23 февраля.

Канон святой мученице Валентине (Алевтине) Кесарийской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропарь мученице Валентине, глас 4

А́гница Твоя́, Иису́се, Валентина,/ зове́т ве́лиим гла́сом:/ Тебе́, Женише́ мой, люблю́,/ и Тебе́ и́щущи страда́льчествую,/ и сраспина́юся и спогреба́юся креще́нию Твоему́,/ и стражду́ Тебе́ ра́ди,/ я́ко да ца́рствую в Тебе́, и умира́ю за Тя,/ да и живу́ с Тобо́ю,/ но я́ко же́ртву непоро́чную приими́ мя с любо́вию поже́ршуюся Тебе́./ Тоя́ моли́твами,// я́ко ми́лостив, спаси́ ду́ши на́ша.

Кондак мученице Валентине, глас 2

Храм Твой всечестны́й,/ я́ко цельбу́ душе́вную обре́тше вси ве́рнии,/ велегла́сно вопие́м ти,/ де́во му́ченице Валентино, великоимени́тая:// Христа́ Бо́га моли́ непреста́но всех нас.

Канон, глас 8

Песнь 1

Ирмос: Пои́м Го́сподеви, прове́дшему лю́ди Своя́ сквозе́ Чермно́е мо́ре, я́ко еди́н сла́вно просла́вися.

Припев: Свята́я му́ченице, Валентино, моли́ Бо́га о нас.

Влече́т к песнопе́нию преми́рных во́инства, и земны́х ли́ки, всехва́льная отрокови́ца, чудесы́.

Припев: Свята́я му́ченице, Валентино, моли́ Бо́га о нас.

Добро́ты возжела́в Влады́ка всех, красне́йшаго твоего́ се́рдца всехва́льная, небе́сных черто́гов сподо́би тя.

Слава: На ка́зни и боле́зни, и на ра́ны многообра́зныя, не устраше́на, му́ченице, вмести́лася еси́: поспеша́ющую бо и́маши благода́ть Спа́сову, возмога́ющую тя.

И ныне: Пречи́стая Богоро́дице, воплоще́нно Присносу́щное и Пребоже́ственное Сло́во па́че естества́ ро́ждшую, пое́м Тя.

Песнь 3

Ирмос: Ты еси́ утвержде́ние притека́ющих к Тебе́, Го́споди, Ты еси́ свет омраче́нных, и пое́т Тя дух мой.

Припев: Свята́я му́ченице, Валентино, моли́ Бо́га о нас.

Яви́лася еси́ на суди́щи му́жественну ду́шу нося́щи, и врага́ я́коже нему́жественна победи́ла еси́ всехва́льная.

Припев: Свята́я му́ченице, Валентино, моли́ Бо́га о нас.

Поро́к в добро́те твое́й, ниже́ вра́ска души́ бысть; и тя Христо́с неве́сту в нетле́нныя черто́ги прия́т.

Слава: Исцели́ всехва́льная души́ моея́ стру́пы, му́ченице Христо́ва, Валентина, и утиши́ твои́ми моли́твами жи́зни моея́ бу́рю.

И ныне: Тя вси стяжа́хом прибе́жище, и сте́ну на́шу христиа́не, и Тя славосло́вим немо́лчно, Безневе́стная.

Моли́ Бо́га о нас, свята́я му́ченице, Валентино, я́ко мы усе́рдно к тебе́ прибега́ем, ско́рой помо́щнице и моли́твеннице о душа́х на́ших. (Поклон.)

Го́споди поми́луй. (Трижды.)

Седален, глас 8

Крове́й твои́х струя́ми, му́ченице Христо́ва, пото́п нечести́вым при́сно де́йствуеши, всехва́льная; ту́чами же благода́ти слове́сныя ни́вы напая́ющи всегда́, в ни́хже возраща́еши клас ве́ры, тем пресла́вно и по сме́рти яви́лася еси́ о́блак, источа́ющи жи́зни свиде́тельство, страстоте́рпице всехва́льная, Валентино, моли́ся Христу́ Бо́гу, согреше́ний оставле́ние дарова́ти чту́щым любо́вию святу́ю па́мять твою́.

