2 февраля.

Канон второй преподобному Евфимию Великому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Весели́ся, пусты́ня неражда́ющая, благоду́шествуй, неболя́щая, я́ко умно́жи тебе́ ча́да му́ж жела́ний духо́вных, благоче́стием насади́в, воздержа́нием воспита́в доброде́телей в соверше́нство. Того́ моли́твами, Христе́ Бо́же, умири́ живо́т на́ш.

Велича́ние:

Ублажа́ем тя́, преподо́бне о́тче Евфи́мие, и чте́м святу́ю па́мять твою́, наста́вниче мона́хов и собесе́дниче Ангелов.

Други́й кано́н преподо́бнаго, гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Преподобне отче Евфимие, моли Бога о нас.

Моли́твами твои́ми и мольба́ми умоля́й Бо́га, мра́чный о́блак уны́ния моего́, всеблаже́нне, разори́, благоду́шия сы́й и утеше́ния испо́лнен, Всецарю́ предстоя́.

Припев: Преподобне отче Евфимие, моли Бога о нас.

Ин не́кий но́вый Самуи́л, богода́нен и пре́жде зача́тия обеща́н бы́в, о́тче, все́м яви́лся еси́ Це́рквам, преподо́бне, тезоиме́нно зва́ние, по обоему́ приводи́мь быва́я благоду́шия све́тлостию.

Припев: Преподобне отче Евфимие, моли Бога о нас.

Моли́твы и моле́ния де́юще твои́ роди́телие к Бо́гу, да́р Боже́ственный тя́ прие́млют и светоно́сно прозябе́ние, рождество́м возвеща́юща благоче́стия осия́ние и е́реси обличе́ние.

Сла́ва Отцу́ и Сы́ну и Свято́му Ду́ху:

Ты́ из де́тства освяти́лся еси́, преподо́бне, да́вшему Бо́гу и, к Нему́ зря́ и наставля́емь животво́рными повеле́ньми Его́, богоно́се, к высоте́ взя́лся еси́ превысо́цей доброде́телей ве́рою.

И ны́не и при́сно и во ве́ки веко́в. Ами́нь.

Богородичен: Тя́, Богома́ти, предста́тельство иму́ще, не убои́мся враго́в ополче́ния, сопроти́вящихся благоче́стно сла́вящим из Тебе́ рожде́ннаго Бо́га все́х и Го́спода, Его́же за ны́ умоли́.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т, па́че Тебе́, Еди́не Человеколю́бче.

Припев: Преподобне отче Евфимие, моли Бога о нас.

От непло́дныя ро́ждся, духо́внаго благопло́дия земледе́латель многоро́днейший яви́лся еси́, те́рние посека́я нече́стия, преподо́бне, и благоче́стия се́мя Боже́ственно вмета́я.

Припев: Преподобне отче Евфимие, моли Бога о нас.

Священнодействи́телен преесте́ственных и та́инственных зре́ний, богоно́се, бы́в, неве́рныя приводя́ Христу́, боголе́пно ве́рующия, уче́нии твои́ми, о́тче, науча́емыя лу́чшим.

Припев: Преподобне отче Евфимие, моли Бога о нас.

Целому́дреннейшим по́мыслом и благочести́вым одержи́мь, теку́щих и тле́емых а́бие ве́чную жи́знь и сла́дость предызбра́л еси́, воздержа́нием кра́йним пло́ть умертви́в, Евфи́мие.

Сла́ва Отцу́ и Сы́ну и Свято́му Ду́ху:

Огнепа́льною душе́ю и уя́звленною любо́вию Христо́вою, огнепа́льных лови́тв де́монских избе́г, росода́тельною благода́тию просвети́лся еси́, о́тче, знаменоно́сец бы́в.

И ны́не и при́сно и во ве́ки веко́в. Ами́нь.

