24 февраля.

Канон преподобному Димитрию, Прилуцкому чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь, глас 1-й:

Свы́ше от Бо́га, преподо́бне, благода́ть прия́л еси́ духо́вную и от Него́ у́бо позна́лся еси́, блаже́нне, того́ ра́ди и ты ду́хом позна́л еси́ лу́чшая Его́, бу́дущаго ве́ка пребыва́ние, и по́стнически испыта́вся во свои́х оби́телех. И ны́не, со Ангелы ликовству́я, Спа́су всех за ны моли́ся свя́те Дими́трие, да вси вопие́м: Сла́ва Да́вшему ти кре́пость. Сла́ва Венча́вшему тя. Сла́ва Де́йствующему тобо́ю всем исцеле́ния.

Ин тропарь, глас 1-й

Свы́ше от Бо́га преподо́бне, благода́ть прия́л еси́, Дими́трие пресла́вне, и Того́ си́лою укрепля́ем, Ева́нгельски ходи́ти изво́лил еси́, отону́дуже и от Христа́ возме́здие трудово́м обре́те, всеблаже́нне, Его́же моли́ спасти́ся душа́м на́шим.

КАНОН, глас 2-й

Песнь 1

Ирмос: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грех потреби́ло есть: препросла́вленный Госпо́дь сла́вно бо просла́вися.

Припев: Преподо́бне о́тче наш Дими́трие, моли́ Бо́га о нас.

Тебе́ твоего́ блаже́нне, уче́ния долг принося́ще, возда́ния простира́ем, вене́ц похвала́м плету́ще; ты же ми́лостив яви́ся, пребога́те, твои́ми мольба́ми благода́ть нам пода́ждь духо́вную.

Преподо́бне о́тче наш Дими́трие, моли́ Бо́га о нас.

Всегуби́тельное стремле́ние страсте́й, о́тче, увяди́л еси́, слове́сным объя́т Богому́дрием, благопребы́тен бо был еси́ и благогла́сен, кро́ток же и смире́н, сло́вом прему́дрости, Дими́трие, и ра́зума венча́н.

Преподо́бне о́тче наш Дими́трие, моли́ Бо́га о нас.

Священноукраси́л еси́ себе́, о́тче, ра́зумом и де́тельным виде́нием благода́ти, Богоглаго́ливе Дими́трие, жела́я венца́ сла́вы Христо́вы, и твою́ наде́жду изря́дно, преблаже́нне, не погреши́л еси́.

Слава: Целому́дрие удержа́л еси́ я́ве, кра́йнюю же кро́тость и высо́кое, Богоно́се, смире́ние, и́миже возвыша́емь, трудо́в твои́х де́йством и виде́нием, ра́дуяся, принесе́ся, вене́ц неувяда́емый прие́м.

И ныне: Тва́рей яви́лся еси́, Чи́стая, всех ви́димых и неви́димых превы́шши, Всенепоро́чная: Зижди́теля бо родила́ еси́, я́коже изво́ли воплоти́тися в утро́бе Твое́й. Его́же со дерзнове́нием моли́ спасти́ пою́щия Тя.

Песнь 3

Ирмос: Процвела́ есть пусты́ня, я́ко крин, Го́споди, язы́ческая неплодя́щая Це́рковь Прише́ствием Твои́м, в не́йже утверди́ся мое́ се́рдце.

Преподо́бне о́тче наш Дими́трие, моли́ Бо́га о нас.

Просия́л еси́ в житии́ твое́м, Богоно́се Дими́трие, я́коже всесве́тлое со́лнце в ми́ре, и просвети́ и́же к тебе́ ве́рою и любо́вию приходя́щия и пою́щия тя.

Преподо́бне о́тче наш Дими́трие, моли́ Бо́га о нас.

Просвеща́ются концы́ уче́нии твои́ми, преподо́бне, я́коже бо свети́льник просвети́л еси́, Богоно́се, Це́рковь Христо́ву, о не́йже утверди́ся мое́ се́рдце.

Слава: Непорабоще́ну соблю́л еси́ ду́шу твою́ страстьми́ и сластьми́ теле́сными, Богоно́се Дими́трие всече́стне, те́мже ны́не по достоя́нию восхваля́ем тя.

И ныне: Сказу́я иногда́ сокрове́нное та́инство, Отрокови́це, Тебе́ дре́вле Гаврии́л зовя́ше: ра́дуйся, Бо́жия пала́то, в ню́же всели́ся вся челове́ки обожи́, я́ко Милосе́рд.

