6 февраля.

Канон блаженной Ксении Петербургской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Суеты́ земна́го ми́ра отве́ргшися, / кре́ст жития́ бездо́мнаго во стра́нничестве прия́ла еси́, / скорбе́й, лише́ний, людска́го осмея́ния не убоя́лася еси́, / любо́вь же Христо́ву позна́ла еси́, / е́юже ны́не на небеси́ услажда́ешися, / Ксе́ние блаже́нная, богому́драя, / моли́ся о спасе́нии ду́ш на́ших.

Ин тропа́рь, гла́с 7:

Нищету́ Христо́ву возлюби́вши,/ безсме́ртныя трапе́зы ны́не наслажда́ешися,/ безу́мием мни́мым безу́мие ми́ра обличи́вши,/ смире́нием кре́стным си́лу Бо́жию восприя́ла еси́./ Сего́ ра́ди дар чудоде́йственныя по́мощи стяжа́вшая,/ Ксе́ние блаже́нная, моли́ Христа́ Бо́га// изба́витися нам от вся́каго зла покая́нием.

Велича́ние:

Ублажа́ем тя́, свята́я блаже́нная Ксе́ние, и чти́м святу́ю па́мять твою́, ты́ бо мо́лиши о на́с Христа́ Бо́га на́шего.

Стихи́ра, гла́с 6:

Жесто́кое житие́ во́лею избра́ла еси́, и озлобле́ния вся́ческая претерпе́ла еси́, юро́дство ми́ра сего́ обличи́вши, прему́дрость же Бо́жию яви́вши. И ны́не на небеси́ утеша́ешися, мы́ же, на земли́ стра́нствующе, тебе́ непреста́нно зове́м: не забу́ди на́с, блаже́нная, Христа́ Бо́га о на́с умоля́ющи.

Кано́н блаже́нней Ксе́нии, гла́с 4-й.

Пе́снь 1.

Ирмос: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Припев: Святая блаженная мати Ксение, моли Бога о нас.

Ксе́ние блаже́нная, вои́стинну по и́мени твоему́ и житие́ твое́ бы́сть: на земли́ бо, я́ко во стране́ чужде́й, преходя́щи и во Оте́чествие небе́сное преста́витися ча́ющи, вся́ земна́я, я́ко се́нь и со́ние, презре́ла еси́.

Припев: Святая блаженная мати Ксение, моли Бога о нас.

Суету́ вся́ческую, я́ко пра́х от ногу́ твое́ю отря́сши, жесто́ким путе́м в зе́млю обетова́ния ше́ствовати изво́лила еси́, Ксе́ние мужему́дренная, человекоуби́йцу врага́, я́ко Амали́ка, побежда́ющи и Го́сподеви побе́дное пе́ние принося́щи.

Сла́ва Отцу́ и Сы́ну и Свято́му Ду́ху:

Еги́петския котлы́ благоде́нствия презре́вши и миру кичли́вому посмея́вшися, Ксе́ние му́драя, мо́ря жите́йскаго дно́ прешла́ еси́ неврежде́нно, Бо́гу тя́ веду́щу руко́ю кре́пкою, Ему́же воспе́ла еси́ побе́дное пе́ние.

И ны́не и при́сно и во ве́ки веко́в. Ами́нь.

Богородичен: Ненаде́ющихся наде́ждо и бори́мых по́моще, Пречи́стая, в мо́ри су́щих звездо́ боготе́чная, и в пусты́ни заблу́ждших исто́чниче живоно́сный, отра́ду душа́м на́шим, Де́во Благослове́нная, да́ждь.

Пе́снь 3.

Ирмос: Не му́дростию, и си́лою, и бога́тством хва́лимся, но Тобо́ю, Отчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Припев: Святая блаженная мати Ксение, моли Бога о нас.

Иоа́нна, возлю́бленнаго ученика́ Спа́сова, слы́шавши глаго́люща: и́же лю́бит ми́р, в не́м любви́ Отчей не́сть; мир грехолюби́вый возненави́девши, в до́м Отчий поспеша́ла еси́, блаже́нная.

