24 февраля.

Канон второй благоверному князю Всеволоду Псковскому (в крещении Гавриилу)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 4-й:

Из мла́да яви́лся еси́, Богому́дре кня́же Гаврии́ле,/ Боже́ственный сосу́д, избра́н Богови,/ благоче́стием воспита́н, ве́ру непоро́чну соблю́д/ и мно́ги святы́я це́ркви устро́ив,/ изгна́ние претерпе́л еси́ от свои́х,/ я́коже и целому́дрии прароди́тели твои́ от бра́та убие́ние./ С ни́миже предстоя́ Святе́й Тро́ице,/ моли́ся, стране́ на́шей сохране́нной бы́ти/ и всем нам спасти́ся.

Канон иной, глас 4-й

Песнь 1

Ирмос: Несть Тебе́ подо́бен препросла́вленный Го́споди:/ руко́ю бо кре́пкою изба́вил еси́ лю́ди,/ я́же стяжа́л еси́, Человеколю́бче.

Припев: Благоверне княже Всеволоде, моли́ Бо́га о нас.

Несмь подо́бен, ка́ко воспе́ти от ча́сти/ Небе́сному Воево́де тезоимени́таго вели́каго кня́зя Все́волода,/ возсия́вша в словя́нех насе́льшихся,/ иде́же первозва́нный во апо́столех жезл водрузи́.

Припев: Благоверне княже Всеволоде, моли́ Бо́га о нас.

В ле́та вели́каго кня́зя Влади́мира ца́рскою диади́мою от Монома́ха че́стно почте́н, возсия́в,/ пе́рвому же вели́кому Влади́миру подража́в,/ я́ко от ко́рене их честна́ ветвь изра́сл еси́.

Слава: Царя́ Небе́снаго, сла́вима в Тро́ице,/ из мла́да яви́лся еси́ сосу́д чист и непоро́чен./ Ему́же ны́не предстоя́ дерзнове́нно,/ о нас помоли́ся, блаже́нне кня́же Гаврии́ле.

И ныне: Чи́стую Тя и непоро́чную Арха́нгел Гаврии́л я́ко узре́,/ ра́дуйся, Тебе́, Влады́чице, све́тло возопи́, Неискусобра́чная,/ челове́ком спасе́ние, князе́м и царе́м похвала́ и честносло́вие.

Песнь 3

Ирмос: Не му́дростию, и си́лою, и бога́тством хва́лимся,/ но Тобо́ю, О́тчею Ипоста́сною му́дростию, Христе́:/ несть бо свят, па́че Тебе́,/ Человеколю́бче.

Припев: Благоверне княже Всеволоде, моли́ Бо́га о нас.

Сла́внаго страстоте́рпца Гео́ргия храм и оби́тель прече́стну со блаже́нным Кириа́ком воздви́гл еси́,/ и в ней мно́жество и́нок о тебе́, Богому́дре, хва́лятся/ и мольбу́ Богови прино́сят.

Припев: Благоверне княже Всеволоде, моли́ Бо́га о нас.

Бори́са, целому́драго прароди́теля своего́, поревнова́в,/ зако́нное сочета́ние, я́коже вели́кий Моисе́й и Иса́йя име́ста, Боговиде́ния сподо́бистася,/ терпе́нием до конца́ блаже́нство и Бо́жие благослове́ние получи́ша.

Слава: Всея́ Росси́и вели́кая княги́ня Богому́драя О́льга ви́де трисо́лнечныя лучи́, сия́юща на усть Пле́сковы,/ назна́менуя град и храм Пресвяты́я Тро́ицы,/ в нем бо и ты, досточу́дне, чудеса́ соде́я,/ с не́юже о нас моли́ся.

И ныне: Сказу́я е́же дре́вле сокрове́нное та́инство, Отрокови́це,/ Тебе́ иногда́ Гаврии́л, взыва́я:/ ра́дуйся, Бо́жия пала́то,/ в ню́же всели́вся, вся челове́ки обожи́л есть, я́ко Милосе́рд.

