24 февраля.

Канон Святому священномученику Власию Севастийскому, епископу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

И нра́вом прича́стник, и престо́лом наме́стник апо́столом бы́в, дея́ния обре́л еси́, богодохнове́нне, в виде́ния восхо́д, сего́ ра́ди сло́во и́стины исправля́я, и ве́ры ра́ди пострада́л еси́ да́же до кро́ве, священному́чениче Вла́сие. Моли́ Христа́ Бо́га спасти́ся душа́м на́шим.

Кано́н, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Священномучениче Власие, моли Бога о нас.

Похвалу́ согла́сну дне́сь Христу́ прино́сим, сла́вную Вла́сия му́драго творя́ще па́мять, Моисе́йски, празднолю́бцы, пою́ще пе́снь Бо́гу на́шему, я́ко просла́вися.

Припев: Священномучениче Власие, моли Бога о нас.

До́льних презира́тель Вла́сий и Христо́в рачи́тель, я́ко святи́тель, и му́ченик, и па́стырь, е́же де́лом показа́ние, и, предло́жь боже́ственную трапе́зу, на снеде́ние созыва́ет на́с.

Сла́ва Отцу́ и Сы́ну и Свято́му Ду́ху:

Житие́ доброде́тельми очи́стил еси́ и сосу́д яви́лся еси́, потре́бен боже́ственнаго мѵ́ра на восприя́тие честна́го служе́ния, му́дре, оде́жду же кровьми́ муче́ния испестри́л еси́.

И ны́не и при́сно и во ве́ки веко́в. Ами́нь.

Богородичен: Воста́ от о́тча паде́ния, Богороди́тельнице Чи́стая, и от кля́твы изба́вися я́ве прама́терния, Пресвята́я, Твои́м Рождество́м ро́д ве́сь челове́ческий.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Священномучениче Власие, моли Бога о нас.

Яко ве́дом Бо́гу, свяще́нствовати Христу́ пома́зался и научи́лся Ду́хом, са́м ся́ кро́вию освяти́л еси́.

Припев: Священномучениче Власие, моли Бога о нас.

Уче́ньми вои́стинну сбы́тием му́дрых де́л твои́х Це́ркви бы́л еси́ му́ченик и учи́тель, Вла́сие.

Сла́ва Отцу́ и Сы́ну и Свято́му Ду́ху:

Образ благоче́стия Це́ркве Христо́вы бы́л еси́, свяще́нную оде́жду твою́ кровьми́ уясни́л еси́ страда́ний твои́х.

И ны́не и при́сно и во ве́ки веко́в. Ами́нь.

Богородичен: Ро́ждши на земли́ пребога́таго Бо́га, Чи́стая, челове́ческое паде́ние на небеса́ возвела́ еси́.

Конда́к, гла́с 2.

Боже́ственное прозябе́ние, цве́т неувяда́емый, лозы́ Христо́вы розго́ многострада́льная, богоно́се Вла́сие, ве́рою чту́щия па́мять твою́ весе́лия твоего́ испо́лни, моля́ся непреста́нно о все́х на́с.

Седа́лен, гла́с 8.

Благоче́стия сы́й прозябе́ние че́стно, нече́стия яви́лся еси́ потреби́тель, Вла́сие прехва́льне, си́лою духо́вною: на суди́щи бо и́дольскую ле́сть обличи́л еси́ и благодерзнове́нно пе́ти Тро́ицу пропове́дал еси́, те́мже и беззако́нным преда́вся, страстоте́рпче, зве́ря умори́л еси́, злонача́льнаго зми́я. Сего́ ра́ди вопие́м ти́: моли́ Христа́ Бо́га, согреше́ний оставле́ние дарова́ти чту́щим любо́вию святу́ю па́мять твою́.

Сла́ва, и ны́не, Богородичен:

Со́лнца о́блаче разу́мнаго, Боже́ственнаго Све́та свети́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослепле́нием страсте́й, безстра́стия заре́ю просвети́, молю́ся, и оскверне́нное ми́ се́рдце омы́й пото́ки умиле́ния, покая́ния же слеза́ми, и от тиме́ния мя́ очи́сти де́л мои́х, да любо́вию зову́ Ти: Богоро́дице Присноде́во, моли́ Христа́ Бо́га прегреше́ний оставле́ние пода́ти ми́, Тебе́ бо име́ю наде́жду, ра́б Тво́й.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Священномучениче Власие, моли Бога о нас.

Утвержда́емь жезло́м и́стинным, Моисе́йски низложи́л еси́ пре́лести зми́я, Вла́сие, уго́дниче Христо́в, обличи́в мучи́теля и наста́вль но́выя лю́ди.

Припев: Священномучениче Власие, моли Бога о нас.

