исте́кшею Кро́вию.

Припе́в: Преподо́бне о́тче наш Анато́лие, моли́ Бо́га о нас.

И́стинный де́лателю моли́твы Иису́совы сый, о́тче преподо́бне, е́й и чад твои́х му́дре науча́л еси́, о чистоте́ серде́чней тех раде́я, да сла́дость духо́вную обря́щут.

Припе́в: Преподо́бне о́тче наш Анато́лие, моли́ Бо́га о нас.

По́мыслов открове́нию пред отце́м духо́вным чад твои́х поуча́л еси́, свя́те Анато́лие, во е́же сете́й бесо́вских избежа́ти и Сама́го Го́спода в себе́ прия́ти сподо́битися.

Сла́ва Отцу́ и Сы́ну и Свято́му Ду́ху:

Во́ина Христо́ва вои́стину яви́ тя Госпо́дь ве́рным, Анато́лие, о спасе́нии вся́кия души́ при́сно ра́тующаго, те́мже и нас от наве́тов вра́жиих защити́.

И ны́не и при́сно и во ве́ки веко́в. Ами́нь.

Богоро́дичен: Песнь Ти сле́зную прино́сим, Де́во, и си́це вопие́м: изба́ви ны вся́кия беды́ и ми́лость Боже́ственнаго Сы́на Твоего́ нам испроси́.

Конда́к, глас 4:

Поле́зная души́ твое́й взыску́я,/ во оде́жду и́ночества обле́клся еси́,/ кро́тости же и смире́нию Госпо́дню подража́я,/ Небе́сным жи́телем уподо́бился еси́/ и, до́брый наста́вник и́ноком быв,/ благоче́стия ве́лий побо́рник яви́лся еси́,/ преподо́бне о́тче наш Анато́лие,/ моли́ Христа́ Бо́га// спасти́ся душа́м на́шим.

И́кос:

Прииди́те, вси ве́рнии, ратобо́рцы у́мныя бра́ни, побе́дника ди́внаго Анато́лия воспои́м, и́же зло́бу возду́шных князе́й, я́ко прах, возмета́ и к Небесе́м взы́де ле́ствицею моли́твы непреста́нныя, к вы́шнему Иерусали́му вы́ну устремля́яся и смире́нием стра́сти посека́я. Те́мже от Венцеда́вца Христа́ я́ко ца́рским венце́м обложе́н, возгла́ви мона́шествующих ли́ки и наста́ви, е́же вопи́ти непреста́нно се́рдцем и усты́: Го́споди, Иису́се Христе́, Сы́не Бо́жий, поми́луй нас.

Песнь 7

Ирмос: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем опаля́еми взыва́ху:// благослове́н еси́ в хра́ме сла́вы Твоея́, Го́споди.

Припе́в: Преподо́бне о́тче наш Анато́лие, моли́ Бо́га о нас.

Житие́ твое́, труды́ духо́вными преиспо́лненное, почита́юще, о́тче, и писа́нии твои́ми на поле́зное наставля́еми, благода́рне Бо́гу взыва́ем: благослове́н еси́ в хра́ме сла́вы Твоея́, Го́споди.

Припе́в: Преподо́бне о́тче наш Анато́лие, моли́ Бо́га о нас.

А́нгел во пло́ти на земли́ показа́лся еси́, о́тче, наставле́нии твои́ми, я́ко крыла́ми, от ко́зней вра́жиих огражда́я и огне́м любве́ твоея́ душевре́дная те́рния попаля́я.

Сла́ва Отцу́ и Сы́ну и Свято́му Ду́ху:

Те́ло твое́, я́ко хра́мину души́, целому́дрием украша́я, к чистоте́ душе́вней и теле́сней чад твои́х подвиза́л еси́, Анато́лие преподо́бне, те́мже моли́ Бо́га и нам от вся́кия скве́рны очи́ститися.

И ны́не и при́сно и во ве́ки веко́в. Ами́нь.

Богоро́дичен: Тебе́, Де́во Чи́стая, Ку́пино Неопали́мая, Огнь Божества́ во чре́ве Твое́м носи́вшая и неопа́льна пребы́вшая, вопие́м: благослове́нна Ты в жена́х, Всенепоро́чная Влады́чице.

Песнь 8

Ирмос: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:// благослови́те, вся дела́ Госпо́дня, Го́спода.

Припе́в: Преподо́бне о́тче наш Анато́лие, моли́ Бо́га о нас.

Наставле́ния твоя́, преподо́бне, му́дрости испо́лнена суть, и́миже малоду́шнии укрепля́ются, неради́вии исправля́ются и скорбя́щии утеша́ются, благода́рне взыва́юще: благослови́те, вся дела́ Госпо́дня, Го́спода.

Припе́в: Преподо́бне о́тче наш Анато́лие, моли́ Бо́га о нас.

