4 февраля.

Канон cвятому апостолу Тимофею

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь апо́стола, гла́с 4:

Бла́гости научи́вся и трезвя́ся во все́х, благо́ю со́вестию священноле́пно обо́лкся, поче́рпл еси́ от сосу́да избра́ннаго неизрече́нная и, ве́ру соблю́д, ра́вное тече́ние соверши́л еси́, апо́столе Тимофе́е. Моли́ Христа́ Бо́га спасти́ся душа́м на́шим.

Тропа́рь му́ченика, гла́с то́йже:

Му́ченик Тво́й, Го́споди, Анаста́сий во страда́нии свое́м вене́ц прия́т нетле́нный от Тебе́, Бо́га на́шего, име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н апо́стола, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Святый апостоле Тимофее, моли Бога о нас.

Воста́ния страсте́й и неве́дения мра́к моли́твами твои́ми, блаже́нне, разори́ све́тлою безстра́стия благода́тию, я́ко да богоявле́нна ны́не досто́йно воспою́ тя.

Припев: Святый апостоле Тимофее, моли Бога о нас.

Ви́дев Предве́дец и Бо́г твоего́ ума́ добро́ту, Тимофе́е, боже́ственным апо́столом тя́, сослужи́теля удосто́ив, показа́, му́дрым про́мыслом о на́с промышля́я.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Еди́но Пресу́щественное Нача́ло, проразумева́ющее вся́, ве́мы: от е́ллин бо апо́стол, Христо́вою просвеще́н благода́тию, ны́не боже́ственному Па́влу счисля́ется Тимофе́й.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Святый апостоле Тимофее, моли Бога о нас.

Излия́ся, всеблаже́нне, бога́тно благода́ть во устна́х твои́х и ре́ки догма́тов источи́, Це́рковь Христо́ву напая́ющия и многопло́ден принося́щия пло́д, Тимофе́е христопропове́дниче, богому́дре апо́столе.

Припев: Святый апостоле Тимофее, моли Бога о нас.

Но́ги твоя́ проро́чески, всеблаже́нне, украси́шася, вся́к бо у́м, я́ве преиму́щий, благовести́л еси́ ми́р, всему́дре, дре́внюю разруши́вшаго челове́ков бра́нь Спа́са все́х и Го́спода.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Умертви́в твоя́ у́ды плотски́я, Сло́ву повину́л еси́ ху́ждшая, блаже́нне Тимофе́е, влады́чество пода́в лу́чшему, и, стра́сти удержа́в, ду́шу уясни́л еси́, наставля́емь Па́вловыми уче́нии.

Седа́лен, гла́с 4.

Боже́ственными дарова́нии укра́шен, удобри́л еси́, сла́вне, Ефе́сскую све́тлую митропо́лию, апо́столе, пропове́дник бо показа́лся еси́, с Па́влом боже́ственным все́м провозвести́л еси́ спаси́тельное сло́во. Те́мже торжеству́ем ве́рою па́мять твою́.

Сла́ва, И ны́не, Богородичен:

Де́во Всенепоро́чная, я́же Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, Еди́на Всепе́тая.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Святый апостоле Тимофее, моли Бога о нас.

Зако́нно, всеблаже́нне, пострада́ти изво́лив, воздержа́нием всеконе́чным треволне́ния страсте́й уму́ покори́л еси́, доброде́тели прие́м соверше́ние, великопропове́дниче богому́дре Тимофе́е.

Припев: Святый апостоле Тимофее, моли Бога о нас.

Облиста́в, я́ко со́лнце, Па́вел, испусти́, я́коже зарю́ све́тлу, вселе́нную бога́тным све́том просвеща́я, светоявле́нно тя́, богоявле́нне Тимофе́е, к наставле́нию на́шему и утвержде́нию.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Возжела́в те́пле жела́ний кра́йнейшее и любо́вию сраствори́вся, раче́нием на другу́ю жи́знь преше́л еси́, богоприя́тне, всегда́ твоего́ созира́я Рачи́теля и Того́ виде́ния насыща́яся.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Святый апостоле Тимофее, моли Бога о нас.

Пе́рваго и все́х Вино́внаго Све́та невеще́ственными сия́нии просвеща́емь, ми́р уясни́л еси́ пропове́данием честны́м, свети́льник благоче́стия, жи́зни сло́во преиме́ния проявле́нно яви́лся еси́, священнотаи́нниче всеблаже́нне.

Припев: Святый апостоле Тимофее, моли Бога о нас.

Па́вла боже́ственнаго и́стинный учени́к учи́теля стопа́м после́дует, сего́ се́я уче́ния ве́рным, и́миже благоче́стия к све́ту наставля́еми, из но́щи у́тренююще, славосло́вим Тя́, Человеколю́бче.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Просвеще́нием Па́вел вторы́й явля́ешися, служа́щий пе́рвей све́тлости, сея́ позна́нием просвети́ на́с. Сего́ сво́инник Тимофе́й яви́ся, Того́ всеору́жием победи́тельно огражда́емь.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Святый апостоле Тимофее, моли Бога о нас.

Колесни́ца Бо́жия яви́лся еси́, Тимофе́е, нося́щи Того́ Боже́ственное и́мя, пред лице́м безбо́жных мучи́телей, богоприя́тне, не ужаса́яся си́х свере́пства: ты́ бо в непобеди́мую Спа́са кре́пость оде́ялся еси́.

Припев: Святый апостоле Тимофее, моли Бога о нас.

