1 февраля.

Канон преподобному Савве, игумену Сторожевскому, Звенигородскому чудотворцу.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Пусты́ни яви́лся еси́ до́брое прозябе́ние, преподо́бне: от ю́ности бо изво́лил еси́ чи́стое житие́, духо́вному твоему́ учи́телю после́дуя, и того́ уче́нием у́м к небе́сным впери́в, и ста́ду твоему́ прему́др наста́вник показа́лся еси́; те́м и Христо́с я́ко пресве́тла тя́ свети́льника чудесы́ обогати́, Са́вво, о́тче на́ш, моли́ спасти́ся душа́м на́шим.

Стихи́ра, гла́с 2:

Преподо́бне о́тче, измла́да в доброде́тели приле́жно обучи́вся, орга́н бы́л еси́ Свята́го Ду́ха, и от Него́ прие́м чуде́с де́йство, научи́л еси́ челове́ки преоби́дети сла́дкая. Ны́не же, боже́ственным све́том чисте́йше осиява́емь, просвети́ и на́ша мы́сли, Са́вво, о́тче на́ш.

Кано́н свята́го, гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Савво, моли Бога о нас.

Наста́ви мя́, Го́споди Бо́же мо́й, да возмогу́ благоче́стно уго́дника Твоего́, преподо́бнаго Са́ввы, сла́вное и честно́е восхвали́ти торжество́.

Припев: Преподобне отче Савво, моли Бога о нас.

Му́жески подвиза́лся еси́ и, зарю́ духо́вную восприе́м, взя́лся еси́ к высоте́ небе́сней, и ны́не со Ангелы прославля́ешися.

Сла́ва Отцу́ и Сы́ну и Свято́му Ду́ху:

Ору́жием креста́ огражда́яся, преподо́бне, всю́ си́лу проти́внаго победи́л еси́ и до конца́ сего́ без ве́сти сотвори́л еси́.

И ны́не и при́сно и во ве́ки веко́в. Ами́нь.

Богородичен: Пресу́щное Сло́во, существо́ на́ше прие́м от чи́стых крове́й Твои́х, богосоде́ла на́с, тле́ния изба́вив, Чи́стая: сего́ ра́ди Тя́ при́сно сла́вим.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Савво, моли Бога о нас.

Молча́нием язы́к обузда́л еси́ и немяте́жным житие́м во пло́ти Ангельски, о́тче, пожи́л еси́.

Припев: Преподобне отче Савво, моли Бога о нас.

Вои́стинну благи́я жи́зни сподо́бился еси́, преподо́бне, чистото́ю и поще́нием сию́ обре́т. И ны́не со безпло́тными вопие́ши: не́сть свя́т, па́че Тебе́, Го́споди.

Сла́ва Отцу́ и Сы́ну и Свято́му Ду́ху:

Трисия́нным Све́том озаре́н, и благода́ть Ду́ха Свята́го всели́ся в тя́, преподо́бне, возлю́бльши чи́стую твою́ ду́шу, и непреста́нно вопие́ши: не́сть свя́т, па́че Тебе́, Го́споди.

И ны́не и при́сно и во ве́ки веко́в. Ами́нь.

Богородичен: Разуме́ти рождества́ Твоего́, Чи́стая, неизглаго́ланную глубину́ недоуме́ет у́м челове́чь: Бо́г бо, истощи́в Себе́ за милосе́рдие во утро́бе Твое́й, всего́ мя́ обнови́.

Седа́лен, гла́с 4:

Мра́з нощны́й претерпе́л еси́, и тяготу́ ва́ра дневна́го поне́сл еси́, и си́х ра́ди ве́чное наслажде́ние и пи́щу присноживу́щую восприя́л еси́, Христо́в уго́дниче, блаже́нне Са́вво: моли́ спасти́ся душа́м на́шим.

Сла́ва, и ны́не, Богородичен:

Чи́стая, Всенепоро́чная и Неискусому́жная, Яже еди́на Безле́тнаго Сы́на и Сло́ва Бо́жия в ле́то ро́ждши, Сего́ со святы́ми и честны́ми патриа́рхи, му́ченики, проро́ки и преподо́бными моли́ дарова́ти на́м очище́ние и ве́лию ми́лость.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Савво, моли Бога о нас.

Безме́рное смире́ние возлюби́в, своея́ мы́сли зри́тельное очи́стил еси́ и ны́не, в ра́йских селе́ниих водворя́яся, вопие́ши: сла́ва си́ле Твое́й, Го́споди.

Припев: Преподобне отче Савво, моли Бога о нас.

Сле́зными пото́ки, преподо́бне, зе́млю се́рдца твоего́ напои́л еси́, предстоя́ в моли́тве неколе́блен, Творцу́ все́х взыва́л еси́: сла́ва си́ле Твое́й, Го́споди.

Сла́ва Отцу́ и Сы́ну и Свято́му Ду́ху:

Не забу́ди ста́да твоего́, преподо́бне, е́же му́дре собра́л еси́ и в жи́зни се́й упа́сл еси́ благоче́стно: потщи́ся, о́тче на́ш Са́вво, ввести́ во огра́ду небе́сную.

