6 февраля.

Канон святой блаженной Валентине Минской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь глас 1-й:

От младенства восприявши веру Христову в сердце твое, / яко мудрая дева пронесла еси чрез все житие плоды ея, / темже и Христос дарова ти силу, / целити недуги немощствующих и колеблющихся. / Мы же, прославляюще тя, блаженная мати Валентино, вопием: // слава Давшему тебе крепость, / слава Прославльшему тя, // слава спасающему всех призывающих тя.

Величание:

Величаем тя, / святая блаженная мати наша Валентина, / и чтим святую память твою, / ты бо молиши за нас // Христа Бога нашего.

КАНОН, глас 8-й:

ПЕСНЬ 1-я.

Ирмос: Воду прошед яко сушу и египетскаго зла избежав,  Израильтянин вопияше: Избавителю и Богу нашему поим.

Припев: Святая блаженная Валентино, моли Бога о нас.

Боже Всещедрый, сподоби ны, недостойныя, принести молебное пение угоднице Твоей Валентине, нашей ходатаице и молитвеннице пред Тобою.

Припев: Святая блаженная Валентино, моли Бога о нас.

Закон Божий имущи в сердце своем издетска, уязвилася любовию ко Христу и Тому истово в житии своем служила еси, мати блаженная.

Сла́ва Отцу́ и Сы́ну и Свято́му Ду́ху:

Избра тя Господь сосуд Духа Святаго в земли Минстей утешати страждущих и немощных, притекающих к стопам твоим.

И ны́не и при́сно и во ве́ки веко́в. Ами́нь.

Богородичен: Архангельски песнь Тебе поем, Чистая:Радуйся, Обрадованная Марие, Мати Христа Бога, присно молящаяся за род наш.

ПЕСНЬ 3-я.

Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.

Припев: Святая блаженная Валентино, моли Бога о нас.

Житием богоугодным и праведным освятилася еси, мати блаженная, темже и нам, с верою к тебе прибегающим, помози благодати Божия исполнится.

Припев: Святая блаженная Валентино, моли Бога о нас.

Прозорливо усмотряя кончину воинов, на поле брани убиенных, утешала еси вопрошавших тя.

Сла́ва Отцу́ и Сы́ну и Свято́му Ду́ху:

Жизнорадостно сретающи из разных градов и весей приходящих к тебе страждущих в болезнех, исцеляла их, блаженная Валентино.

И ны́не и при́сно и во ве́ки веко́в. Ами́нь.

Богородичен: Небеснаго Творца, Богородице Всепетая, рождши, Небес пространнейшая явилася еси. Нас от пространнаго пути погибельна уклоньши, на Небесный путь настави, молюся.

Седален, глас 2-й:

К тебе, блаженная мати Валентино, яко сильной молитвеннице пред Богом, притекаем, и просим исцеления недугом душевным и телесным, и вся потребная ко спасению.

Слава, и ныне, Богородичен:

Мати Пречистая, граде Божий, избави люди Твоя от бед, и помощь подаждь противитися врагом гордым, да вопием Ти:Радуйся, Благословенная.

ПЕСНЬ 4-я.

Ирмос: Слышах, Господи, смотрения Твоего таинство, разумех дела Твоя и прославих Твое Божество.

Припев: Святая блаженная Валентино, моли Бога о нас.

Сила Божия, в немощи совершающаяся, яви тя чудную помощницу, целительницу недужных и немощных, делательницу молитвы, поющу: слава силе Твоей, Господи.

Припев: Святая блаженная Валентино, моли Бога о нас.

Ум мой омраченный и страстьми телесными обуреваемый, твоими молитвами, блаженная мати, просвети и утиши, да выну воспою Господеви: слава силе Твоей, Боже наш.

Сла́ва Отцу́ и Сы́ну и Свято́му Ду́ху:

Недостойными усты приносимое тебе убогое хваление наше, не презри, блаженная, но приими и воспевающих память твою молитвою посети да воспоем Богу: слава силе Твоей, Господи.

