3 февраля.

Канон преподобному Максиму Исповеднику.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Правосла́вия наста́вниче, благоче́стия учи́телю и чистоты́, вселе́нныя свети́льниче, мона́шествующих богодухнове́нное удобре́ние, Макси́ме прему́дре, уче́ньми твои́ми вся́ просвети́л еси́, цевни́це духо́вная, моли́ Христа́ Бо́га спасти́ся душа́м на́шим.

Други́й тропа́рь, му́ченика, гла́с 4:

Му́ченик Тво́й, Го́споди, Неофи́т во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н преподо́бнаго, гла́с 8.

Пе́снь 1.

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко Еди́н сла́вно просла́вися.

Припев: Преподобне отче Максиме, моли Бога о нас.

Всю́ мне́ богодухнове́нную от медото́чнаго и сла́дкаго твоего́ иска́пай язы́ка, боже́ственный Макси́ме, благода́ть Ду́ха.

Припев: Преподобне отче Максиме, моли Бога о нас.

Огнь горя́щь яви́лся еси́ на е́реси, блаже́нне: я́ко бо тро́стие, сия́ изнури́л еси́ ре́вностию Ду́ха.

Сла́ва Отцу́ и Сы́ну и Свято́му Ду́ху:

Безслове́сное предложи́ся от злочести́вейшаго произволе́ния единово́льное уче́ние, словесы́ же твои́ми, о́тче, обличи́ся.

И ны́не и при́сно и во ве́ки веко́в. Ами́нь.

Богородичен: Ве́сь жела́ние, из утро́бы Твоея́, Богоневе́сто, благоизво́ливый роди́тися, и Сла́дость е́сть, и Све́т незаходи́мый.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Припев: Преподобне отче Максиме, моли Бога о нас.

Велича́йший Макси́м, благочести́выя Христо́вы ве́ры всеи́стинно пропове́дник же и му́ченик показа́ся кро́вию.

Припев: Преподобне отче Максиме, моли Бога о нас.

Макси́ме блаже́нне, ты́ поще́нием бы́л еси́ боголе́пное любому́дрия и чи́стое жили́ще.

Сла́ва Отцу́ и Сы́ну и Свято́му Ду́ху:

Излия́ язы́к тво́й реку́ Христо́вых уче́ний благоче́стне, Макси́ме всеблаже́нне, прему́дрости пита́тель.

И ны́не и при́сно и во ве́ки веко́в. Ами́нь.

Богородичен: Да стезю́, Влады́ко, ко святы́ни веду́щую, пока́жеши на́м, во утро́бу всесвяту́ю всели́лся еси́.

Конда́к, гла́с 8.

Тро́ицы рачи́теля и вели́каго Макси́ма, науча́юща я́сно ве́ре Боже́ственней, е́же сла́вити Христа́, во дву́ естества́х, во́лях же и де́йствах су́ща, в пе́снех досто́йных, ве́рнии, почти́м, взыва́юще: ра́дуйся, пропове́дниче ве́ры.

Та́же седа́лен, гла́с 5.

Гоне́ния претерпе́в за ве́ру, отгна́л еси́, о́тче, вся́ку е́ресь, отсе́чен же с руко́ю язы́к, Макси́ме, испове́дания благоле́пный от руки́ Творца́ прия́л еси́ вене́ц, блаже́нне. Его́же ны́не непреста́нно моли́ поми́ловатися душа́м на́шим.

Сла́ва, И ны́не, Богородичен:

По Бо́зе в Тво́й, Богоро́дице, прибе́г смире́нный покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́к, и трепе́щу. Моле́ние сотвори́, Чи́стая, к Сы́ну Твоему́ от си́х изба́вити мя́.

КрестоБогородичен:

Из Безнача́льнаго Отца́ рожде́ннаго, напосле́док Тя́ пло́тию Ро́ждшая, на Кресте́ ви́сяща зря́щи, Христе́, — увы́ Мне́, любе́знейший Иису́се! — вопия́ше, — ка́ко сла́вимый я́ко Бо́г от Ангел, от беззако́нных ны́не челове́ков, Сы́не, хотя́, распина́ешися? Пою́ Тя́, Долготерпели́ве.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́ и просла́вих Твое́ Божество́.

Припев: Преподобне отче Максиме, моли Бога о нас.

Земноро́дных тя́ почита́ют, и небе́сных чи́ни чудя́тся, любо́вию бо му́дрости показа́лся еси́, о́тче, я́ко безпло́тен.