Слава, и ныне, Богородичен: Яко Де́ву и еди́ну в жена́х Тя безсе́менно ро́ждшую Бо́га пло́тию, вси ублажа́ем ро́ди челове́честии: огнь бо всели́ся в Тя Божества́, и я́ко Младе́нца дои́ши Зижди́теля и Го́спода. Тем а́нгельский собо́р и челове́ческий род, досто́йно сла́вим пресвято́е рождество́ Твое́, и согла́сно вопие́м Ти: моли́ Христа́ Бо́га, прегреше́ний оставле́ние дарова́ти, досто́йно пою́щим сла́ву Твою.

Песнь 4

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Припев: Свята́я му́ченице, Валентино, моли́ Бо́га о нас.

Нескве́рное зерца́ло боже́ственных разуме́ний тебе́ саму́ю устро́ивши, я́ко свети́льник златоле́потнейший страда́лиц посреде́, му́ченице, возсия́ла еси́.

Припев: Свята́я му́ченице, Валентино, моли́ Бо́га о нас.

Мра́чному не принесла́ еси́ де́мону же́ртвы, непобеди́мая му́ченице, Валентино, жизноно́сную бо возлюби́ла еси́ за благоче́стие смерть прия́ти.

Слава: Яко неболе́зненно нося́щи со страстоно́сцы те́ло непоро́чная, ра́нами нечу́вственна пребыла́ еси́, боже́ственныя любве́ раче́нием.

И ныне: Очище́ние нам да́руй неве́дений, я́ко безгре́шен, и умири́ мир Твой, Бо́же, моли́твами Ро́ждшия Тя.

Пе́снь 5

Ирмос: Утренююще вопие́м Ти: Го́споди, спаси́ ны, Ты бо еси́ Бог наш, ра́зве Тебе́ ино́го не ве́мы.

Припев: Свята́я му́ченице, Валентино, моли́ Бо́га о нас.

Дне и ми́ра противополо́жное уве́девши, ратолю́бнаго де́мона люби́ти не восхоте́ла еси́.

Припев: Свята́я му́ченице, Валентино, моли́ Бо́га о нас.

Мнев твою́ осла́бити боже́ственную, му́ченице, Валентино, любо́вь, смех яви́ся, козньми́ вселука́вый.

Слава: Пода́ждь ми просвеще́ние и мир, всехва́льная, реша́щи моли́твами твои́ми многомяте́жное смуще́ние.

И ныне: Де́ву по рождестве́ пое́м Тя, Богоро́дице, Ты бо Бо́га Сло́ва пло́тию ми́ру породи́ла еси́.

Песнь 6

Ирмос: Ри́зу мне пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.

Припев: Свята́я му́ченице, Валентино, моли́ Бо́га о нас.

Му́жественное в же́нстей пло́ти души́ мудрова́ние нося́щи сла́вная, о зве́рех су́щих в вода́х неради́ла еси́.

Припев: Свята́я му́ченице, Валентино, моли́ Бо́га о нас.

Победи́ла еси́ мучи́телей горды́ню, неврежде́на пребы́ла еси́, му́ченице непобеди́мая, и вене́ц побе́ды прия́ла еси́.

Слава: Яко добру́, и я́ко красну́, я́ко че́стну, и яко де́вства заря́ми сия́ющую, тебе́ Жени́х Госпо́дь Себе́ приво́дит, пресла́вная.

И ныне: Еди́на Сло́вом пло́тию Сло́во поро́ждшая, изба́ви, мо́лимся, сете́й вра́жиих ду́ши на́ша.

Го́споди поми́луй. (Трижды.) Слава, и ныне.

Кондак, глас 2

Храм Твой всечестны́й, я́ко цельбу́ душе́вную обре́тше вси ве́рнии, велегла́сно вопие́м Ти, де́во му́ченице, Валентино, великоимени́тая: Христа́ Бо́га моли́ непреста́нно о всех нас.

Икос

Уневе́стившуюся Христу́ муче́нием, Валентину, соше́дшеся, почти́м досто́йно, я́ко да тоя́ моли́твами, душетле́нныя па́губы изба́вльшеся, губи́тельства, тру́са и падежа́, житие́ во смире́ние препрово́дим, сподо́бльшеся со все́ми святы́ми, от ве́ка Бо́гу благоугоди́вшими, ходи́ти во све́те, и пе́ти с си́ми: удиви́л еси́, Спа́се, Твоя́ ми́лости всем челове́ком, ве́рою хва́лящим ю. Те́мже зове́м ей: моли́ непреста́нно о всех нас.