И ны́не и при́сно и во ве́ки веко́в. Ами́нь.

Богородичен: Услыши, Пречистая Владычице, моления наша, и избави нас от насилия вражия, и глас Христов, призывающий благословенныя в Царство, услышати сподоби.

Пе́снь 5

Ирмос: Просветил нас повелении Твоими, Господи, и мышцею Твоею высокою Твой мир подаждь нам, Человеколюбие.

Припев: Святая блаженная Валентино, моли Бога о нас.

Просвети нас, о мати Валентино, надеждею и любовию ко Господу, ныне бо зрящи Христа лицем к лицу, света неизреченнаго наслаждаешися, Тому за ны молися.

Припев: Святая блаженная Валентино, моли Бога о нас.

Христос тя озари Своим светом неизреченным в годину безбожную, тем и яви тя яко столп огнен, светяй во тьме, блаженная мати.

Сла́ва Отцу́ и Сы́ну и Свято́му Ду́ху:

Яко звезда многосветлая возсияла еси, блаженная мати, указующи истинный путь на земном пути людем ищущим Правды Божией.

И ны́не и при́сно и во ве́ки веко́в. Ами́нь.

Богородичен: Свет рождшая божественный и Превечный, Богоневесто, разреши мглу прегрешений наших.

ПЕСНЬ 6-я.

Ирмос: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.

Припев: Святая блаженная Валентино, моли Бога о нас.

Призывающи имя Божие во спасение твое, спасению многих послужила еси. Да пребудем и мы в единении с Богом и в любви между собою, молимтися, мати Валентино.

Припев: Святая блаженная Валентино, моли Бога о нас.

Молитвою Небесною и по кончине твоей от недуг свобождаеши, целительнице наша безмездная, достойно хвалима еси на земли, молися о душах наших.

Сла́ва Отцу́ и Сы́ну и Свято́му Ду́ху:

Молитву нашу приими, мати Валентино, да в умилении к честней иконе твоей припадем и недугов душевных и страстей телесных исцеление скоро приимем.

И ны́не и при́сно и во ве́ки веко́в. Ами́нь.

Богородичен: Избавителя нашего неизреченно рождшая, Пресвятая Дево, буди нам грешным прибежище спасения и вечныя жизни Споручница.

Кондак, глас 5-й:

Ходатаица за немощствующих явилася еси, / на земли Минстей, блаженная Валентино, / в скорбех, бедах и напастех всех верных утешающи, / прозревающи болезни и недуги приходящих к тебе, / просим же и мы недостойнии, / твоего предстательства пред Престолом Всевышняго, // даровати нам мир и спасение душ наших.

Икос: На земли Минстей просияла еси, блаженная Валентино, и вси притекающии к тебе в скорбех, бедах и напастех обретают велие утешение, приносяще свои просьбы и воздыхания сердечная, получают облегчение и исцеления. Тем молим тя, мати наша, твоего непрестаннаго предстательства у престола Всевышняго во веки.

ПЕСНЬ 7-я.

Ирмос: От Иудеи дошедше, отроцы, в Вавилоне иногда верою Троическою пламень пещный попраша, поющее: отцев Боже, благословен еси.

Припев: Святая блаженная Валентино, моли Бога о нас.

Возгореся нечестие на земли нашей, веру отеческую в людех тщащееся попалити, ты же, блаженная, приходящих к тебе научала еси верою воспевати: отцев Боже, благословен еси.

Припев: Святая блаженная Валентино, моли Бога о нас.

Богопротивнии мучителие, от закона Божия отступльшии, храмы разрушиша, но ты, блаженная Валентино, утешала приходящих к тебе и подвигала еси пети: отцев Боже, благословен еси.