Богородичен: Рече́ния Боже́ственных проро́ков и те́х проро́чествия запеча́тала еси́, ро́ждши Сло́во, глаго́лющее чрез те́х, и те́х испо́лнившая богоглаго́лания вся́, Благослове́нная, Всенепоро́чная.

Седа́лен, гла́с 8.

Воздержа́ния еле́ем душе́вную испо́лнил еси́ лампа́ду духо́вне, жела́я присносве́тлое Жениха́ твоего́ прише́ствие, моли́твами бо́дренными соблю́л еси́, преподо́бне, и в черто́зе Сего́ весели́шися, блаже́нне. Те́мже досто́йно сла́дость прия́л еси́, и́стинно присноживо́тное чуде́с де́йствие, богоно́се Евфи́мие. Моли́ Христа́ Бо́га прегреше́ний оставле́ние дарова́ти пра́зднующим любо́вию святу́ю па́мять твою́.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча и на́шу нищету́ посети́в. Те́м с проро́ком Авваку́мом зову́ Ти́: си́ле Твое́й сла́ва, Человеколю́бче.

Припев: Преподобне отче Евфимие, моли Бога о нас.

Всего́ себе́, о́тче, Бо́гу освяти́л еси́, безсме́ртныя сла́вы жела́я, и к Нему́ поте́кл еси́ те́пле жи́тельством непоро́чным, и воздержа́нием, и жития́ све́тлостию, непреста́нно взыва́я: си́ле Твое́й сла́ва, Человеколю́бче.

Припев: Преподобне отче Евфимие, моли Бога о нас.

Ты́, Исто́чник, преподо́бне, благосты́ни возлюби́в все́ю си́лою, по́стником бы́л еси́, исто́чник Боже́ственных дарова́ний, жа́ждущия сия́ исцеля́я: исто́чники бо, я́коже дре́вле Моисе́й в пусты́ни, пресла́вно, всеблаже́нне, источи́л еси́.

Припев: Преподобне отче Евфимие, моли Бога о нас.

Яви́вся от незаходи́мых Ду́ха, рабы́нина ча́да свободи́л еси́, сы́ны Бо́жия достоле́пны сия́ обновля́я сыноположе́ния креще́нием: боже́ственнаго бо Предте́чи подража́в житие́, крести́тель показа́лся еси́, Евфи́мие.

Сла́ва Отцу́ и Сы́ну и Свято́му Ду́ху:

От Бо́га благода́тию просвеща́емь, неве́дущим позна́лся еси́, Евфи́мие: не подоба́ше бо твое́й доброде́тели вои́стинну в пусты́нях таи́тися и покрыва́тися. Те́мже тя́, светоно́сна я́ко свети́льника все́м, Влады́ка все́х показа́.

И ны́не и при́сно и во ве́ки веко́в. Ами́нь.

Богородичен: Ра́дуйся, Честна́я, ра́дуйся, Де́во Всечи́стая; ра́дуйся, горо́, благода́тию приосене́нная; ра́дуйся, ски́ние; ра́дуйся, киво́те; ра́дуйся, све́щниче, све́т боже́ственный нося́щая, ра́дости бо неизрече́нныя и ду́ш весе́лия ве́рным хода́таица была́ еси́.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и к све́ту за́поведей Твои́х пути́ моя́ напра́ви, молю́ся.

Припев: Преподобне отче Евфимие, моли Бога о нас.

По́стников благоче́стия на небе́сную стезю́, Евфи́мие, предводи́л еси́, о́тче, и к насле́дию неги́блющему в вы́шняя возводя́й, сто́лп о́гненный же и о́блак, явля́емь заре́ю Ду́ха.

Припев: Преподобне отче Евфимие, моли Бога о нас.

Врача́ боля́щим, зело́ ми́лостивна, ми́ру дарова́ тя Христо́с, о́тче, и пита́теля а́лчущим пресла́вна, наказа́теля несмы́сленным, целомудри́теля неразумева́ющим, сирота́м и ни́щим засту́пника.

Припев: Преподобне отче Евфимие, моли Бога о нас.

