5 февраля.

Канон святителю Павлину Милостивому, епископу Ноланскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 3:

Правило веры несокрушимыя, / и образ милосердия Христова был еси, Павлине, / вся бо радости мира отринув, / за угнетенных в рабство предался еси. / Тем же любовию твоею озаряема, // вселенная славит тя.

Канон, глас 3.

Песнь 1.

Ирмос: Воды древле манием Божественным во едино сонмище совокупивый, и разделивый море израильтеским людем, Сей Бог наш препрославлен есть, Тому Единому поим, яко прославися.

Припев: Святителю отче Павлине, моли Бога о нас.

Яко же ты сам потрудился еси / в писании песен духовных, / тако и ныне нас умудри / воспети твои подвиги, святителю.

Припев: Святителю отче Павлине, моли Бога о нас.

В житии своем соблюл еси верность Господеви, / рабства и нищеты не убояхся, / умножи убо и нам веру, / да и не смущается сердце наше.

Сла́ва Отцу́ и Сы́ну и Свято́му Ду́ху:

Ослабеваем дерзновением, / упования твердаго не имамы, / на твое же взирающе дивное житие, / духом обновляемся, святителю.

И ны́не и при́сно и во ве́ки веко́в. Ами́нь.

Богородичен: Владычице мира, Святых благая собеседнице, / возглаголи сердцам нашим утешение.

Песнь 3

Ирмос: Иже от несущих вся Приведый, / Словом созидаемая, / совершаемая Духом, / Вседержителю Вышний, / в любви Твоей утверди мене.

Припев: Святителю отче Павлине, моли Бога о нас.

Купно со святителем Павлином / да почтется и супруга его Тарасия, / яко великая жена христианская, / обратившая мужа своего ко спасению.

Припев: Святителю отче Павлине, моли Бога о нас.

Не имея своих чад, / воспитал еси убогих и сирот: / научи и нас о бесприютных детях пещися / и разумети скорби сиротливых душ.

Сла́ва Отцу́ и Сы́ну и Свято́му Ду́ху:

Посмеяния друзей не убоялся еси, / поносивших тя за отречение от блеска мирского, / укрепи и нас без смущения / спасительное дело Христово совершати.

И ны́не и при́сно и во ве́ки веко́в. Ами́нь.

Богородичен: Молитвами безсеменно рождшия Тя, Спасе, / постави рабу Твоему / слово Твое и страх Твой, / да спасуся.

Седален, глас 7:

Странноприимец был еси, святителю, / воззри убо и на мя обнищавшего, / сокровище добродетелей расточившего, / и приими милостиво в вечные кровы, / утомленного странствием земным.

Слава и ныне:

Радуйся лествице, иже Иаков виде, / к Небесному Отцу нас приводящая, / Богомати Пречистая.

Песнь 4.

Ирмос: Положил еси к нам твердую любовь, Господи, / Единороднаго бо Твоего Сына за ны на смерть дал еси. / Темже Ти зовем, благодаряще: / слава силе Твоей, Господи.

Припев: Святителю отче Павлине, моли Бога о нас.

Хочет враг нас, яко пшеницу, рассеяти, / но ты, добрый деятель Христов, / собери в небесные житницы наследие твое.

Припев: Святителю отче Павлине, моли Бога о нас.

Яко же во дни пленения и прочих бед / был еси утешитель паствы твоея, / сице и нас печалию помраченных / просвети надеждою на Бога.

Сла́ва Отцу́ и Сы́ну и Свято́му Ду́ху:

Превыше Иова воссиял еси нищетою добровольною, / он бо и на гноище свободен пребысть, / ты же волею рабство приял еси, / да Христа приобщаеши навеки.

И ны́не и при́сно и во ве́ки веко́в. Ами́нь.

Богородичен: Воссиявшая миру великое солнце Христа / сподоби нас, Владычице, / животворящих и бессмертных лучей Его.

Пе́снь 5

Ирмос: К Тебе утреннюю, всех Творцу, / преимущему всяк ум мирови, / зане свет повеления Твоя, / в нихже настави мя.

Припев: Святителю отче Павлине, моли Бога о нас.

Многажды отдавал еси бедным / последний хлеб из дому твоего: / научи и нас подражать твоему примеру.

Припев: Святителю отче Павлине, моли Бога о нас.

Не восхотел еси радоваться со счастливыми, / но, памятуя скорби убогих страдальцев земли, / сих участь предпочел еси: / нищету, бесприютность и рабство.

Сла́ва Отцу́ и Сы́ну и Свято́му Ду́ху:

В письмах поучал еси пламенно / о пользе молитвы за усопших, / ныне помолимся, святителю, / о скончавшихся близких наших.

И ны́не и при́сно и во ве́ки веко́в. Ами́нь.

Богородичен: О светоносная Дево! В час исхода моего / отверзи ми двери Небеснаго Царства, / да идеже Господь мой, тамо и аз, / слуга неключимый, вселюся.

Песнь 6.

Ирмос: Бездна последняя грехов обыде мя, / и исчезает дух мой; / но прострый, Владыко, высокую Твою мышцу, / яко Петра, мя, Управителю, спаси.

Припев: Святителю отче Павлине, моли Бога о нас.

