19 февраля.
Канон святому равноапостольному Фотию, патриарху Константинопольскому, Исповеднику.
![Святому равноапостольному Фотию, патриарху Константинопольскому Святому равноапостольному Фотию, патриарху Константинопольскому](img_i/049.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Тропа́рь, гла́с 4:
Яко апо́столов единонра́вный и вселе́нныя учи́тель, Влады́ку все́х, Фо́тие, моли́, ми́р вселе́нней дарова́ти и душа́м на́шим ве́лию ми́лость.
Велича́ние:
Велича́ем тя́, святи́телю о́тче Фо́тие, и чте́м святу́ю па́мять твою́, ты́ бо мо́лиши за на́с Христа́ Бо́га на́шего.
Стихира, гла́с 6:
Излия́ся благода́ть во устна́х твои́х, преподо́бне о́тче, и бы́л еси́ па́стырь Христо́вы Це́ркве, уча́ слове́сныя о́вцы, ве́ровати в Тро́ицу Единосу́щную, во Еди́ном Божестве́.
Кано́н святи́теля, гла́с 4.
Пе́снь 1.
Ирмос: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся, све́тло торжеству́я, и воспою́, ра́дуяся, Тоя́ чудеса́.
Припев: Святителю отче Фотие, моли Бога о нас.
Свети́ло богоза́рнейшее, све́ту тезоимени́те, свя́те, тму́ отжени́ ума́ моего́, сия́ньми мя́ све́та Боже́ственнаго озари́в, я́ко да восхвалю́ твоя́ исправле́ния.
Припев: Святителю отче Фотие, моли Бога о нас.
Ве́ры утвержде́ние, Це́ркве учи́теля и сто́лп незы́блем испове́дания, и многосве́тел благода́ти свети́льник, и уста́ богодухнове́нная тя́, Фо́тие, позна́хом.
Сла́ва Отцу́ и Сы́ну и Свято́му Ду́ху:
Зако́нно подвиза́лся еси́, предбе́дствуя, чу́дне, о Боже́ственнем пропове́дании, я́ко святи́тель ве́рен, и подави́л еси́ жи́лами твои́х догма́тов, я́коже зве́ря, Никола́я суему́дреннаго.
И ны́не и при́сно и во ве́ки веко́в. Ами́нь.
Богородичен: Мари́ю Пречи́стую, прииди́те, воспои́м вси́, Еди́ну украси́вшую челове́чество, ро́ждшую Бо́га воплоще́на, и Де́ву пребы́вшую неврежде́ну.
Пе́снь 3.
Ирмос: Твоя́ песносло́вцы, Богоро́дице, живы́й и незави́стный Исто́чниче, ли́к Себе́ совоку́пльшия, духо́вно утверди́, в боже́ственней Твое́й сла́ве, венце́в сла́вы сподо́би.
Припев: Святителю отче Фотие, моли Бога о нас.
Глаго́лавый на высоту́ хулу́ за́падный зми́й лю́тый, словесы́ твои́ми заусти́ся, свети́льниче богови́днейший, те́мже и правосла́внии достодо́лжно тя́ почита́ем.
Припев: Святителю отче Фотие, моли Бога о нас.
Умерщвля́ется ересе́й зми́й словесы́ твои́ми, о́тче, прему́дрыми, я́коже ка́мением поража́емь, и во главу́ сокруша́емь, те́мже и це́рковь достодо́лжно тя́ почита́ет.
Сла́ва Отцу́ и Сы́ну и Свято́му Ду́ху:
Писа́ний представле́ньми до́блественными благода́ти Ду́ха, му́дре, о́бщей бы́ти доказа́л еси́, и Ду́ху именова́тися, Сего́ же Ипоста́си от Отца́ исходи́ти.
И ны́не и при́сно и во ве́ки веко́в. Ами́нь.
Богородичен: Безнача́льнаго Роди́теля Сло́во, Иже вся́каго вы́шший нача́ла, нача́ло ны́не воплоща́емь от Тебе́, Чи́стая, прия́т и под вре́менем бы́сть, време́н все́х превы́шший.