Сла́ва Отцу́ и Сы́ну и Свято́му Ду́ху:

Страждущим людем во дни нечестия молитвами твоими, от злобожнаго языковредия неврежденным быти споспешествовала еси, научивши взывати: отцев Боже, благословен еси.

И ны́не и при́сно и во ве́ки веко́в. Ами́нь.

Богородичен: Отроковице Дево, простри на нас милость Сына Твоего, да кромешныя тьмы избавимся мольбами Твоими, поюще: благословен еси, Господи Боже, во веки.

ПЕСНЬ 8-я.

Ирмос: Царя Небеснаго, Егоже поют вои Ангельстии, хвалите и превозносите во вся веки.

Припев: Святая блаженная Валентино, моли Бога о нас.

Победительница страстей явилася еси, Валентино, всякая искушения вражия побеждающи и непрестанно поющи: благословите, вся дела Господня, Господа.

Припев: Святая блаженная Валентино, моли Бога о нас.

Царя Небеснаго измлада возлюбила еси, и Тому до конца дний своих со усердием служила еси, блаженная. Ныне же с лики ангельскими присно поеши: благословите, вся дела Господня, Господа.

Сла́ва Отцу́ и Сы́ну и Свято́му Ду́ху:

Мнози людие, пленении безбожием, молитвами твоими, блаженная мати, на путь спасения наставила еси, дабы в вере правей воспевали Богови: благословите, вся дела Господня, Господа,

И ны́не и при́сно и во ве́ки веко́в. Ами́нь.

Богородичен: Победе во бранех духовных верным пособствуеши, Пресвятая Дево, темже и всем к Тебе притекающим помощь Твою низпосли, да выну поем: благословите, вся дела Господня, Господа.

ПЕСНЬ 9-я.

Ирмос: Воистину Богородицу Тя исповедуем, спасении Тобою, Дево Чистая, со безплотными лики Тя величающее.

Припев: Святая блаженная Валентино, моли Бога о нас.

На одре болезни лежащи, имела еси, Валентино, смирение, кротость, веру несумненну, надежду и любовь, яже к Богу, и нас сего сподоби, да с тобою Христа присно величаем.

Припев: Святая блаженная Валентино, моли Бога о нас.

По гласу Божию: претерпевый до конца, той спасен будет, ты, блаженная Валентино, исполнила еси закон Господа и ныне во славе предстоиши и величаеши присно Господа.

Сла́ва Отцу́ и Сы́ну и Свято́му Ду́ху:

Приими наше недостойное моление, Валентино блаженная, и ходатайствуй пред Господем за всех чтущих тя, да с тобою сподобимся в селениих райских славити Святую Троицу.

И ны́не и при́сно и во ве́ки веко́в. Ами́нь.

Богородичен: Мати Божия, Сияние Неизреченнаго Света, стопы наша к жизни вечней направи, прощающи вся злая, нами содеянная.

Светилен:

Якоже солнце светоносно возсия ныне, блаженная мати Валентино, память твоя, и озари землю Белорусскую светом неизреченным, дабы вси вернии прославляли Великаго Бога Отца, и Сына, и Святаго Духа.

Слава, и ныне, Богородичен:

Державным Твоим покровом, Пречистая, нас рабов Твоих, от наветов вражиих сохраняй всегда невредимы, Тя бо едину стяжахом надежду и утверждение.

Молитва святой Валентине:

О блаженная мати наша Валентино! Якоже и во дни земныя жизни твоея, с любовию принимала еси всех страждущих и немощствующих, всех в скорбех и болезнех сущих, и молитвами твоими целила недуги их. Такожде и ныне всем, с верою и умилением приходящим к тебе, у Господа исцеления испроси, наипаче же от падений греховных сохрани и на путь спасения настави. Услыши нас недостойных, блаженная Валентино, и принеси наша моления ко Престолу Всевышняго, да с радостию восхвалим Пресвятую Троицу: Отца и Сына и Святаго Духа, ныне и присно и во веки веков. Аминь.