26 февраля.
Канон преподобному Мартиниану Кесарийскому (Палестинскому).
![Преподобному Мартиниану Кесарийскому (Палестинскому) Преподобному Мартиниану Кесарийскому (Палестинскому)](img_i/066.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 8:
Пла́мень искуше́ний сле́з тече́ньми погаси́л еси́, блаже́нне, и, морска́я волне́ния, и звере́й стремле́ния обузда́вый, взыва́л еси́: препросла́влен еси́, Всеси́льне, огня́ и бу́ри спасы́й мя́.
Кано́н, гла́с 2.
Пе́снь 1.
Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.
Припев: Преподобне отче Мартиниане, моли Бога о нас.
Та́йными пе́сньми согла́сно, прииди́те, восхва́лим по́стника благоче́стия дне́сь, Мартиниа́на, ве́рно, я́ко до́бре и зако́нно пости́вшася, те́мже и побе́ды прия́т от Христа́ вене́ц.
Припев: Преподобне отче Мартиниане, моли Бога о нас.
Неукло́нно стра́хом Христо́вым, о́тче, огражда́ем, стра́ха вра́жия, я́коже мо́лния, отгна́л еси́, стра́шен бо бы́л еси́ на ни́х терпе́нием воздержа́ния и мечта́ньми непоколеби́мь пребы́л еси́, прехва́льне.
Сла́ва Отцу́ и Сы́ну и Свято́му Ду́ху:
Спаси́тельною си́лою Христо́вою искуше́ние тебе́ де́монское наше́дшее удо́бь ми́мо тече́, жены́ наи́тие, преподо́бне, ю́же спасы́й, уязви́л еси́ сея́ ра́ди злонача́льника.
И ны́не и при́сно и во ве́ки веко́в. Ами́нь.
Богородичен: Во чре́ве поноси́вши без му́жа, Чи́стая, и Де́ва же Ма́ти в жена́х еси́ нетле́нна, Ду́хом Святы́м Сы́на Бо́жия заче́нши во утро́бе, Его́же по благоволе́нию Отца́ родила́ еси́ без се́мене.
Пе́снь 3.
Ирмос: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Припев: Преподобне отче Мартиниане, моли Бога о нас.
Пло́ти воздержа́нием отмы́л еси́ ме́рзости зло́бу, я́коже ти́ну, и обре́л еси́ чистото́ю ума́ стези́, преподо́бне, пра́ведных, гла́дких путе́й отбе́г грехо́вных, му́дре.
Припев: Преподобне отче Мартиниане, моли Бога о нас.
Вжили́в се́рдце твое́ и разже́г стра́хом и любо́вию Госпо́днею, пло́ть твою́ опали́л еси́ во́лею огне́м веще́ственным, му́дре, си́м пропису́я на́м гее́нны, преподо́бне, негаси́мый о́гнь.
Сла́ва Отцу́ и Сы́ну и Свято́му Ду́ху:
Ураня́я твое́ те́ло огне́м всеяду́щим, гони́тель яви́лся еси́ и вене́чник, уязвля́я супоста́та терпе́нием, очища́я же помышле́ний скве́рну, преподо́бне, и убеля́я ду́хом, и де́вствуя пло́тию.
И ны́не и при́сно и во ве́ки веко́в. Ами́нь.
Богородичен: Зача́тие неискусому́жно, Боже́ственное Рожде́ние несказа́нно, па́че ума́ бо, Бо́г же, ражда́емый вы́ше естества́. О, Рождества́ Твоего́! О, чистоты́ Твоея́! Тобо́ю бо яви́ся мне́ Бо́г в ра́бии о́бразе.
Седа́лен, гла́с 4.
Преподо́бный Тво́й, Го́споди, в поще́нии свое́м по́двиги показу́я усе́рдием мно́гим, Христе́ Бо́же на́ш, име́я бо кре́пость Твою́, преоби́дяше бе́сы, посече́ сло́вом некре́пкую горды́ню. Те́мже Тя́ мо́лим: спаси́ ду́ши на́ша.
Сла́ва, и ны́не, богоро́дичен.
Де́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.
Пе́снь 4.
Ирмос: Прише́л еси́ от Де́вы не хода́тай, ни Ангел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти́: сла́ва си́ле Твое́й, Го́споди.
Припев: Преподобне отче Мартиниане, моли Бога о нас.
Умертви́ся томи́теля ле́сти обре́тение и побежде́ние прия́т, ея́же бо ра́ди победи́ти наде́яшеся, се́ю низложи́ся и попира́ется до́бле нога́ми кре́пко.
Припев: Преподобне отче Мартиниане, моли Бога о нас.
Претерпе́л еси́ до́блественным нра́вом Го́спода, стези́ упра́вил еси́ и на ка́мень всели́лся еси́, преподо́бне, без покро́ва лежа́щ, я́ко на не́бо, возше́д в ма́лый о́стров.