Припев: Преподобне отче Максиме, моли Бога о нас.

Суро́в у́бо мучи́тель, но терпе́ние твое́ непрекло́нно, те́м ты́ у́бо ублажи́лся еси́, вселука́вый же изве́ржеся.

Припев: Преподобне отче Максиме, моли Бога о нас.

Состра́ждет тебе́, Макси́ме, ученико́в дво́ица преблаже́нная, твои́м страда́нием приобщи́вшеся, те́мже и по́честей ра́вно получи́ша.

Сла́ва Отцу́ и Сы́ну и Свято́му Ду́ху:

Тече́нием твоея́ кро́ве напая́ема, Це́рковь Христо́ва прозяба́ет оте́ческаго преда́ния Боже́ственное се́мя твои́м уче́нием, преподо́бне.

И ны́не и при́сно и во ве́ки веко́в. Ами́нь.

Богородичен: Изба́вльшеся Рождество́м Твои́м грехо́внаго до́лга, Всенепоро́чная, ра́достное пе́ние возсыла́ем Тебе́, Богоневе́сто.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси Бо́г на́ш, ра́зве Тебе́, ино́го не ве́мы.

Припев: Преподобне отче Максиме, моли Бога о нас.

Ра́зум земноро́дных собра́в и небе́сных, впра́вду филосо́ф имену́ется Макси́м.

Припев: Преподобне отче Максиме, моли Бога о нас.

Прему́дрости безме́рным жела́нием Христа́ твоего́ подо́бник изря́днейший яви́лся еси́, сла́вный Макси́ме.

Сла́ва Отцу́ и Сы́ну и Свято́му Ду́ху:

Гне́вом изгна́н бы́л еси́ мучи́теля, обре́л же еси́, блаже́нне, Иису́са утеше́ние.

И ны́не и при́сно и во ве́ки веко́в. Ами́нь.

Богородичен: Тя́ Богоро́дицу неве́дущии, Богома́ти, Све́та да не у́зрят, ро́ждшагося из Тебе́, Пречи́стая.

Пе́снь 6.

Ирмос: Ри́зу мне́ пода́ждь све́тлу, одея́йся све́том, я́ко ри́зою, многоми́лостиве Христе́ Бо́же на́ш.

Припев: Преподобне отче Максиме, моли Бога о нас.

Непреста́нно прино́сиши Бо́гу, богому́дре, мольбу́, душе́вных же и теле́сных страсте́й и тле́ния мя́ изба́вити.

Припев: Преподобне отче Максиме, моли Бога о нас.

Изсуши́ся ересе́й исто́чник му́тный ве́сь, сла́вне Макси́ме, загражда́емь шу́мом язы́ка твоего́.

Сла́ва Отцу́ и Сы́ну и Свято́му Ду́ху:

Очи́сти мя́, Еди́не Бла́же, и исто́чник благода́ти, Христе́, се́рдцу моему́ Твоего́ преподо́бнаго моли́твами источи́.

И ны́не и при́сно и во ве́ки веко́в. Ами́нь.

Богородичен: Красне́йший па́че все́х челове́к Сы́н Тво́й, Всечи́стая, добро́тою Божества́, а́ще и пло́ть на́с ра́ди бы́сть.

Конда́к, гла́с 6.

Све́т Трисия́нный, все́льшийся в ду́шу твою́, сосу́д избра́н показа́ тя, всеблаже́нне, явля́юща Боже́ственная конце́м, неудобопости́жных разуме́ний ты́ сказу́яй, блаже́нне, и Тро́ицу все́м, Макси́ме, возпропове́дуяй я́сно, Пресу́щную, Безнача́льную.

Икос:

Подража́тель яви́вся Спа́совых страсте́й и Того́ в души́ твое́й име́я, всеблаже́нне, восхожде́ния в се́рдцы твое́м возложи́л еси́, пребога́те. То́й же тебе́ подаде́ благода́ть с небесе́, сопроти́вил бо ся еси́ мучи́телем, му́дре, му́жески, Безнача́льную, и Боже́ственную, и Единосу́щную Тро́ицу пропове́дуя и облича́я злосла́вныя и богобо́рныя. Безчи́сленныя претерпе́л еси́ напа́сти, всехва́льне, язы́ка отре́зание богосло́внаго, преподо́бне, и твоея́ руки́ вку́пе. Не преста́л же еси́ ты́, со дерзнове́нием глаго́ля и утвержда́я ве́рныя боже́ственными твои́ми уче́нии, Тро́ицу все́м лю́дем пропове́дуя я́сно, Пресу́щную, Безнача́льную.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Преподобне отче Максиме, моли Бога о нас.