Ты еси супружества о Господе венец, / ты и отречения монашеского образ: / тем же и монаси, и мирстии / чтим твою память с любовию.

Припев: Святителю отче Павлине, моли Бога о нас.

Кто тя достойно воспоет, дивный Павлине? / Не обретаем ангельских гласов, / да восхвалим человека небеснаго.

Сла́ва Отцу́ и Сы́ну и Свято́му Ду́ху:

Ныне совершил еси подвиг твой / и зриши Бога лицом к лицу: / очисти и наши сердца, / да убежим от нощи сомнений и неверия.

И ны́не и при́сно и во ве́ки веко́в. Ами́нь.

Богородичен: Владычице мира, / ослабевшую душу мою / умудри к созерцанию Божественных видений.

Кондак, глас 8:

Возвещал еси усердно, святителю, / о силе ходатайства святых за мир, / ныне писанное тобою делом яви, / яко великий угодник Божий, / возвесели сердца зовущих: // радуйся, Павлине, святителю милостивый.

Икос:

Ангел утешитель скорбящих и немощных кроткий / к небесам путеводитель был еси в житии твоем, святителю, / душу свою за спасение униженных / положил еси, тем же ароматом добродетелей твоих / услаждаемы, величаем тя хвалебно: / радуйся, благоуханное миро смирения, / радуйся, добрыми делами Отца прославимый, / радуйся, любовию скорбных согреваяй, / радуйся, образе христоподражательного жития, / радуйся, Божию славу жизни своей проявивый, / радуйся, Павлине, святителю милостивый.

Песнь 7.

Ирмос: Якоже древле / благочестивыя три отроки оросил еси / в пламени халдейстем, / светлым Божества огнем / и нас озари, / благословен еси, взывающия, / Боже отец наших.

Припев: Святителю отче Павлине, моли Бога о нас.

Ты был еси, отче, садовник искусен, / твоими молитвами яви мя / яко цвет благоуханен, / насажден в садах рая пресветлаго.

Припев: Святителю отче Павлине, моли Бога о нас.

Обрет сокровище нетленное Христа, / ты первее в горы уединился еси: / вразуми и нас безмолвие любити, / да в тишине ума и сердца узрим Бога.

Сла́ва Отцу́ и Сы́ну и Свято́му Ду́ху:

Ты вся познания мирския, / всю мудрость Господу посвятил еси, / научи и нас вся дарования своя / во славу Его единаго обращати.

И ны́не и при́сно и во ве́ки веко́в. Ами́нь.

Богородичен: Владычице, Надеждо ненадежных, / не даждь до конца погибнути ленивому рабу, / но силою благодатною исцели / расслабление воли моея.

Песнь 8.

Ирмос: Нестерпимому огню соединившеся, / Богочестия предстояще, юноши, / пламенем же невреждени, / Божественную песнь пояху: / благословите, вся дела Господня, Господа / и превозносите во вся веки.

Припев: Святителю отче Павлине, моли Бога о нас.

Среди нашествия варварского и нестроений / извел еси корабль паствы твоея / в тишину Христову, / тако и с нами сотвори.

Припев: Святителю отче Павлине, моли Бога о нас.

Умоли Христа Бога о Церкви, / ересьми, неверием и распрями обуреваемой, / даждь пастырем силу и мудрость / право правити слово Господней истины.

Сла́ва Отцу́ и Сы́ну и Свято́му Ду́ху:

Вопиют к Тебе священных соборы / и монашествующих полки: / на твердом камени веры Христовой / утверди сердца, тьмою бед устрашенныя.

И ны́не и при́сно и во ве́ки веко́в. Ами́нь.

Богородичен: Светоносным омофором Твоим, Пречистая, / Церковь Сына Твоего / всегда охраняй от искушений и непосильных бед.

Песнь 9.

Ирмос: Новое чудо и Боголепное: / девическую бо дверь затворенную / яве проходит Господь, / наг во входе, / и плотоносец явися во исходе Бог, / и пребывает дверь затворена. / Сию неизреченно / яко Богоматерь, величаем.

Припев: Святителю отче Павлине, моли Бога о нас.

Ты еси чистоты светильник / и воистину друг Божий, / исторгни нас из блата страстей / и сладостию духовной напитай.

Припев: Святителю отче Павлине, моли Бога о нас.

Ты еси врач согрешающим, / ты еси пастырь премудрый, / управи наше мятежное житие / к обители святыни и покоя вечнаго.

Сла́ва Отцу́ и Сы́ну и Свято́му Ду́ху:

Многажды восхвалял еси / тайну Святыя Евхаристии, / пробуди в суетных душах наших / жажду Святаго Причастия.

И ны́не и при́сно и во ве́ки веко́в. Ами́нь.

Богородичен: Преблагословенная, Чистая, / пребуди со мною на всяк день же и час, / да радостен буду, и не впаду в сети / отчаяния и нечестия.

Светилен:

Яко светило неугасаемое / и по смерти показался еси, святителю, / благоуханием мощей твоих целебных / и красотою великих чудес.

Слава, и ныне:

Спаси, Христе Боже, люди Твоя, / и страну осени тишиною, / за молитвы Матери Твоея / и Павлина милостиваго.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Павлине, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.