Припев: Святая блаженная мати Ксение, моли Бога о нас.

Юро́ду себе́ Христа́ ра́ди сотво́рши, му́дрости же преми́рныя исполня́ющися, о́ком чи́стым бу́дущая, я́ко настоя́щая, прозрева́ющи, проро́ком Бо́жиим поревнова́ла еси́, Ксе́ние богому́драя.

Сла́ва Отцу́ и Сы́ну и Свято́му Ду́ху:

Моли́тва усе́рдная — пи́ща тебе́ бы́сть, пра́веднице, руга́ния же и осмея́ния — питие́ сла́дкое, смиренному́дрие — оде́жда украше́ния, и вене́ц — Ду́ха осия́ние.

И ны́не и при́сно и во ве́ки веко́в. Ами́нь.

Богородичен: Уста́ двиза́ти на моли́тву, я́коже ма́ти Самуи́лова ника́коже облени́мся, ве́рнии, небесе́ и земли́ Цари́цу призыва́ющи.

Седа́лен, гла́с 5:

Егда́ но́щию моли́твы твоя́ тайноле́пно творя́щи, на сне́г коле́на твоя́ преклоня́ла еси́, блаже́нная, душа́ твоя́ па́че сне́га убеля́шеся, сле́зы же, от теплоты́ серде́чныя пролива́емыя, зе́млю согрева́ху, гра́д тво́й спя́щий бде́нием твои́м спаса́шеся, и гне́в Бо́жий от того́ отвраща́шеся. Ны́не у́бо тебе́ от мира сего́ отше́дшей, бе́дствуем лю́те, но́щь несве́тла наста́ на́м, огусте́ тма́ грехо́вная, со́н ле́ности и нераде́ния зе́ницы на́ша смежи́, гра́д тво́й в ру́це безбо́жник предаде́ся, и оте́чествие твое́ врагу́ порабо́тися, потщи́ся у́бо на моли́тву и на по́мощь на́м поспеша́й, Ксе́ние, дерзнове́нием ве́лия.

Слава, и ныне, богородичен, глас тойже:

Предста́тельнице и ско́рая Засту́пнице ро́да христиа́нского, бездо́мных и оте́чествия лише́нных Покрови́тельнице, моли́ при́сно Сы́на Твоего́ и Бо́га с блаже́нною Ксе́ниею за ру́сския лю́ди во оте́чествии и в разсе́янии су́щия, да Оте́чествия неотъе́млемаго, небе́снаго дости́гнем.

Пе́снь 4.

Ирмос: Услы́шах сла́вное смотре́ние Твое́, Христе́ Бо́же, я́ко роди́лся еси́ от Де́вы, да от ле́сти изба́виши зову́щия: сла́ва си́ле Твое́й, Го́споди.

Припев: Святая блаженная мати Ксение, моли Бога о нас.

Же́нскую не́мощь отлага́ющи, Андре́ем нарекла́ся еси́, мужеу́мная, проти́ву духо́в зло́бы подвиза́ющися, — сла́ва си́ле Твое́й, — к Подаю́щему ти́ си́лу взыва́ющи.

Припев: Святая блаженная мати Ксение, моли Бога о нас.

Евино высокоу́мие, ра́й затвори́вшее, отве́ргши всеконе́чно, богому́драя, юро́да нарещи́ся изволя́еши, зми́я льсти́ваго посрами́вши.

Сла́ва Отцу́ и Сы́ну и Свято́му Ду́ху:

Ум Христо́в внутрьу́ду тая́щи, прему́драя, ми́ра му́дрость попира́еши, вразумля́еши же лю́ди, судьбы́ Бо́жия предвозвеща́ющи, и стопы́ на́ша на пу́ть пра́вый направля́ющи.

И ны́не и при́сно и во ве́ки веко́в. Ами́нь.

Богородичен: Милосе́рдие Твое́ к на́м преклони́ти тщи́мся, Богоро́дице, моли́твенницу Тебе́ предлага́ющи Ксе́нию блаже́нную, ея́же предста́тельство стяжа́ти упова́ем, па́мять ея́ те́пле воспева́юще.

