4 февраля.

Канон святому преподобномученику Анастасию Персскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь апо́стола, гла́с 4:

Бла́гости научи́вся и трезвя́ся во все́х, благо́ю со́вестию священноле́пно обо́лкся, поче́рпл еси́ от сосу́да избра́ннаго неизрече́нная и, ве́ру соблю́д, ра́вное тече́ние соверши́л еси́, апо́столе Тимофе́е. Моли́ Христа́ Бо́га спасти́ся душа́м на́шим.

Тропа́рь му́ченика, гла́с то́йже:

Му́ченик Тво́й, Го́споди, Анаста́сий во страда́нии свое́м вене́ц прия́т нетле́нный от Тебе́, Бо́га на́шего, име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н, гла́с 1.

Пе́снь 1.

Ирмос: Твоя́ победи́тельная десни́ца боголе́пно в кре́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяном пу́ть глубины́ новосоде́лавшая.

Припев: Преподобномучениче Анастасие, моли Бога о нас.

Утром светле́йшим Твоего́, Христе́, воста́ния осиява́емь, сего́ тезоимени́тый, от восто́ка устреми́вся, я́ко со́лнце, ны́не Це́рковь озаря́ет чудесы́.

Припев: Преподобномучениче Анастасие, моли Бога о нас.

Боже́ственныя любве́ испо́лнен, терпели́вно му́ки претерпе́л еси́, му́чениче Анаста́сие, и Христу́, по́стническими укра́шен добро́тами, ра́дуяся, приве́лся еси́, благово́нная же́ртва, блаже́нне.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ра́дуйся, благода́ти исто́чниче, ра́дуйся, ле́ствице и две́ре небе́сная, ра́дуйся, све́щниче, и ста́мно злата́я, и горо́ несеко́мая, Яже Жизнода́вца Христа́ ми́ру Ро́ждшая.

Пе́снь 3.

Ирмос: Еди́не, ве́дый челове́ческаго существа́ не́мощь и ми́лостивно в не́ вообра́жся, препоя́ши мя́ с высоты́ си́лою, е́же вопи́ти Тебе́, Святы́й, одушевле́нный хра́ме неизрече́нныя сла́вы Твоея́, Человеколю́бче.

Припев: Преподобномучениче Анастасие, моли Бога о нас.

Стезю́ ше́ствовав те́сную, пе́рвее у́бо поще́нием к му́ченической сла́ве предуспе́л еси́, муче́ния ра́ди наслажде́ние обре́т боле́зньми, сла́вне му́чениче Анаста́сие, небе́сную красоту́ прие́мля.

Припев: Преподобномучениче Анастасие, моли Бога о нас.

Боле́знь страда́ния твоего́ во всю́ изы́де вселе́нную, му́чениче непобеди́ме: проти́ву бо греха́ да́же до кро́ве сопроти́вився, победоно́сец бы́л еси́ и венце́м побе́ды украси́лся еси́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Из Тебе́ прозябе́, Чи́стая, Цве́т неувяда́емый, благоуха́ющий все́ челове́чество Боже́ственным мѵ́ром естества́ Своего́, Иже Отцу́ Собезнача́льный, и из Тебе́ бы́в под ле́том, Де́во Всенепоро́чная.

Пе́снь 4.

Ирмос: Го́ру Тя́, благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

Припев: Преподобномучениче Анастасие, моли Бога о нас.

Ничто́же тя́ су́щия ко Христу́ любве́ отлучи́: ни удо́в отсече́ние, ни ра́н преще́ние, ни ме́чь, ни сме́рть, но ниже́ о́гнь, ниже́ гла́д, Анаста́сие, небе́снаго ликова́ния купносе́льниче.

Припев: Преподобномучениче Анастасие, моли Бога о нас.

Со усе́рдием на ра́мо кре́ст тво́й взе́м, после́довал еси́ Христо́вым спаси́тельным за́поведем и, Сего́ бы́в подража́тель да́же до сме́рти, всеизря́днейше, ны́не наслажда́ешися Того́ све́тлости.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ра́дость Тебе́ я́ве с небесе́ прише́д, архистрати́г, Чи́стая, благовести́, ре́к: Бо́г изы́дет с пло́тию из Тебе́, Де́во Всечи́стая, во спасе́ние любо́вию пою́щих Тя́.

