6 февраля.

Канон преподобной Ксении Миласской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, ма́ти, изве́стно спасе́ся, е́же по о́бразу: прии́мши бо кре́ст, после́довала еси́ Христу́, и, де́ющи, учи́ла еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней. Те́мже и со Ангелы сра́дуется, преподо́бная Ксе́ние, ду́х тво́й.

Канон святы́я, гла́с 8.

Пе́снь 1.

Ирмос: Пе́снь возсле́м, лю́дие, чу́дному Бо́гу на́шему, свободи́вшему Изра́иля от рабо́ты, пе́снь побе́дную пою́ще и вопию́ще: пои́м Тебе́, Еди́ному Влады́це.

Припев: Святая преподобная Ксение, моли Бога о нас.

Стра́ннаго су́ща вся́кия доброде́тели и удали́вшагося от Бо́га дея́ньми безме́стными, присво́й мя́ Сему́ моли́твами твои́ми благоприя́тными, Ксе́ние честна́я, преподо́бная, твое́ стра́нное житие́ благохва́лящаго.

Припев: Святая преподобная Ксение, моли Бога о нас.

Огнь тя́ разжже́ мы́сленный, я́ко ве́щь удобопа́льну, мирску́ю пре́лесть и плотска́го обру́чника отврещи́ся увеща́ ра́зумом му́жественнейшим и Го́споду чи́сте уневе́стися.

Сла́ва Отцу́ и Сы́ну и Свято́му Ду́ху:

Стра́нную уразуме́вши жи́знь, на небесе́х пребыва́ющую и непреходя́щую, зва́ние я́ко дея́ние премени́ла еси́ и потекла́ еси́, я́коже еле́нь жа́ждущий, Безсме́ртнаго в сле́д Обру́чника.

И ны́не и при́сно и во ве́ки веко́в. Ами́нь.

Богородичен: Пе́сньми Всечи́стую, ве́рнии, Мари́ю да восхва́лим, Богома́терь обра́дованную, покро́в боже́ственный, благоти́шное приста́нище, все́х ве́рных спасе́ние.

Пе́снь 3.

Ирмос: Утвержде́й Сло́вом небеса́ и зе́млю основа́вый на вода́х мно́гих, утверди́ мя к пе́нию славосло́вия Твоего́, Го́споди.

Припев: Святая преподобная Ксение, моли Бога о нас.

Удержа́ла еси́ раче́ние боже́ственное чи́стыя души́ твоея́, забве́ние прия́ти тя́ поще́ния боле́зней увеща́, честна́я, и естества́.

Припев: Святая преподобная Ксение, моли Бога о нас.

Безсме́ртнаго Обру́чника добро́тами наслажда́ема, добро́ту пло́ти увяди́ла еси́ и яви́лася еси́ красне́йша, в Боже́ственный черто́г всели́вшися.

Сла́ва Отцу́ и Сы́ну и Свято́му Ду́ху:

Позлаще́нная кри́ла доброде́телей стяжа́вши, к высоте́ небе́сней возлете́ла еси́, блаже́нная, я́ко голуби́ца нетле́нна.

И ны́не и при́сно и во ве́ки веко́в. Ами́нь.

Богородичен: Све́тлый о́блаче мы́сленнаго и пресве́тлаго Со́лнца, возсия́вшаго из чре́ва Твоего́, Де́во, просвети́ ду́ши пою́щих Тя́.

Седа́лен, гла́с 8.

За милосе́рдие я́вльшееся на земли́ возлюби́вши Сло́во Бо́га Отца́, Тому́ после́довала еси́, я́ко Жениху́, всеблаже́нная, и тле́ннаго жениха́ усе́рдно оста́вила еси́, оста́вльши же тле́нное бога́тство. Те́мже, во стра́нстве тезоимени́тно живу́щи, стра́сти умертви́ла еси́ и живы́х восприя́ла еси́ насле́дие, богодухнове́нная. Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Сла́ва, и ны́не, Богородичен:

В напа́сти многоплете́нныя впа́д от вра́г ви́димых и неви́димых, бу́рею одержи́мь безчи́сленных согреше́ний мои́х, и я́ко к те́плому заступле́нию и покро́ву моему́, Чи́стая, ко приста́нищу притека́ю Твоея́ бла́гости. Те́мже, Всечи́стая, из Тебе́ Воплоще́нному безсе́менно моли́ся приле́жно о все́х рабе́х Твои́х, непреста́нно моля́щихтися, Богоро́дице Пречи́стая, моля́щи Его́ при́сно согреше́ний оставле́ние дарова́ти, воспева́ющим досто́йно сла́ву Твою́.

Пе́снь 4.

