22 февраля.

Канон святому мученику Никифору из Антиохии Сирской.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Му́ченик Тво́й, Го́споди, Ники́фор во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н свята́го. Гла́с 8.

Пе́снь 1.

Ирмос: Колесницегони́теля фарао́ня погрузи́ чудотворя́й иногда́ Моисе́йский же́зл, крестообра́зно порази́в и раздели́в мо́ре, Изра́иля же беглеца́, пешехо́дца спасе́, пе́снь Бо́гови воспева́юща.

Припев: Святый мучениче Никифоре, моли Бога о нас.

Воздвиза́ема жите́йскаго мо́ря волну́ющься лю́те душе́вный кора́бль напа́стьми и страстьми́, ми́ра Вино́вниче, к тишине́ глубо́цей, я́ко Благоде́тель, преложи́, му́ченика, Христе́, мольба́ми.

Припев: Святый мучениче Никифоре, моли Бога о нас.

Разу́мною мы́слию, прему́дре, мы́сленней души́ гне́ва стра́сть благоче́стно покори́л еси́ и к бли́жнему прите́кл еси́ Саприки́ю, тща́ся премени́ти, чу́дне, зако́ном Спа́совым повину́яся.

Сла́ва Отцу́ и Сы́ну и Свято́му Ду́ху:

Тро́ичен: Равномо́щную, Единоесте́ственную, и Сопресто́льную, и Единосу́щную, Трисия́нную зарю́ Еди́наго Божества́ испове́дающе, чти́м в Тре́х Ли́цех, неразде́льно пропове́дающе Сло́во со Отце́м и Ду́хом.

И ны́не и при́сно и во ве́ки веко́в. Ами́нь.

Богородичен: Ум небе́сный Твое́ та́инство непости́жное разуме́ти и́стинно не мо́жет, Всепе́тая: Отцу́ бо Сопресто́льный, во чре́во Твое́ всели́вся, из Тебе́ роди́тися благоволи́, во двою́ естеству́ познава́емь.

Пе́снь 3.

Ирмос: Утвержде́й в нача́ле небеса́ ра́зумом и зе́млю на вода́х основа́вый, на ка́мени мя́, Христе́, за́поведей Твои́х утверди́, я́ко не́сть свя́т па́че Тебе́, еди́не Человеколю́бче.

Припев: Святый мучениче Никифоре, моли Бога о нас.

Ники́фор прозва́н бы́в, при де́лех яви́ся победоно́сец, пре́лести бо мра́к, благода́ти све́том разори́в, отгна́, зовы́й: не́сть свя́т, па́че Тебе́, еди́не Человеколю́бче.

Припев: Святый мучениче Никифоре, моли Бога о нас.

Умерщвле́нному тебе́ ра́ди ве́ровав Влады́це, самово́льно к сме́рти притека́еши, во́льныя Его́ возжела́в ме́ртвости, я́ко победоно́сец му́ченик, Боже́ственною си́лою укрепля́емь.

Припев: Святый мучениче Никифоре, моли Бога о нас.

На земли́ подви́жник, на небесе́х вене́чник, уго́дник Христо́в Ники́фор показа́ся я́ве, с безпло́тными чи́нми зовы́й: не́сть свя́т, па́че Тебе́, еди́не Человеколю́бче.

Сла́ва Отцу́ и Сы́ну и Свято́му Ду́ху:

Тро́ичен: От Ума́ вели́каго — Отца́, устре́мльшееся Сло́во, исходя́ща же и Свята́го Ду́ха, просвеща́еми ве́рно богодохнове́нными повеле́нии, испове́даем вси́ несозда́нное Еди́но Божество́.

И ны́не и при́сно и во ве́ки веко́в. Ами́нь.

Богородичен: Неискусобра́чно от Отца́ пре́жде ве́к Ро́ждшагося, во чре́ве Твое́м заче́нши, Де́во, породи́ла еси́ на́м Бо́га, вку́пе и Челове́ка, в ко́емждо естестве́ соверше́нна, неразде́льна.