Го́споди, поми́луй (трижды).

Седален, глас 3-й

Исправле́ние жития́ твоего́ всем провеща́ет стопы́, Дими́трие о́тче, вои́стинну ве́рою подо́бящим ти ся; те́мже, и́же любо́вию блажа́т тя всегда́, спаса́й моли́твами твои́ми от вся́кия тесноты́, Христа́ Преблага́го моля́, преподо́бне блаже́нне досточу́дне.

Слава, и ныне: Яко невозде́ланная, Де́во, Лоза́, красне́йший грозд прозя́бла еси́, источа́ющ нам вино́ спасе́ния, всех веселя́щее ду́ши же и телеса́. Те́мже я́ко вину́ Тя до́брых блажа́ще при́сно, со Ангелом вопие́м Ти: ра́дуйся, Благода́тная.

Песнь 4

Ирмос: Прише́л еси́ от Де́вы не хода́тай, ни Ангел, но Сам, Го́споди, вопло́щся, и спасл еси́ всего́ мя, челове́ка. Тем зову́ Ти: Сла́ва си́ле Твое́й, Го́споди.

Преподо́бне о́тче наш Дими́трие, моли́ Бо́га о нас.

Ты, Дими́трие, и́нокующим бысть вене́ц, не каме́нием многоцве́тным укра́шен, но доброде́телию обло́жен, яви́лся еси́, блаже́нне, Богора́дованное вои́стинну украше́ние.

Преподо́бне о́тче наш Дими́трие, моли́ Бо́га о нас.

Боже́ственную, Богому́дре, поче́л еси́ прему́дрость: те́мже дарова́нии тя сия́ одари́, сла́ву ве́чную тебе́ хода́тайствовавши, о́тче Дими́трие всече́стне.

Слава: Све́тлостию нрав твои́х и о́бразы бла́гости, преподо́бне Дими́трие, подо́бне пожи́л еси́, те́мже присту́пен ты всем бысть, всеблаже́нне и пречу́дне.

И ныне: Умерщвле́ния плод нам Ева принесе́, Ты же, Жизнь ро́ждши Ипоста́сную, а́бие испра́вила еси́ род наш, Богоневе́сто Пречи́стая.

Пе́снь 5

Ирмос: Хода́тай Бо́гу и челове́ком был еси́, Христе́ Бо́же: Тобо́ю бо, Влады́ко, к Светонача́льнику, Отцу́ Твоему́, от но́щи неве́дения приведе́ние и́мамы.

Преподо́бне о́тче наш Дими́трие, моли́ Бо́га о нас.

Стремле́ние страсте́й безстра́стием удержа́л еси́, Богоно́се Дими́трие, виде́нии и дея́нии просвети́л еси́, о́тче, душе́вное устрое́ние.

Преподо́бне о́тче наш Дими́трие, моли́ Бо́га о нас.

Умо́м чи́стым и писа́нии духо́вными бесе́довал еси́, Богоглаго́ливе Дими́трие, виде́ния и дея́ния собра́в бога́тство, о́тче преподо́бне.

Слава: Прему́дрости глубину́ испыта́в, Дими́трие, дости́гл еси́ обрести́, ели́ко благопотре́бно, и би́сер многоце́нный боле́зньми стяжа́л еси́, преблаже́нне, ра́зума.

И ныне: Се во чре́ве, Богоро́дице Пречи́стая, Христа́ Бо́га па́че сло́ва име́ла еси́, я́коже Иса́ия провозгласи́, и вы́ше естества́ Сего́, Богороди́тельнице, родила́ еси́.

Песнь 6

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли, Бо́же, мя возведи́.

Преподо́бне о́тче наш Дими́трие, моли́ Бо́га о нас.

Вселе́нней свети́ло пресве́тлое, о́тче, яви́лся еси́, Дими́трие, слове́с све́тлостию просвеща́я ве́рою и любо́вию к тебе́ притека́ющия.

Преподо́бне о́тче наш Дими́трие, моли́ Бо́га о нас.

Блаже́нное житие́ преше́л еси́, назда́в у́бо чу́вства, вне был еси́ мирска́го мятежа́ и Бо́гу прибли́жился еси́, Дими́трие.

Слава: Я́ко добр, я́ко кра́сен вене́ц, и́мже ны́не венча́лся еси́, прему́дре Дими́трие, доброде́тельми венча́емь, и над страстьми́ ца́рствовал преизря́дне.