Сострада́телен, ми́лостив, нра́в смиренному́дрый нося́, бы́л еси́, страсте́й отсека́я вины́ боже́ственными уче́нии, и умудря́я, о́тче, и наказу́я ученики́ твоя́, и ду́ш исцеля́я неду́ги.

Сла́ва Отцу́ и Сы́ну и Свято́му Ду́ху:

Всю́ду лучи́ испуща́я чуде́с твои́х, вся́ просвети́л еси́ и, я́коже магни́т, привле́кл еси́ к твои́м уче́нием, назида́я нра́вы и ду́ш зало́ги, проходя́ души́ чистото́ю.

И ны́не и при́сно и во ве́ки веко́в. Ами́нь.

Богородичен: Истинную Богоро́дицу, вси́ Тя́ пропове́дуем, Богоблаже́нная, Твои́м Рождество́м тле́ннаго изба́вльшиися рождества́ и к лу́чшей па́ки жи́зни воззва́ни бы́вше за милосе́рдие ми́лости Бо́га на́шего.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Преподобне отче Евфимие, моли Бога о нас.

Велича́йшую от Бо́га вла́сть прие́м, мно́жества вражде́бных де́монов отгна́л еси́, си́х стропо́тства исцеля́я вся́, ве́рою к тебе́ притека́ющия.

Припев: Преподобне отче Евфимие, моли Бога о нас.

Блаже́н и́стинно бы́л еси́, о́тче Евфи́мие, нищету́ богатотво́рную и пла́чь ра́достен стяжа́в, преподо́бне, и́миже Ца́рство небе́сное насле́довал еси́.

Сла́ва Отцу́ и Сы́ну и Свято́му Ду́ху:

Отри́нул еси́ су́щую на земли́ че́сть и сла́ву удобоувяда́емую, присносу́щную же жи́знь и насле́дие нетле́нное, всеблаже́нне, восприя́л еси́, в се́лех небе́сных всели́вся изве́стнейше.

И ны́не и при́сно и во ве́ки веко́в. Ами́нь.

Богородичен: Госпожу́ Тя́ вся́ческих и Влады́чицу имену́ем: вои́стинну бо Су́щаго Бо́га неизрече́нно родила́ еси́, вся́ Сотво́ршаго, и Содержа́щаго, и Объе́млющаго, Всенепоро́чная.

Конда́к, гла́с 8.

В честне́м рождестве́ твое́м ра́дость тва́рь обре́те и в боже́ственней па́мяти твое́й, преподо́бне, благоду́шие прия́т мно́гих твои́х чуде́с, от ни́хже пода́ждь бога́тно в ду́ши на́ша и очи́сти грехо́в скве́рны, я́ко да пое́м: Аллилу́ия.

Икос:

От ле́ностнаго се́рдца хвале́ние ка́ко принесу́, окая́нный, — ужаса́юся, — и воспою́ вели́каго Евфи́мия? Но, сего́ наде́явся мольба́м, благоду́шием и тща́нием мно́зем пе́снь начну́, и все́м изреку́ того́ житие́ и рожде́ние, и ка́ко сего́ роди́телие поя́ху Бо́гу: Аллилу́ия.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Преподобне отче Евфимие, моли Бога о нас.

Поще́ния три́знище, святы́ни, о́тче, обуче́ние твое́ показа́л еси́ житие́, воздержа́нием кра́йним со безпло́тными соединя́яся, зовы́й, Евфи́мие: благослове́н Бо́г оте́ц на́ших.

Припев: Преподобне отче Евфимие, моли Бога о нас.

Ору́жие тя́ обою́ду остро́ Христо́с показа́, враго́в сердца́ и де́монов закала́ющее полки́ и пою́щих ду́ши обвеселя́ющее: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Све́та насыща́яся Трисо́лнечнаго, о́тче, све́т вторы́й, прича́стием пе́рваго сообразова́н, яви́лся еси́, Евфи́мие, зари́ испуща́я пою́щим: благослове́н Бо́г оте́ц на́ших.