Конда́к, гла́с 1.

Любве́ сою́зом связа́вся, Ники́форе, разруши́л еси́ я́ве зло́бу не́нависти и мече́м во главу́ твою́ усе́чен бы́л еси́, му́ченик боже́ственный вопло́щшагося Спа́са, Его́же о на́с моли́, пою́щих сла́вную па́мять твою́.

Седа́лен, гла́с 1.

Багряни́цу твои́ми кровьми́ омочи́л еси́, и се́ю я́ко во́ин оде́явся непобеди́мь, и, я́коже ски́птр, кре́ст держа́, восте́кл еси́ от земли́ к небесе́м, Ники́форе блаже́нне, Царю́ вся́ческих предстои́ши. Сла́ва Да́вшему ти́ кре́пость, сла́ва Венча́вшему тя́, сла́ва Де́йствующему тобо́ю все́м исцеле́ния.

Слава, и ныне, богородичен:

Ру́це Твои́ боже́ственнии, и́миже Созда́теля понесла́ еси́, Де́во Пресвята́я, вопло́щшагося благосты́нею, просте́рши, умоли́ Его́ изба́вити на́с от искуше́ний, и страсте́й, и бе́д, хва́лящих Тя́ любо́вию и вопию́щих: сла́ва Все́льшемуся в Тя́, сла́ва Проше́дшему из Тебе́, сла́ва Изба́вльшему на́с рождество́м Твои́м.

Пе́снь 4.

Ирмос: Ты́ моя́ кре́пость, Го́споди, Ты́ моя́ и си́ла, Ты́ мо́й Бо́г, Ты́ мое́ ра́дование, не оста́вль не́дра Отча, и на́шу нищету́ посети́в. Те́м с проро́ком Авваку́мом зову́ Ти: си́ле Твое́й сла́ва, Человеколю́бче.

Припев: Святый мучениче Никифоре, моли Бога о нас.

Боже́ственную жи́знь, о Ники́форе, получи́л еси́, Боже́ственныя зари́, блаже́нне, сподо́бився, Боже́ственным све́том светови́дно ны́не озаря́еши творя́щия па́мять твою́, богому́дре, и ве́рою вопию́щия: си́ле Твое́й сла́ва, Человеколю́бче.

Припев: Святый мучениче Никифоре, моли Бога о нас.

Сия́еши, Христо́вым му́чеником совоку́плься, разори́л бо еси́ ле́сть многобо́жную, мече́м усе́чен бы́в во главу́ твою́, и кро́вными тече́нии твои́ми всю́ потопи́л еси́ и́дольскую пре́лесть, Влады́це зовя́: си́ле Твое́й сла́ва, Человеколю́бче.

Припев: Святый мучениче Никифоре, моли Бога о нас.

Иже зако́нов Твои́х не сохрани́в Саприки́й, Твоея́ обнажа́ется, Спа́се, Боже́ственныя благода́ти и, враго́м плещи́ пода́в, Твои́х му́ченик лиша́ется сла́вы окая́нный. Те́мже, Твоему́ пра́ведному уди́вльшеся промышле́нию, зове́м: си́ле Твое́й сла́ва, Человеколю́бче.

Сла́ва Отцу́ и Сы́ну и Свято́му Ду́ху:

Тро́ичен: Све́т Оте́ц Безнача́льный и все́х вино́вный, Све́т Сло́во, Све́т Ду́х Святы́й, от Отца́, я́коже от исто́чника, пре́жде все́х ве́к неизрече́нно сия́ющее Трисо́лнечное Божество́ во Еди́ном Существе́, и си́ле, и сла́ве познава́ется.

И ны́не и при́сно и во ве́ки веко́в. Ами́нь.