Го́споди, поми́луй (трижды).

Седален, глас 3-й

Иму́щи Дух и́стинный, прему́дре,/ и́же в тебе́ пожи́л есть, сосу́д и жили́ще Пресвяте́й Тро́ице соде́ла,/ стро́ити и соблюда́ти церква́м благоле́пие и утвержде́ние./ Сего́ ра́ди и мы, соше́дшеся в па́мять твою́,/ Богому́дре кня́же Гаврии́ле, мо́лим тя:/ Христо́ви моли́ся дарова́ти нам ве́лию ми́лость.

Слава, и ныне: Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную? что же возымену́ю Тя?/ недоумева́ю и ужаса́юся./ Те́мже, я́ко повеле́н бых, вопию́ Ти:/ ра́дуйся, Благода́тная.

Песнь 4

Ирмос: Неизсле́дный Бо́жий сове́т,/ е́же от Де́вы воплоще́ния/ Тебе́, Вы́шняго,/ проро́к Авваку́м усмотря́я, зовя́ше:/ сла́ва си́ле Твое́й, Го́споди.

Припев: Благоверне княже Всеволоде, моли́ Бо́га о нас.

По благослове́нию архиере́я со отце́м свои́м, Богому́дре, подви́гшеся,/ мног труд показа́ша, вели́кий Но́вград многому́дренно соде́ласта/ на утвержде́ние ве́рою зову́щим:/ сла́ва си́ле Твое́й, Го́споди.

Припев: Благоверне княже Всеволоде, моли́ Бо́га о нас.

Епи́скопа вели́каго Новагра́да свяще́нием це́рковь многочу́дну вели́кому Иоа́нну Предте́чи/ в па́мять сы́ну твоему́, прему́дре Гаврии́ле, воздви́гл еси́,/ с ни́мже поя́:/ сла́ва си́ле Твое́й, Го́споди.

Слава: Генна́дия Патриа́рха Богосло́вию после́довал еси́, Богому́дре Гаврии́ле,/ Триипоста́снаго Существа́ в со́бствех, Отца́, и Сы́на, и Свята́го Ду́ха,/ во Еди́ном Божестве́ покланя́ема бы́ти, ве́ровав,/ Ему́же с ним поя́:/ сла́ва си́ле Твое́й, Го́споди.

И ныне: Всю Тя, Ду́хом Гаврии́л очиствова́нну, Всенепоро́чная, разуме́в,/ вопие́т Ти я́вственно:/ о ра́дуйся, кля́твы избавле́ние и пра́отцев воззва́ние!

Пе́снь 5

Ирмос: Ны́не воста́ну, проро́чески рече́ Бог,/ ны́не просла́влюся, ны́не вознесу́ся,/ па́дшаго прие́м от Де́вы,/ и к све́ту у́мному вознося́й Моего́ Божества́.

Припев: Благоверне княже Всеволоде, моли́ Бо́га о нас.

Пско́ва гра́да и ла́дожане, избра́ннии людие, при́звани новогоро́дскими му́жи,/ умы́слившими на изгна́ние твое́, свя́те,/ сове́т их разверго́ша, возврати́ша тя, ра́достию мир подаю́ща.

Припев: Благоверне княже Всеволоде, моли́ Бо́га о нас.

Руко́ю твое́ю честно́ю написа́в, прему́дре Гаврии́ле,/ твоего́ строе́ния вели́каго Иоа́нна Крести́теля це́ркви,/ пребога́тое твоего́ пра́веднаго дая́ния законоположе́ние ве́чно,/ мир всем да́руя.

Слава: Многоразсу́дное вселе́нских учи́телей о Це́ркви Христо́ве разсмотри́в,/ и твои́х святоле́пных прароди́телей зако́нное завеща́ние,/ и уста́вы судо́м оте́ческим, преда́в Царю́ сла́вы, Богому́дре,/ архиере́ом непоколеби́мо соблюда́ти.