Слове́сным тя́ и безслове́сным благоде́теля, е́же к Бо́гу присвое́ние показа́, блаже́нне, исправле́ний твои́х, те́мже у́бо прия́л еси́ исцеле́ний дарова́ния.

Сла́ва Отцу́ и Сы́ну и Свято́му Ду́ху:

Во удо́ле, иде́же положи́ся боле́знь, су́щим о Христе́ твои́м овца́м пра́ведно, все́, о́тче, удави́л еси́ сло́вом благода́ти беззако́ния те́рние.

И ны́не и при́сно и во ве́ки веко́в. Ами́нь.

Богородичен: Яко ра́й, посреде́ Це́ркве насажде́н, яви́ся ро́ждши Дре́во Жи́зни, Препе́тая, от Него́же у́бо вкуси́вше, позна́хом Христа́ Бо́га на́шего.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Священномучениче Власие, моли Бога о нас.

На па́жити Боже́ственней просте́р преде́лы ста́да твоего́, святи́телю, богому́дренно ле́сть отгна́л еси́ от всея́ земли́.

Припев: Священномучениче Власие, моли Бога о нас.

Уче́ньми, му́дре святи́телю, ста́до твое́ утверди́л еси́ в ве́ре, се́ бо и жены́ ле́сть попра́ша.

Сла́ва Отцу́ и Сы́ну и Свято́му Ду́ху:

Любо́вию Христо́вою утвержда́емы, жены́ к подо́бию прихо́дят по́двиг твои́х, о́тче, закала́емы усе́рдно Христо́ви.

И ны́не и при́сно и во ве́ки веко́в. Ами́нь.

Богородичен: Умертви́ся вои́стинну Рождество́м Твои́м, Влады́чице, наи́тие сме́ртное, све́том бо тма́ разоря́ема ви́дится.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Священномучениче Власие, моли Бога о нас.

Красото́ю разли́чных ра́н теле́сных та́йныя оде́жды твоея́ украси́л еси́ ле́поту и обою́ду, иера́рше, венча́лся еси́ благода́тию.

Припев: Священномучениче Власие, моли Бога о нас.

Ве́рою Христо́вою я́ко стеко́шася, жены́ стра́ждущия с тобо́ю, о́тче, усе́рдно уме́рша, Вла́сие. Любо́вию творя́щих па́мять твою́ сохрани́.

Сла́ва Отцу́ и Сы́ну и Свято́му Ду́ху:

Ре́вностию Христо́вою разже́гшеся му́ченицы, ласка́тельныя ле́сти пре́лесть отве́ргше, му́кам томле́ния запали́ша кро́вию.

И ны́не и при́сно и во ве́ки веко́в. Ами́нь.

Богородичен: Кре́пость моя́ вои́стинну Ты́ и пе́ние еси́, Богороди́тельнице, на Тя́ бо наде́жду мою́ возложи́х и возвы́сих Тобо́ю на враги́ моя́ ро́г мо́й.

Конда́к, гла́с 8.

Свяще́ния пома́занием и муче́ния кро́вию украси́лся еси́, сла́вне Вла́сие, и сия́еши всю́ду, в вы́шних лику́я и на́с назира́я, в хра́м тво́й прише́дшия и в не́м тебе́ непреста́нно зову́щия: все́х на́с соблюди́.

Икос:

Со тща́нием, бра́тие, собери́теся и хра́м му́ченика дости́гните, я́ко да сего́ воспое́м дне́сь, я́ко да благода́тию его́ наслади́мся, ду́ши бо спаса́ет и телеса́ от страсте́й многоразли́чных, я́ко му́ченик, я́ко преподо́бен, я́ко ве́рен святи́тель и побо́рник, вопию́щим ему́ от души́ чи́сты: все́х на́с соблюди́.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Священномучениче Власие, моли Бога о нас.

Дави́дски тебе́ взыва́ем, о о́тче Вла́сие, любо́вию: Го́споду яви́лся еси́ ты́ подо́бник, и стопы́ твоя́ не позна́шася, и́бо стези́ твоя́ о Го́споде яви́шася на вода́х.

Припев: Священномучениче Власие, моли Бога о нас.

Спа́совою насла́ждшеся, му́ченицы, благода́тию, вои́стинну ра́дость вмени́сте напа́сти муче́ние: чу́до же, я́ко превы́ше челове́ка, крове́м, прело́жшимся во млеко́, ужа́сно.

Сла́ва Отцу́ и Сы́ну и Свято́му Ду́ху:

Ма́терне у́бо к муче́нию дерзнове́ние зря́ще ве́рою Христо́вою де́ти и того́ благоле́пия наслажда́ются, ко Влады́це, ра́дующеся, тща́хуся.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, ра́дуйся, Тобо́ю бо даде́ся ра́дость, Богоро́дице, вопию́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Священномучениче Власие, моли Бога о нас.

