5 февраля.

Канон священномученику Клименту, епископу Анкирскому, и святому мученику Агафангелу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Лоза́ преподо́бства и сте́бль страда́льчества, цве́т свяще́ннейший и пло́д богода́нный, ве́рным, всесвяще́нне, присноцвету́щ, дарова́лся еси́, но я́ко му́чеников сострада́лец и священнонача́льников сопресто́льник, моли́ Христа́ Бо́га спасти́ся душа́м на́шим.

Канона свята́го, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Священномучениче Клименте, моли Бога о нас.

С го́рними ли́ки я́ко иере́й и я́ко му́ченик сла́вен Христу́ предстоя́, приле́жно моли́ получи́ти осия́ния твоего́ восхваля́ющим тя́.

Припев: Священномучениче Клименте, моли Бога о нас.

Просте́ртыя по́двиги по земли́ препроводи́в, преподо́бне, Ца́рствия небе́снаго сподо́бился еси́ вене́ц прия́ти и ве́чную жи́знь и неразори́мую.

Сла́ва Отцу́ и Сы́ну и Свято́му Ду́ху:

Изба́влен стра́стию Безстра́стнаго, страда́нием потща́лся еси́ к Нему́ востещи́, подража́тель бы́в я́ве страсте́й Его́, Ангелов ссе́льниче.

И ны́не и при́сно и во ве́ки веко́в. Ами́нь.

Богородичен: Преиспещре́нна добро́тою доброде́телей, Богома́ти Пречи́стая, Бо́га и́стиннаго доброде́тель зачала́ еси́ на́м, исто́чник благи́х источа́юща.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Священномучениче Клименте, моли Бога о нас.

Красны́ прине́сл еси́ плоды́, розга́ жизноно́сныя бы́в Лозы́, и, сия́ му́ченическими украси́в блиста́ньми, Спа́су все́х освяти́л еси́.

Сла́ва Отцу́ и Сы́ну и Свято́му Ду́ху:

Па́вла яви́лся еси́ подража́тель, всю́ вселе́нную претека́я, всеблаже́нне, креще́нием богоде́льным и кро́вию кропле́ния освяща́я испове́дания твоего́.

И ны́не и при́сно и во ве́ки веко́в. Ами́нь.

Богородичен: Не́сть непоро́чна, я́коже Ты́, Всечи́стая Богоро́дице: еди́на бо от ве́ка Бо́га и́стиннаго и все́х Соде́теля, Бо́га Сло́ва, па́че сло́ва родила́ еси́.

Седа́лен, гла́с 8.

От Анки́ры звезду́ богосия́нную, Каппадо́ков похвалу́, благоче́стно Кли́мента почти́м, многострада́льнаго му́ченика, свяще́нников сла́ву, преподо́бных похвалу́, си́рых предста́теля, ни́щих побо́рника, и́же и, пострада́в в два́десять осьмо́е ле́то, мно́гия просвети́, и оте́чество освяти́ многострада́льный му́ченик, мо́лится же Христу́ Бо́гу прегреше́ний оставле́ние дарова́ти чту́щим любо́вию святу́ю па́мять его́.

Сла́ва, и ны́не, Богородичен:

Яко де́ву и еди́ну в жена́х, Тя́, без се́мене ро́ждшую Бо́га пло́тию, вси́ блажи́м, ро́ди челове́честии: о́гнь бо всели́ся в Тя́ Божества́, и я́ко Младе́нца млеко́м пита́еши Зижди́теля и Го́спода. Те́м, Ангельский и челове́ческий ро́д, досто́йно сла́вим пресвято́е Рождество́ Твое́ и согла́сно вопие́м Ти́: моли́ Христа́ Бо́га прегреше́ний оставле́ние дарова́ти покланя́ющимся ве́рою пресвято́му Рождеству́ Твоему́.

КрестоБогородичен:

Агнца и Па́стыря и Изба́вителя, Агница зря́щи на Кресте́, восклица́ше, пла́чущи, и, го́рько рыда́ющи, вопия́ше: ми́р у́бо ра́дуется, прие́мля Тобо́ю избавле́ние, утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости. Долготерпели́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согреше́ний оставле́ние, ве́рою пою́щим Боже́ственныя Стра́сти Твоя́.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Священномучениче Клименте, моли Бога о нас.

Обте́к всю́ зе́млю, просте́рл еси́ подвиго́в ро́згу, страда́льческое иска́пая ра́дование и благово́ния сла́дость, страстоте́рпче всеблаже́нне.