Сла́ва Отцу́ и Сы́ну и Свято́му Ду́ху:
До́блественнеи и кра́снии твои́ но́зе, прехва́льне, к тече́нию просте́рл еси́, от страны́ в страну́ преходя́: бежа́л бо от гра́да страсте́й и в безстра́стие дости́гл еси́.
И ны́не и при́сно и во ве́ки веко́в. Ами́нь.
Богородичен: Пребыла́ еси́ по Рождестве́ Де́ва, Препе́тая, Бо́г бо Безнача́льный яви́ся, из Тебе́ проходя́, Ему́же вчелове́чшуся, подо́бия о́браз целу́ем.
Пе́снь 5
Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.
Припев: Преподобне отче Мартиниане, моли Бога о нас.
Две́рь обре́т доброде́тели, кова́рство врага́, преподо́бне, яви́лся еси́ и жи́зни мое́й предста́тель, души́ же наста́вник, погруже́нней лю́те бу́рею.
Сла́ва Отцу́ и Сы́ну и Свято́му Ду́ху:
Да́р Бо́жий я́ко прия́т моли́тв твои́х кре́пость, вся́ соверша́еши, му́дре, пресла́вно, и спаса́еши от глубины́, и от бу́ри избавля́еши страсте́й ду́ши на́ша.
И ны́не и при́сно и во ве́ки веко́в. Ами́нь.
Богородичен: Во двою́ естеству́ и Ипоста́си еди́ной бы́л еси́ и соверше́н Сы́й Челове́к. Несме́шен о́браз или́ зра́к не пострада́, Сло́ве, воплоща́яся, Го́споди.
Пе́снь 6.
Ирмос: Ко Го́споду от ки́та Ио́на возопи́: Ты́ мя возведи́ из глубины́ а́да, молю́ся, да я́ко Изба́вителю, во гла́се хвале́ния, и́стины же ду́хом пожру́ Тебе́.
Припев: Преподобне отче Мартиниане, моли Бога о нас.
Си́лою Бо́жиею укре́пль твою́ ду́шу, прехва́льне, не ужа́слся еси́, наде́ждею огражда́емь, непрепла́ваему глубину́, му́дре, преити́, но спасе́ся, дельфи́нми носи́мь.
Припев: Преподобне отче Мартиниане, моли Бога о нас.
Житие́ твое́ Ангелы и́стинно удиви́, де́моны посрами́ и челове́ки просвети́, и жену́ па́че спа́сл еси́, и на стезю́ поще́ния привле́кл еси́.
Сла́ва Отцу́ и Сы́ну и Свято́му Ду́ху:
Подо́бие твои́м трудо́м и честны́м подвиго́м, му́дре, твое́ преи́тие по достоя́нию и́стинно бы́сть, и взя́т на враги́ целому́дрия побе́ду, воздержа́нием зми́я уби́в.
И ны́не и при́сно и во ве́ки веко́в. Ами́нь.
Богородичен: Зако́ны о Тебе́ изнемого́ша вои́стинну естества́, Де́во Чи́стая, де́вствуеши бо, ро́ждши сопресто́льна Отцу́ и Боже́ственному Ду́ху Сло́во су́ща, Бо́га же и Челове́ка.
Конда́к, гла́с 2.
Яко подви́жника благоче́стия иску́сна, и страда́льца произволе́нием честна́го, и пусты́ни жи́теля и все́льника, в пе́снех досто́йно восхва́лим Мартиниа́на присночестна́го: то́й бо зми́я попра́.
Икос:
От коне́ц да́же до коне́ц про́йде веща́ние кра́сных доброде́телей и боже́ственных по́двиг твои́х: мла́д сы́й во́зрастом, в пусты́нях возжела́л еси́ пожи́ти, пе́ния Христу́, псалмы́ и моли́твы воспуща́я при́сно, де́нь же и но́щь возраста́я в боле́знех и слеза́х, чи́сте житие́ твое́ сконча́л еси́ и, му́дре, злонача́льнаго посрами́л еси́, ты́ бо зми́я попра́л еси́.
Пе́снь 7.
Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.
Припев: Преподобне отче Мартиниане, моли Бога о нас.
Ве́щнаго жития́ уста́вль себе́, мона́шествуй, бе́гай кре́пко, гра́ды вся́ и страны́ обходи́, я́ко досто́йно, Мартиниа́н бо учи́т без печа́ли пе́ти: благослове́н Бо́г оте́ц на́ших.
Припев: Преподобне отче Мартиниане, моли Бога о нас.
Тве́рдым хожде́нием Па́влову бы́л еси́, му́дре, ше́ствию о́браз, любо́вию гоня́, его́же пости́гл еси́ воздержа́ния тече́нием твои́м, те́мже и, я́ко стра́нен ми́ра, позна́лся еси́, прехва́льне, Царю́ Небе́сному и просла́вился еси́ ве́рно.