Сокро́вище богому́дрыя души́ твоея́ источа́я, се́рдцем о ча́дех твои́х боле́зновал еси́, о́тче Анато́лие, и, в терпе́нии скорбе́й тех наставля́я, та́ко увещава́л еси́: благослови́те, вся дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Словеса́ уте́шительная от лю́бящаго се́рдца твоего́, о́тче Анато́лие, я́ко ми́ро благово́нное, нам изли́шася, мы же, о тебе́ Го́спода сла́вяще, вопие́м: благослови́те, вся дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Ру́це Твои́, Пречи́стая Богоро́дице, к Сы́ну Твоему́ простира́ющи, моли́твы за ны Бо́гу возно́сиши, те́мже, Тобо́ю спаса́еми, си́це вопие́м: благослови́те, вся дела́ Госпо́дня, Го́спода.

Песнь 9

Ирмос: Ка́мень нерукосе́чный/ от несеко́мыя горы́ Тебе́, Де́во,/ краеуго́льный отсече́ся, Христо́с,/ совокупи́вый разстоя́щаяся естества́.// Тем веселя́щеся, Тя, Богоро́дице, велича́ем.

Припе́в: Преподо́бне о́тче наш Анато́лие, моли́ Бо́га о нас.

Де́вства красоту́ на земли́ яви́в и ду́шу твою́ посто́м и моли́твою очи́стив, богоблаже́нне, во оби́тели ве́чныя Го́споду себе́ угото́вал еси́.

Припе́в: Преподо́бне о́тче наш Анато́лие, моли́ Бо́га о нас.

Глаго́лы твоя́ спаси́тельныя, я́ко би́сер многоце́нный, в ду́ши ве́рных влага́л еси́, преподо́бне о́тче Анато́лие, те́мже и нас не оста́ви, я́коже обеща́лся еси́.

Сла́ва Отцу́ и Сы́ну и Свято́му Ду́ху:

От моще́й твои́х благода́ть почерпа́юще, труды́ твоя́ и по́двиги мно́гия ублажа́ем, преподо́бне Анато́лие, и за вся Бо́га на́шего сла́вим.

И ны́не и при́сно и во ве́ки веко́в. Ами́нь.

Богоро́дичен: Из Тебе́, Богоро́дице, Исто́чниче чи́стый, истече́ Вода́ Жива́я, Я́же есть Христо́с Бог наш, глаго́лом жи́зни ве́чныя жа́ждущия напая́яй.

Свети́лен, глас 1:

Свети́льник све́та сый и у́мныя моли́твы лампа́да негаси́мая, Анато́лие ста́рче О́птинский, еле́й ду́ха доброде́ланием души́ стяжа́в, те́мже вся просвеща́еши в па́мяти твое́й и стезю́ спаси́тельную мона́шествующим и мирски́м указу́еши.

Моли́тва

О преподо́бне о́тче Анато́лие, ди́вный ста́рче О́птинский! Предстоя́ще ра́це моще́й твои́х (или́: пред о́бразом твои́м святы́м), воспомина́ем ди́вное твое́ житие́ и по́двиги, во сла́ву Го́спода на́шего Иису́са Христа́ подъя́тыя. Ты, от ю́ности красоту́ ми́ра сего́ презре́в, возжела́л еси́ Бо́гу усе́рдно послужи́ти и, от роди́телей теле́сную добро́ту унасле́довав, па́че украша́лся еси́ души́ благоле́пием, е́же в терпе́нии стяжа́ти подоба́ет. Ты, от двои́х ста́рцев, блаже́ннаго Мака́рия и пречу́днаго Амвро́сия, воспита́нный, ста́рец духоно́сный соде́лался еси́, я́ко и богому́дрый святи́тель Игна́тий о тебе́ удивля́шеся.

О ста́рче ди́вный! Ты, моли́твою непреста́нною вы́ну со Христо́м пребыва́я, вели́кую благода́ть стяжа́л еси́, те́мже и мно́гая ча́да, путь у́зкий и приско́рбный избра́вше, ра́достно вслед тебе́ теча́ху, к Восто́ку восто́ков приближа́ющеся. Мы же, словесы́ твои́ми наставля́еми и моли́твами твои́ми огражда́еми, со умиле́нием зове́м ти: не оста́ви нас, скорбьми́ обурева́емых, грехи́ мно́гими обремене́нных, от лука́ваго врага́ смуща́емых, но помози́ по́двигом до́брым подвиза́тися, ве́ру соблюсти́ и Све́та Небе́снаго дости́гнути, да досто́йно восприи́мем вся от Го́спода угото́ванная и, зерца́лом разре́шшимся, вку́пе с тобо́ю чи́сте у́зрим Бо́га на́шего в Тро́ице сла́вимаго, Отца́, и Сы́на, и Свята́го Ду́ха, во Ца́рствии Его́. Ами́нь.