Ру́це распросте́р псало́мски пред лице́м Бо́жиим, о́тче, прине́сл еси́, священноде́йствуя, кро́вию твое́ю моли́твы твоя́ Христу́. Те́мже ча́шу, му́дре, спаси́тельную испи́в, вопия́л еси́: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Вдови́це ревну́юще благоче́стно, боже́ственную па́мять твою́ соверша́ем ве́рно, богора́дованне Вла́сие, и са́м у́бо обеща́ние, е́же сотвори́л еси́ к не́й, и с не́ю к на́м дарова́нии благи́ми на́м бу́ди на по́мощь.

И ны́не и при́сно и во ве́ки веко́в. Ами́нь.

Богородичен: Бя́ше естество́ челове́ческое, е́же пре́жде осужде́нное паде́нием преступле́ния, обре́те же, Богоро́дице, Рождество́м Твои́м благослове́ние вои́стинну и пое́т ра́достно: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Священномучениче Власие, моли Бога о нас.

Якоже в сла́дости ра́йстей и в не́й Ца́рствие, Вла́сие, му́дре святи́телю, насле́дие уготовля́я, на заколе́ние поте́кл еси́, о Го́споде ра́дуяся.

Припев: Священномучениче Власие, моли Бога о нас.

Горды́ню посе́кл еси́ ты́, блаже́нне, духо́вным мече́м вознося́щихся су́етно на ста́до твое́ безбо́жных, твои́ми кровьми́ украси́в благоче́стие.

Сла́ва Отцу́ и Сы́ну и Свято́му Ду́ху:

Вла́сие, му́дре святи́телю, со стра́ждущими с тобо́ю жена́ми, вку́пе и с детьми́ боже́ственными благослове́ньми хва́лящия тя́ венча́ти помоли́ся, я́ко от нача́ла тебе́ сло́во воспе́вших.

И ны́не и при́сно и во ве́ки веко́в. Ами́нь.

Богородичен: В Рождестве́ Де́ва яви́лася еси́, я́ко пре́жде Рождества́, Богоро́дице, и по Рождестве́ та́кожде уста́вленныя зако́ны естества́ преше́дши, Влады́чице. Те́мже Тя́ вси́ велича́ем.

Свети́лен.

Святи́тель и му́ченик, преподо́бен, незло́бив я́влься, Вла́сие, страсте́й Христо́вых ра́ны нося́, Да́вшаго ти́ благода́ть исцеля́ти вся́ неду́ги.

Сла́ва, и ны́не, Богородичен:

Тя́ Дании́л преднапису́ет несеко́мую го́ру, из нея́же честны́й Ка́мень отсече́ся, истнева́ет и́дольския хра́мы, Богороди́тельнице Мари́е.

Молитва священномученику Власию, епископу Севастийскому

О, многострада́льный о́тче, вели́кий уго́дниче Бо́жий, священному́чениче Вла́сие. Услы́ши на́с, гре́шных, к тебе́ прибега́ющих и те́пле тебе́ моля́щихся. Бу́ря мно́гих зо́л, бе́д и скорбе́й обдержи́т на́с, боле́зни душе́вныя и теле́сныя и вся́кия наважде́ния вра́жия обурева́ют на́с. Мы́ же неради́м о спасе́нии на́шем, ниже́ досто́йны есмы́ по грехо́м на́шим у Го́спода по́мощи проси́ти. Но ты́, до́брый па́стырю, ве́лие дерзнове́ние име́яй у Ми́лостиваго Бо́га, я́коже иногда́ ведо́мый на муче́ния твоя́, вдови́цы слезя́щия, прини́кшия к тебе́, не отри́нул еси́, и́ну бо от напа́сти зве́ря свободи́л еси́, ины́я же о́троку исцеле́ние у Го́спода испроси́л еси́, та́кожде и ны́не при́зри на ча́да твоя́, в ча́с се́й к тебе́ прите́кшия, утеше́ния и по́мощи прося́щия. Ты́ у́бо Го́спода умоли́л еси́: а́ще ка́я боле́знь или́ беда́ и́мут кому́ бы́ти и то́й помяне́т и́мя твое́ – по́мощи вся́кому в прославле́ние Его́ Пресвята́го И́мени. Не отри́ни на́с, моля́щихся тебе́, но я́коже обеща́лся еси́, во бла́го сотвори́ вся́кое проше́ние на́ше, по ми́лости Всеблага́го Бо́га, Ему́же че́сть и сла́ва во ве́ки веко́в. Ами́нь.