Шрифт

17 февраля.

Канон иной преподобному Кириллу, Новоезерскому чудотворцу.

Преподобному Кириллу, Новоезерскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Бо́жиим Ду́хом подвиза́емь, сле́з твои́х ту́чами изсо́хшее напои́л еси́, и безпло́тное в пусты́ни житие́ показа́л еси́, и е́же из глубины́ се́рдца бо́дренными моли́твами и посто́м, благодея́ния труды́ уплодоноси́л еси́, и вселе́нную всю́ просвети́л еси́ сия́нием чуде́с твои́х, о́тче на́ш Кири́лле, моли́ Христа́ Бо́га, спасти́ся душа́м на́шим.

Велича́ние:

Ублажа́ем тя́, преподо́бне о́тче Кири́лле, и чте́м святу́ю па́мять твою́, наста́вниче мона́хов и собесе́дниче Ангелов.

Други́й кано́н, гла́с 2.

Пе́снь 1.

Ирмос: Гряди́те, лю́дие, пои́м пе́снь Христу́ Бо́гу, разде́льшему мо́ре и наста́вльшему лю́ди, я́же изведе́ из рабо́ты еги́петския, я́ко просла́вися.

Припев: Преподобне отче Кирилле, моли Бога о нас.

Песносло́вити достохва́льную па́мять твою́ усе́рдно, преподо́бне, благода́ть пода́ждь, Кири́лле. Моли́ о на́с и о все́х, согреши́вших, о оставле́нии.

Припев: Преподобне отче Кирилле, моли Бога о нас.

Иноческий сво́й кре́ст взе́м, преподо́бне, после́довал еси́ Христу́ Вседержи́телю и, умертви́в пло́ть, жи́зни ве́чныя сподо́бился еси́, преподо́бне.

Сла́ва Отцу́ и Сы́ну и Свято́му Ду́ху:

Зако́ну Бо́жию повину́яся, досточу́дне, страстна́я взыгра́ния увяди́л еси́ воздержа́ния по́двигом и безстра́стия благода́тию обогати́лся еси́.

И ны́не и при́сно и во ве́ки веко́в. Ами́нь.

Богородичен: Иже Тебе́ ра́ди нетле́нием обога́щшеся, Богороди́тельнице Пречи́стая, — ра́дуйся, Обра́дованная, — вопие́м Ти́, — преподо́бных и пра́ведных украше́ние.

Пе́снь 3.

Ирмос: Утверди́ на́с в Тебе́, Го́споди, дре́вом умерщвле́й гре́х, и стра́х Тво́й всади́ в сердца́ на́с, пою́щих Тя́.

Припев: Преподобне отче Кирилле, моли Бога о нас.

Во́д живо́тных испо́лншися Боже́ственнаго Ду́ха, богоно́се, душа́ твоя́ ре́ки чуде́с то́чит, неду́жным исцеле́ние подая́.

Припев: Преподобне отче Кирилле, моли Бога о нас.

К широте́ ра́йстей всели́лся еси́, всеблаже́нне Кири́лле, те́сную ше́ствовав стезю́, и бесо́в кова́рствия, и ше́ствия безчи́сленная утесни́л еси́.

Сла́ва Отцу́ и Сы́ну и Свято́му Ду́ху:

Тече́нием твои́х сле́з напая́емь, я́ко дре́во плодоно́сно, Кири́лле, благопло́дне поле́зныя прине́сл еси́ доброде́тели, чуде́с Боже́ственную благода́ть прие́мь.

И ны́не и при́сно и во ве́ки веко́в. Ами́нь.

Богородичен: Еди́н Благи́й про́йде утро́бу, воплоща́емь, и Челове́к ви́ден бы́сть соверше́н, Его́же моли́ спасти́ пою́щия Тя́.

Седа́лен, гла́с 1:

Мона́шествовав богоуго́дне и доброде́тельно пожи́в, благода́ть исцеле́ния прия́л еси́, блаже́нне Кири́лле, зна́мения соверши́в стра́шна; оби́тель же совокупи́в свяще́нную, приве́л еси́ мно́жество спаса́емых Го́сподеви, пребога́те. Сла́ва Бо́гу, просвети́вшему тя́, сла́ва венча́вшему тя́, сла́ва святу́ю твою́ па́мять просла́вльшему.