И ны́не и при́сно и во ве́ки веко́в. Ами́нь.

Богородичен: Чистоты́ жили́ще, селе́ние Влады́ки все́х и проро́ков все́х сбытие́, Богора́дованная Чи́стая, пою́щия Тя́ уще́дри.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Савво, моли Бога о нас.

Бо́дренными бде́нии, блаже́нне, и ча́стыми воздыха́нии, Благода́ть Ду́ха возрасте́ в тебе́, о́тче, и сла́вна тя́, Са́вво, показа́.

Припев: Преподобне отче Савво, моли Бога о нас.

Влады́чне смире́ние восприи́м, во́ду почерпа́я, на ра́мех свои́х носи́ти изво́лил еси́: нача́льника трудополо́жна во все́м себе́ показа́л еси́.

Сла́ва Отцу́ и Сы́ну и Свято́му Ду́ху:

Преблаже́нне, богоприя́тне о́тче на́ш Са́вво, непреста́нно ста́до твое́ вопие́т ти́: моли́твами твои́ми ко Го́споду спаси́ ны́, мо́лимся.

И ны́не и при́сно и во ве́ки веко́в. Ами́нь.

Богородичен: По рожде́нии стра́шнем пребыла́ еси́ Де́ва, я́коже пре́жде. Бо́г бе́ рожде́йся, устроя́яй вся́ во́лею, Безневе́стная Мари́е Богоблагода́тная.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Савво, моли Бога о нас.

Страда́нии по́двиг твои́х, преблаже́нне, клас боже́ственный возрасти́л еси́ и пита́еши благоче́стно восхваля́ющия тя́, Са́вво преподо́бне, о́тче на́ш.

Припев: Преподобне отче Савво, моли Бога о нас.

Кня́зя проше́ние, о́тче, со тща́нием исполня́я, хра́м Богома́тере воздви́гл еси́, в не́мже пра́здничною ра́достию мона́хов мно́жества веселя́тся, па́мять твою́ прославля́юще.

Сла́ва Отцу́ и Сы́ну и Свято́му Ду́ху:

Ка́плями по́тов твои́х, преподо́бне, враго́в ополче́ния попра́л еси́ и дости́гл еси́ Ангельския невеще́ственныя ли́ки.

И ны́не и при́сно и во ве́ки веко́в. Ами́нь.

Богородичен: Всеблага́я Влады́чице, я́же преблага́го Бо́га пло́тию ро́ждши, озло́бленное страстьми́ мое́ се́рдце очи́сти, да ве́рою и любо́вию велича́ю Тя́.

Конда́к, гла́с 2.

Госпо́дним жела́нием распали́вся, стра́сти плотски́я воздержа́нием оттря́с, Боже́ственнаго све́та незаходи́мое свети́ло яви́лся еси́, чуде́с луча́ми все́х просвеща́еши, притека́ющих к ра́це моще́й твои́х, Са́вво преподо́бне, о́тче на́ш.

Икос:

Всеси́льное Ду́ха Свята́го де́йство богови́дно в тя́ всели́ся, и боголе́пными манове́нии благоте́чне иды́й к горе́, иде́же хоте́л еси́ оби́тель воздви́гнути, и, я́коже небе́сный ра́й, благово́нными насажде́н цве́ты, сию́ обре́т, всели́лся еси́ и хра́м Богома́тере чу́ден воздви́гл еси́, мона́хов мно́жество собра́л еси́, и сия́, доброде́тельными дея́нии све́тло блиста́ющия, воздержа́нии му́дростная вообра́жь; и ны́не, в па́мять твою́ соше́дшеся, вопие́м ти́: моли́ о на́с, Са́вво преподо́бне, о́тче на́ш.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобне отче Савво, моли Бога о нас.

Пучи́ною сле́з твои́х, пребога́те, злонача́льнаго зми́я потопи́л еси́, я́ко победоно́сец изря́ден к небе́сным возлете́л еси́, непреста́нно вопие́ши: благослове́н Бо́г оте́ц на́ших.

Припев: Преподобне отче Савво, моли Бога о нас.

Житие́ незло́биво име́л еси́, и непоро́чно, и укра́шено по́ты страда́ния, прехва́льне, Боже́ственнаго светоли́тия испо́лнився, взыва́л еси́: благослове́н Бо́г оте́ц на́ших.

Сла́ва Отцу́ и Сы́ну и Свято́му Ду́ху:

Хва́лится, преподо́бне, гра́д тво́й, я́ко венце́м ца́рским обложи́ся, име́я мо́щи твоя́ в себе́, я́ко добра́ граждани́на от Бо́га прия́л е́сть.

И ны́не и при́сно и во ве́ки веко́в. Ами́нь.

Богородичен: Препе́тая Де́во, препе́таго Бо́га ро́ждшая, пою́щия Тя́ прича́стники покажи́ Све́та и изба́ви гее́нны огня́ и вся́каго вре́да вра́жия моли́твами Твои́ми.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобне отче Савво, моли Бога о нас.