И ныне: Вы́ше естества́ родила́ еси́, Де́во, и ве́чнуеши Дева, я́вльши и́стиннаго Божества́ Сы́на и Бо́га Твоего́ о́бразы.

Го́споди, поми́луй (трижды). Слава, и ныне:

Кондак, глас 8-й

От ю́ности, преподо́бне, крест твой взем, Христу́ после́довал еси́, в моли́твах и поще́ниих, во бде́ниих же и злострада́ниих плоть твою́ изнуря́я; те́мже и Всеви́дящее Око, твоя́ труды́ ви́дев, чудесы́ тя прославля́ет и всех зва́ти тебе́ науча́ет: ра́дуйся, преподо́бне о́тче Дими́трие, по́стников удобре́ние.

Икос

Боже́ственными доброде́тельми твои́ми себе́, му́дре, укра́сил еси́, Спа́су Христу́ жили́ще соде́лав, о́тче, му́жественне: я́коже зла́то, искуси́лся еси́ ве́рою к Бо́гу и, наде́ждею и любо́вию обе́ты полага́я, воздержа́нием пости́вся, я́ко безпло́тен, в целому́дрии и во смире́нии возне́лся еси́. Те́мже и мы, моли́твами твои́ми просве́щшеся, преподо́бне Дими́трие, вопие́м ти: ра́дуйся, я́ко измла́да Бо́гу послужи́л еси́; ра́дуйся, притека́ющим к тебе́ спасе́ния хода́таю; ра́дуйся, христоимени́тым лю́дем похвала́ и утвержде́ние; ра́дуйся, я́ко твои́ми моли́твами сопроти́внии побежда́ются; ра́дуйся, я́ко всем прося́щим дае́ши дар, от Го́спода даро́ванный ти, исцеле́ний; ра́дуйся, я́ко и чудесы́ тя Бог прославля́ет и всех зва́ти тебе́ науча́ет; ра́дуйся, преподо́бне о́тче Дими́трие, по́стников удобре́ние.

Песнь 7

Ирмос: Богопроти́вное веле́ние беззако́ннующаго мучи́теля высо́к пла́мень вознесло́ есть. Христо́с же простре́ Богочести́вым отроко́м ро́су духо́вную, Сый благослове́н и препросла́влен.

Преподо́бне о́тче наш Дими́трие, моли́ Бо́га о нас.

Благоуха́ют, преподо́бне, твои́х уче́ний словеса́, благода́тию Ду́ха сия́юще, Божество́ бо Еди́но чтый в Трие́х Ли́цех, Сло́ва же воплоще́ние поя́, благоуха́еши нас, пребога́те.

Преподо́бне о́тче наш Дими́трие, моли́ Бо́га о нас.

Ума́ чистото́ю и по́мысла, Богоразу́мия све́тлостию житие́ преше́л еси́, чистото́ю же телесе́ и де́вства сия́нием изря́дно возложе́ние я́влься Всеви́дцу и Вседержи́телю.

Слава: Сло́во твое́, со́лию растворе́но, и житие́ твое́, благода́тию, преблаже́нне, сия́я, яви́ся, пречу́дне; те́мже в вы́шняя оби́тели, ра́дуяся, всели́ся еси́, Христу́ со дерзнове́нием ны́не предстоя́.

И ныне: Управля́ющи, Пречи́стая, мое́ житие́, к Твоему́ всети́хому приста́нищу напра́ви, Бо́га ро́ждши, благи́х исто́чника, всем подаю́ща ве́рным нетле́ния благода́ти.

Песнь 8

Ирмос: Пещь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те, вся дела́ Госпо́дня, Го́спода.

Преподо́бне о́тче наш Дими́трие, моли́ Бо́га о нас.

Вене́ц благоле́пен Христо́с Живода́вец на верх твой положи́, тезоимени́те Дими́трие, и́бо дея́ньями просия́л еси́ и виде́нии яви́лся еси́, зовы́й: благослови́те, вся дела́ Госпо́дня, Го́спода.

Преподо́бне о́тче наш Дими́трие, моли́ Бо́га о нас.

Все преше́д чу́вство, преблаже́нне, уму́ пе́рвому прибли́жился еси́ души́ твоея́ чистото́ю, жития́ же све́тлостию, венцено́сче Дими́трие, зовы́й: благослови́те, вся дела́ Госпо́дня, Го́спода.

