20 февраля.

Канон иной святителю Парфению, епископу Лампсакийскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, / воздержа́ния учи́теля, / яви́ тя ста́ду твоему́, / я́же веще́й и́стина, / сего́ ра́ди стяжа́л еси́ смире́нием высо́кая, / нището́ю бога́тая, / о́тче Парфе́ние, / моли́ Христа́ Бо́га / спасти́ся ду́шам на́шим.

Стихи́ра, гла́с 6:

Дне́сь, ве́рнии, свяще́нное соверша́им торжество́, / па́мять чту́ще Парфе́ния чу́днаго, / Ангела бы́вша невеще́ственным житие́м, / апо́стола, я́ко ле́сть и́дольскую упраздни́, / проро́ка же, я́ко бу́дущая прозира́ше, / до́бляго му́ченика, / я́ко вся́ ра́дости ми́ра сего́ отве́рже, / и пло́ть свою́ умертви́. / Те́мже и со дерзнове́нием мо́лится / дарова́ти ми́рови ми́р / и душа́м на́шим ве́лию ми́лость.

Кано́н святи́теля, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святителю отче Парфение, моли Бога о нас.

Уясня́ют доброде́телей благода́тию дне́сь все́х на́с, в све́тлое торжество́ му́драго святи́теля, я́коже зарю́, испуща́я светоно́сная чуде́с сия́ния.

Припев: Святителю отче Парфение, моли Бога о нас.

На го́ру безстра́стия, преподо́бне, возне́сл еси́ у́м и, во мра́к писа́ний вше́д, невеще́ственнаго, Парфе́ние, све́та, преподо́бне, испо́лнен яви́лся еси́, сла́вне.

Сла́ва Отцу́ и Сы́ну и Свято́му Ду́ху:

Ору́жие, я́ко вои́стинну извле́к, и́же е́сть глаго́л Бо́жий, вра́жию уязви́л еси́ кре́пость, святи́телю Парфе́ние, те́мже победи́тельная на де́моны ты́ прия́л еси́.

И ны́не и при́сно и во ве́ки веко́в. Ами́нь.

Богородичен: Роди́тель в раи́ бы́сть за́висть сме́рти челове́ком, его́же, ро́ждься, Де́во, из Тебе́ Сы́н Бо́жий Оте́чь с шу́мом потреби́, безсме́ртие пода́в ро́ду на́шему.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святителю отче Парфение, моли Бога о нас.

Якоже фи́никс цветоно́сен, доброде́тели на земли́, преподо́бне, безсме́ртия плоды́ на небесе́х скры́л еси́.

Припев: Святителю отче Парфение, моли Бога о нас.

Хра́м тя́ все́х Бо́гу живу́щая в тебе́ показа́ благода́ть себе́, преподо́бне, ея́же ра́ди просла́вился еси́, Парфе́ние.

Сла́ва Отцу́ и Сы́ну и Свято́му Ду́ху:

Пречестны́м от Бо́га архиере́йства укра́шься, сла́вне, одея́нием, священноде́йственник досто́ин Того́ яви́лся еси́ благосты́ни.

И ны́не и при́сно и во ве́ки веко́в. Ами́нь.

Богородичен: Разруши́ся кля́твы на́шея средогра́дие, Чи́стая Влады́чице, па́че ума́ Рождество́м Твои́м, и Боже́ственному естеству́ совокупи́хомся.

Седа́лен, гла́с 3.

Испо́лнь Ду́ха Боже́ственнаго сы́й, де́лы просия́ благоче́стия, свяще́нне чудотво́рче Парфе́ние, от ле́сти челове́ки обрати́л еси́, боля́щих стра́сти исцеля́я. Отче преподо́бне, Христа́ Бо́га моли́ спасти́ся душа́м на́шим.

Сла́ва, и ны́не, богоро́дичен, гла́с то́йже:

Ра́бски ны́не притека́ю к покро́ву Твоему́, Пренепоро́чная, изба́ви мя́, Богороди́тельнице, слия́ния страсте́й, я́ко безстра́стия Вино́внаго ро́ждшая.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святителю отче Парфение, моли Бога о нас.

Та́ин неизглаго́ланных насла́ждься Бо́жиих, треблаже́нне, науча́яся боже́ственно Того́ сокрове́нным, те́мже и ра́зума ре́ки, Парфе́ние, источи́л еси́.

Припев: Святителю отче Парфение, моли Бога о нас.

