19 февраля.

Канон преподобному Вуколе, епископу Смирнскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Пра́вило ве́ры и о́браз кро́тости, воздержа́ния учи́теля яви́ тя ста́ду твоему́ я́же веще́й и́стина, сего́ ра́ди стяжа́л еси́ смире́нием высо́кая, нището́ю бога́тая, о́тче Вуко́ле, моли́ Христа́ Бо́га спасти́ся душа́м на́шим.

Кано́н свята́го. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Вуколе, моли Бога о нас.

Боже́ственными светлостьми́ и свяще́нными и светоно́сными сия́ньми просвеща́емь при́сно, мою́ озари́ ду́шу, све́тлый тво́й пра́здник, о́тче, чту́щаго.

Припев: Преподобне отче Вуколе, моли Бога о нас.

Всесве́тлу тя́ звезду́ мы́сленное показа́в Со́лнце, светлостьми́ твои́х доброде́телей уясни́ зе́млю, святи́телю Христо́в, Вуко́ле всему́дре.

Сла́ва Отцу́ и Сы́ну и Свято́му Ду́ху:

Житие́ при́сно освяще́нно, и чи́сто, и скве́рнам несме́сно показу́я, Христо́в свяще́н сосу́д, му́дре, позна́лся еси́ на земли́, Вуко́ле пресла́вне.

И ны́не и при́сно и во ве́ки веко́в. Ами́нь.

Богородичен: Иже Отцу́ Сы́й Единоро́ден па́че ума́ во чре́ве Твое́м вопло́щься боголе́пно, челове́ки обожи́, Чи́стая, за мно́жество щедро́т Преблаги́й.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Вуколе, моли Бога о нас.

Сы́н дне́ и све́та бы́в, святи́телю, труды́ боже́ственными, всели́лся еси́ я́ве во све́тлостех ны́не святы́х, благода́тию сия́я.

Припев: Преподобне отче Вуколе, моли Бога о нас.

Пропове́дая Еди́но благоче́стно Тро́ицы Существо́, многобо́жную ле́сть искорени́л еси́ от земли́, я́ко святи́тель че́стен, я́ко Сло́ва и́стинный служи́тель.

Сла́ва Отцу́ и Сы́ну и Свято́му Ду́ху:

Пу́ть показа́л еси́ жи́зни все́м прельще́нным от враго́в наве́та и приве́л еси́ ты́я, я́ко па́стырь слове́сен, спасе́ны, Сло́ву, Первопа́стырю.

И ны́не и при́сно и во ве́ки веко́в. Ами́нь.

Богородичен: Приста́нище бу́ди ми́ и стра́ж, лю́тыми треволне́нии страсте́й неосла́бно обурева́ему при́сно, в мо́ри, Чи́стая, жития́, Еди́на Присноде́во.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Вуколе, моли Бога о нас.

Предве́даяй Бо́г твоея́, богоблаже́нне, души́ красоту́ и ума́ чистоту́, священнопропове́дника му́дра свяще́нно тя́ рукополага́ет.

Припев: Преподобне отче Вуколе, моли Бога о нас.

От Ду́ха просвеща́емь, су́щия во тме́ пре́лести просвеща́еши и креще́нием сы́ны дне́ соверша́еши, святи́телю пресла́вне.

Сла́ва Отцу́ и Сы́ну и Свято́му Ду́ху:

Обре́т тя́, благода́тию сия́юща, сла́вный Богосло́в, ру́ку возлага́ет боже́ственными вожде́ньми и свяще́нника соверша́ет свяще́нна, Вуко́ле всему́дре.

И ны́не и при́сно и во ве́ки веко́в. Ами́нь.

Богородичен: Разу́мно в купине́ Тя́ Моисе́й узре́, священнообразу́ему, Огня́, хотя́щаго бы́ти во утро́бе, явля́ет та́инственно, Богоро́дице Присноде́во.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Вуколе, моли Бога о нас.

Святи́тельскую свяще́нную оде́жду носи́в свяще́нно, нечести́выя просвети́л еси́, честны́й святи́телю, Еди́ницу Несозда́нную в Трие́х Ли́цех, Вуко́ле, пропове́дая.

Припев: Преподобне отче Вуколе, моли Бога о нас.

От у́ст во́лка мы́сленнаго исхи́тил еси́ лю́ди, уче́ньми богогла́сных твои́х у́ст, и ерети́чествующая незатворе́нная уста́ твои́ми богосло́вии загради́л еси́, о́тче.

Сла́ва Отцу́ и Сы́ну и Свято́му Ду́ху:

Ме́рзкий победи́ся твои́ми свяще́нными словесы́ Маркио́н и изри́неся вся́каго безме́стия изрыга́яй ти́ну злосмра́дну, Вуко́ле сла́вне.

И ны́не и при́сно и во ве́ки веко́в. Ами́нь.

Богородичен: Зако́ны естества́ Иису́с, Пресу́щественный Бо́г, обновля́ет, Всенепоро́чная, из Твоея́ утро́бы ражда́яся, Еди́н, осуществова́вый вся́ во́лею.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Вуколе, моли Бога о нас.

Вознося́щее смире́ние, чистоту́ ума́, любо́вь нелицеме́рну, ве́ру и наде́жду име́я чи́сту, Вуко́л сла́вный Тро́ице яви́ся жили́ще.

Припев: Преподобне отче Вуколе, моли Бога о нас.

Вельми́ украси́вша Сми́рняном свяще́нное седа́лище, тя́, прехва́льне, тайново́ждствует Ду́х, Су́щаго по тебе́ па́стыря Полика́рпа, руко́ю твое́ю, Вуко́ле, соверша́ема.

