7 февраля.

Канон преподобному Анатолию Оптинскому, Старшему

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глaс 3:

У́мныя моли́твы пресве́тлый свети́льниче,/ О́птины пу́стыни ди́вная похвало́,/ Це́ркве Ру́сския украше́ние,/ Небе́снаго Иерусали́ма граждани́не,/ о́тче Анато́лие преподо́бне,/ моли́ Христа́ Бо́га// спасти́ся душа́м на́шим.

Кано́н преподо́бнаго. Глас 3.

Песнь 1

Ирмос: Ди́вно, сла́вно творя́й чудеса́/ Ты еси́, Бо́же,/ бе́здну оземлени́вый, и колесни́цы потопи́вый,/ и лю́ди спасы́й, пою́щия Тебе́,// я́ко Царю́ на́шему и Бо́гу.

Припе́в: Преподо́бне о́тче наш Анато́лие, моли́ Бо́га о нас.

Анато́лие, о́тче преди́вне, па́мять твоя́ светоно́сная не́бо церко́вное озари́, всех лю́бящих тя привлека́ющи, те́мже во стра́се свяще́ннем дерза́ю воспе́ти житие́ твое́.

Припе́в: Преподо́бне о́тче наш Анато́лие, моли́ Бо́га о нас.

Наста́ви ны, заблу́ждшия умо́м, на стези́ спаси́тельныя и возгре́й в сердца́х на́ших любо́вь к Сладча́йшему Иису́су, е́юже снеда́емь сла́дце, се́рдцем та́ял еси́, я́ко воск, во огни́ Божества́.

Сла́ва Отцу́ и Сы́ну и Свято́му Ду́ху:

А́нгелов све́тлости подража́я, невеще́ственный огнь в се́рдце носи́л еси́ и, весь просве́щся, стра́сти плотски́я испепели́л еси́, быстрокры́лым хоте́нием во́лю о́тчую испо́лнив.

И ны́не и при́сно и во ве́ки веко́в. Ами́нь.

Богоро́дичен: Тя Честне́йшую Херуви́м и Сла́внейшую без сравне́ния Серафи́м, воспева́ем, Всепе́тая Де́во, Бо́га бо пло́тию родила́ еси́, Всенепоро́чная, Еди́наго от Тро́ицы, Христа́ Жизнода́вца.

Песнь 3

Ирмос: Лук сокруши́л еси́ вра́жий,/ и щиты́ стерл еси́ кре́постию, Влады́ко Христе́,/ утвержде́ние на́ше,// Свят еси́, Го́споди.

Припе́в: Преподо́бне о́тче наш Анато́лие, моли́ Бо́га о нас.

О́птинская похвала́ еси́, Анато́лие, и мона́шествующих до́брый во́ин Христо́в, восприи́м бо щит послуша́ния, по́стничества шлем и моли́твы обоюдоо́стрый меч, на путь спасе́ния мно́гия и́ноки наста́вил еси́.

Припе́в: Преподо́бне о́тче наш Анато́лие, моли́ Бо́га о нас.

Лук вра́жий сокруши́л еси́, о́тче прему́дре, и, крыле́ моли́твы посре́брене име́я, в го́рняя у́мно воспари́л еси́, се́рдце же чи́сто, я́ко зла́том бле́щуще, стяжа́в, лице́м к лицу́ Бо́га узре́л еси́, вопия́: Свят еси́, Го́споди.

Сла́ва Отцу́ и Сы́ну и Свято́му Ду́ху:

Иису́са, Царя́ Сла́вы и Го́спода, возлюби́в, полки́ бесо́вския и́менем Того́ вспя́ть обрати́л еси́, о́тче, не Голиа́фа бо меч прие́м, но ка́мень слове́сный, и исполи́ны страсте́й тем сокруши́л еси́.

И ны́не и при́сно и во ве́ки веко́в. Ами́нь.

Богоро́дичен: Я́ко злата́я Кади́льница су́щи, Пречи́стая Де́во, Боже́ственный фимиа́м источа́ющая, смра́да грехо́внаго ве́рныя рабы́ Твоя́ изба́ви, Ты бо еси́ Засту́пница ро́да христиа́нскаго.