Припев: Священномучениче Клименте, моли Бога о нас.

Ве́рт зря́ще твоего́ страда́ния, ра́н цве́ты, блаже́нне, твои́х, ра́дующеся, пожина́ем и разли́чными чудесы́ чу́вства обвеселя́ем.

Сла́ва Отцу́ и Сы́ну и Свято́му Ду́ху:

Дне́ бы́л еси́ сы́н, чу́дне, и Све́та Невече́рняго, непреста́нно озаря́емь Трисо́лнечным Све́том и сия́нием пропове́дания.

И ны́не и при́сно и во ве́ки веко́в. Ами́нь.

Богородичен: Мари́е Всечи́стая, чистоты́ бы́вши прия́телище вмести́тельное Боже́ственнаго вселе́ния, душе́вную мою́ скве́рну и окаля́ние истреби́.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Священномучениче Клименте, моли Бога о нас.

Ра́ны, всему́дре, терпя́ многоле́тныя и должа́йшия, многострада́телен бы́л еси́, ны́не же нетле́ннаго блаже́нства сла́дость насле́довал еси́ ве́чнующую.

Припев: Священномучениче Клименте, моли Бога о нас.

Ве́ру, я́ко анки́ру тве́рдую, и наде́жду, и любо́вь основа́ние положи́в, Честне́й Тро́ице себе́ возложи́л еси́ хра́м освяще́н, о́тче всебога́те.

Сла́ва Отцу́ и Сы́ну и Свято́му Ду́ху:

Богоукра́шенный сопру́г пресве́тлый подвиза́ся на три́знищи страда́ния, прие́м ве́чную жи́знь, со Ангелы лику́ет и сра́дуется.

И ны́не и при́сно и во ве́ки веко́в. Ами́нь.

Богородичен: Спасти́ хотя́ от тли́ истле́вшее челове́ческое естество́, Зижди́тель и Госпо́дь во утро́бу очище́ну Святы́м Ду́хом всели́вся, неизрече́нно вообрази́ся.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Священномучениче Клименте, моли Бога о нас.

Зако́нно пострада́вше, венцы́ от руки́ Влады́чния прия́сте, даро́в разли́чных раздая́ния, и благода́ть исцеле́ний, и ве́рных врачева́ти неду́ги.

Сла́ва Отцу́ и Сы́ну и Свято́му Ду́ху:

Житие́ боже́ственное, подвиго́в пробавле́ние, ра́н изпростре́ние, благоле́пия венча́ние та́йное, и добро́ты диади́ма, и оде́жда нетле́ния тебе́ бы́ша.

И ны́не и при́сно и во ве́ки веко́в. Ами́нь.

Богородичен: Всечи́стая Влады́чице, ро́ждшая земны́м ко́рмчия Го́спода, страсте́й мои́х непостоя́нное и лю́тое утоли́ смуще́ние и тишину́ пода́ждь се́рдцу моему́.

Конда́к, гла́с 4.

Лозы́ бы́л еси́ честна́я розга́ Христо́ва, многострада́льне Кли́менте всехва́льне, я́влься, со стра́ждущими же взыва́л еси́: Ты́ му́чеников, Христе́, све́тлое ра́дование.

Икос:

От младе́нства свяще́нно воздое́ннаго, ро́згу лозы́ Царя́ Христа́, пе́сньми почти́м ве́рно: то́й бо яви́ся весе́лием и́стинно и добро́тою че́стен, в му́ках и страда́ниих непрекло́нен, во свяще́нстве воображе́н иера́рх и о́бщник Бо́жия Ца́рства, и́дольская бо ка́пища и я́рость мучи́телей в ничто́же вмени́в, на три́знищи Еди́наго ра́достию Спа́са испове́дуя: Ты́ му́чеников, Христе́, све́тлое ра́дование.

Пе́снь 7.

Ирмос: Отроцы в Вавило́не пе́щнаго пла́мене не убоя́шася, но, посреде́ пла́мене вве́ржени, ороша́еми, поя́ху: благослове́н еси́, Го́споди, Бо́же оте́ц на́ших.

Припев: Священномучениче Клименте, моли Бога о нас.

Заре́ю муче́ния вселе́нную уясни́л еси́, воспева́я Христу́ мы́сли и души́ чистото́ю: благослове́н еси́, Го́споди, Бо́же отце́в на́ших.