Ве́сь взе́мся, богоно́се, мы́слию к небеси́ боже́ственне, сла́ву ви́дел еси́ мы́сленно неизрече́нную, те́мже и равноа́нгелен на земли́ яви́лся еси́, Парфе́ние.

Сла́ва Отцу́ и Сы́ну и Свято́му Ду́ху:

Весели́тся со Ангелы вся́ тва́рь, я́же па́че ума́ зря́щи соверша́ема, о́тче, тобо́ю зна́мения, те́мже и вино́внаго си́м воспева́ет, я́ко Бо́га си́льна.

И ны́не и при́сно и во ве́ки веко́в. Ами́нь.

Богородичен: Яко пресла́вна и неизглаго́ланна, Богоро́дице, но́ваго Твоего́ Рождества́ и́стинно су́ть, Чи́стая, та́инства стра́шна и ужа́сна, в ни́хже мы́сль и у́м побежда́ется, Пречи́стая.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святителю отче Парфение, моли Бога о нас.

Пома́зался еси́ вои́стинну еле́ем Ду́ха, Парфе́ние, по достоя́нию служи́ти Го́споду, сла́вою тя́ украси́вшему.

Припев: Святителю отче Парфение, моли Бога о нас.

Глубину́ испыта́я писа́ния, пресла́вне, многоце́нный би́сер — Христа́ — избра́в, Его́же ста́ду разда́л еси́.

Сла́ва Отцу́ и Сы́ну и Свято́му Ду́ху:

Яко име́я от Бо́га неистощи́му благода́ть, му́дре, пресла́вна источа́еши чуде́са все́м, чудотво́рче Парфе́ние.

И ны́не и при́сно и во ве́ки веко́в. Ами́нь.

Богородичен: Да кропи́т не́бо весе́лие и благода́ть на земли́, воздаде́ бо Ей ны́не весе́лие в высоту́, Еди́ну Богороди́тельницу.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святителю отче Парфение, моли Бога о нас.

Труби́т вселе́нней все́й, Парфе́ние, богоно́сное твое́ житие́, кра́сных чуде́с дарова́нии, пресла́вне, веща́нием Ду́ха. [Дважды.]

Сла́ва Отцу́ и Сы́ну и Свято́му Ду́ху:

Кропи́л еси́ сыноположе́ния во́ду ста́ду твоему́, нече́стия скве́рну омыва́я уче́нии твои́ми, Парфе́ние, и просвеща́я све́том благода́ти.

И ны́не и при́сно и во ве́ки веко́в. Ами́нь.

Богородичен: Ра́зума нетле́ннаго пло́д прозябла́ еси́, Богороди́тельнице, ми́ру, при́сно живы́й Хода́тай нетле́ния явля́емь ве́рою и любо́вию чту́щим Тя́.

Конда́к святи́теля, гла́с 3:

Чуде́с прия́л еси́ Боже́ственную благода́ть, богому́дре свяще́нне Парфе́ние, чудотво́рче богоно́се, вся́ ве́рных стра́сти очища́я, ду́хи лука́вства, о́тче, изгоня́я, сего́ ра́ди тя́ воспева́ем, я́ко ве́лия таи́нника Бо́жия благода́ти.

Икос:

Чистото́ю, я́коже тайнови́дец и дру́г Христо́в богосло́в Иоа́нн, у́мныя о́чи уясни́в, зре́л еси́, богому́дре Парфе́ние, сокрове́нная и та́йная, я́же познава́я, ми́ра непостоя́нная презре́л еси́, ника́коже к си́м прилепи́тися восхоте́л еси́, еще́ же и ча́да твоя́ от су́етных отвраща́л еси́, лу́чшим жела́нием те́х разжиза́я, те́мже и по все́й вселе́нней сла́вно бы́сть и́мя твое́, я́ко вели́каго таи́нника Бо́жия благода́ти.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святителю отче Парфение, моли Бога о нас.

Ду́ха в тебе́ все́льшаяся Боже́ственная благода́ть, му́дре, хра́м и це́рковь тя́ сла́вы я́ко вои́стинну устро́и, Парфе́ние: в ню́же Оте́ц, и Сы́н, и Са́м Уте́шитель всели́ся.

Припев: Святителю отче Парфение, моли Бога о нас.

Огне́м Боже́ственным нече́стия попали́л еси́, преподо́бне, всю́ терно́вную ле́сть на земли́ и все́ял еси́ ста́ду твоему́ Боже́ственная уче́ния, присноживо́тны плоды́ принося́щая.