Седа́лен, глас 4:

До́брый па́стырю ста́да слове́снаго, свя́те Анато́лие, ду́ши немощны́я словесы́ твои́ми и де́лы исцеля́л еси́ и, и́нокини мно́гия оте́ческою любо́вию назида́я, неврежде́нны от собла́знов ми́ра сохрани́л еси́, и досто́йны Жениху́ Христу́ приве́л еси́. Его́же моли́ и нам Ца́рствия Небе́снаго сподо́битися.

Сла́ва, и ны́не, Богоро́дичен:

К Тебе́, Богоро́дице Пречи́стая, в ско́рбех и ну́ждах су́ще, прибега́ем недосто́йнии, Ты бо еди́на ско́рая Моли́твенница у Престо́ла Сы́на Твоего́ и тве́рдое на́ше Упова́ние. О Всепе́тая Ма́ти, Твои́м хода́тайством заступи́ и спаси́ нас, да не постыди́мся во ве́ки.

Песнь 4

Ирмос: Что ужа́слся еси́, Авваку́ме?/ Кому́ зове́ши и вопие́ши:/ от ю́га прии́дет Бог?/ Сло́во Пло́ть бы́сть, и всели́ся в ны, и ви́дехом,/ во хвале́нии пою́ще ди́вному Бо́гу на́шему,// я́ко просла́вися.

Припе́в: Преподо́бне о́тче наш Анато́лие, моли́ Бо́га о нас.

Пое́м и сла́вим Твое́ спаси́тельное смотре́ние, Го́споди, я́ко яви́л еси́ Це́ркви Ру́сской избра́нника Твоего́, преподо́бнаго Анато́лия, О́птины пу́стыни преди́вное украше́ние, благода́ти испо́лнена и моли́твенника те́плаго о душа́х на́ших.

Припе́в: Преподо́бне о́тче наш Анато́лие, моли́ Бо́га о нас.

О, ди́внаго Бо́жия смотре́ния! Дарова́ бо Госпо́дь тебе́, преподо́бне Анато́лие, дар у́мныя серде́чныя моли́твы, е́юже о́чи мы́сленныя просвети́в, духо́внаго соверше́нства дости́гл еси́. Не оста́ви и нас твои́м моли́твенным заступле́нием.

Сла́ва Отцу́ и Сы́ну и Свято́му Ду́ху:

Ю́ношеския нра́вы отри́нув, вседу́шно Бо́гови порабо́тал еси́, о́тче Анато́лие, те́мже Той просла́ви тя и, в Небе́сныя оби́тели всели́в, ли́ку преподо́бных сочета́.

И ны́не и при́сно и во ве́ки веко́в. Ами́нь.

Богоро́дичен: Мари́е, Богора́дованная Отрокови́це, Го́ру Тя зрит проро́к Приосене́нную, и ужаса́ется: Всевы́шний бо, все́лься в Тя, сни́де к нам, я́ко пото́ки ю́гом, и испо́лни зе́млю Богове́дения.

Песнь 5

Ирмос: Све́том Твои́м Невече́рним, Христе́,/ озари́, Бо́же, смире́нную мою́ ду́шу,/ и наста́ви на страх Твой,// зане́ свет повеле́ния Твоя́.

Припе́в: Преподо́бне о́тче наш Анато́лие, моли́ Бо́га о нас.

Оте́ческия заве́ты храня́ и послуша́ние доброразсу́дное име́я, ключа́рь та́инственный яви́лся еси́, преподо́бне, и, ключе́м моли́твы у́мныя две́ри страсте́й затвори́в, Небеса́ отве́рзл еси́. Те́мже и нас в го́рняя тайново́дствуй, досточу́дне.

Припе́в: Преподо́бне о́тче наш Анато́лие, моли́ Бо́га о нас.

Ла́стовице богогла́сная и Предте́чев рачи́телю, о́тче Анато́лие ста́рче наш, ты, в се́рдце и́мя Го́спода Иису́са име́я, ве́сну у́мную в скит прине́сл еси́ и мно́гия ду́ши, мра́зом греха́ окова́нныя, теплото́ю любве́ согре́л еси́.