И ны́не и при́сно и во ве́ки веко́в. Ами́нь.

Богородичен: Яко у́тро, возсия́ла еси́, пра́вды Со́лнца иму́щи, от тмы́ неве́дения ми́р очища́юща богоразу́мия заре́ю, Ему́же пое́м: благослове́н Бо́г оте́ц на́ших.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Евфимие, моли Бога о нас.

Крепча́йшее стяжа́в жи́тельство, всеблаже́нне, к высоча́йшему зре́нию дости́гл еси́, прия́телище бы́в вмести́тельное Ду́ха Животво́рнаго и отту́ду бога́тно теку́щих дарова́ний, поя́ непреста́нно: лю́дие, превозноси́те Его́ во ве́ки.

Припев: Преподобне отче Евфимие, моли Бога о нас.

Пресели́вся, дости́гл еси́ Сио́на краегра́дие, в ве́чныя же оби́тели доше́л еси́ и, насле́дие небе́сное от твои́х боле́зней обре́т, со Ангельскими ликостоя́нии пое́ши: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Преподобне отче Евфимие, моли Бога о нас.

Всесве́тел, я́ко со́лнце, пусты́ни просвети́л еси́, темнозра́чныя отгна́л еси́ де́моны и сто́лп всесве́тлый небодося́жущий бы́л еси́, чудотво́рными сия́нии блиста́яй, непреста́нно взыва́я Влады́це: свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Свяще́ннейшими дея́ньми жития́ украша́емь, нача́льнейшую доброде́тель испра́вил еси́, уче́ний пра́востию све́тел бы́в, и богосло́вия изве́стнаго сказа́тель, вопия́ непреста́нно: свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Неве́сто Бо́жия Всенепоро́чная, к Тебе́ прибега́ющия плене́ния страсте́й исхи́ти и самовла́стную свобо́ду, Влады́чице, правосла́вных Це́рквам пода́ждь, ве́рою песнопою́щим: свяще́нницы, воспо́йте, лю́дие, превозноси́те во вся́ ве́ки.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Преподобне отче Евфимие, моли Бога о нас.

Сказа́ Христо́с тебе́, е́же к Нему́ многорачи́тельное, о́тче, разреше́ние, я́коже Моисе́ю дре́вле богови́дцу, ему́же подо́бник доброде́телию бы́в, расто́ргнул еси́ мо́ре страсте́й, преше́л еси́ невозбра́нно к земли́ обетова́ния, проти́вныя победи́в.

Припев: Преподобне отче Евфимие, моли Бога о нас.

Преста́вился еси́, я́ко Илия́ ревни́тель, доброде́телей е́здя колесни́цею к небеси́, иде́же жи́тельство я́ве твое́ написа́ся, преподо́бне, и ны́не Влады́це предстоя́, помина́й ве́рою соверша́ющия па́мять твою́ светоно́сную и всесвяще́нную.

Припев: Преподобне отче Евфимие, моли Бога о нас.

Житие́ твое́, всеблаже́нне, Ангельское, и жи́знь твоя́, богому́дре, пресве́тла, душа́ же светови́днейшая богови́дна, и благочести́ва ве́ра твоя́, Боже́ственных бо догма́тов сказа́тель бы́л еси́, богоно́се, и пропове́дник правосла́внаго уче́ния яви́лся еси́.

Сла́ва Отцу́ и Сы́ну и Свято́му Ду́ху:

Моле́бника тя́ и моли́твенника, к Бо́гу моля́щася, о́тче, проще́ние грехо́в и долго́в мои́х отсече́ния прося́ща, Боже́ственныя принужда́юща щедро́ты, предлага́ю усе́рдно наде́жди, моли́твою твое́ю, богому́дре, утвержда́емь.

И ны́не и при́сно и во ве́ки веко́в. Ами́нь.