Седа́лен гла́с 8.
Проро́ку Илии́ ревну́я и Иоа́нну, та́кожде, Крести́телю, му́жески изобличи́л еси́ цари́ беззако́нновавшия. Священнонача́лия престо́л боже́ственне украси́л еси́, и уче́ний мно́жеством ми́р обогати́л еси́, те́мже и боже́ственна списа́ния употреби́в, ве́рныя подтверди́л еси́ и неве́рныя обрати́л еси́, святи́телю чу́дне, моли́ Христа́ Бо́га, согреше́ний оставле́ние дарова́ти пра́зднующим любо́вию святу́ю па́мять твою́.
Пе́снь 4.
Ирмос: Седя́й в сла́ве на Престо́ле Божества́ во о́блаце ле́гце, при́иде Иису́с Пребоже́ственный, Нетле́нною Дла́нию и спасе́ зову́щия: сла́ва, Христе́, си́ле Твое́й.
Припев: Святителю отче Фотие, моли Бога о нас.
В ю́ности целому́дрие, в ста́рости ра́зум, и во все́м житии́ тве́рдость и долготерпе́ние, и ко все́м любо́вь показа́л еси́, зову́щим: сла́ва, Христе́, си́ле Твое́й.
Припев: Святителю отче Фотие, моли Бога о нас.
Светле́йшее твое́ житие́, я́коже пра́вило изве́стнейшее, вся́кою, о́тче, Боже́ственною доброде́телию показа́ся, в моли́твах, в поще́ниих, бде́ниих же и моле́ниих, и́же к Бо́гу Человеколю́бцу.
Сла́ва Отцу́ и Сы́ну и Свято́му Ду́ху:
Дрема́ние твои́ма ве́ждома, богоно́се, не да́л еси́, до́ндеже, о́тче, до́м себе́ сама́го соверши́л еси́ Всеви́дцу Влады́це красне́йший, к Нему́же взыва́л еси́: сла́ва, Христе́, си́ле Твое́й.
И ны́не и при́сно и во ве́ки веко́в. Ами́нь.
Богородичен: Умерщвле́нныя, Всесвята́я, челове́ки оживи́ла еси́, па́дшия ты́я ко истле́нию возста́вила еси́, Жизнода́вца ро́ждши, избавля́ющаго зову́щия: сла́ва, Христе́, си́ле Твое́й.
Пе́снь 5
Ирмос: Ужасо́шася вся́ческая о Боже́ственней сла́ве Твое́й: Ты́ бо, неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м, воспева́ющим Тя́, ми́р подава́ющая.
Припев: Святителю отче Фотие, моли Бога о нас.
Благода́ть прие́м Всесвята́го Ду́ха, Боже́ственное жили́ще показа́лся еси́, боже́ственне научи́в богозна́ния све́ту, Фо́тие всечу́дне му́дре, о́тче святе́йший, Це́ркве утвержде́ние.
Припев: Святителю отче Фотие, моли Бога о нас.
Язы́к тво́й тро́сть Уте́шителя бы́сть, ско́ро избавле́ние даю́щаго позна́вшим влады́чество Его́, и душа́м и́х вдыха́юща ра́зум небе́сный, свяще́ннейший Фо́тие.
Сла́ва Отцу́ и Сы́ну и Свято́му Ду́ху:
Блиста́ющася слове́с же и уче́ний благода́тьми, тя́ Христо́с показа́ ми́рови ерети́чествующих отража́юща стремле́ния, и ду́ши просвеща́юща ве́рных, все́х пою́щих тя́, ве́ры пропове́дника.
И ны́не и при́сно и во ве́ки веко́в. Ами́нь.
Богородичен: Де́ва роди́ Сы́на Преве́чнаго, в естество́ обле́кшася челове́ческое, я́коже науча́я, святи́тель глаго́лет, и спа́сшаго сие́ от тле́ния стра́стию те́ла, и Де́вою пребы́сть.