Сла́ва, и ны́не, Богородичен:

Ру́це Твои́ Боже́ственнеи, и́маже Созда́теля понесла́ еси́, Де́во Пречи́стая, вопло́щшагося благосты́нею, просте́рши, умоли́ Его́ изба́вити на́с от искуше́ний, и страсте́й, и бе́д, хва́лящих Тя́ любо́вию и вопию́щих: сла́ва все́льшемуся в Тя́, сла́ва проше́дшему из Тебе́, сла́ва изба́вльшему на́с Рождество́м Твои́м.

Пе́снь 4.

Ирмос: Пою́ Тя, слу́хом бо, Го́споди, услы́шах и ужасо́хся: до мене́ бо и́деши, мене́ ища́, заблу́ждшаго. Те́м мно́гое Твое́ снизхожде́ние, е́же на мя́, прославля́ю, Многоми́лостиве.

Припев: Преподобне отче Кирилле, моли Бога о нас.

Распе́н себе́ самого́ страсте́м и ми́рови, богому́дре о́тче, на Кресте́ распросте́ршему дла́ни Христу́ угоди́л еси́, Кири́лле, Его́же моли́ спасти́ ду́ши на́ша.

Припев: Преподобне отче Кирилле, моли Бога о нас.

По́двигом страда́ния плотски́я умертви́л еси́ у́ды, ме́ртвыя же моли́твою возста́вил еси́, и приходя́щия усе́рдно ве́рою чу́дно оправда́л еси́, и вся́к неду́г, о́тче, исцели́л еси́.

Сла́ва Отцу́ и Сы́ну и Свято́му Ду́ху:

Ду́ха Свята́го присво́ил еси́ твое́й души́ и́скренно, Имже па́стырь избра́н показа́лся еси́, о́тче богому́дре, и и́нокующим украше́ние прекра́сное.

И ны́не и при́сно и во ве́ки веко́в. Ами́нь.

Богородичен: Яко до́ждь на руно́, Чи́стая, в честно́е чре́во Твое́ Сло́во сни́де воплоща́емо, и погуби́ многобо́жия одожде́нием, Всенепоро́чная, и го́рькую зи́му разори́л е́сть.

Пе́снь 5

Ирмос: Све́та Пода́телю и веко́в Тво́рче, Го́споди, во све́те Твои́х повеле́ний наста́ви на́с: ра́зве бо Тебе́, ино́го Бо́га не зна́ем.

Припев: Преподобне отче Кирилле, моли Бога о нас.

Иже в ми́лость Бо́га моля́, о́тче преподо́бне Кири́лле, напо́лнил еси́, я́коже Илия́ чва́нец, еле́я, сосу́д вели́к, от зря́щих удивля́емь ве́рно.

Припев: Преподобне отче Кирилле, моли Бога о нас.

Яко чи́ст душе́ю, ты́, во изступле́нии бы́в, ви́дел еси́ всю́ зе́млю, я́ко под заре́ю сия́ющу, Еди́наго Бо́га почита́ющу, всеблаже́нне Кири́лле.

Сла́ва Отцу́ и Сы́ну и Свято́му Ду́ху:

Чудоде́йствуя о Христе́, воде́ истещи́ моли́твою, преподо́бне Кири́лле, мо́лиши Подвигополо́жника, я́же, пребыва́ющи, пропове́дает чудеса́.

И ны́не и при́сно и во ве́ки веко́в. Ами́нь.

Богородичен: Живы́й на небесе́х восхоте́ всели́тися в ложесна́ Твоя́, Чи́стая, я́ко да на́с хра́мы Тро́ице сотвори́т, Тя́, Богоро́дицу, пропове́дающих.

Пе́снь 6.

Ирмос: Во глубине́ грехо́вней содержи́мь е́смь, Спа́се, и в пучи́не жите́йстей обурева́емь, но, я́коже Ио́ну от зве́ря, и мене́ от страсте́й возведи́ и спаси́ мя.

Припев: Преподобне отче Кирилле, моли Бога о нас.

Светосия́нии просвеща́емь Свята́го Ду́ха, чудотво́рче Кири́лле, и́нокующим свети́льник све́тел яви́лся еси́.

Припев: Преподобне отче Кирилле, моли Бога о нас.