Ирмос: Из горы́ приосене́нныя, Сло́ве, проро́к, еди́ныя Богоро́дицы, хотя́ща воплоти́тися богови́дно усмотри́ и со стра́хом славосло́вяше си́лу Твою́.

Припев: Святая преподобная Ксение, моли Бога о нас.

Ве́но Христу́ принесла́ еси́ чистоту́, умерщвле́ние уде́с и боле́зни воздержа́ния, и восприя́ла еси́ небе́сное Ца́рство и ве́чнующее наслажде́ние.

Припев: Святая преподобная Ксение, моли Бога о нас.

Образ тебе́ до́брым подаю́щи, привлекла́ еси́ мно́гая ду́ши на спасе́ние, отто́ргшися мирска́го пристра́стия, Ксе́ние богому́драя и досточу́дная.

Сла́ва Отцу́ и Сы́ну и Свято́му Ду́ху:

Моча́щи посте́лю слеза́ми, преподо́бная, и с пе́пелом яду́щи хле́б, утеше́ние получи́ла еси́ нестаре́ющееся и рая́ наслажде́ние.

И ны́не и при́сно и во ве́ки веко́в. Ами́нь.

Богородичен: Ра́дуйся, от на́с, Свята́я Богоро́дице; ра́дуйся, Ра́дость ро́ждшая ми́ру; ра́дуйся, еди́на защище́ние челове́ков, Благослове́нная Богоро́дице Чи́стая.

Пе́снь 5

Ирмос: Мра́к души́ моея́ разжени́, Светода́вче Христе́ Бо́же, началоро́дную тму́ изгна́в бе́здны, и да́руй ми́ све́т повеле́ний Твои́х, Сло́ве, да у́тренюя, сла́влю Тя́.

Припев: Святая преподобная Ксение, моли Бога о нас.

Яко ю́ница, жела́ющи Па́стыря Боже́ственную добро́ту, взыва́ла еси́: где́ ны́не пасе́ши, Женише́? Где́ почива́еши, рцы́ ми? Жела́ю Твое́ ви́дети преизя́щное виде́ние и распаля́юся всю́ду.

Припев: Святая преподобная Ксение, моли Бога о нас.

Рачи́тельныя добро́ты Моея́, — вопие́т Жени́х, — и́щущи, честна́я, доброде́тельми облиста́вшися, в небесе́х Мя́ смотри́: та́мо пасу́ Аз и Моя́ призыва́ю всегда́ о́вцы.

Сла́ва Отцу́ и Сы́ну и Свято́му Ду́ху:

Го́рлица красне́йшая, ла́стовица светле́йшая и мы́сленный слави́й, ловле́ния прете́кши мы́сленных се́тей, яви́лася еси́, Ксе́ние честна́я, и в пожела́нней добро́те Христо́ве, досточу́дная.

И ны́не и при́сно и во ве́ки веко́в. Ами́нь.

Богородичен: Безма́терня горе́, в после́дняя су́щим до́ле, ражда́еши без отца́, Осуществова́вшаго, Де́во, на́ше все́ за благоутро́бие мно́гое, Его́же моли́ спасти́ от тли́ пою́щия Тя́.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святая преподобная Ксение, моли Бога о нас.

Стра́нное твое́ житие́ и па́че челове́ка поще́ние прославля́я, тебе́ ра́ди Стра́нствовавый, сла́вная, зна́меньми и чудесы́ пресла́вными и́стинно тя́, преподо́бная, украси́.

Припев: Святая преподобная Ксение, моли Бога о нас.

Кру́гом доброде́телей венча́вшися, востекла́ еси́, к Нему́же жела́ла еси́, Христу́, кру́гом зве́здным тя́ па́че ума́ возвеща́ющу бли́жним и да́льным страннообра́зно, Ксе́ние сла́вная.

Сла́ва Отцу́ и Сы́ну и Свято́му Ду́ху:

Устрани́вшагося дале́че от за́поведей Бо́га на́шего, присво́й мя́ твои́ми, преподо́бная, мольба́ми и стра́нна мя́ сотвори́ лю́тыя гее́нны и страсте́й, содержа́щих мя́.

И ны́не и при́сно и во ве́ки веко́в. Ами́нь.

Богородичен: На ра́мех херуви́мских неопи́санно Седя́й, опи́сан в Твое́м чре́ве всели́ся пло́тию, а не Божество́м, и из Тебе́ про́йде Спаса́яй челове́чество.

Конда́к, гла́с 2.

Твою́ страннонра́вную, Ксе́ние, па́мять соверша́юще, любо́вию почита́ющии тя́, пое́м Христа́, во все́х тебе́ подаю́щаго кре́пость исцеле́ний, Ему́же всегда́ моли́ся о все́х на́с.

Пе́снь 7.

Ирмос: Отроки ороси́вый в пещи́ и Де́ву сохрани́вый, ро́ждшую Тя́, по рождестве́, благослове́н еси́, Бо́же оте́ц на́ших.