Богородичен: Всего́ в Тебе́ обновля́ет челове́ка ве́сь, всему́, Пречи́стая, соединя́емь, Оте́ческих не́др не оста́вль и в Твою́ утро́бу всели́тися изво́лив, Иже бога́тством милосе́рдия во́лею обнища́в и обогати́в ми́р Божество́м.

Пе́снь 5

Ирмос: Вску́ю мя́ отри́нул еси́ от лица́ Твоего́, Све́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и к све́ту за́поведей Твои́х пути́ моя́ напра́ви, молю́ся.

Припев: Святый мучениче Никифоре, моли Бога о нас.

Тече́ньми твои́х крове́й церко́вный ра́й напои́л еси́, разделя́емыми в нача́ла четверочи́сленная, блаже́нне, доброде́телей боже́ственных, от ни́хже душа́м, о Ники́форе, почерпа́ем Боже́ственная дарова́ния.

Припев: Святый мучениче Никифоре, моли Бога о нас.

Се́ятель зло́бы злопомне́нием окая́ннаго восхити́, бла́гости же и ми́ра Вино́вник привлече́ вме́сто о́наго Боже́ственным световиде́нием укра́шена Ники́фора, богому́драго му́ченика.

Припев: Святый мучениче Никифоре, моли Бога о нас.

Освяща́ется, Спа́се, Твое́й во́льней стра́сти подо́бяся, из ре́бр бо Твои́х богому́дрый ка́плями окропле́н, свои́х крове́й Тебе́ то́ки приноша́ет, мече́м посека́емь, к Тебе́ гряды́й.

Сла́ва Отцу́ и Сы́ну и Свято́му Ду́ху:

Тро́ичен: Спасе́ния основа́ние правосла́вие ве́дуще, Собезнача́льна Отцу́ Сло́ва и Свята́го Ду́ха пропове́дуем в Тре́х Ли́цех Еди́но Нача́ло, Еди́но Существо́, Еди́ну во́лю, Еди́но де́йство.

И ны́не и при́сно и во ве́ки веко́в. Ами́нь.

Богородичен: Мы́сленно научи́ся проро́ков собо́р Твои́м та́йнам: небесе́ бо две́рь на земли́ Влады́ка Тя́ показа́, и из Тебе́, Де́во, вопло́щься, пра́вды Со́лнце, су́щим во тме́ возсия́.

Пе́снь 6.

Ирмос: Бе́здна грехо́в и прегреше́ний бу́ря мя́ смуща́ет и во глубину́ ну́жднаго ре́ет мя́ отча́яния, но Твою́ кре́пкую ру́ку мне́ простри́, я́ко Петро́ви, о Упра́вителю! и спаси́.

Припев: Святый мучениче Никифоре, моли Бога о нас.

Исцели́ сокруше́ние души́ моея́, Ники́форе богому́дре, и, страсте́й мра́к разори́в, отжени́ заря́ми су́щия в тебе́ Боже́ственныя све́тлости, моля́ Изба́вителя Христа́, блаже́нне.

Припев: Святый мучениче Никифоре, моли Бога о нас.

Бу́рю и́дольскаго треволне́ния, страда́льче Ники́форе, кре́стным ве́трилом и дыха́нии духо́вными ти́хо преплы́в, му́чениче непобеди́ме, в приста́нище ти́хое Христо́во дости́гл еси́.

Сла́ва Отцу́ и Сы́ну и Свято́му Ду́ху:

Пострада́л еси́ му́ченически и вои́стинну победоно́сец бы́л еси́, кова́рствия благомо́щно разори́в зми́ева, и, страсте́м я́ко о́бщник, блаже́нне, бы́в Влады́ки, ны́не по достоя́нию спросла́вился еси́.

И ны́не и при́сно и во ве́ки веко́в. Ами́нь.

Богородичен: Ужаса́ются мы́сленнии Ангельстии чи́ни, дивя́щеся, со Отце́м Су́щаго пре́жде ве́к и Ду́хом из чре́ва Твоего́ пло́тски Младе́нца ражда́ема зря́ще, Богороди́тельнице Пречи́стая.