Пе́снь 5

Ирмос: Стяжа́вый ны́, избра́нныя лю́ди, кро́вию Твое́ю, Го́споди, Тво́й ми́р да́ждь на́м, во единомы́слии сохраня́я ста́до Твое́.

Припев: Святая блаженная мати Ксение, моли Бога о нас.

Наготу́ и хла́д терпя́щи, ри́зы же ни́щим раздаю́щи, — довле́ет ми́ ри́за креще́ния, — в себе́ взыва́ла еси́, блаже́нная.

Припев: Святая блаженная мати Ксение, моли Бога о нас.

Уврачу́й на́ша ра́ны, услы́ши моли́твы, умири́ на́шу жи́знь и на по́мощь на́м поспеша́й, Ксе́ние благолюби́вая.

Сла́ва Отцу́ и Сы́ну и Свято́му Ду́ху:

Юныя вразуми́ и на пу́ть и́стины наста́ви, ста́рыя умудри́ и боже́ственная разуме́ти научи́, вся́ко на дела́ блага́я и́х подвиза́ющи, о Ксе́ние, му́дрость небе́сную стяжа́вшая.

И ны́не и при́сно и во ве́ки веко́в. Ами́нь.

Богородичен: Печа́ли отло́жше, восклони́мся и горе́ воззри́м, бра́тие, и у́зрим в небесе́х Цари́цу Богоро́дицу, покро́вом Свои́м светоно́сным на́с покрыва́ющую.

Пе́снь 6.

Ирмос: Внегда́ скорбе́ти ми́, возопи́х ко Го́споду, и услы́ша мя́ Бо́г спасе́ния моего́.

Припев: Святая блаженная мати Ксение, моли Бога о нас.

Окорми́ на́с, в мо́ри жите́йском бе́дствующих, блаже́нная, ко приста́нищу благооти́шному на́с провожда́ющи, моля́щися ко Еди́ному, Иже на́с спасти́ могу́щему.

Припев: Святая блаженная мати Ксение, моли Бога о нас.

Хотя́ще блага́я твори́ти, зла́я содева́ем. За́поведи Бо́жия ве́дуще, о те́х небреже́м и согреша́ем: помози́ на́м немощны́м, Ксе́ние благосе́рдая.

Сла́ва Отцу́ и Сы́ну и Свято́му Ду́ху:

Возопи́ о на́с ко Го́споду, Ему́же послужи́ла еси́, о Ксе́ние, гла́сом кре́пким, я́коже Моисе́й в пусты́ни, и услы́шит тя́ Бо́г, спасти́ хотя́й челове́ки.

И ны́не и при́сно и во ве́ки веко́в. Ами́нь.

Богородичен: Аще не ты́ на́м ру́це про́стреши, о Богома́ти, не и́мамы избы́ти поги́бельнаго ро́ва, сего́ ра́ди Ти́ зове́м: Влады́чице, спаси́ ны.

Конда́к, гла́с 3:

На земли́ я́ко стра́нна пребы́вши, / о небе́снем же Оте́чествии воздыха́ющи, / юро́да от бу́иих и неве́рных, / прему́дра же и свя́та от ве́рных познава́ешися, / и от Бо́га сла́вою и че́стию венча́ешися, / Ксе́ние мужеу́мная и богоу́мная, / сего́ ра́ди зове́м ти́: / ра́дуйся, я́ко по стра́нствии земне́м / в дому́ Отчем водворя́ешися.

Икос:

Кто́ сия́, во врата́ Ца́рствия небе́снаго толку́щая, ея́же ри́зы белы́, лице́ же сия́ет па́че со́лнца? Отку́ду прихо́дит и яковы́х тре́бует? — Сия́ е́сть дщи́ Отца́ Небе́снаго, Сы́на Бо́жия раба́ ве́рная и Ду́ха Свята́го сосу́д избра́нный, на земли́ я́ко стра́нница прише́льствовавшая. Ны́не во Оте́чествие небе́сное преставля́ется, со тща́нием у́бо се́й две́ри отве́рзите и срета́йте ю́, с весе́лием зову́ще: ра́дуйся, Ксе́ние, я́ко по стра́нствии земне́м в дому́ Отчем водворя́ешися.

