17 февраля.

Канон преподобному Исидору Пилусиотскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

В тебе́, о́тче, изве́стно спасе́ся, е́же по о́бразу: прии́м бо кре́ст, после́довал еси́ Христу́, и де́я, учи́л еси́ презира́ти у́бо пло́ть, прехо́дит бо, прилежа́ти же о души́, ве́щи безсме́ртней; те́мже и со Ангелы сра́дуется, преподо́бне Иси́доре, ду́х тво́й.

Кано́н свята́го. Гла́с 6.

Пе́снь 1.

Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, Бо́гу побе́дную пе́снь пои́м, вопия́ше.

Припев: Преподобне отче Исидоре, моли Бога о нас.

Сокруше́ннаго се́рдца стена́ние услы́шав, Влады́ко, души́ моея́ лю́тое сокруше́ние исцели́ моли́твами преподо́бнаго Твоего́, Христе́, я́ко Всеси́лен.

Припев: Преподобне отче Исидоре, моли Бога о нас.

Вше́д, ты́, богоно́се, в де́тельную доброде́тель, Иси́доре, виде́нием чи́стым и кра́сным явле́нием Бо́гу бесе́дуя всегда́, я́ве обогати́лся еси́.

Сла́ва Отцу́ и Сы́ну и Свято́му Ду́ху:

Прему́дрости ча́ши прине́с твоя́ уста́, прему́дре, и́же отону́ду дарова́ний исто́чник поче́рпл еси́, Бо́гу побе́дную пе́снь воспева́я.

И ны́не и при́сно и во ве́ки веко́в. Ами́нь.

Богородичен: Яко на ле́гцем о́блаце, Соде́тель на Тебе́ прии́де низложи́ти, я́ко Си́лен, еги́петская, Влады́чице Чи́стая, рукотворе́нная, Христо́с, я́ко Всеси́льный.

Пе́снь 3.

Ирмос: Не́сть свя́т, я́коже Ты́, Го́споди Бо́же мо́й, вознесы́й ро́г ве́рных Твои́х, Бла́же, и утверди́вый на́с на ка́мени испове́дания Твоего́.

Припев: Преподобне отче Исидоре, моли Бога о нас.

Ума́ острото́ю, му́дре, су́щих собра́в, пресла́вне, естество́, и́мже нача́льную вину́, я́ко чи́ст богосло́в, неле́стно пости́гл еси́.

Припев: Преподобне отче Исидоре, моли Бога о нас.

Поуче́ние положи́в я́сно сме́рти житию́, богоно́се треблаже́нне, страсте́й ве́щныя вины́ умертви́л еси́, безстра́стия объя́т бы́в жела́нием.

Сла́ва Отцу́ и Сы́ну и Свято́му Ду́ху:

В сле́д, ра́дуяся, Христа́, кре́ст тво́й носи́в, после́довал еси́, о́тче, в посте́ тве́рдем и Сему́, я́ко мо́щно, уподо́бился еси́ жития́ чистото́ю.

И ны́не и при́сно и во ве́ки веко́в. Ами́нь.

Богородичен: Зако́нных естества́ кроме́ Влады́ку ро́ждши, Богоро́дице Де́во, дре́внюю преслуша́ния кля́тву разори́ла еси́, благослове́ния исто́чник источа́ющи.

Седа́лен, гла́с 3.

Кни́га ра́зума уче́ния, бога́тством ве́ры сочинена́, Пресвято́му яви́лся еси́ Ду́ху, открыва́я Боже́ственная тре́бующим и жи́знь сокро́вищствуя хотя́щим. Отче преподо́бне, Христа́ Бо́га моли́ дарова́ти на́м ве́лию ми́лость.

Сла́ва, и ны́не, богоро́дичен, гла́с 3:

Боже́ственная была́ еси́ ски́ния Сло́ва, Еди́на Всечи́стая Де́во Ма́ти, чистото́ю Ангелы превозше́дшая, па́че все́х мене́ пе́рсть бы́вша, оскверне́на плотски́ми прегреше́ньми, очи́сти моли́тв Твои́х боже́ственными вода́ми, подаю́щи, Чи́стая, ве́лию ми́лость.

Пе́снь 4.

Ирмос: Христо́с моя́ си́ла, Бо́г и Госпо́дь, честна́я Це́рковь боголе́пно пое́т, взыва́ющи, от смы́сла чи́ста, о Го́споде пра́зднующи.