Сла́ва Отцу́ и Сы́ну и Свято́му Ду́ху:

И́стинный послу́шник ста́рца Амвро́сия быв, окормле́ние сестр Ша́мординския оби́тели прия́л еси́, богому́дре, и, духо́вне тех назида́я и стра́ху Бо́жию науча́я, в го́рния оби́тели му́дре упра́вил еси́.

И ны́не и при́сно и во ве́ки веко́в. Ами́нь.

Богоро́дичен: Тя, Пресвята́я Де́во, Богоро́дицу вои́стину испове́дуем, зане́ Тобо́ю Свет яви́ся в мир, и су́щия во тьме грехо́вней просвети́.

Песнь 6

Ирмос: Воззва́х воздыха́нии немо́лчными к Ще́дрому Бо́гу,/ и услы́ша мя от а́да преиспо́дняго,// и возведе́ от тли живо́т мой.

Припе́в: Преподо́бне о́тче наш Анато́лие, моли́ Бо́га о нас.

Воздыха́ньми немо́лчными и слеза́ми, всено́щными стоя́ньми и моли́твенными бде́нии неви́димыя враги́ от ста́да твоего́ отгна́л еси́, преподо́бне.

Припе́в: Преподо́бне о́тче наш Анато́лие, моли́ Бо́га о нас.

И́мя сладча́йшее Иису́сово по вся дни непреста́нно в се́рдце твое́м носи́л еси́, Анато́лие сла́вне, сего́ ра́ди и мно́жество и́ноков и и́нокинь научи́л еси́, ка́ко моли́тве сей подоба́ет прилежа́ти.

Сла́ва Отцу́ и Сы́ну и Свято́му Ду́ху:

Украси́лся еси́ боже́ственными добро́тами и венце́м побе́дным увя́злся еси́, Анато́лие о́тче, те́мже и ца́рствуеши над враги́ и Царю́ ми́ра и Спа́су душ на́ших предстои́ши.

И ны́не и при́сно и во ве́ки веко́в. Ами́нь.

Богоро́дичен: Мари́е Де́во Влады́чице, Невмести́маго Бо́га во чре́ве Твое́м вмести́вшая, сердца́ на́ша разшири́, е́же и́скренне люби́ти Бо́га и бли́жняго по за́поведи Сы́на Твоего́.

Конда́к, глас 2.

Богодарова́нною ти моли́твою/ возсия́л еси́, я́ко боже́ственное свети́ло,/ посреде́ собо́ра О́птинских отце́в,/ просвети́в мона́шествующих ли́ки и наста́вив,/ е́же вопи́ти непреста́нно се́рдцем и усты́:// Го́споди, Иису́се Христе́, Сы́не Бо́жий, поми́луй нас.

И́кос:

Прииди́те, вси ве́рнии, ратобо́рцы у́мныя бра́ни, побе́дника ди́внаго Анато́лия воспои́м, и́же зло́бу возду́шных князе́й, я́ко прах, возмета́ и к Небесе́м взы́де ле́ствицею моли́твы непреста́нныя, к вы́шнему Иерусали́му вы́ну устремля́яся и смире́нием стра́сти посека́я. Те́мже от Венцеда́вца Христа́ я́ко ца́рским венце́м обложе́н, возгла́ви мона́шествующих ли́ки и наста́ви, е́же вопи́ти непреста́нно се́рдцем и усты́: Го́споди, Иису́се Христе́, Сы́не Бо́жий, поми́луй нас.

Песнь 7

Ирмос: Я́коже дре́вле/ благочести́выя три о́троки ороси́л еси́ в пла́мени халде́йстем,/ све́тлым Божества́ огне́м и нас озари́,/ благослове́н еси́, взыва́ющия,// Бо́же оте́ц на́ших.

Припе́в: Преподо́бне о́тче наш Анато́лие, моли́ Бо́га о нас.