Сла́ва Отцу́ и Сы́ну и Свято́му Ду́ху:

Разуме́в зва́ние твое́ Ду́хом, прему́дре, су́щаго по тебе́ благода́тию слове́сным овца́м наста́вника приво́диши к престо́лу, доброде́телей сия́нием блиста́юща.

И ны́не и при́сно и во ве́ки веко́в. Ами́нь.

Богородичен: Две́рь благода́ти, отве́рзшая челове́ком две́рь небе́сную, покая́ния две́ри ми́ пресве́тло отве́рзи, Влады́чице, и от вра́т сме́ртных свободи́.

Седа́лен свята́го, гла́с 4.

Свяще́нства све́том сия́я, просвети́л еси́ лю́ди, святи́телю, и и́дольскую тму́ потреби́л еси́, заре́ю же исцеле́ний страсте́й мглу́ разори́в, преше́л еси́ к незаходи́мому сия́нию, о на́с моля́, приле́жно тя́ чту́щих, Вуко́ле блаже́нне.

Сла́ва, и ны́не, богоро́дичен, гла́с 4.

Иже на престо́ле херуви́мстем седя́й, и в не́дрех Отчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х; вопло́щься бо, Бо́г вои́стинну, воцари́ся над все́ми язы́ки, и разу́мно ны́не пои́м Ему́. Его́же умоли́ спасти́ся рабо́м Твои́м.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобне отче Вуколе, моли Бога о нас.

Вразумля́я неразу́мныя, исправля́я же ле́стию попо́лзшияся, о́тче, спа́сл еси́ и Бо́гу приве́л еси́ чи́сты, Тому́ песнопою́щия благоче́стно: благослове́н еси́, Бо́же оте́ц на́ших.

Припев: Преподобне отче Вуколе, моли Бога о нас.

Украси́шася, всеблаже́нне, лани́ты твоя́, воплоще́ние пропове́дающия, за неизрече́нное милосе́рдие Возсия́вшаго на́м, к Нему́же вопия́л еси́ приле́жно: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Облада́в воздержа́нием телесе́, страстьми́, сла́вне, необлада́н льсти́ваго яви́лся еси́ прило́гами и ны́не воспева́еши неле́стно: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Изба́вльшеся дре́вняго осужде́ния Рождество́м Твои́м, Всенепоро́чная, я́ко Влады́чицу воспева́ем Тя́, спа́сшиися, Де́во, Тебе́ ра́ди, вопию́ще и глаго́люще ве́рно: благослове́на, Яже Бо́га пло́тию ро́ждшая.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобне отче Вуколе, моли Бога о нас.

Процве́л еси́, я́ко фи́никс, во дво́рех Бо́жиих, до́лжным пра́ведных сно́м усну́л еси́; прино́сит же наслажде́ние боже́ственный тво́й гро́б чу́до зря́щим, Вуко́ле богопропове́дниче.

Припев: Преподобне отче Вуколе, моли Бога о нас.

Бо́жие Бо́г Сло́во Ипоста́сное свяще́нна святи́теля тя́ поставля́ет, помазу́юща лю́ди свяще́нно, святи́телю наста́вниче Сми́рняном, свети́льниче вселе́нныя.

Сла́ва Отцу́ и Сы́ну и Свято́му Ду́ху:

Вопло́щшагося Сло́ва богосло́вил еси́ и мно́ги от безслове́сия лю́ди спа́сл еси́, боже́ствен бы́в учени́к возсия́вшаго в богосло́вии, Вуко́ле богоно́се.

И ны́не и при́сно и во ве́ки веко́в. Ами́нь.

Богородичен: Свяще́нно науча́шеся Твои́м та́инством проро́ков, Богоро́дице, боже́ственное сосло́вие, издале́ча разуме́в и я́сно излага́я богозна́мения Боже́ственнаго Рождества́ Твоего́.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобне отче Вуколе, моли Бога о нас.

Яко све́т, я́ко заря́, я́ко вели́кое со́лнце, я́ко мо́лния, Христо́ву Це́рковь облиста́л еси́, и ве́рных мы́сли просвети́л еси́, и в невече́рних ме́стех всели́лся еси́, поя́ трисвяты́ми гла́сы Тро́ицу несозда́нную.

Припев: Преподобне отче Вуколе, моли Бога о нас.

Пло́ти и ми́ра вне́ бы́в священноде́йственне, ко преми́рным, ра́дуяся, преше́л еси́ чино́м, обожа́емь положе́нием светле́йшим, те́мже па́мять твою́ ве́рою соверша́ем на земли́, Вуко́ле всему́дре.

Сла́ва Отцу́ и Сы́ну и Свято́му Ду́ху:

Земля́ те́ло твое́ блаже́нное покрыва́ет, я́ве исцеле́ния точа́що и дарова́ния, не́бо же ду́х со избра́нными но́сит и́же от ве́ка, Боже́ственными сия́ньми укра́шен вои́стинну, Вуко́ле сла́вне.

И ны́не и при́сно и во ве́ки веко́в. Ами́нь.

Богородичен: Гла́сом Ангеловым вели́каго сове́та Ангела, Чи́стая, Христа́ Емману́ила породила́ еси́, ко Ангелом до́льныя совокупля́юща, еди́на Благослове́нная, еди́на Всепе́тая, еди́на вино́вна на́шего, Де́во, обоже́ния.

Молитва

О свяще́нная главо́, преподо́бне о́тче, преблаже́нне а́вво Вуколе, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.