Богородичен: Спаси́тельный бу́ди мне́ сто́лп, Чи́стая, де́монским возбраня́ющь полко́м, и напа́стей молву́ и бе́д отгоня́ющь, и страсте́й наше́ствие дале́че прогоня́ющь, и чи́сту дая́й свобо́ду, и Боже́ственных дарова́ний оби́льство да́руяй.

Свети́лен.

Из ложе́сн освяти́ тя Бо́г, о́тче преподо́бне, я́ко Иереми́ю дре́вле и Самуи́ла, богоно́се, проро́ка боже́ственнаго показа́в тя́, чудоде́йственне Евфи́мие, Ангелов единосе́льниче, с ни́миже помина́й вся́, тя́ ве́рно воспева́ющия.

Сла́ва, и ны́не, Богородичен:

Госпо́дьственно Богоро́дицу Тя́ испове́дуем, Влады́чице, Тебе́ ра́ди спа́сшиися, и́бо Бо́га неизрече́нно родила́ еси́, разори́вшаго Кресто́м сме́рть и к Себе́ привле́кши преподо́бных собо́ры, с ни́миже Тя́ восхваля́ем, Де́во.

Стихи́ры, гла́с 8.

Преподо́бне о́тче Евфи́мие, / оста́вив я́же на земли́, / Христу́ после́довал еси́, / не предпоче́т, сла́вне, тле́нных па́че бу́дущих. / В пусты́ни, я́коже во гра́де, живы́й, / де́монския полки́ погуби́л еси́. / О, кто́ возмо́гл бы изрещи́, присносла́вне, / твоея́ души́ вои́стинну теплоту́, / я́же ко Го́споду?

Преподо́бне о́тче Евфи́мие, / ты́ показа́лся еси́ пра́вило мона́шествующих и похвала́, / правосла́вных услажде́ние / и све́тлый вселе́нныя свети́льник, / ле́стнаго бо врага́ не ужа́слся еси́ страхова́ний, / в пеще́ре живы́й. / О, дарова́ния, су́щаго в тебе́, блаже́нне! / Имже я́ве / вся́ку попра́л еси́ де́монов бро́вь.

Преподо́бне о́тче Евфи́мие, / ты́ вои́стинну к Бо́гу / ду́шу впери́л еси́, / и поще́нием, свя́те, чу́вства очи́стив, / и непреста́нными моли́твами, всеблаже́нне, / безсме́ртныя жи́зни сподо́бился еси́. / О, удобре́ние по́стников пресла́вне! / Тя́ бо Христо́с, ра́дуяся, прия́т / в невеще́ственныя оби́тели.

Сла́ва, гла́с то́йже:

Мона́хов мно́жества, наста́вника тя́ почита́ем, о́тче на́ш Евфи́мие, твое́ю бо стезе́ю вои́стинну пра́во ходи́ти позна́хом. Блаже́н еси́, Христу́ рабо́тав, и вра́жию обличи́л еси́ си́лу, Ангелов собесе́дниче, преподо́бных соприча́стниче и пра́ведных, с ни́миже моли́ся Го́сподеви поми́ловатися душа́м на́шим.

И ны́не:

Влады́чице, приими́ моли́твы ра́б Твои́х и изба́ви на́с от вся́кия ну́жды и печа́ли.

Молитва

Дивный и преславный угодниче Христов, великий отче Евфимие, от святаго чертога, идеже ты со всеми святыми ликуеши, призри на нас, во мраце жития сего сущих, и научи ны презирати вся, яже в мире нарицаются благая. Научи нас любити ближния своя, терпети обиды и поношения, скорби и болезни, в смирении благодаряще Бога. Научи нас молитися и каятися во гресех своих, очиститися нам от всякия скверны. Умоли Господа, Емуже послужил еси от юности своея даже до старости маститей, да сподобимся и мы, рабы неключимии, со светильники горящими усрести Жениха Христа и с Ним внити в чертог украшенный Царствия Его. Аминь.