18 февраля.

Канон святой мученице Агафии Панормской (Палермской).

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 4:

Агница Твоя́, Иису́се, Ага́фия, зове́т ве́лиим гла́сом: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нию Твоему́, и стражду́ Тебе́ ра́ди, я́ко да ца́рствую в Тебе́, и умира́ю за Тя́, да и живу́ с Тобо́ю; но, я́ко же́ртву непоро́чную, приими́ мя, с любо́вию поже́ршуюся Тебе́. Тоя́ моли́твами, я́ко Ми́лостив, спаси́ ду́ши на́ша.

Кано́н святы́я. Гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Святая мученице Агафие, моли Бога о нас.

Благи́х пе́рвую вину́ возжела́вши, благоимени́таго зва́ния, му́ченице, сподо́билася еси́, несказа́ннаго промышле́ния, нра́вов твои́х проразуме́вши благосты́ню.

Припев: Святая мученице Агафие, моли Бога о нас.

Взяла́ся еси́, чи́стая, к житию́ пресве́тлому, плотско́е мудрова́ние презре́вши и к жела́ннейшему Жениху́ твоему́ кре́пко взира́ющи.

Сла́ва Отцу́ и Сы́ну и Свято́му Ду́ху:

Неве́ста Христо́ва, Боже́ственною бла́гостию украси́лася еси́, и де́вства добро́тами, и боже́ственными кровьми́ честна́го муче́ния, сугу́быми венцы́ венча́ема, сла́вная.

И ны́не и при́сно и во ве́ки веко́в. Ами́нь.

Богородичен: Боголе́пное селе́ние, Чи́стая, Ты́ была́ еси́, небе́с простра́ннейшее и чисте́йшее, Богоро́дице Де́во, и ны́не о Тебе́ ра́дуется де́вственный ли́к.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Святая мученице Агафие, моли Бога о нас.

Ага́фие, я́сный и красне́йший боже́ственных му́ченик цве́т и сла́ва, души́ моея́ ты́ озлобле́ние исцели́вши, му́ченице, удобри́.

Припев: Святая мученице Агафие, моли Бога о нас.

Ро́дными доброде́тельми себе́ уясни́ла еси́, Ага́фие, и му́ченица пронарекла́ся еси́, о привре́менных небре́гши и Бо́жие Ца́рство возлюби́вши.

Сла́ва Отцу́ и Сы́ну и Свято́му Ду́ху:

Все́х кра́сных Христа́ предпочла́ еси́, Ага́фие, привлечена́ боже́ственным жела́нием, и мучи́телей свире́пства благоде́рзостно и му́жески попра́ла еси́.

И ны́не и при́сно и во ве́ки веко́в. Ами́нь.

Богородичен: Богоневе́сто Чи́стая, Бо́га, Его́же родила́ еси́, моли́ изба́вити Тя́ пою́щия от искуше́ний, и обстоя́ний, и страсте́й, и бе́д, Всеблаже́нная.

Седа́лен святы́я, гла́с 3.

Сла́вою ве́ры и благоче́стием, преподо́бством, и де́вством, и усе́рдием укра́шена страда́ния, нарекла́ся еси́ у́м преподо́бен, самоизво́лен, вои́стинну че́сть к Бо́гу, оте́честву избавле́ние, Христу́ я́ко неве́ста моля́щися дарова́ти на́м ве́лию ми́лость.

Сла́ва, и ны́не, Богородичен:

Боже́ственнаго естества́ не отлу́чься, пло́ть бы́в во чре́ве Твое́м, но Бо́г вочелове́чься и пребы́сть, Иже по Рождестве́ Ма́терь Тя́ Де́ву, я́ко пре́жде Рождества́, сохрани́в Всенепоро́чну, Еди́н Госпо́дь, Того́ приле́жно моли́ дарова́ти на́м ве́лию ми́лость.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Святая мученице Агафие, моли Бога о нас.

Посрами́ся льсти́ваго зми́я безу́мие и обличи́ся, де́вы бо сего́ ны́не свире́пство попира́ют, Христу́, от Де́вы возсия́вшу на земли́ и все́х озари́вшу.

Припев: Святая мученице Агафие, моли Бога о нас.

Зако́нно целому́дрие нескве́рно удержа́вши, страстоте́рпице, ду́хи, ра́дующися, низложи́ла еси́ лука́вствия, Христо́вою вооружи́вшися благода́тию и кре́ст Сего́ на ра́мех взе́мши.