Мудрова́ние плотско́е умертви́л еси́, че́сти и име́ния совле́клся еси́, от земли́ к небе́сным взы́ти тща́ся и вся́ пе́ти науча́я: Го́спода по́йте и превозноси́те его́ во ве́ки.

Припев: Преподобне отче Савво, моли Бога о нас.

Се́рдца твоего́ бразды́, о́тче Са́вво, му́дре возде́лал еси́, сле́зными ту́чами сия́ напои́л еси́ и благоуха́нно мѵ́ро прине́слся еси́ Христу́, Ему́же вопие́ши: Го́спода по́йте и превозноси́те Его́ во ве́ки.

Сла́ва Отцу́ и Сы́ну и Свято́му Ду́ху:

Христу́ принося́, блаже́нне, поще́ния, и сле́зы, и непоро́чную моли́тву, ри́зную ле́поту и мя́гкия оде́жды власяны́ми ру́бы премени́л еси́, си́м показу́я глубоча́йшее смире́ние.

И ны́не и при́сно и во ве́ки веко́в. Ами́нь.

Богородичен: Изба́вльшеся пе́рвыя кля́твы Рождество́м Твои́м, всеблагослове́нная Отрокови́це Богора́дованная, Гаврии́лов тебе́ гла́с возсыла́ем: ра́дуйся, вино́вная все́х спасе́ния.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобне отче Савво, моли Бога о нас.

Ви́дети сла́ву Вседержи́теля жела́я, обнови́л еси́ души́ кре́пость и сла́вою обогати́лся еси́ небе́сною.

Припев: Преподобне отче Савво, моли Бога о нас.

Честно́е украше́ние благода́ти, о́тче преподо́бне Са́вво, испроси́ Держа́вному Импера́тору на́шему во бране́х кре́пость и здра́вие телесе́, я́ко да непреста́нно тя́ велича́ем.

Сла́ва Отцу́ и Сы́ну и Свято́му Ду́ху:

Чи́ни Ангельстии тебе́, о́тче, срето́ша, и пра́ведных собо́ри возвесели́шася, и от вседержи́тельныя десни́цы Влады́чни венча́лся еси́, те́мже тя́ досто́йно велича́ем.

И ны́не и при́сно и во ве́ки веко́в. Ами́нь.

Богородичен: Све́том Твои́м мя́, Богора́дованная в жена́х Де́во, просвети́, молю́ся, и огня́ ве́чнаго изба́ви мя́, я́ко да велича́ю Тя́ и по до́лгу да воспою́ вели́чия Твоя́.

Свети́лен:

По́мыслом лу́чшим стра́сти удержа́в, и де́монов свире́пства низложи́л еси́. И ны́не со дерзнове́нием предстоя́ Христу́, моли́ся о ста́де твое́м, о́тче на́ш.

Слава, и ныне, богородичен:

По Бо́зе на Тя́ упова́ем, Пречи́стая, из Тебе́ проше́дшему сраспина́еми Христу́, Твои́ми к Нему́ мольба́ми неврежде́нны до конца́ ны́ сохрани́.

Молитва преподобному Савве, игумену Сторожевскому, Звенигородскому

О, пречестна́я и свяще́нная главо́! Небе́снаго Иерусали́ма граждани́не, Пресвяты́я Тро́ицы обита́лище, преподо́бне о́тче Са́вво! Ве́лие име́я дерзнове́ние ко Всеми́лостивому Влады́це, моли́ся о ста́де огра́ды твоея́ и о всех по ду́ху ча́дех твои́х. Не премолчи́ за ны ко Го́споду и не пре́зри ве́рою и любо́вию чту́щих тя. Испроси́ предста́тельством твои́м у Царя́ ца́рствующих мир Це́ркви, под зна́мением креста́ вои́нствующей, архиере́ом святи́тельства благоле́пие, мона́шествующим до́брое в по́двизех тече́ние; святе́й оби́тели сей, гра́ду сему́ и всем градом и стра́нам охране́ние; ми́ру безмяте́жие и мир, гла́да и па́губы избавле́ние; ста́рым и немощны́м утеше́ние и подкрепле́ние, ю́ным и младе́нцам благо́е в ве́ре возраста́ние, в Ева́нгельском уче́нии тве́рдое обуче́ние, и в чистоте́ и целому́дрии пребыва́ние; вдови́цам и сиротам ми́лость и заступле́ние, плене́нным отра́ду и возвраще́ние, боля́щим исцеле́ние, малоду́шным успокое́ние, заблу́ждшим исправле́ние, согреша́ющим дух сокруше́ния, бе́дствующим благовре́менну по́мощь. Не посрами́ нас, к тебе́ с ве́рою притека́ющих, споспешеству́й, я́ко чадолюби́вый оте́ц ча́дам, и нам понести́ и́го Христо́во во благоду́шии и терпе́нии, и всех упра́ви в ми́ре и покая́нии сконча́ти живо́т свой непосты́дно и пресели́тися со упова́нием во оби́тели Небе́сныя. Иде́же ты, по труде́х и по́двизех, ны́не водворя́ешися со А́нгелы и Святы́ми, зря и прославля́я Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.