Пе́снь 7.

Ирмос: Юноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди, Бо́же оте́ц на́ших.

Припев: Святая блаженная мати Ксение, моли Бога о нас.

Ле́гкое бре́мя Христо́во на ра́мо твое́ взе́мши, вся́ тя́жкая земна́я ни во что́же вменя́ющи, блаже́нная, неудобоноси́мое ка́мение на ве́рх церко́вный преноси́ла еси́, усе́рдно трудя́щися и зову́щи: благослове́н еси́ Го́споди, Бо́же оте́ц на́ших.

Припев: Святая блаженная мати Ксение, моли Бога о нас.

Алчем и жа́ждем и наготу́ем духо́вно: пи́щу сла́дкую, твое́ наставле́ние, да́ждь у́бо на́м, блаже́нная, прохлади́ горта́ни на́ша росо́ю моли́тв твои́х о на́с, убо́гих, я́ко да Го́сподеви благода́рне зове́м: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Мытаре́во грехолю́бное житие́ подража́юще, смиренному́дрия того́ не стяжа́хом, па́че же и фарисе́евой го́рдости преда́хомся, доброде́телей же не иму́ще, что́ у́бо сотвори́м немощни́и, а́ще не к тебе́, Ксе́ние, прибе́гнем и возопии́м: умоли́ о на́с Бо́га оте́ц на́ших.

И ны́не и при́сно и во ве́ки веко́в. Ами́нь.

Богородичен: Ины́я не́сть во вселе́нней, я́коже Ты́, Богоро́дице, я́же ма́тернее дерзнове́ние ко Спа́су иму́щая, и Ангелы пресла́вною чистото́ю превозше́дшая: те́мже Ти́ припа́даем, Влады́чице, моли́ о на́с при́сно Бо́га оте́ц на́ших.

Пе́снь 8.

Ирмос: Вся́ческая, Влады́ко, прему́дростию Твое́ю соста́вил еси́, земли́ же па́ки утверди́л еси́, я́коже ве́си, дно́, основа́нием водрузи́вый на вода́х безме́рных. Те́м вси́ вопие́м, воспева́юще: благослови́те, дела́ Госпо́дня, непреста́нно Го́спода.

Припев: Святая блаженная мати Ксение, моли Бога о нас.

Помо́щница на́м бу́ди, блаже́нная, изыма́ющи на́с от скорбе́й и боле́зней, от собла́знов же, нестрое́ний и бе́д, и жела́ния серде́ц на́ших во бла́го испо́лни, я́ко да о тебе́ Бо́га благодаря́ще, вопие́м: благослови́те дела́ Госпо́дня непреста́нно Го́спода.

Припев: Святая блаженная мати Ксение, моли Бога о нас.

Огне́вицу держа́вствующему уста́вила еси́, цари́це же в виде́нии со́ннем предста́вши, прорекла́ еси́ то́й рожде́ние ча́да, те́мже благода́рственне вопия́ше: благослови́те дела́ Госпо́дня непреста́нно Го́спода.

Сла́ва Отцу́ и Сы́ну и Свято́му Ду́ху:

Ча́да твоя́ есмы́, о Ксе́ние блаже́нная, не оста́ви на́с си́рых, но на по́мощь к на́м прииди́. Не забу́ди о сла́ве твое́й пеку́щихся, но ра́дованием и́м возда́ждь, да вси́ согла́сно пое́м: благослови́те дела́ Госпо́дня непреста́нно Го́спода.

И ны́не и при́сно и во ве́ки веко́в. Ами́нь.