И ныне: Храм су́щи свяще́ния, Пренепоро́чная,/ веща́нием Гаврии́ла Арха́нгела, во святы́х почива́ющаго, родила́ еси́ Пресвята́го Бо́га,/ всех освяща́ющаго и лю́тых изыма́юща.

Песнь 6

Ирмос: Возопи́ша с весе́лием пра́ведных ду́си:/ ны́не ми́ру заве́т но́вый завеща́ется,/ и кропле́нием да обновя́тся лю́дие/ Бо́жия Кро́ве.

Припев: Благоверне княже Всеволоде, моли́ Бо́га о нас.

Бу́яго наро́да де́рзость на Су́ждаль,/ не послу́шавша святи́теля богонаказа́тельных слове́с чужда́го достоя́ния не жела́ти,/ ты же, пра́ведниче, пра́вду возлюби́в,/ в мир сих преложи́л еси́.

Припев: Благоверне княже Всеволоде, моли́ Бо́га о нас.

Умо́м разсуди́тельным/ оби́дящия достоя́ние, прему́дрости Бо́жия Це́ркве, инове́рныя язы́ки победи́в,/ и во гра́де Ю́риеве прароди́теля твоего́/ ве́ру правосла́вную па́ки предложи́л еси́.

Слава: В челове́цех Боголюбе́зен, и ве́лий властоде́ржец,/ и це́ркве Пресвяты́я Тро́ицы строе́нию спосо́бник,/ и я́ко проуве́дев, в ней положи́тися,/ Е́йже предстоя́, сла́вне Гаврии́ле, о нас моли́ся.

И ныне: Глаго́лом Боже́ственным послушли́ва Гаврии́ловым была́ еси́,/ Безнача́льнаго Сло́ва пло́тию породила́ еси́,/ всех освяща́ющаго и лю́тых изыма́юща.

Го́споди, поми́луй (трижды). Слава, и ныне:

Кондак, глас 8-й

Многому́дренно пресели́вся во град Псков, блаже́нне кня́же Гаврии́ле,/ плод благи́й Бо́гови в жи́зни сей был еси́,/ присноцвету́щ доброде́тельми и, я́коже Дави́д, незло́бием./ Того́ ра́ди получи́л еси́ жизнь ве́чную на Небесе́х,/ всегда́ зря Святу́ю Тро́ицу./ Моли́ изба́витися нам от вся́ких бед, да зове́м ти:/ ра́дуйся, утвержде́ние гра́ду на́шему.

Икос

Всечестну́ю па́мять почти́м уго́дника Христо́ва, вели́каго кня́зя Все́волода,/ оте́ческою диади́мою от ю́ности укра́шена,/ хра́браго во́ина на супоста́ты и вла́стеля благоути́шна,/ и ра́достныя глаго́лы от се́рдца воззове́м к нему́, си́це вопию́ще:/ ра́дуйся, я́ко из млады́х ногте́й Бо́га возлюби́в;/ ра́дуйся, я́ко за́поведей Его́ нело́жный храни́тель;/ ра́дуйся, земли́ слове́нстей украше́ние;/ ра́дуйся, церко́вный строи́телю и обогати́телю неску́дный;/ ра́дуйся, церква́м украше́ние и и́стинный побо́рниче;/ ра́дуйся, нело́жный прави́телю о́тческих преда́ний;/ ра́дуйся, благоче́стия столп, непоколеби́м вра́жиими прило́ги;/ ра́дуйся, я́ко во вре́мя вели́каго гла́да преизоби́льный ни́щим и си́рым пита́телю;/ ра́дуйся, бе́дным утеше́ние и засту́пник;/ ра́дуйся и весели́ся, я́ко сугу́бу мзду Небе́сную сугу́ба ра́ди изгна́ния от Бо́га обре́л еси́;/ ра́дуйся, я́ко сподо́бился еси́ восприя́тия/ сугу́быя благода́ти вене́ц пресве́тел и исто́чник исцеле́ния;/ ра́дуйся, пресла́вный кня́же Гаврии́ле, князе́м Росси́йским похвала́;/ ра́дуйся, утвержде́ние гра́ду на́шему.