Сла́ва Отцу́ и Сы́ну и Свято́му Ду́ху:

Удицею язы́ка из глубины́ пре́лести, Парфе́ние, дре́вле твое́ ста́до извле́кл еси́ к жи́зни; ны́не же, о́тче, моли́твами твои́ми уловля́еши от вся́каго ро́да ры́бна благода́тию.

И ны́не и при́сно и во ве́ки веко́в. Ами́нь.

Богородичен: Ви́деша Ангели, Богороди́тельнице, стра́нно Рождество́м Твои́м естество́ тле́нное ро́да пе́рстнаго, к нетле́нному па́ки прите́кшее житию́ и сла́ве небе́сней.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святителю отче Парфение, моли Бога о нас.

Жезло́м ве́ры, му́дре, е́ллинския хра́мы разори́л еси́ и хра́мы воздви́гл еси́, преподо́бне, Спа́су и Бо́гу на́шему, в ни́хже же́ртвы чи́сты прине́сл еси́, поя́ Ему́: благослови́те, вся́ дела́ Госпо́дня, Го́спода.

Припев: Святителю отче Парфение, моли Бога о нас.

Заколе́ние благово́нно са́м себе́ прине́сл еси́, му́дре, воздержа́ния огне́м уха́ние возпосла́л еси́ непоро́чно в Боже́ственный и непристу́пный же́ртвенник Бо́жий, поя́, Парфе́ние: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Име́я Боже́ственную благода́ть от Бо́га, о́тче Парфе́ние, источа́еши исцеле́ния приступа́ющим к тебе́, преподо́бне, очища́я неду́ги и отгоня́ кре́пко де́монов полки́, вино́внаго си́м пе́ти я́ко Бо́га, науча́я при́сно.

И ны́не и при́сно и во ве́ки веко́в. Ами́нь.

Богородичен: Иже естество́м Непристу́пный везде́, Сы́н и Сло́во Бо́жие, в Тя́ все́лься, Чи́стая, и оде́явся, Пресвята́я, в на́ш о́браз, я́ко Милосе́рд, яви́ся, благопристу́пен пло́тию, и поживе́ с на́ми. Сего́ ра́ди любо́вию Тя́ чту́, и пою́, и хвалю́.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святителю отче Парфение, моли Бога о нас.

Тиме́ние оттря́с и́стинно плотски́х страсте́й, треблаже́нне, всего́ себе́ к Боже́ственней пресели́ жи́зни и наслажде́нию невеще́ственному, иде́же, лику́я, назира́еши ны́.

Припев: Святителю отче Парфение, моли Бога о нас.

Цве́ты мы́сленныя, богоно́сне, я́ко в наслажде́нии нетле́нне во святе́й твое́й па́мяти, чуде́с добро́ту пожина́юще, разли́чно исплете́н вене́ц, де́йствия обноси́м.

Сла́ва Отцу́ и Сы́ну и Свято́му Ду́ху:

Ты́, прете́к, я́же в ми́ре, и с небе́сными, о богоно́сне, безпло́тными ли́ки лику́я, о́тче Парфе́ние, о на́с моли́ся, творя́щих твою́ па́мять ве́рно.

И ны́не и при́сно и во ве́ки веко́в. Ами́нь.

Богородичен: Пою́ Твою́ благода́ть, Де́во, и велича́ю Твою́ сла́ву, Ты́ бо просвеще́ние души́ мое́й еси́ вои́стинну и утеше́ние, ско́рая по́мощь, и спасе́ние, и заступле́ние.

Свети́лен:

Светоно́сное Иису́сово и́мя, возлю́бленное и вожделе́нное тебе́ от млада́го во́зраста, но́ваго тя́, Моисе́ю подо́бнаго, богови́дца соде́ла, во мра́к та́инственный входя́щаго. Те́мже, Парфе́ние небоявле́нне, и мою́ ду́шу, мра́ком грехо́вным покрове́нную, озари́ любве́ Иису́совы заре́ю и на безстра́стия го́ру смире́нием возведи́.

Сла́ва, и ны́не, Богородичен:

Светоза́рная Бо́жия пала́то и недоуме́нный Светода́вца престо́ле, Мати́ безневе́стная, просвети́ ны све́том доброде́тели, да о́браз Бо́жий, помраче́нный страстьми́, па́ки сла́вою дре́влею просия́ет в на́с, ве́рою и любо́вию Тя́ воспева́ющих.

Молитва

О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Парфе́ние, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.