Сла́ва Отцу́ и Сы́ну и Свято́му Ду́ху:

Твои́х исправле́ний свяще́ннейшее торжество́, небе́сным све́том сия́ющо, озаря́ет зову́щия: благослове́н еси́, Го́споди, Бо́же отце́в на́ших.

И ны́не и при́сно и во ве́ки веко́в. Ами́нь.

Богородичен: Му́дрости прему́дрый, Де́во, Ма́ти была́ еси́, вся́ му́дре пра́вящия есте́ственною бла́гостию. Благослове́н, Всечи́стая, Пло́д Твоего́ чре́ва.

Пе́снь 8.

Ирмос: За зако́ны оте́ческия блаже́ннии в Вавило́не ю́ноши, предбе́дствующе, царю́ющаго оплева́ша повеле́ние безу́мное, и совоку́плени, и́мже, не свари́шася огне́м, Держа́вствующему досто́йную воспева́ху пе́снь: Го́спода по́йте, дела́, и превозноси́те во вся́ ве́ки.

Припев: Священномучениче Клименте, моли Бога о нас.

Яви́вшеся светле́йшии на земли́ свети́льницы, озаря́ете тве́рдь, всебога́тии, честны́я Це́ркве, на небесе́х же сия́нием страда́ния ва́шего перворо́дных торжество́, весели́теся, вопию́ще: Го́спода по́йте, дела́, и превозноси́те во вся́ ве́ки.

Припев: Священномучениче Клименте, моли Бога о нас.

С весе́лием ра́достную твои́х подвиго́в па́мять ны́не пра́зднуем: я́коже бо безпло́тен, претерпе́л еси́ ра́н треволне́ния, но вме́сто си́х ве́чнующую пи́щу досто́йно восприя́л еси́, воздая́ние бога́тное, — Го́спода по́йте, дела́, — взыва́я, — и превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Во упещре́нную и пресве́тлую оде́жду ты́ сла́вы оде́явся вме́сто ду́ха, пребога́те, лю́таго уны́ния, вме́сто му́к Ангельское пребыва́ние премени́л еси́, прие́м Жи́зни Присносу́щныя, — Го́спода по́йте, дела́, — зовы́й, — и превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Из Присносу́щнаго Роди́теля Соприсносу́щное Сло́во и Сразумева́емое, напосле́док же веко́в вопло́щся от Де́вы, челове́ческий ве́сь богосоде́ла зра́к, Себе́ по Ипоста́си неслия́нно соедини́в, Го́спода по́йте, дела́, и превозноси́те во вся́ ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Священномучениче Клименте, моли Бога о нас.

Ба́нею светови́днаго креще́ния соверши́вся, и свяще́нства ма́стию, и му́ченическою кро́вию омы́вся, блаже́нне, укра́шен, ра́дуяся, восте́кл еси́ к небе́сным во́инством, богоблаже́нне.

Сла́ва Отцу́ и Сы́ну и Свято́му Ду́ху:

Святы́х му́чеников вене́ц — Сло́во Бо́жие, венце́м дарова́ний украси́ тво́й святы́й ве́рх, чу́дне, пра́вды незаходи́мое Со́лнце, Его́же ра́ди по́двиги до́лгия, ра́дуяся, претерпе́л еси́.

И ны́не и при́сно и во ве́ки веко́в. Ами́нь.

Богородичен: Сы́н и Сло́во Бо́жие Безнача́льное, вопло́щся, Сы́н Де́вы быва́ет благоволе́нием Отца́ и Ду́ха Боже́ственнаго соде́йством, ве́сь обнови́ истле́вший мо́й зра́к, я́ко Всеси́лен.

Свети́лен.

Якоже Па́вел апо́стол, зе́млю обте́кл еси́ всю́, и до́лгими твои́ми по́двиги просте́рл еси́, Кли́менте, ро́згу, и мре́жею ве́ры уловля́еши Агафанге́ла, соо́бщника и сму́ченика, блага́го веща́ния тезоимени́тнаго страда́льца.

Сла́ва, и ны́не, Богородичен:

Ты́ мое́ заступле́ние, Пречи́стая, и кре́пкое прибе́жище, Ты́ и предста́тельница, и покро́в, и к Тебе́ припа́даю, зовы́й: от бе́д мои́х изба́ви мя́, я́ко Ра́дость ро́ждшая, и от огня́ исхи́ти ве́чнаго, Де́во, на Тя́ наде́ющагося.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Кли́менте, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.