Припев: Святая преподобная Ксение, моли Бога о нас.

Пелена́ми Ри́м хва́лится, Ми́ласса же мно́жае, твоя́ мо́щи стяжа́вши, из ни́хже то́чатся чудеса́ ве́рным, богоневе́сто.

Припев: Святая преподобная Ксение, моли Бога о нас.

Река́ яви́лася еси́ врачева́ний, страсте́й мо́ре потопля́я песнопою́щих: благослове́н еси́, Го́споди, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Успи́ла еси́ стра́сти душетле́нныя во мно́гих бде́ниих, блаже́нная, и пра́ведным подо́бным сно́м усну́ла еси́, о ми́ре моля́щися.

И ны́не и при́сно и во ве́ки веко́в. Ами́нь.

Богородичен: Из Тебе́ Воплоти́вшагося па́че сло́ва моля́щи не преста́й, Препе́тая Богоро́дице, от се́тей изба́вится вра́жиих душа́м на́шим.

Пе́снь 8.

Ирмос: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Припев: Святая преподобная Ксение, моли Бога о нас.

Обручи́вшися, я́ко писа́ся, еди́ному му́жу, Христу́, кра́сному добро́тою, вся́к ви́д доброде́телей благоче́стно навы́кла еси́, сла́вная, и в черто́г Боже́ственный всели́ся, ве́но прии́мши благода́ть врачева́ний во вся́ ве́ки.

Припев: Святая преподобная Ксение, моли Бога о нас.

Душа́ моя́ в сле́д Тебе́ прилепи́ся, Христе́, — вопия́ла еси́ любо́вию, — я́ко земля́ жа́ждущая, Тя́, во́ду жи́ву, ищу́, Го́споди, Тебе́ ту́чи приноша́ю сле́з, Твоея́ любве́ струе́ю напо́й мя́, Спа́се, во вся́ ве́ки.

Сла́ва Отцу́ и Сы́ну и Свято́му Ду́ху:

Украси́лася еси́, возлю́бльши и́стинно Су́щее Жела́ние, просла́вилася еси́, отрокови́це, Препросла́вленному прилепи́вшися Бо́гу, ты́ ли́к святы́й привела́ еси́ де́в Спа́су, тя́ подража́вших, с ни́миже в го́рних лику́еши селе́ниих.

И ны́не и при́сно и во ве́ки веко́в. Ами́нь.

Богородичен: Еди́ну Тя́ избра́, добро́ту Иа́ковлю, Отчее Сло́во, и посреде́ Тебе́ всели́ся, и, я́ко благоволи́, па́че все́х кра́сный челове́ков, Всечи́стая, про́йде, омрачи́вшееся на́ше очища́я естество́.

Песнь 9

Ирмос: Благослове́н Госпо́дь Бо́г Изра́илев, воздви́гнувый ро́г спасе́ния на́м в дому́ Дави́дове, Отрока Своего́, в ни́хже посети́ на́с Восто́к с высоты́ и напра́вил ны́ е́сть на пу́ть ми́ра.

Припев: Святая преподобная Ксение, моли Бога о нас.

Не́мощию, сла́вная, некре́пкаго врага́ победи́ла еси́, стра́нну проходя́щи жи́знь и стра́сти плотски́я умертви́вши, и ны́не на небесе́х живе́ши, иде́же твое́ и́маши и́стинно жи́тельство, я́ко чи́стая де́ва.

Припев: Святая преподобная Ксение, моли Бога о нас.

Благослове́н Госпо́дь, приста́нище ти́хое врачева́ний показа́в честну́ю твою́ ра́ку, на́м, при́сно бе́дствующим пучи́ною и бу́рею страсте́й, мона́шествующих сла́во и де́в похвало́, богоно́сная Ксе́ние.

Сла́ва Отцу́ и Сы́ну и Свято́му Ду́ху:

Яко де́вства хра́м, я́ко чи́стую голуби́цу, я́ко го́рлицу непоро́чную, я́ко неве́сту Христо́ву, кра́сную добро́тою тя́ и непоро́чную, я́ко о́браз Боже́ственных доброде́телей, я́ко ве́рт заключе́н, ве́рнии, почита́ем, богоно́сная Ксе́ние.

И ны́не и при́сно и во ве́ки веко́в. Ами́нь.

Богородичен: Глаго́лом Твои́м после́дующе, ро́ди родо́в, Блаже́нная, Тя́ ублажа́ют при́сно: Бо́га бо, и́стинно Блаже́ннаго, родила́ еси́, Чи́стая Де́во, вся́ блаже́нны Тому́ рабо́тающия нело́жно творя́щаго.

Молитва

О свята́я, Ксение. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.