Сла́ва Отцу́ и Сы́ну и Свято́му Ду́ху:

Бу́ди ми́ предста́тельница всему́драя, лю́тых мя́ изыма́ющи и напа́стей, бу́ри же, и ско́рби, и наси́лия изба́ви вра́жия, я́ко да изба́влься, воспою́ тя, я́ко благу́ю предста́тельницу, благоимени́тая.

И ны́не и при́сно и во ве́ки веко́в. Ами́нь.

Богородичен: Неизме́рно Ангельския, Пречи́стая, све́тлости превозшла́ еси́, мы́сленнаго Со́лнца ро́ждши несказа́нно, Христа́, заря́ми Божества́ ве́рных мы́сли озаря́ющаго.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Святая мученице Агафие, моли Бога о нас.

Боже́ственными веле́нии пра́вима сла́вная, обра́зно плотска́го пристра́стия разреши́ла еси́ ю́з Ага́фие, ма́слина я́вльшися плодови́та.

Припев: Святая мученице Агафие, моли Бога о нас.

Все́ю любо́вию Христо́вою светле́йшая, блиста́ния зря́щи, я́же на земли́ до́лу влеку́щия презре́ла еси́ сла́сти, Онаго и Еди́наго жела́ющи красоты́.

Сла́ва Отцу́ и Сы́ну и Свято́му Ду́ху:

Да неизрече́нную сподо́бишися жи́знь, сла́вная, избра́нных ви́дети, му́ки претерпе́ла еси́ кре́пко, ра́дующися Ага́фие всехва́льная.

И ны́не и при́сно и во ве́ки веко́в. Ами́нь.

Богородичен: Тебе́, ро́ждшей Христа́, все́х Соде́теля, зове́м: ра́дуйся, Чи́стая, ра́дуйся, Све́т возсия́вшая на́м; ра́дуйся, вмести́вшая Бо́га Невмести́маго.

Пе́снь 6.

Ирмос: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.

Припев: Святая мученице Агафие, моли Бога о нас.

Суему́дрен сы́й мучи́тель тя́, до́брую де́ву, укра́сти наде́яшеся, но безсту́ден обличи́ся, прирази́вся тве́рдому твоему́ ра́зуму.

Припев: Святая мученице Агафие, моли Бога о нас.

Излия́ся благода́ть во устна́х твои́х, му́ченице благоимени́тая, я́сно бо обличи́ла еси́ я́ве безсту́днаго, богонауче́нным сло́вом обогати́вшися.

Сла́ва Отцу́ и Сы́ну и Свято́му Ду́ху:

Ка́мень всече́стен яви́лася еси́, всехва́льная, у́м самоизво́лен преподо́бен иму́щи и оте́честву избавле́ние тве́рдо бы́вши, Ага́фие честна́я.

И ны́не и при́сно и во ве́ки веко́в. Ами́нь.

Богородичен: Псало́мски, восхваля́юще, вопие́м Ти́: ра́дуйся, ту́чнейшая горо́ Христа́ Бо́га, в ню́же всели́тися благоволи́ за на́ше спасе́ние, Богоневе́сто.

Конда́к, гла́с 4.

Да украси́тся дне́сь Це́рковь порфи́рою сла́вною, омоче́ною от чи́стых крове́й Ага́фии му́ченицы, — ра́дуйся, — вопию́щи, — Ката́нская похвало́.

Пе́снь 7.

Ирмос: Образу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми, поя́ху: благослове́н еси, Бо́же оте́ц на́ших.

Припев: Святая мученице Агафие, моли Бога о нас.

Яко зело́ све́тло веща́ющи и я́ве мучи́теля устраши́ла еси́ сло́вом прему́дрости и благода́ти, терпе́нием же му́к у́глие о́гненное неболе́зненно терпя́щи, взыва́ла еси́: благослове́н еси́, Бо́же оте́ц на́ших.

Припев: Святая мученице Агафие, моли Бога о нас.

Неи́стовством лю́тым содержи́мь, злосе́рдый недоумева́ше лю́те, твою́ ви́дя ю́ность и сосце́в твои́х прозябе́ние, ра́дующи бо ся, му́ченице, вопия́ла еси́ твоему́ Жениху́, взыва́ющи: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Предста́ све́тло Христо́в учени́к тебе́, стрего́мей, твоя́ исцеля́я лю́тыя ра́ны, я́же подъя́ла еси́, непобеди́мая му́ченице, Спа́сова деви́це, ра́дующися и глаго́лющи: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: Умерщвля́ется Ада́м, преступи́в за́поведь Вседержи́теля, Ты́ же, ро́ждши ве́чную Жи́знь, Де́во Всенепоро́чная, сего́ изба́вила еси́ от сме́рти, Сы́ну Твоему́ взыва́юща: благослове́н еси́, Бо́же оте́ц на́ших.