Пе́снь 5

Ирмос: Бо́г Сы́й ми́ра, Оте́ц щедро́т, вели́каго Сове́та Твоего́ Ангела, ми́р подава́юща, посла́л еси́ на́м; те́м, богоразу́мия к све́ту наста́вльшеся, от но́щи у́тренююще, славосло́вим Тя́, Человеколю́бче.

Припев: Преподобномучениче Анастасие, моли Бога о нас.

Дре́вле хваля́йся безме́рно, и зе́млю претя́ объя́ти, и всу́е гордя́ся, мо́ре, му́дре, все́ потреби́ти, твои́ми благому́жествы, Анаста́сие му́чениче, попира́ется богопроти́вный.

Припев: Преподобномучениче Анастасие, моли Бога о нас.

Зако́нно пострада́в му́ченик Христо́в и победи́в, страда́нии возме́здия, чуде́с де́йство прие́млет я́ве: неду́ги бо цели́т и де́моны отгоня́ет, Христо́вою си́лою чудоде́йствуя, Анаста́сий.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Прокля́тие Евы, все́х ма́тере, Твои́м Рождество́м, Де́во, упраздни́ла еси́, ми́ру благослове́ние израсти́вши, Христа́: те́м Тя́, ра́дующеся, и усты́, и язы́ком, Богоро́дицу вои́стинну испове́дающе, велича́ем.

Пе́снь 6.

Ирмос: Из утро́бы Ио́ну младе́нца изблева́ морски́й зве́рь, якова́ прия́т; в Де́ву же все́льшееся Сло́во и пло́ть прие́мшее про́йде, сохра́ншее нетле́нну: Его́же, бо не пострада́ истле́ния, Ро́ждшую сохрани́ неврежде́нну.

Припев: Преподобномучениче Анастасие, моли Бога о нас.

Заре́ю Кре́стною я́ве просвеща́емь, пре́лести мра́к разреши́л еси́ и победи́л еси́, спле́тся с мучи́телем, всесла́вне, и, ра́дуяся, прия́л еси́ твоя́ победи́тельная, му́чениче Христо́в Анаста́сие, лику́я с му́ченическими во́инствы.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ве́сь ли́к от Бо́га науче́н проро́ческий Твое́ прорече́ та́инство несказа́ннаго и боже́ственнаго зача́тия, е́же из Тебе́ Боже́ственнаго Сло́ва, Ма́ти Де́во: Ты́ бо и́стиннейший и дре́вний сове́т яви́ла еси́.

Седа́лен, гла́с 4.

Сла́вою соверше́нства яви́лся еси́ прече́стен, я́ко Боже́ственными просвети́в светозаре́нии у́м и позна́в Креста́ кре́пость, преподо́бен посто́м и кровьми́ му́ченик бы́л еси́, богому́дренне, Анаста́сие блаже́нне. Те́мже и чуде́с тобо́ю то́чит да́р Христо́с.

Пе́снь 7.

Ирмос: Тебе́, у́мную, Богоро́дице, пе́щь, разсмотря́ем, ве́рнии, я́коже бо о́троки спасе́ три́ Превозноси́мый, ми́р обнови́, во чре́ве Твое́м всеце́л, хва́льный отце́в Бо́г и препросла́влен.

Припев: Преподобномучениче Анастасие, моли Бога о нас.

Страда́лец ве́рныя поуща́ет, я́ве о́браз показа́в му́жество свое́ Боже́ственней ны́не подража́ти стра́сти во́льней, ю́же за ны́ претерпе́ хва́льный отце́в Бо́г и препросла́влен.

Припев: Преподобномучениче Анастасие, моли Бога о нас.

Равномо́щная Тро́ица ве́руется благоче́стия рачи́телем: до́блии бо страда́льцы за Сию́ пострада́ша, кро́ви излива́юще, му́ченически борю́щеся, и ду́ши предаю́ще я́ве, и убива́еми.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Ра́дуйся, Чи́стая, из Тебе́ про́йде Па́стырь, Иже во Ада́мову ко́жу оде́явся, вои́стинну превозноси́мый во всего́ мя́, челове́ка, за благоутро́бие непости́жное, хва́льный отце́в Бо́г и препросла́влен.