Еди́но естество́ Тро́ицы, еди́но хоте́ние ре́кл еси́, еди́но де́йство, Бо́га же, вопло́щшагося во двою́ естеству́, хоте́нию же и де́йству пропове́дал еси́. Отце́в на́ших Бо́же, благослове́н еси́.

Припев: Преподобне отче Максиме, моли Бога о нас.

Не во́ли две́ разделя́емыя ра́зума проти́вностию, ка́чеством же па́че пропове́дал еси́, о́тче, есте́ственным ра́знствующия. Отце́в на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Сто́лп правосла́вия боже́ственная твоя́ словеса́, о́тче, держа́ще, Еди́наго от Тро́ицы во дву́х существа́х и во́лях почита́ем. Отце́в на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Юнаго нося́щи Младе́нца, пре́жде все́х веко́в Бо́га, Всенепоро́чная, из Тебе́ вопло́щшагося, не преста́й моля́щи спасти́ пою́щия: отце́в на́ших Бо́же, благослове́н еси́.

Пе́снь 8.

Ирмос: Победи́тели мучи́теля и пла́мене благода́тию Твое́ю бы́вше, за́поведем Твои́м зело́ прилежа́ще, о́троцы вопия́ху: благослови́те, вся́ дела́ Госпо́дня, Го́спода.

Припев: Преподобне отче Максиме, моли Бога о нас.

Весьма́ возлюби́в Превозлюби́вшаго ро́д челове́ческий, кре́ст Тво́й взя́л еси́ и Тому́, блаже́нне, сраспя́лся еси́, — благослови́те, — поя́, — дела́ Госпо́дня, Го́спода.

Припев: Преподобне отче Максиме, моли Бога о нас.

Устрани́вся вся́кия сла́сти, блаже́нне, смертоно́сныя, тебе́ соде́лал еси́ всего́ нескве́рно зерца́ло боже́ственное, поя́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Живоно́сну зарю́ от Еди́наго Божества́ Триипоста́снаго прие́м, яви́лся еси́ су́щим во тме́ со́лнце заблу́ждшим, — благослови́те, — поя́, — вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Жи́зни Тя́ Ма́терь и Бо́га Роди́тельницу позна́вше, правосла́вною ве́рою вси́ блажи́м, Богороди́тельнице, благосло́вяще ку́пно Рождество́ Твое́, Чи́стая, и превознося́ще во ве́ки.

Песнь 9

Ирмос: Проявле́нное на горе́ законополо́жнику во огни́ и купине́, Рождество́ Присноде́вы, в на́ше ве́рных спасе́ние, пе́сньми немо́лчными велича́ем.

Припев: Преподобне отче Максиме, моли Бога о нас.

Еще́ твоя́, я́ко Авелева, кро́вь и во ве́ки богодохнове́нныя догма́ты гла́сом я́сным Христо́ве Це́ркви пропове́дует, Макси́ме всеблаже́нне и превели́кий.

Припев: Преподобне отче Максиме, моли Бога о нас.

Отсече́ся рука́, пи́шет же боже́ственным пе́рстом, я́ко тро́стию и черни́лом, отре́занным язы́ком и твое́ю кро́вию честно́ю ве́ру в сердца́х правосла́вную.

Сла́ва Отцу́ и Сы́ну и Свято́му Ду́ху:

Ста́л еси́ пред престо́лом Боже́ственным с му́ченики, и́хже ре́вности и ве́ры приобщи́лся еси́, о́тче, и на́с усво́й Влады́це и твоя́ подража́тели соде́лай.

И ны́не и при́сно и во ве́ки веко́в. Ами́нь.

Богородичен: Ты́ еси́, Богоро́дице, ору́жие на́ше и стена́, Ты́ еси́ заступле́ние к Тебе́ прибега́ющих, Тя́ и ны́не на моли́тву предлага́ем, да изба́вимся от враго́в на́ших.

Свети́лен.

Труба́ яви́лся еси́ прему́дрости, благогла́сным язы́ком твои́м проти́вных ужаса́я полки́, Макси́ме, све́т мона́шествующих, те́мже, твои́ми пита́ющеся словесы́, ра́зум познава́ем су́щих.

Молитва преподобному Максиму Исповеднику

О, свяще́нная главо́, преподо́бне о́тче, преблаже́нне а́вво Макси́ме! Не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.