Богородичен: Имя Твое́ пресла́дкое и мироуха́нное да не отхо́дит от у́ст на́ших, Богоро́дице, сердца́ же на́ша любо́вию боже́ственною горя́ща, всю́ тва́рь да приглаша́ют вопи́ти: благослови́те дела́ Госпо́дня непреста́нно Ма́терь Бо́жию.

Песнь 9

Ирмос: Тя́, пресла́вную Неве́сту и Всесвяту́ю Богоро́дицу, Зижди́теля ро́ждшую неви́димых же и все́х ви́димых, пе́сньми велича́ем.

Припев: Святая блаженная мати Ксение, моли Бога о нас.

Тайноле́пная жития́ твоего́ и по́двизи твои́ сокрове́ннии, ны́не ми́ру яви́шася, Ксе́ние блаже́нная, те́мже о тебе́ всеселя́щеся, Христа́ Бо́га, тебе́ просла́вльшаго, немо́лчно велича́ем.

Припев: Святая блаженная мати Ксение, моли Бога о нас.

Аще и преста́вилася еси́ от земны́х, оба́че ве́дуще тя́ и по сме́рти на́м спребыва́ющую и моли́твами твои́ми при́сно на́с от бе́д покрыва́ющу, благода́рне тя́, блаже́нная, велича́ем.

Сла́ва Отцу́ и Сы́ну и Свято́му Ду́ху:

Еже о на́с, немощны́х и убо́гих, попече́ние твое́ воспомина́юще, с любо́вию к тебе́ припа́даем, моли́твеннице на́ша кре́пкая: не оста́ви у́бо на́с, си́рых, но при́сно на́м помога́й, я́ко да о тебе́ Бо́га и Отца́ Небе́снаго при́сно велича́ем.

И ны́не и при́сно и во ве́ки веко́в. Ами́нь.

Богородичен: Моли́твы Ксе́нии блаже́нныя к Тебе́, Влады́чице, о на́с приноси́мыя, к Сы́ну твоему́ и Бо́гу, Де́во, принеси́, Твои́м ма́терним хода́тайством ты́я подкрепля́ющи, и спаса́й, Пречи́стая, Тя́ велича́ющия.

Свети́лен:

До́ме Отчий, отве́рзи ми́ две́ри, от земли́ чужде́й преста́вльшейся, — вопие́т Ксе́ния блаже́нная, во врата́ Ца́рствия небе́снаго толку́щи.

Сла́ва, и ны́не, Богородичен:

Две́ре небе́сная, пала́то Царе́ва, христиа́н неруши́мая стено́, богоприе́мнеи Твои́ ру́це на́м простира́ющи, введи́ на́с, Влады́чице, в ве́чныя кро́вы.

Молитва блаженной Ксении Петербургской

О свята́я блаже́нная ма́ти Ксе́ние! Под кро́вом Всевы́шняго жи́вшая, ведо́мая и укрепля́емая Богома́терию, глад и жа́жду, хлад и зной, поноше́ния и гоне́ния претерпе́вшая, дар прозо́рливости и чудотворе́ния от Бо́га получи́вшая и под се́нью Всемогу́щего упоко́ившаяся, днесь же, от сла́внаго тысящеле́тия Креще́ния Руси́, Це́рковь Ру́сская, прославля́ет тя, я́ко благоуха́нный цвет. Предстоя́ще на ме́сте твоего́ погребе́ния, пред о́бразом твои́м святы́м, я́ко живе́й ти, су́щей с на́ми, мо́лимся ти: приими́ проше́ния на́ша и принеси́ я́ ко Престо́лу милосе́рднаго Отца́ Небе́снаго, я́ко дерзнове́ние к Нему́ иму́щая; испроси́ притека́ющим к тебе́ ве́чное спасе́ние, на блага́я дела́ и начина́ния на́ша ще́дрое благослове́ние, от вся́ких бед и скорбе́й избавле́ние. Предста́ни святы́ми твои́ми моли́твами пред Всеми́лостивым Спаси́телем на́шим о нас, недосто́йных и гре́шных. Помози́, свята́я блаже́нная ма́ти Ксе́ние, младе́нцы све́том свята́го Креще́ния озари́ти и печа́тию да́ра Ду́ха Свята́го запечатле́ти, ю́ныя в ве́ре, че́стности, богобоя́зненности и целому́дрии воспита́ти и успе́хи в уче́нии им стяжа́ти. Боля́щия и неду́гующия исцели́, супру́гом любо́вь и согла́сие ниспосли́, мона́шествующих по́двигом до́брым подвиза́тися помози́ и от поноше́ния огради́, па́стыри в кре́пости ду́ха утверди́, Це́рковь и страну́ на́шу сохрани́, и всех боголюби́вых чад в предсме́ртный час причаще́ния Святы́х Христо́вых Та́ин сподо́би, ты бо еси́ на́ше ско́рое услы́шание и избавле́ние, тебе́ благодаре́ние воссыла́ем и с тобо́ю сла́вим Отца́ и Сы́на и Свята́го Ду́ха, ны́не и при́сно, и во ве́ки веко́в. Ами́нь.