Яко пресла́вно житие́ твое́, и́мже ста́до и́нок приве́л еси́ к ра́зуму спаси́тельному.

Сла́ва Отцу́ и Сы́ну и Свято́му Ду́ху:

Жи́тель бы́в Ца́рства небе́снаго, богому́дре Кири́лле, сего́ улучи́ти моли́ ве́рою тя́ при́сно ублажа́ющим.

И ны́не и при́сно и во ве́ки веко́в. Ами́нь.

Богородичен: Из утро́бы Твоея́, Чи́стая, возсия́в Пра́вды невече́рнее Со́лнце и ве́рных просвети́, Богоро́дице, Де́во Всепе́тая.

Конда́к, гла́с 8:

Взбра́нному и кре́пкому адама́нту, прогони́телю бесо́в, но́вому чудотво́рцу, победи́тельная, страсте́й злы́х свободи́вшеся, благода́рственная воспису́ем ти́, о́тче на́ш Кири́лле. Но я́ко име́я дерзнове́ние у престо́ла Христо́ва, ве́рою чту́щих тя́, гра́д же и лю́ди, моли́твою твое́ю сохраня́й, ты́ бо еси ста́ду твоему́ похвала́ и утвержде́ние.

Икос:

Услы́шав Христо́в глаго́л и оста́вив плотска́я мудрова́ния, бога́тство и сла́ву, я́ко пра́х, вмени́в и на стра́сти, я́ко безпло́тен, подвиза́вся, и безпло́тных ликостоя́нию чистото́ю уподо́бися, ра́зума дарова́ния прия́л еси́. Те́м в пе́снех си́це ти́ вопие́м, реку́ще: ра́дуйся, Кири́лле преподо́бне и богоно́се, небе́сный челове́че, земны́й Ангеле; ра́дуйся, кроме́ ми́ра су́етнаго пусты́ню соде́лавый в Кра́снем о́строве и в не́м оби́тель соста́вив. Ра́дуйся, я́ко в не́й и́нок мно́жество собра́л еси́ и от ни́х слы́шиши си́це реку́щих: ра́дуйся, и́нокующим о спасе́нии хода́тай; ра́дуйся, уныва́ющим о́браз утеше́ния; ра́дуйся, и́ноком от наве́т вра́жиих изба́вителю; ра́дуйся, ско́рбем губи́телю на́шего естества́, я́ко отгоня́я по́мыслы зло́бныя; ра́дуйся, скорбя́щим душе́ю сла́дкое утеше́ние и ра́дости Боже́ственныя пода́телю; ра́дуйся, на́ш предста́телю и изба́вителю. Ра́дуйся, преподо́бне о́тче Кири́лле, и́ноком удобре́ние.

Пе́снь 7.

Ирмос: Вети́и яви́шася о́троцы любомудре́йшии дре́вле, от богоприя́тныя бо души́, богосло́вяще устна́ми, поя́ху: Пребоже́ственный отце́в и на́ш Бо́же, благослове́н еси́.

Припев: Преподобне отче Кирилле, моли Бога о нас.

Ме́ртвость живоно́сную стяжа́в сласте́й отложе́нием, те́мже больны́я исцеля́ти сподо́бился еси́, Кири́лле, — Пребоже́ственный отце́в, — вопия́, — Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Непщева́вше умори́ти без ума́ чародея́ньми, о́тче, лука́выми тебе́, блюдо́маго Боже́ственною все́х Зижди́теля дла́нию, несмы́сленно постыде́вшеся, обличе́ни бы́ша су́щим в тебе́ проразуме́нием.

И ны́не и при́сно и во ве́ки веко́в. Ами́нь.

Богородичен: Исцели́ души́ моея́ стра́сти, безстра́стия исто́чник ро́ждшая несказа́нно, и умиле́ния ту́чу пода́ждь ми́, хода́тайствуя мне́ утеше́ния, Свята́я Богоро́дице.

Пе́снь 8.

Ирмос: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.

Припев: Преподобне отче Кирилле, моли Бога о нас.

Над страстьми́ тлетво́рными ца́рствовав о Христе́, богому́дре о́тче, в Ца́рствии небе́снем сподо́бился еси́ жи́ти со все́ми святы́ми, до́бре пожи́в и Всеви́дца Бо́га возлюби́в.