Конда́к, гла́с 3.

Впери́вся, сла́вне, Госпо́днею любо́вию и Сего́ сла́вный Кре́ст на ра́мо взе́м, посрами́л еси́ диа́воли ко́зни, пострада́л еси́ да́же до сме́рти и и́стины яви́лся еси́ победоно́сец, ору́жник и таи́нник Бо́жия благода́ти.

Икос:

Па́влово я́ве уче́ние возлюби́л еси́ и в пе́рсех твои́х, сла́вне, насади́л еси́, вопия́: любо́вь не безсту́дствует, сия́ Зижди́теля Челове́ка соверше́нна на́м дарова́; любве́ ра́ди вся́ претерпе́: гво́здие и кре́ст, о́цет и оплева́ния, копие́м прободе́н бы́сть в ре́бра свята́я, и́миже источи́ на́м кро́вь и во́ду богоде́льную. Его́же возжела́в, яви́лся еси́ победоно́сец, и зва́нием ору́жник, и таи́нник Бо́жия благода́ти.

Пе́снь 7.

Ирмос: Бо́жия снизхожде́ния о́гнь устыде́ся в Вавило́не иногда́, сего́ ра́ди о́троцы в пещи́, ра́дованною ного́ю, я́ко во цве́тнице лику́юще, поя́ху: благослове́н еси́ Бо́же, оте́ц на́ших.

Припев: Святый мучениче Никифоре, моли Бога о нас.

Сме́рть бы́сть тебе́, Ники́форе, отше́ствие от су́щих зде́, блаже́нне, к небеси́ же и на небе́сная возше́л еси́, ны́не лику́я, со Ангелы пое́ши: благослове́н еси́, Бо́же оте́ц на́ших.

Припев: Святый мучениче Никифоре, моли Бога о нас.

Укрепля́емь страстьми́ Вседержи́теля, не́мощи превозвы́шенное о́ко и превзя́тую бро́вь низве́ргл еси́ на зе́млю, богому́дре, взыва́я Созда́телю твоему́: благослове́н еси́, Бо́же оте́ц на́ших.

Припев: Святый мучениче Никифоре, моли Бога о нас.

Пу́ть свиде́тельства твоего́ Ники́фор теки́й соверши́, разшири́в се́рдце де́йством Боже́ственнаго Ду́ха, ны́не усе́рдно взыва́ет Ти́, Влады́ко: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Тро́ичен: Ума́ пе́рваго и безнача́льнаго, ро́ждшаго Сло́во Собезнача́льное безстра́стно и безле́тно и произве́дша Всесвята́го Ду́ха, Тя́, Отца́ ве́дуще, взыва́ем: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Обоя́ была́ еси́, Девома́ти, Богороди́тельнице Чи́стая, во чре́ве заче́нши Бо́га несказа́нно, из Тебе́ воплоща́ема, во обои́х зра́цех познава́ема, богому́жно на земли́ пожи́вшаго.

Пе́снь 8.

Ирмос: Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Никифоре, моли Бога о нас.

Зна́менався благода́тию Спа́са, самозва́н ты́ к подвиго́м му́жески отлучи́лся еси́ и, побе́ду взе́м на сопроти́вныя, му́чениче Христо́в, победи́тельными украси́лся еси́ венцы́, боже́ственне воспева́я: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Никифоре, моли Бога о нас.

Освяти́вся водо́ю, Ники́форе, и Ду́хом и му́ченическими обагре́н кровьми́ стяжа́л еси́ я́ко му́ченик и́стинный Христа́ Бо́га светови́дную све́тлость, всеблаже́нне, в не́йже ны́не взыва́еши: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Сла́ва Отцу́ и Сы́ну и Свято́му Ду́ху:

Тро́ичен: Со безпло́тными чи́нми в Трие́х Ипоста́сех Еди́н бла́гости исто́чник приснотеку́щий, нерожде́но, безнача́льно и пресоверше́нно Божество́, соде́тельное и Царя́ все́х, о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

И ны́не и при́сно и во ве́ки веко́в. Ами́нь.