Пе́снь 6.
Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.
Припев: Святителю отче Фотие, моли Бога о нас.
Вели́каго воспои́м Фо́тия, трубу́, я́сно пропове́давшую Боже́ственнаго Ду́ха от Отца́ исхожде́ние, я́коже гро́мов сы́н богосло́вствова.
Припев: Святителю отче Фотие, моли Бога о нас.
Расте́рзано бы́сть все́ шата́ние, твои́ми, свяще́ннейший Фо́тие, словесы́ ерети́ческое, те́мже ве́рных собра́ние светлосоверша́тельно почита́ет па́мять твою́, свя́те.
Сла́ва Отцу́ и Сы́ну и Свято́му Ду́ху:
Игра́ет и все́ весели́тся собра́ние ве́рных правосла́вное, всечестны́й Фо́тие, Григо́рия зря́ тя́ и Златоу́стаго, вои́стинну че́стна прее́мника.
И ны́не и при́сно и во ве́ки веко́в. Ами́нь.
Богородичен: Пою́ Твое́, Отрокови́це, зача́тие, пою́ Твое́ несказа́нное Рождество́, пою́ покро́в Тво́й, и́мже вре́да вся́каго избавля́юся, и́же к Твое́й ти́хости то́щно притека́ющий.
Конда́к гла́с 8.
Церко́вный свети́льник светоза́рнейший и правосла́вных наста́вник боже́ственнейший, да увенча́ется ны́не цве́ты пе́сненными, боговеща́нная цевни́ца Ду́ха, крепча́йший ересе́м противобо́рец, ему́же и зове́м: ра́дуйся, всечестны́й Фо́тие.
Икос:
Ангел от челове́к показа́лся еси́, о о́тче, от земли́ к небе́сным дости́г. Те́мже безпло́тным лико́м изравня́ема тя́ зря́, преподо́бне, ужаса́юся и любо́вию зову́ ти́ благогове́йно такова́я: ра́дуйся, и́мже Тро́ица покланя́ема быва́ет; ра́дуйся, и́мже Бо́г воспева́ется; ра́дуйся, правосла́вных пра́вило пра́вейшее; ра́дуйся, беззако́ннующия изоблича́яй тверде́йше; ра́дуйся, высото́ смире́ния неудобовосходи́мая мно́гими; ра́дуйся, глубино́ разсужде́ния неудобозри́мая сме́ртными; ра́дуйся, я́ко бы́л еси́ Бо́гу боже́ственный жре́ц; ра́дуйся, я́ко приво́диши Бо́гу спасе́нных; ра́дуйся, Бо́жиим му́чеником единовсе́льниче; ра́дуйся, честны́м преподо́бным собесе́дниче; ра́дуйся, и́мже злочести́вии потребля́ются; ра́дуйся, и́мже ве́рнии уверя́ются. Ра́дуйся, всечестны́й Фо́тие.
Пе́снь 7.
Ирмос: Не послужи́ша тва́ри богому́дрии, па́че Созда́вшаго, но, о́гненное преще́ние му́жески попра́вше, ра́довахуся, пою́ще: препе́тый отце́в Госпо́дь и Бо́г, благослове́н еси́.
Припев: Святителю отче Фотие, моли Бога о нас.
Преше́л еси́, богому́дре о́тче, к небе́сным селе́нием, и прибли́жився Бо́гу, прича́стием обожа́ем боже́ствен бы́л еси́, поя́ преподо́бне: отце́в Госпо́дь и Бо́г, благослове́н еси́.
Припев: Святителю отче Фотие, моли Бога о нас.
Вразумля́еми твои́ми словесы́ науча́емся, о́тче всехва́льне, я́коже в со́лнцех трие́х, неразде́льно, несеко́мо почита́ти Божество́, Ему́же и пое́м: отце́в Госпо́дь и Бо́г, благослове́н еси́.