Вене́ц благоле́пен прия́л еси́, пребога́те Тимофе́е, богому́дре апо́столе, и диади́мою Ца́рствия досто́йно обложи́лся еси́, и предста́л еси́ престо́лу Влады́ки твоего́, с Па́влом ра́дуяся в се́лех небе́сных, блаже́нне.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Мѵ́ром у́мнаго, Тимофе́е всече́стне, пло́тию на́с ра́ди истоще́ннаго Христа́ обонява́емь, благово́ние Сего́ прия́л еси́ и пре́дал еси́ ве́рою тебе́ притека́ющим, таи́нниче неизрече́нных свя́те, Того́ мы́сленныя любве́.

Конда́к, гла́с 1.

Боже́ственнаго ученика́ и спутеше́ственника Па́влова Тимофе́я, ве́рнии, воспои́м вси́, с си́м почита́юще му́драго Анаста́сия, возсия́вшаго от Перси́ды, я́ко звезду́, и отгоня́щаго душе́вныя на́ша стра́сти и неду́ги теле́сныя.

Икос:

Со́лнца мно́жае возсия́ ле́тнее святы́х торжество́, и ве́рныя просвети́, и де́монскую тмообра́зную си́лу отгна́ всю́, и неду́ги очи́сти, и проше́ния прося́щих испо́лни. Те́мже притека́ю а́з, окая́нный, и молю́ся от боле́зни стра́стнаго моего́ се́рдца, да прииму́, я́же хощу́, и обря́щу, я́же тре́бую: премене́ние печа́ли, и житие́ безпеча́льно, и прегреше́ний оставле́ние, и боже́ственное врачева́ние душе́вное и теле́сное.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Святый апостоле Тимофее, моли Бога о нас.

Слико́вник небе́снаго чи́на ты́ по досто́инству бы́в, весели́шися ра́достно, зари́ светода́тельныя, блаже́нне, насыща́яся, священнотаи́нниче Тимофе́е, хва́льнаго возвеща́я Бо́га и препросла́вленнаго.

Припев: Святый апостоле Тимофее, моли Бога о нас.

Священноде́йствуя Христо́во Ева́нгелие, от доброде́тельных высо́т богопи́санная посла́ния Па́вел боже́ственнейший, ра́дуяся, посла́ я́ко ученику́ тебе́, Тимофе́е, хва́льнаго возвеща́я Бо́га и препросла́вленнаго.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Немощно́е пло́ти укрепля́ше благомо́щием души́: я́ко безтеле́сен бо, на земли́ ты́ жи́тельствовав, му́ченик бы́л еси́, во главу́ сокруша́емь, священноде́телю та́инств Бо́жиих, богоблаже́нне.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Святый апостоле Тимофее, моли Бога о нас.

Стоя́ния Ангельскаго сподобля́емь, показа́лся еси́, Тимофе́е блаже́нне, небе́сных чино́в, научи́вся бо преесте́ственно, све́тлости си́х подража́л еси́, му́дре. С ни́миже воспева́еши, веселя́ся: да благослови́т тва́рь вся́ Го́спода и превозно́сит во вся́ ве́ки.

Припев: Святый апостоле Тимофее, моли Бога о нас.

Си́лою оде́явся с небесе́, я́ко апо́стол, яви́лся еси́, богому́дре, наше́дшею страннообра́зно ученико́м Сло́ва и самови́дцем, о Тимофе́е! С ни́миже воспева́еши, ра́дуяся: да благослови́т тва́рь вся́ Го́спода и превозно́сит во вся́ ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ста́л еси́ жела́ния я́ве, всеблаже́нне, кра́йнейшаго, я́ко дости́гл до́брых, Тимофе́е богопропове́дниче, всегда́ осия́емь све́том Тро́ическим я́сно, и ны́не воспева́еши, веселя́ся: да благослови́т тва́рь вся́ Го́спода и превозно́сит во вся́ ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Святый апостоле Тимофее, моли Бога о нас.

Рече́ние Дави́дово испо́лнися, я́ко бо мо́лния, вселе́нней яви́лся еси́, пропове́данием озаря́я концы́, всеприснопа́мятне блаже́нне Тимофе́е, те́м тя́, богоявле́нне, непреста́нно велича́ем.

Припев: Святый апостоле Тимофее, моли Бога о нас.

Заре́ю светонача́льною, прему́дре, Богонача́льным Трисо́лнечным осия́нием насыща́яся и чи́сто наслажда́яся, пою́щия тя́, блаже́нне, спаса́й от мра́ка прегреше́ний, священнотаи́нниче всече́стне.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Ра́вна Тя́ Отцу́ и Ду́ху, Единоро́дне, пра́ве му́дрствующе, сла́вим, уче́ньми апо́столов Твои́х, Влады́ко, утвержда́еми, Па́вла, пропове́дника Твоего́ смотре́ния, и Тимофе́я богому́драго.

Свети́лен.

Два́ свети́ла в ми́ре сия́ют светоно́сно, Тимофе́й же вели́кий во Христо́вых апо́столех и Анаста́сий му́ченик во единообра́зных, и́хже восхва́лим вку́пе.

Сла́ва, и ны́не, Богородичен:

Вси́ ве́рнии, Тя́ Хода́таицу ко из Тебе́ ны́не Ро́ждшемуся предлага́ем, Пресвята́я, мы́ же лу́чшаго ра́ди сраспина́емся Сему́. Те́мже не преста́й о на́с моля́щи.

Молитва

О, святый апостоле Христов Тимофее, подвигом добрым подвизався на земли, восприял еси на небесех венец правды, егоже уготовал еси Господь всем любящим Его; темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.