Богородичен: Святе́йши Ты́ была́ еси́, Богоро́дице Всепе́тая, преми́рнаго Ангельскаго чи́на, си́х бо родила́ еси́ Соде́теля и Го́спода от де́вственна неискусобра́чна чре́ва во дву́ существа́х неслия́нно, непревра́тно, во еди́ней же Ипо́стаси Бо́га воплоще́нна.

Песнь 9

Ирмос: Ужасе́ся о се́м не́бо, и земли́ удиви́шася концы́, я́ко Бо́г яви́ся челове́ком пло́тски, и чре́во Твое́ бы́сть простра́ннейшее небе́с. Те́м Тя́, Богоро́дицу, Ангелов и челове́к чинонача́лия велича́ют.

Припев: Святый мучениче Никифоре, моли Бога о нас.

Преста́вился еси́, я́ко жени́х, украси́вся оде́ждами, истка́нными от кро́ве муче́ния, Боже́ственныя све́тлости ко прича́стию украси́вшаго, сла́вне и, удобри́вшаго на Кресте́ стра́стию честно́ю все́х Благоде́теля, о Ники́форе преблаже́нне!

Припев: Святый мучениче Никифоре, моли Бога о нас.

Привле́клся еси́ Влады́ки добро́тами, и́хже ничто́же красне́йше, сла́вне, и Того́ тща́ся наслади́тися непреста́нныя и благоле́пныя све́тлости, мече́м отсещи́ твою́ главу́ поуща́л еси́ мучи́тели, разжига́емь любо́вию, о Ники́форе, Го́спода твоего́.

Припев: Святый мучениче Никифоре, моли Бога о нас.

Све́тло на ле́сть, му́чениче Христо́в, до́блествовав и сию́ победи́в, я́ко победи́тель, вене́ц прия́л еси́ твое́й главе́ дарова́ний, сла́вне, и ны́не лику́еши му́ченически с му́ченическими ли́ки, всеблаже́нне Ники́форе, у престо́ла все́х Царя́.

Сла́ва Отцу́ и Сы́ну и Свято́му Ду́ху:

Тро́ичен: От нерожде́нна Отца́ боголе́пно Сы́на рожде́нна сла́вяще и Ду́ха Пра́ваго, пре́жде ве́к исхо́днаго, Три́ Ипоста́си чти́м пресу́щныя и нача́льныя Тро́ицы, соедине́нныя еди́нством неслия́нным, богосло́вяще велича́ем.

И ны́не и при́сно и во ве́ки веко́в. Ами́нь.

Богородичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Преблаго́е Сло́во, Его́же Оте́ц отры́гну от се́рдца Своего́ пре́жде все́х ве́к, я́ко Бла́г. Его́же ны́не и теле́с превы́шша разумева́ем, а́ще и в пло́ть облече́ся.

Свети́лен.

Тезоимени́т показа́лся еси́ побе́ды, о Ники́форе, любо́вию и муче́нием победи́в мучи́тели. Те́мже и побе́ды вене́ц прия́л еси́ от Го́спода.

Богородичен:

Держа́вным Твои́м покро́вом от враго́в наве́та на́с, Чи́стая, Твоя́ рабы́, сохраня́й вся́ невреди́мы, Тя́ бо стяжа́хом Еди́ну прибе́жище в ну́ждах.

Молитва

О святы́й уго́дниче Бо́жий, му́чениче Ники́форе! По́двигом до́брым подвиза́вся на земли́, восприя́л еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й твой о́браз, ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́ Престо́лу Бо́жию, приими́ моле́ния на́ша и ко Всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.