Слава: Жела́нием зе́льным, преблаже́нне, изсле́дил еси́ Богоно́снаго Се́ргия вели́каго житие́ Боже́ственное, жи́зни све́тлостию поревнова́л еси́, прехва́льне, быв у́бо и собесе́дник сего́ изря́ден вои́стинну.

И ныне: Ум безстра́стен во утро́бе Твое́й соединя́ется челове́ческому уму́, Пречи́стая, пло́ти же дебельство́м под ле́том быв лет превы́шший. Тем Тя, Богоро́дице, ве́рою и любо́вию сла́вим.

Песнь 9

Ирмос: Безнача́льна Роди́теля Сын, Бог и Госпо́дь, вопло́щся от Де́вы, нам яви́ся омраче́нная просвети́ти, собра́ти расточе́нная. Тем Всепе́тую Богоро́дицу велича́ем.

Преподо́бне о́тче наш Дими́трие, моли́ Бо́га о нас.

Пречестны́й Дими́трие, ны́не чи́сто услажда́яся и пи́щу прие́мля па́че у́мныя, иде́же собо́ри святы́х о́крест Го́спода лику́ют, блаже́нне, и́же тя ны́не чту́щия, хода́тайствуя, к себе́ привлецы́.

Преподо́бне о́тче наш Дими́трие, моли́ Бо́га о нас.

Преше́л еси́, ра́дуяся, жела́нием в рай, к еди́ному вои́стинну блаже́нству, к пребо́льшей добро́те, и к жи́зни вои́стинну нестаре́ющейся, и Све́ту Невече́рнему, Богоно́сне о́тче Дими́трие.

Слава: Яко Со́лнце просия́л еси́ в мона́шеских собо́рех, от млады́х ногте́й освяще́н был еси́, я́коже зарю́, испуща́я доброде́тели твоего́ жития́, пресла́дкий Дими́трие, Богоно́сне о́тче преподо́бне.

И ныне: Разуме́вше издале́ча прозорли́выма очи́ма, проро́цы Тя я́ве провозвести́ша, хотя́щую Ма́терь бы́ти Вседе́телю, Влады́це всех, тем Тя, Всепе́тая, Богоро́дицу испове́дуем.

Молитва преподобному Димитрию, игумену Прилуцкому, Вологодскому

О, свяще́нная главо́, преди́вный чудотво́рче, богоно́сне о́тче наш Дими́трие! Усе́рдно припа́дающе к тебе́, мо́лимся: яви́, нам, смире́нным и гре́шным, многомо́щное твое́ заступле́ние. Се бо грех ра́ди на́ших, не и́мамы дерзнове́ния ко Го́споду проси́ти Его́ даро́в, нам благопотре́бных, но тебе́, моли́твенника к Нему́ благоприя́тного, предлага́ем и про́сим: испроси́ нам у бла́гости Его́ вся я́же на по́льзу душа́м и телесе́м на́шим: ве́ру, пра́вду, наде́жду несумне́нну, любо́вь нелицеме́рну, во искуше́ниих му́жество, в злострада́ниях терпе́ние, в моли́твах постоя́нство, в благоче́стии преуспе́яние, вожделе́нное здра́вие, земли́ плодоно́сие, возду́ха благорастворе́ние, дожди́ благовре́менны, жите́йских потре́б дово́льство, мир во днех на́ших и благослове́ние свы́ше на вся́кая блага́я дела́ на́ша. Не забу́ди, чудотво́рче святы́й, ми́лостиво посеща́ти оби́тель свою́, гра́ды и ве́си страны́ на́шея правосла́вныя, сохраня́я и соблюда́я их моли́твами твои́ми от вся́кого зла. Помяни́ всех, ве́ру и любо́вь к тебе́ иму́щих и и́мя твое́ моли́твенно призыва́ющих, и во благи́х проше́ния их ми́лостиво испо́лни, осеня́я их свы́ше святооте́ческим твои́м благослове́нием. Ей свя́тче Бо́жий, не лиши́ и нас гре́шных твоего́ многомо́щнаго заступле́ния, но сподо́би нас кончи́ну жития́ благу́ю улучи́ти и Ца́рствие Небе́сное унасле́довати. Да воспое́м и просла́вим ди́внаго во святы́х свои́х Бо́га на́шего, Отца́ и Сы́на и Свята́го Ду́ха, во ве́ки веко́в. Ами́нь.