Сла́ва Отцу́ и Сы́ну и Свято́му Ду́ху:
Ко́ль всесвяще́нно, и боже́ственно, и богуго́дно испове́дание твое́: я́коже бо зла́то очи́щся, Бо́гу угоди́л еси́, о́тче треблаже́нне, веселя́ся подража́нием, преподо́бне, страсте́й Спа́совых.
И ны́не и при́сно и во ве́ки веко́в. Ами́нь.
Богородичен: Все́м вино́вна челове́ком яви́лася еси́ Боже́ственнаго избавле́ния, Изба́вителя все́х ро́ждшая, Всенепоро́чная, Ему́же вси́ пое́м: превозноси́мый отце́в Госпо́дь и Бо́г, благослове́н еси́.
Пе́снь 8.
Ирмос: Отроки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.
Припев: Святителю отче Фотие, моли Бога о нас.
Теку́т исто́чницы твои́х догма́тов и всю́ Це́рковь напая́ют, Фо́тие пречу́дне, те́мже восхваля́ем тя́, я́ко правосла́вных утвержде́ние, о́тче, и похвалу́, Го́спода пою́ще непреста́нно и превознося́ще во вся́ ве́ки.
Припев: Святителю отче Фотие, моли Бога о нас.
Ко приста́нищу ти́хому ты́ приста́л еси́, жите́йския бу́ри отри́нув, име́л бо еси́ направля́юща все́ твое́ ше́ствие Упра́вителя Го́спода, Фо́тие всему́дре, ма́нием вся́ творя́щаго, Его́же превозно́сим во вся́ ве́ки.
Сла́ва Отцу́ и Сы́ну и Свято́му Ду́ху:
Све́т трисия́тельный Пребоже́ственныя Тро́ицы в тя́ все́лься, све́т тя́ вторы́й показа́ просвеща́ющь собо́р правосла́вных, ерети́ческое же по́лчище, о́тче, притупля́ющь, и — Го́спода по́йте, — зову́щь, — и превозноси́те во вся́ ве́ки.
И ны́не и при́сно и во ве́ки веко́в. Ами́нь.
Богородичен: Ши́пок в те́рнии Тя́ обре́т, и цве́т во удо́лиях всеблагово́нный, кри́н же всенескве́рный, Влады́чице Богоневе́сто, Тво́й Жени́х свы́ше в Тя́ всели́ся, и ми́р облагоуха́ ве́сь, Тя́ превознося́щь во вся́ ве́ки.
Песнь 9
Ирмос: Вся́к земноро́дный да взыгра́ется, Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.
Припев: Святителю отче Фотие, моли Бога о нас.
Всего́ себе́ привожду́, чу́дне, к боже́ственному покро́ву твоему́, я́ко святи́тель же вла́сть реши́ти прегреше́ния от Христа́ прие́м, мои́х прегреше́ний вери́ги расто́рг, спаси́ мя моли́твами твои́ми и Боже́ственным све́том просвети́.
Припев: Святителю отче Фотие, моли Бога о нас.
Взя́лся еси́ к све́ту незаходи́мому, сла́вне, земны́х, о́тче, изба́влься, и Вседержи́телю и Трисо́лнечному Све́ту предстои́ши с го́рними чи́нми, и отту́ду посыла́емаго сия́ния наслажда́ешися, всеблаже́нне, и на́с просвеща́еши, восхваля́ющих тя́.
Сла́ва Отцу́ и Сы́ну и Свято́му Ду́ху:
Якоже не́кий храбо́рник яви́лся еси́ изобличи́тель пре́лестныя е́реси, Правосла́вия же Боже́ственный защи́тник со Игна́тием, Фо́тие, его́же и прее́мник и нра́вов и престо́ла бы́л еси́, и мо́лишися с ни́м ко Го́споду.
И ны́не и при́сно и во ве́ки веко́в. Ами́нь.