Пе́снь 8.

Ирмос: В пе́щь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся́ ве́ки.

Припев: Святая мученице Агафие, моли Бога о нас.

В весе́лии и ра́дости преве́чней жи́ти сподо́бившися, неизрече́нною твое́ю сла́вою озари́тися чту́щим тя́, Ага́фие, Го́сподеви помоли́ся и нетле́нныя жи́зни наслади́тися.

Припев: Святая мученице Агафие, моли Бога о нас.

Умо́м, и се́рдцем, и душе́ю возлю́бльши Христа́ па́че сло́ва, Многорачи́тельнаго, Еди́наго, впери́лася еси́ Тому́, вопию́щи: теку́ в сле́д Тебе́ и вселю́ся с Тобо́ю во ве́ки.

Сла́ва Отцу́ и Сы́ну и Свято́му Ду́ху:

Преесте́ственными ря́снами и кра́сною оде́ждею укра́шена, я́ко царе́ва дщи́, в че́сти Христо́ве предстои́ши, Ага́фие, взыва́ющи: Тя́ превозно́сим, Го́спода, во ве́ки.

И ны́не и при́сно и во ве́ки веко́в. Ами́нь.

Богородичен: Мѵ́ро излия́нное на́м, Богоро́дице, Христа́ во чре́ве нося́щи, облагоуха́ла еси́ ми́р богодохнове́нными воня́ми. Те́мже Тебе́, Де́во, взыва́ем: ра́дуйся, мирополо́жнице мирово́ннаго ми́ра.

Песнь 9

Ирмос: От Бо́га Бо́га Сло́ва, неизрече́нною му́дростию прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии, единому́дренно пе́сньми велича́ем.

Припев: Святая мученице Агафие, моли Бога о нас.

Победи́тельными венцы́ украси́вшися, богому́драя Ага́фие, десни́цею живонача́льною ны́не изба́витися помоли́ся, я́коже оте́честву твоему́, от бу́ри, я́ко пе́рвее огня́ уста́вила еси́ стремле́ние, да вси́ тя́ пе́сньми непреста́нно велича́ем.

Припев: Святая мученице Агафие, моли Бога о нас.

Боже́ственным про́мыслом снабдева́я вся́ческая, Христо́с, ны́не воздая́ твое́й, му́ченице, до́блести, вселя́ет тя́ в се́лех небе́сных я́ко неве́сту всенепоро́чную Свою́ и ра́доватися со Ангелы и с му́ченики сподо́бил е́сть.

Сла́ва Отцу́ и Сы́ну и Свято́му Ду́ху:

Ми́лостивна, о страстоте́рпице, Судию́ вся́ческих — Христа́ сотвори́ мне́, честна́я, мольба́ми твои́ми, пресла́вная, и прегреше́ний мои́х мно́жество очи́стити Благоутро́бнаго при́сно моля́щи не преста́й, му́чеников удобре́ние.

И ны́не и при́сно и во ве́ки веко́в. Ами́нь.

Богородичен: Вопло́щься неизрече́нно от чи́стых Твои́х крове́й, я́ко со́лнце, яви́ся на́м, Пречи́стая Ма́ти безневе́стная, пре́жде ве́к все́х Отцу́ Собезнача́льный Сы́н и, тму́ отгна́в, просвети́ вся́ческая.

Свети́лен му́ченице.

Сосце́в твои́х отъя́тия претерпе́ла еси́, до́брая деви́це, и вся́ки ины́я му́ки Христа́ ра́ди, страстоте́рпице, те́м и в черто́г тя́ кра́сный всели́ тво́й Жени́х, сла́вная, лику́ющу со Ангелы, де́во му́ченице Ага́фие.

Молитва

О свята́я, мученице Ага́фие. По́двигом до́брым подвиза́вшися на земли́, восприя́ла еси́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже ра́дуемся о пресла́внем сконча́нии жи́тельства твоего́ и чтим святу́ю па́мять твою́. Ты же, предстоя́щи Престо́лу Бо́жию, приими́ моле́ния на́ша и ко всеми́лостивому Бо́гу принеси́, о е́же прости́ти нам вся́кое прегреше́ние и помощи́ нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством твои́м, а́ще и недосто́йни есмы́, ви́дети блага́я на земли́ живы́х, сла́вяще еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.