Песнь 7

Ирмос: В нача́ле Безнача́льное Сло́во,/ со Отце́м и Ду́хом Сын Единоро́дный,/ благослове́н еси́ и превозноси́мый Бо́же оте́ц на́ших.

Припев: Благоверне княже Всеволоде, моли́ Бо́га о нас.

В ско́рбех па́ки пребыва́я, блаже́нне Гаврии́ле,/ от разсвире́пившихся муже́й, сове́тующих на тя на коне́чное изгна́ние,/ но в кре́пости души́ благода́рно поя́:/ благослове́н Бог оте́ц на́ших.

Припев: Благоверне княже Всеволоде, моли́ Бо́га о нас.

Песносло́вивша тя Богому́дренно по Христо́ве Це́ркви,/ Боже́ственная преда́ния и оте́ческий уста́в/ прие́м, вели́кий Но́вград содержи́т, поя́:/ благослове́н Бог оте́ц на́ших.

Слава: Гри́вну зла́ту о твое́й вы́и нося́/ и вене́ц терпе́ния от Вседержи́теля восприе́мля,/ вы́ну зря у́мныма очи́ма,/ Тро́ичным све́том, Гаврии́ле, просвеща́ем, в весе́лии поя́:/ благослове́н Бог оте́ц на́ших.

И ныне: Гаврии́л Архистрати́г по́слан бысть, ра́дость возвеща́ет Ти,/ Де́во Ма́ти Чи́стая,/ ея́же ра́ди печа́ль преста́, и кля́тва непло́ды бысть,/ благослове́ние же ве́рным князе́м процвете́ во ве́ки.

Песнь 8

Ирмос: Вся дела́ Божия/ и вся тварь, благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Припев: Благоверне княже Всеволоде, моли́ Бо́га о нас.

Го́рняго Иерусали́ма жела́я насле́довати, зва́нием почита́ем благонаро́читых люде́й,/ от Вышегра́да прише́л еси́ во град Псков,/ с ни́ми поя́, блаже́нне, и превознося́ Го́спода во ве́ки.

Припев: Благоверне княже Всеволоде, моли́ Бо́га о нас.

Раче́ние незло́биво ко изгна́вшим тя, блаже́нне,/ я́коже Дави́д ко Авессало́му показа́л еси́,/ жела́я в Вы́шних кро́тких зе́млю насле́дити, ве́чнаго селе́ния, Богому́дре, во ве́ки.

Слава: Тобо́ю, Богоблаже́нне кня́же Гаврии́ле, град Псков вельми́ хва́лится:/ в не́м бо благоче́стно пожи́в, спасе́ние соде́лав,/ Тро́ицу чти́ти научи́л еси́ во Еди́ном Божестве́,/ и покланя́тися Той, и благосло́вити во ве́ки.

И ныне: Предвозвести́тель ве́чныя та́йны/ Арха́нгел Гаврии́л, – е́же ра́дуйся! – Тебе́, Богоро́дице, взыва́я,/ тезоимени́тый же сему́ от земны́х князь/ Твоего́ успе́ния хра́му с Богому́дрым Ни́фонтом основа́ние полага́ют,/ благосло́вяще Тя во ве́ки.

Песнь 9

Ирмос: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.

Припев: Благоверне княже Всеволоде, моли́ Бо́га о нас.

Пи́щи безсме́ртныя, Те́ла и Кро́ве Христо́вы, сподо́бился еси́ причасти́тися, Богому́дре,/ проще́ние и мир всем дав,/ ду́шу твою́ Небе́сному Царю́ и Влады́це пре́дал еси́./ Ему́же со все́ми святы́ми предстоя́, всеблаже́нне, о нас моли́ся.

Припев: Благоверне княже Всеволоде, моли́ Бо́га о нас.