Небе́сная возлюби́л еси́, о́тче, вся земна́я презре́в, и, от а́ввы Мака́рия криле́ моли́твы восприи́м, на высоту́ доброде́телей, я́ко оре́л высокопа́рный, возлете́л еси́, благослове́н еси́, вопия́, Бо́же оте́ц на́ших.

Припе́в: Преподо́бне о́тче наш Анато́лие, моли́ Бо́га о нас.

И́стинным Све́том просвеще́н, мона́шествующим пра́вило ве́рнейшее и о́браз моли́твы был еси́, преподо́бне о́тче, те́мже и бесе́да твоя́ услади́ святи́теля Игна́тия богому́драго, о непреста́нней моли́тве вопроси́вшаго.

Сла́ва Отцу́ и Сы́ну и Свято́му Ду́ху:

Я́коже дре́внии отцы́, всепослушли́в духо́вным наста́вником твои́м яви́лся еси́, блаже́нне Анато́лие, те́мже и смиренному́дрие нело́жное стяжа́л еси́, нача́льниче му́дрый и учениче́ смире́нный а́ввы Амвро́сия.

И ны́не и при́сно и во ве́ки веко́в. Ами́нь.

Богоро́дичен: Сове́т преве́чный Тобо́ю, Де́во, испо́лнися, глас бо Арха́нгелов услы́шавши, Сло́во О́тчее во утро́бу прия́ла еси́ и Безле́тнаго Сы́на, Всенепоро́чная, родила́ еси́ на спасе́ние нас пою́щих: благослове́н Плод чре́ва Твоего́, Богоро́дице.

Песнь 8

Ирмос: Обра́зно во а́нгельстем я́вльшася зра́це,/ и де́ти прохла́ждша посреде́ горя́щия пе́щи,// благослови́те, дела́ Госпо́дня, Го́спода.

Припе́в: Преподо́бне о́тче наш Анато́лие, моли́ Бо́га о нас.

Вели́чие дел твои́х испове́дует Ру́сская земля́, и А́нгельский собо́р воспева́ет твое́ им сопряже́ние, те́мже и на́ше хвале́ние приими́, Анато́лие досточе́стне, вопию́щих: благослови́те, дела́ Госпо́дня, Го́спода.

Припе́в: Преподо́бне о́тче наш Анато́лие, моли́ Бо́га о нас.

Егда́ с Кроншта́дтским па́стырем безкро́вную же́ртву приноси́л еси́, о́тче Анато́лие, тогда́ А́нгели сослужи́ша вам со стра́хом и тре́петом, воспева́юще и глаго́люще: благослови́те, дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Тро́ичным соста́вом благоугожда́я Пресвяте́й Тро́ице, ум и се́рдце во еди́но сочета́л еси́ и те́ло де́ланием за́поведей предочи́стил еси́, блаже́нне, непреста́нно взыва́я: благослови́те, дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богоро́дичен: Из сете́й вра́жиих ду́шу мою́ исто́ргни, Всенепоро́чная Влады́чице, прило́ги бо сла́стными лю́те оплете́н, не могу́ чист предста́ти Престо́лу Влады́чню, то́кмо вопию́: благослови́те, дела́ Госпо́дня, Го́спода, и Ма́терь Его́ в пе́снех велича́йте.

Песнь 9

Ирмос: Сла́дкою Пречи́стаго Твоего́ Рождества́/ стрело́ю уязвле́ни, Чи́стая,/ Твое́й достожела́нней добро́те дивя́щеся,// пе́сньми а́нгельскими досто́йно Тя я́ко Ма́терь Бо́жию велича́ем.

Припе́в: Преподо́бне о́тче наш Анато́лие, моли́ Бо́га о нас.

Па́мять твоя́, о́тче Анато́лие, плоды́ сла́дкия прино́сит доброде́лания твоего́, моли́твою бо и терпе́нием ду́шу твою́ очи́стил еси́ и прия́т ю́ Христо́с во оби́тели Своя́. Те́мже пе́сньми велича́ющих твое́ преставле́ние, сподо́би улучи́ти ми́лость в День су́дный.

Припе́в: Преподо́бне о́тче наш Анато́лие, моли́ Бо́га о нас.