Припев: Преподобне отче Кирилле, моли Бога о нас.

Твоя́ святы́я моли́твы прие́мля, Бо́г су́щим во оскуде́нии с тобо́ю подава́ше я́же к животу́ вы́ну, вельми́ на земли́ прославля́я тя́, чудоде́йственный Кири́лле всеблаже́нне.

Сла́ва Отцу́ и Сы́ну и Свято́му Ду́ху:

Укра́шся добро́тами боже́ственными, ко кра́сным черто́гом преста́вился еси́, с Бо́гом, о́тче, пребыва́я, и Сего́ Боже́ственныя красоты́ в непроходи́мыя ве́ки наслажда́ешися.

И ны́не и при́сно и во ве́ки веко́в. Ами́нь.

Богородичен: Живы́й исто́чник, я́ко во́ду жи́зни поро́ждши, ду́шу мою́, иста́явшую грехо́вным пла́менем, Богоро́дице Де́во, напо́й, да Тя́ сла́влю во ве́ки.

Песнь 9

Ирмос: Яже пре́жде со́лнца Свети́льника Бо́га возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́ем.

Припев: Преподобне отче Кирилле, моли Бога о нас.

Ми́лостивно вмести́лся еси́, о́тче, вся́ческих Благода́телю, незло́бия добро́тою украша́емь и кро́тостию и красото́ю доброде́телей сия́я, те́мже тя́ вси́ ублажа́ем.

Припев: Преподобне отче Кирилле, моли Бога о нас.

Пе́снь Бо́гу возсыла́ти с безпло́тными сподо́бися, я́ко соблю́д о́нех жития́ чистоту́, терпе́нием сла́ву восприя́л еси́.

Сла́ва Отцу́ и Сы́ну и Свято́му Ду́ху:

Приими́ от на́с, богоно́се, приноси́мое ти́ моле́ние от чи́ста се́рдца и возда́ждь мольба́ми твои́ми согреше́ний оставле́ние и спасе́ние, всече́стне.

И ны́не и при́сно и во ве́ки веко́в. Ами́нь.

Богородичен: Яко ко́рень су́щим вои́стинну, Нетле́нная Де́во, вси́ ве́рнии, наде́ющеся, хвала́ми почита́ем.

Свети́лен.

Ангельскаго жития́ жела́я, удали́лся еси́, Кири́лле, в пусты́ню и стра́сти плотски́я покори́л еси́, равноа́нгелен яви́лся еси́, о́тче на́ш Кири́лле богоно́се.

Сла́ва, и ны́не, Богородичен:

Держа́ва на́ша, Чи́стая, Твоя́ рабы́ сохрани́ вся́ невре́дны, Тя́ бо стяжа́хом еди́ну прибе́жище душа́м на́шим.

Молитва преподобному Кириллу Новоезерскому (Новгородскому) чудотворцу

О, вели́кий уго́дниче, пресла́вный чудотво́рче, Кири́лле блаже́нне! Душе́ю на Небеси́ Престо́лу Бо́жию предстоя́й и Тро́ичныя сла́вы наслажда́яйся, те́лом же на земли́ в Боже́ствественном хра́ме сем почива́яй и от него́ да́нною ти свы́ше благода́тию разли́чная источа́яй чудеса́: при́зри ми́лостивым о́ком на предстоя́щия честне́й твое́й ри́зе лю́ди и прося́щия си́льныя твоея́ по́мощи. Ты у́бо, я́ко стяжа́вый дерзнове́ние, испроси́ Це́ркви благостоя́ние, возду́ха благорастворе́ние, земли́ плодоно́сие. Изба́ви всех, ве́рою несумне́нною к Бо́гу приходя́щих и многоцеле́бныя мо́щи твоя́ благогове́йно почита́ющих, от вся́ких бед душе́вных и теле́сных, от всех томле́ний и прило́гов диа́вольских. Я́ко да твои́ми моли́твами наставля́еми, путь на земли́ маловре́меннаго жития́ на́шего безбе́дне соверши́м: улучи́м же на Небеси́ неконча́емый поко́й и просла́вим ку́пно с тобо́ю всех благи́х Да́теля, еди́наго в Тро́ице сла́вимаго Бо́га, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Преподобному Кириллу, Новоезерскому