Нова́града наро́ди ми́рная устро́ивше и ско́ро ше́дше в Пле́сков,/ восхоте́ша взя́ти мо́щи твоя́, свя́те, но не возмого́ша:/ сугу́бо чудоде́йствие показа́в, ста́ша неподви́жими,/ и по́дал еси́ им от честны́я руки́ своея́ но́готь/ на исцеле́ние и в па́мять ве́чную.

Слава: Ско́ро предва́рше свяще́нное ополче́ние,/ власти же, и наро́читии, и всяк во́зраст, в пресла́вную це́рковь Пресвяты́я Тро́ицы,/ и присту́пльше к чудотво́рней ра́це, вопие́м:/ о всеблаже́нне кня́же Гаврии́ле! Моли́ Царя́ Небе́снаго ве́рным лю́дем здра́вие пода́ти и во́ем побе́ду на враги́,/ гра́ду же и нам спасе́ние и исцеле́ние.

И ныне: Господонача́льный Царю́, со Отце́м седя́й и Серафи́мы пое́мый,/ призри́ на мольбу́ раб Твои́х:/ Пречи́стыя же Твоея Ма́тере и уго́дника Твоего́, кня́зя Гаврии́ла, моле́нием/ спаси́ град и лю́ди и умно́жи плоды́ земны́я,/ пода́ждь ве́рным здра́вие и на проти́вныя побе́ды/ и очи́сти грехи́ на́ша И́мене Твоего́ ра́ди.

Свети́лен

Боже́ственною благода́тию просвети́вся,/ и по сме́рти показа́л еси́ све́тлость жития́ твоего́:/ источа́еши ми́рови благода́ть, притека́ющим к ра́це моще́й твои́х, всеблаже́нне Гаврии́ле,/ и моли́ спасти́ся чту́щим тя.

Молитва

О, вели́кий уго́дниче Бо́жий и пресла́вный чудотво́рче, святы́й благове́рный кня́же Все́володе-Гаврии́ле, гра́да Пско́ва и всея́ держа́вы Росси́йския небе́сный засту́пниче и покрови́телю, и всех нас усе́рдный пред Бо́гом предста́телю и защи́тителю! Предстоя́ Престо́лу Вели́каго Царя́ и Бо́га на́шего, в Тро́ице Святе́й сла́вимаго и покланя́емаго, ве́лие дерзнове́ние к Нему́ и́мати, я́ко ве́рный раб Его́ и уго́дник. К тебе́ у́бо, я́ко сро́дному нам и многомо́щному пред Го́сподем хода́таю, прибега́ем мы гре́шнии и недосто́йнии, и умиле́нно про́сим тя: моли́ Всеблага́го Бо́га, да отврати́т от нас гнев Свой, пра́ведно по дела́м на́шим на ны дви́жимый, и презре́в безчи́сленная прегреше́ния на́ша, обрати́т нас на путь покая́ния и спасе́ния. Огради́ моли́твами твои́ми в мире жизнь на́шу, и ко всем благо́е поспеше́ние и вся к животу́ и благоче́стию потре́бная нам дарова́ти испроси́, и я́коже дре́вле град твой Псков от плене́ния и разоре́ния ра́тнаго изба́вил еси́, та́ко и ны́не и нас и вся гра́ды и ве́си страны́ на́шея от вся́ких напа́стей и бед и внеза́пныя сме́рти предста́тельством твои́м изба́ви, и от всех враг ви́димых и неви́димых покро́вом твои́м защити́. Сохрани́ моли́твами твои́ми в ми́ре держа́ву на́шу и будь всей стране́ Росси́йстей кре́пкое огражде́ние; да ти́хое и безмо́лвное житие́ поживе́м во вся́ком благоче́стии и чистоте́, и та́ко в ми́ре вре́менное сие́ житие́ преше́дшии, в ве́чный дости́гнем поко́й, и сподо́бимся Небе́снаго Ца́рствия, сла́вяще Отца́ и Сы́на и Свята́го Ду́ха, и твое́ свято́е заступле́ние, во ве́ки веко́в. Ами́нь.