Песнь 7

Ирмос: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Свята́я му́ченице, Валентино, моли́ Бо́га о нас.

Па́че ума́ яви́шася боже́ственных му́чеников благому́жества, Зижди́тель бо всех тварь покаря́ет во страда́нии зову́щим : отце́в на́ших Бо́же, благослове́н еси́.

Припев: Свята́я му́ченице, Валентино, моли́ Бо́га о нас.

Ху́лящая загради́ преслову́щая отрокови́ца уста́ мучи́телей, и горды́ню пребеззако́нных Ду́хом Святы́м, боже́ственно воспева́ющи: отце́в на́ших Бо́же, благослове́н еси́.

Слава: Тро́ица о́трок преподо́бных разже́гшия пещь дре́вле попали́; ны́не же Богому́драя, Тро́ицу пою́щи, слуги́ улови́, отце́в Бо́га пою́щия: Бо́же, благослове́н еси́.

И ныне: На́ше спасе́ние я́коже восхоте́л еси́, Спасе, устро́ити, во утро́бу Де́вы всели́лся еси́, Юже ми́ру предста́тельницу показа́л еси́, отце́в на́ших Бо́же, благослове́н еси́.

Песнь 8

Ирмос: Царя́ Небе́снаго, Его́же пою́т во́и а́нгельстии, хвали́те и превозноси́те во вся ве́ки.

Припев: Свята́я му́ченице, Валентино, моли́ Бо́га о нас.

Блаже́ннейшая в жена́х, Вы́шняго возме́здную иму́щи благода́ть, поя́ше хва́лящи Христа́ во ве́ки вся.

Припев: Свята́я му́ченице, Валентино, моли́ Бо́га о нас.

Укрепле́на по́мыслом Неве́стника , невеще́ственным раче́нием, те́ло предала́ еси́ на смерть, и живе́ши во ве́ки вся.

Слава: Та́йно Жени́х ко пречи́стей неве́сте в пещь прише́д, духо́вною росо́ю Отчим благоволе́нием спасл есть, пою́щу Христа́ во ве́ки.

И ныне: По́мощи я́же от Тебе́ тре́бующия не пре́зри, Де́во, пою́щия и превознося́щия Тя во ве́ки.

Песнь 9

Ирмос: Тя, неискусобра́чную Ма́терь Бо́га вы́шняго, Тя, па́че ума́ ро́ждшую сло́вом вои́стинну Бо́га, вы́шшую пречи́стых сил, немо́лчными славословле́нии велича́ем.

Припев: Свята́я му́ченице, Валентино, моли́ Бо́га о нас.

Тече́ние живы́я кро́ве зна́мение нетле́нныя свы́ше дарова́нныя тебе́ жи́зни, му́ченице всехва́льная, Валентино, целе́ний бо сокро́вище непреста́нное че́рплющим яви́лася еси́.

Припев: Свята́я му́ченице, Валентино, моли́ Бо́га о нас.

Косне́ся тебе́ смерть естества́ зако́ном, богому́драя, в живоно́сную же ме́ртвость нестра́стно облекла́ся еси́. Еюже я́ко одушевле́нное твое́ те́ло поло́жши всечестно́е, живе́ши нетле́нно, и свидете́льствуют твоя́ кровотече́ния.

Слава: Яко со́лнечную лучу́ озаря́ющую вся, и я́ко неве́сту Христо́ву предо́бру, я́ко го́рлицу чистолюби́вую, и я́ко ма́слину, я́ко кедр, я́ко су́щую избра́нную голуби́цу, хва́лим тя вси, Валентина, богоимени́тая.

И ныне: Неве́сто неискусобра́чная, сосу́де благово́ния, Тя я́ко и́стинную и непоро́чную, и боже́ственнаго о́блак све́та, прие́мшую небе́сный дождь во утро́бе, Де́во Мати, велича́ем.

Молитва мученице Валентине

О, многострадальная и премудрая мученице Христова Валентино! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся. Моли убо Спаса нашего да сподобит и нас странствие наше земное непреткновенно совершити, и в мире и покаянии житие наше скончати, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество, Отца и Сына и Святаго Духа во веки веков. Аминь.