Насажде́н в дому́ Бо́жием, преподо́бне Анато́лие, возра́сл еси́ в скиту́ О́птинстем, я́ко кедр лива́нский, благово́ние милосе́рдия и любве́ приходя́щим к тебе́ источа́я. Не забу́ди и нас, убо́гих чад твои́х, ве́рою и любо́вию тя велича́ющих.

Припе́в: Преподо́бне о́тче наш Анато́лие, моли́ Бо́га о нас.

Иису́совы моли́твы де́латель рачи́тельный быв, блаже́нне Анато́лие, ум твой, я́ко влады́ку, на стра́сти плотски́я му́жески поста́вил еси́ и се́рдце твое́ вселе́ние Ду́ху Свято́му соде́лал еси́. Помози́ и нам стра́сти грехо́вныя искорени́ти и непреста́нною моли́твою при́сно Бо́гу угожда́ти.

Сла́ва Отцу́ и Сы́ну и Свято́му Ду́ху:

Кра́сный и медото́чный рай О́птину пу́стынь соде́лал еси́, о́тче Анато́лие, в не́йже ду́ши всех приходя́щих к тебе́ духо́вными глаго́лы, я́ко ме́дом, услажда́л еси́. Те́мже и нас, с любо́вию почита́ющих святу́ю па́мять твою́, прича́стниками сла́дости ра́йския бы́ти сподо́би.

И ны́не и при́сно и во ве́ки веко́в. Ами́нь.

Богоро́дичен: А́нгелов сла́дость и апо́столов утеше́ние, мона́шествующих утвержде́ние и правосла́вных Спобо́рнице, не преста́й моли́тися к Сы́ну Твоему́ о испове́дающих Тя, я́ко Ма́терь Бо́жию и Де́ву Чи́стую.

Свети́лен:

Житие́ твое́, све́том ве́ры и́стинныя озаре́нное, пра́ведно сконча́л еси́, свя́те Анато́лие, ны́не, в со́нме О́птинских ста́рцев пребыва́я, я́ко звезда́ путево́дная, к ми́ру го́рнему ве́рным путь освеща́еши.

Моли́тва

О преподо́бне о́тче Анато́лие, ди́вный ста́рче О́птинский! Предстоя́ще ра́це моще́й твои́х (или́: пред о́бразом твои́м святы́м), воспомина́ем ди́вное твое́ житие́ и по́двиги, во сла́ву Го́спода на́шего Иису́са Христа́ подъя́тыя. Ты, от ю́ности красоту́ ми́ра сего́ презре́в, возжела́л еси́ Бо́гу усе́рдно послужи́ти и, от роди́телей теле́сную добро́ту унасле́довав, па́че украша́лся еси́ души́ благоле́пием, е́же в терпе́нии стяжа́ти подоба́ет. Ты, от двои́х ста́рцев, блаже́ннаго Мака́рия и пречу́днаго Амвро́сия, воспита́нный, ста́рец духоно́сный соде́лался еси́, я́ко и богому́дрый святи́тель Игна́тий о тебе́ удивля́шеся.

О ста́рче ди́вный! Ты, моли́твою непреста́нною вы́ну со Христо́м пребыва́я, вели́кую благода́ть стяжа́л еси́, те́мже и мно́гая ча́да, путь у́зкий и приско́рбный избра́вше, ра́достно вслед тебе́ теча́ху, к Восто́ку восто́ков приближа́ющеся. Мы же, словесы́ твои́ми наставля́еми и моли́твами твои́ми огражда́еми, со умиле́нием зове́м ти: не оста́ви нас, скорбьми́ обурева́емых, грехи́ мно́гими обремене́нных, от лука́ваго врага́ смуща́емых, но помози́ по́двигом до́брым подвиза́тися, ве́ру соблюсти́ и Све́та Небе́снаго дости́гнути, да досто́йно восприи́мем вся от Го́спода угото́ванная и, зерца́лом разре́шшимся, вку́пе с тобо́ю чи́сте у́зрим Бо́га на́шего в Тро́ице сла́вимаго, Отца́, и Сы́на, и Свята́го Ду́ха, во Ца́рствии Его́. Ами́нь.