Богородичен: Всего́ мя Бо́г обожи́ти хотя́, ве́сь соединя́ется Ти́, и непостижи́мое новосече́тся все́м та́инство: ражда́еши, Де́ва Нетле́нна, и пло́ть зри́тся Бо́г, Его́же воспева́юще, Тя́ ны́не ублажа́ем, Мари́е, я́коже Сама́ прорекла́ еси́.
Свети́лен.
Предста́теля тя́ тепле́йша Це́рковь име́ет и све́тла учи́теля, о́тче, те́мже све́тло твою́ па́мять торжеству́ет, зову́щи: при́сно покрыва́й ста́до твое́, и сохраня́й невреди́мо от е́реси же и вре́да, священнонача́льниче Госпо́день.
Молитва святителю Фотию Константинопольскому
О, всему́дре и преизря́дне архиере́ю равноапо́стольный просвети́телю земли́ бо́лгарския, светлогла́сная гу́сло Боже́ственнаго Ду́ха, святи́телю о́тче Фо́тие к тебе́ ны́не притека́ем, и ма́лое сие́ моле́ние тебе́ умиле́нно прино́сим. Услы́ши на́с, смире́нных ча́д твои́х, яви́ предста́тельство твое́ о на́с к Вы́шнему, те́пле Того́ умоля́я да прости́т ны́ рабы́ своя́, да отве́рзет на́м две́ри милосе́рдия своего́. Не́смы бо досто́йни, ниже́ дово́льно зре́ти высоту́ небе́сную от мно́жества грехо́в на́ших сляца́еми. Но а́ще и тя́жце согреши́хом и николи́же во́ли Созда́теля на́шего сотвори́хом, ни сохрани́хом повеле́ний его́, оба́че не обрати́хомся к бо́гу ино́му, ниже́ простро́хом ру́це к бо́гу чужде́му. Преклоня́юще коле́на сокруше́нна и смире́нна се́рдца на́шего зижди́телю своему́ и твоего́ оте́ческаго заступле́ния к Нему́ па́ки про́сим: предста́тельствуй, уго́дниче Христо́в, светлопозлаще́нный Фо́тие, стране́ на́шей и Це́ркве Бо́лгарстей, не́когда по́том трудо́в твои́х напая́емой, ны́не же го́рькими собла́зны снеда́емой. Помози́ на́м, свя́тче Бо́жий, да не поги́бнем со беззако́нии на́шими, изба́ви на́с от вся́каго зла́ и от вся́кия ве́щи сопроти́вныя, упра́ви у́м на́ш и укрепи́ сердца́ на́ша в правосла́вней ве́ре, в не́йже твои́м предста́тельством и хода́тайством ни ра́нами, ни преще́нием, ни ко́им гне́вом от Созда́теля своего́ ума́лены бу́дем. Мо́лимтися, па́стырю до́брый, во́лки тя́жки от слове́снаго ста́да Христо́ва отгоня́й, лати́нскую горды́ню, а́ки бы смире́нием себе́ покрыва́ющую, и ле́стне о любви́ глаго́лющую, на Це́рковь же Собо́рную кре́пце востаю́щу, я́коже дре́вле посецы́. На́с же от ерети́ческих ухищре́ний до́бре сохрани́ и и́стинствовати в любви́ наста́ви. Вся́кому доброде́ланию, наипа́че же покая́нию сле́зному о гресе́х на́с научи́: я́ко да по исхо́де на́шем в тамошный ми́р омофо́ром мо́лит твои́х покрыва́еми и Ма́терним заступле́нием Преблагослове́нныя Влады́чицы на́шея сохрани́, изба́вимся возду́шных мыта́рств и ве́чнаго муче́ния, да с тобо́ю и со все́ми всегда́ прославля́ем Всепе́тое и́мя Отца́ и Сы́на и Свята́го Ду́ха, и ны́не и при́сно и в безконе́чныя ве́ки веко́в, Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.
![Святому равноапостольному Фотию, патриарху Константинопольскому Святому равноапостольному Фотию, патриарху Константинопольскому](img_b/049.jpg)