Пе́снь 8.

Ирмос: Чу́да преесте́ственнаго росода́тельная изобрази́ пе́щь о́браз: не бо́, я́же прия́т, пали́т ю́ныя, я́ко ниже́ о́гнь Божества́ — Де́вы, в Ню́же вни́де утро́бу. Те́м, воспева́юще, воспое́м: да благослови́т тва́рь вся́ Го́спода и превозно́сит во вся́ ве́ки.

Припев: Преподобномучениче Анастасие, моли Бога о нас.

От земли́ ты́ к небесе́м венцено́сец, му́чениче Анаста́сие, возлете́л еси́, ле́сти вся́кия де́монския избе́г, и попра́л еси́ и́дольская чти́лища. Те́мже и зове́ши ны́не, ра́дуяся: да благослови́т тва́рь вся́ Го́спода и превозно́сит во вся́ ве́ки.

Припев: Преподобномучениче Анастасие, моли Бога о нас.

Омочи́л еси́ му́ченическими твои́ми кровьми́ твою́ оде́жду, пребога́те му́чениче, кре́ст же, я́ко ски́птр, нося́, со Христо́м ца́рствуеши во ве́ки, Анаста́сие, Ему́же ны́не воспева́еши, ра́дуяся: да благослови́т тва́рь вся́ Го́спода и превозно́сит во вся́ ве́ки.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: Арха́нгельскими песносло́вии сла́вимый, Бога́тное Сло́во на́с ра́ди обнища́, Тя́ Ма́терь, добро́ту Иа́ковлю, Благослове́нная, избра́в. Те́мже, воспева́юще, пое́м: да благослови́т тва́рь вся́ Го́спода и превозно́сит во вся́ ве́ки.

Песнь 9

Ирмос: Образ чи́стаго рождества́ Твоего́ огнепали́мая купина́ показа́ неопа́льная; и ны́не на на́с напа́стей свире́пеющую угаси́ти, мо́лимся, пе́щь, да Тя́, Богоро́дице, непреста́нно велича́ем.

Припев: Преподобномучениче Анастасие, моли Бога о нас.

Струя́ми твои́х крове́й, сла́вне, и́дольскую ле́сть всю́ погаси́л еси́, исполне́ние же Це́ркве уясни́л еси́, о не́йже моля́ся, всеизря́днейше, не преста́й Влады́це, да тя́ вси́ блажи́м.

Припев: Преподобномучениче Анастасие, моли Бога о нас.

О, па́че сло́ва сла́вы твоея́ и неизрече́ннаго Боже́ственнаго вои́стинну осия́ния! Его́же причасти́лся еси́ я́ко победи́тель, Анаста́сие, Влады́це Христу́ предстоя́, Его́же и ны́не моли́ о на́с, воспева́ющих тя́.

Сла́ва Отцу́ и Сы́ну и Свято́му Ду́ху и ны́не и при́сно и во ве́ки веко́в. Ами́нь.

Богородичен: О, стра́шнаго Твоего́ чудесе́! Ты́ бо, Де́во Богоро́дице, та́инство, пре́жде родо́в и пре́жде веко́в сокрове́нное в Бо́зе, вся́ созда́вшем, ро́ждши Бо́га Сло́ва несказа́нно, яви́ла еси́.

Свети́лен.

Два́ свети́ла в ми́ре сия́ют светоно́сно, Тимофе́й же вели́кий во Христо́вых апо́столех и Анаста́сий му́ченик во единообра́зных, и́хже восхва́лим вку́пе.

Сла́ва, и ны́не, Богородичен:

Вси́ ве́рнии, Тя́ Хода́таицу ко из Тебе́ ны́не Ро́ждшемуся предлага́ем, Пресвята́я, мы́ же лу́чшаго ра́ди сраспина́емся Сему́. Те́мже не преста́й о на́с моля́щи.

Молитва

О святы́й уго́дниче Бо́жий, му́чениче Анаста́сие! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.