Сла́ва Отцу́ и Сы́ну и Свято́му Ду́ху:
Тече́ние скончава́я поще́ния твоего́, учени́к Христо́в, Ду́хом Боже́ственным проуве́дев отше́ствие е́же от те́ла, поя́ше душе́ю несомне́нною: я́ко в ру́це Твои́, Влады́ко, ду́х мо́й и ду́шу мою́ ны́не предаю́.
И ны́не и при́сно и во ве́ки веко́в. Ами́нь.
Богородичен: Во́ду жи́ву подая́, от исто́чника Христо́с источи́, в Твою́ святу́ю, Пресла́вная, утро́бу всели́ся, пребы́в неслия́нен, все́х нетле́ния напои́в, ве́рою зову́щих: благослове́нна еси́, Бо́га пло́тию ро́ждши.
Пе́снь 8.
Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́, я́ко Го́спода, и превозноси́те во вся́ ве́ки.
Припев: Преподобне отче Мартиниане, моли Бога о нас.
Совле́кшися чу́вственне плотски́я немощны́я ри́зы и му́жества взе́мши оде́жду и ра́зум, отрокови́ца вопия́ше, постя́щися: Тя́ превозноша́ю, Иису́се, во ве́ки вся́.
Припев: Преподобне отче Мартиниане, моли Бога о нас.
Ра́дуется усе́рдно, вои́стинну на ка́мени Христо́ве утвержде́на и посто́м и ве́рою вооружи́вшися кре́пко, отрокови́ца вопия́ше в пе́снех: Тя́ превозноша́ю, Иису́се, во ве́ки.
Сла́ва Отцу́ и Сы́ну и Свято́му Ду́ху:
Яко преложе́н от тле́нных и вы́шняго нетле́ния прича́стник бы́в, богоно́се, и боже́ственное тече́ние сконча́в, вене́ц прие́м, вопия́л еси́: Тя́ превозноша́ю, Иису́се, во ве́ки.
И ны́не и при́сно и во ве́ки веко́в. Ами́нь.
Богородичен: Сше́дый с небесе́ за милосе́рдие, Ще́дре, Бо́же вся́ческих, и ро́ждься от Де́вы, спаси́ пою́щия: по́йте, вся́ дела́, Го́спода и превозноси́те Его́ во ве́ки.
Песнь 9
Ирмос: Что́ о Тебе́ ве́лия и пресла́вная та́йна, Ада́мова дщи́ и Вы́шняго Ма́ти, Еди́ный к Бо́гу небла́зненный ве́рных мо́ст? Тя́ немо́лчными пе́сньми, ве́рнии, Богоро́дицу велича́ем.
Припев: Преподобне отче Мартиниане, моли Бога о нас.
Зако́ны превозше́д, о́тче, поще́ния, просия́л еси́, в воздержа́нии вся́цем и моли́тве бдя́, посто́м же, вку́пе и чистото́ю, и гове́нием. Те́мже тво́й Венча́тель при кончи́не страда́ний тя́ пропове́дует — Христо́с.
Сла́ва Отцу́ и Сы́ну и Свято́му Ду́ху:
Досто́ин Бо́гу яви́вся, я́ко до́бре подви́глся еси́, вся́ко бо бре́мя отве́рг, ле́гко преплы́л еси́, о́тче, вели́кую и тя́жкую жития́ сего́ пучи́ну и прише́л еси́ в приста́нище ти́хо, преше́д твое́ тече́ние, му́дре.
И ны́не и при́сно и во ве́ки веко́в. Ами́нь.
Богородичен: Ты́ еси́ и́стинно, Еди́на Богоро́дице Присноде́во, христиа́н направле́ние, гре́шников Предста́тельница, из Тебе́ бо благоче́стно возсия́ Избавле́ние. С Ни́мже Тебе́ по до́лгу в ве́ре пе́снь скончава́ю.
Свети́лен.
Ангельскаго жития́ жела́я, удали́л еси́ себе́ в пусты́нях и, стра́сти покори́в пло́ти, равноа́нгелен яви́лся еси́, Мартиниа́не богоно́се.
Богоро́дичен.
Гора́, ю́же предви́де дре́вле боже́ственный Авваку́м, присе́нна, часта́, Ты́ яви́лася еси́, Де́во, и Тя́ Дави́д имену́ет усыре́ну и ту́чну.
Молитва преподобному Мартиниану Кесарийскому (Палестинскому)
О, свяще́нная главо́, преподо́бне о́тче, преблаже́нне а́вво Мартиниа́не! Не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стре́л вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными си́лами, у Престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Преподобному Мартиниану Кесарийскому (Палестинскому) Преподобному Мартиниану Кесарийскому (Палестинскому)](img_b/066.jpg)