Молитва вторая блаженной Ксении Петербургской

О, пресла́вная свята́я блаже́нная ма́ти на́ша Ксе́ние, те́плая о нас пред Бо́гом моли́твеннице! Я́коже пре́жде к надгро́бию твоему́ припа́давшии, си́це ны́не и мы по прославле́нии твое́м к моще́м твои́м прибега́юще, про́сим: помоли́ся Го́споду, да освяти́т на́ши ду́ши и телеса́, да просвети́т ум, очи́стит со́весть от вся́кия скве́рны, нечи́стых помысло́в, лука́вых и ху́льных умышле́ний и от вся́каго превозноше́ния, го́рдости же и киче́ния, высокоу́мия же и де́рзости, от вся́каго фарисе́йскаго лицеме́рия, и от вся́каго сту́днаго и лука́ваго обы́чия на́шего; да да́рует нам и́скреннее покая́ние, сокруше́ние серде́ц на́ших, смиренному́дрие, кро́тость же и ти́хость, благогове́ние, ра́зум же духо́вный со вся́ким благоразу́мием и благодаре́нием. Утаи́вшая себе́ от му́дрых ве́ка сего́, но Бо́гу зна́емая, испроси́ же стране́ на́шей Росси́йстей от бед лю́тых избавле́ние, всего́ на́шего жития́ обновле́ние и исправле́ние, соблюди́ нас во вся́ком благочести́вом правосла́вном испове́дании ве́ры христиа́нския, я́ко да ублажа́юще тя сподо́бимся во вся дни воспева́ти, благодари́ти и сла́вити Отца́ и Сы́на и Свята́го Ду́ха, Тро́ицу Единосу́щную, Животворя́щую и Неразде́льную во ве́ки веко́в. Ами́нь.

Молитва третья блаженной Ксении Петербургской

О, свята́я уго́дница Бо́жия блаже́нная Ксе́ния! При́зри ми́лостиво твои́м о́ком на нас, раб Бо́жиих (имена), честно́й твое́й ико́не уми́льно моля́щиеся и прося́щие у тебе́ по́мощи и заступле́ния. Простри́ ко Го́споду Бо́гу на́шему те́плыя твоя́ моли́твы и испроси́ душа́м на́шим оставле́ние прегреше́ний. Се бо мы се́рдцем сокруше́нным, и ду́хом смире́нным тебе́ хода́таицу ми́лостивую ко Влады́це и моли́твенницу за ны, гре́шныя, призыва́ем, я́ко ты прия́ла еси́ от Него́ благода́ть моли́тися за ны и от бед избавля́ти. Тебе́ у́бо про́сим, не пре́зри нас недосто́йных, моля́щихся тебе́ и твое́й по́мощи тре́бующих, и исходата́йствуй всем вся ко спасе́нию поле́зная, я́ко да твои́ми ко Го́споду Бо́гу моли́твами получи́вши благода́ть и ми́лость просла́вим всех благи́х Исто́чника и Даропода́теля и Бо́га Еди́наго, в Тро́ице Святе́й сла́вимаго, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.