Припев: Преподобне отче Исидоре, моли Бога о нас.

Незави́стно, преподо́бне, Христу́ повину́яся, да́нное тебе́ бога́тство, я́ко благопокори́в ра́б, разда́л еси́, и несказа́нныя тя́ ра́дости Влады́ка сподо́би.

Припев: Преподобне отче Исидоре, моли Бога о нас.

Прему́дрости пучи́ну преплы́в, до́брый би́сер, я́ко до́бр купе́ц, приобре́л еси́ и се́й то́кмо сокро́вище неоску́дно стяжа́л еси́.

Сла́ва Отцу́ и Сы́ну и Свято́му Ду́ху:

Боже́ственным Ду́хом осия́емь, лучи́ слове́с со́лнечно все́м испусти́л еси́, спасе́ния ве́рным, богоявле́нне, жела́я.

И ны́не и при́сно и во ве́ки веко́в. Ами́нь.

Богородичен: Яко вои́стинну неизглаго́ланна и непости́жна Твоего́, Богоро́дице, боголе́пнаго су́ть Рождества́ су́щим на земли́ и на небеси́, Присноде́во, та́инства.

Пе́снь 5

Ирмос: Бо́жиим све́том Твои́м, Бла́же, у́тренюющих Ти́ ду́ши любо́вию озари́, молю́ся, Тя́ ве́дети, Сло́ве Бо́жий, и́стиннаго Бо́га, от мра́ка грехо́внаго взыва́юща.

Припев: Преподобне отче Исидоре, моли Бога о нас.

Умерщвле́нием, всему́дре, страсте́й вне́ бы́в и пло́ти, любо́вию Бо́гу прибли́жился еси́, Пресвято́му и Пресве́тлому Све́ту, и Еди́ному, истязу́ющему чистоту́.

Припев: Преподобне отче Исидоре, моли Бога о нас.

Боже́ственным сия́нием твои́м, бла́же, у́м, богоно́сец, озари́в, сто́лп всесве́тел бы́сть, все́м посыла́я Боже́ственнаго Све́та Боже́ственныя зари́ и мра́к неве́дения отгоня́.

Сла́ва Отцу́ и Сы́ну и Свято́му Ду́ху:

Хотя́й все́м я́ко бла́г, всему́дре, спасти́ся, наста́вника заблу́ждшим тя́ показа́, мно́гия обраща́ти ко спасе́ния пути́, Иси́доре треблаже́нне, о́тче пребога́те.

И ны́не и при́сно и во ве́ки веко́в. Ами́нь.

Богородичен: Вои́стинну усты́ и душе́ю, Влады́чице ми́ра Блага́я, испове́даю Тя́, Всенепоро́чная, воплоще́нна Бо́га ро́ждшую, Чи́стая, и жития́ Тя́ предста́тельницу ве́рою предлага́ю.

Пе́снь 6.

Ирмос: Жите́йское мо́ре, воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Припев: Преподобне отче Исидоре, моли Бога о нас.

Словесы́ су́дными укра́шься я́ко иере́й, слове́сно разсуди́л еси́, богоно́се, и те́лом и душе́ю, и го́ршее лу́чшему повину́в смы́сленно, досточу́дне.

Сла́ва Отцу́ и Сы́ну и Свято́му Ду́ху:

Благомо́щно Еги́пта страсте́й и пи́щи ты́, мона́шествующих похвало́, воздержа́тельными, сла́вне, я́звами, истязу́я уязви́л еси́, ве́рным услажда́я прехожде́ние.

И ны́не и при́сно и во ве́ки веко́в. Ами́нь.

Богородичен: Нося́й вся́ческая си́лою Боже́ственною и содержа́й, я́ко Благоутро́бен, Твои́ми объя́тии, Пречи́стая, вопло́щься, я́ко Младе́нец но́сится, Иже Отцу́ по Существу́ Соприсносу́щный.

Конда́к, гла́с 4.

Денни́цу другу́ю тя́ Це́рковь обре́тши, пресла́вне, твои́х слове́с мо́лниями освеща́ема, взыва́ет ти́: ра́дуйся, всеблаже́нне богому́дре Иси́доре.

Пе́снь 7.

Ирмос: Росода́тельну у́бо пе́щь соде́ла Ангел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́, Бо́же оте́ц на́ших.

Припев: Преподобне отче Исидоре, моли Бога о нас.

На тве́рди ве́ры поста́ви, о́тче, я́коже со́лнце, Влады́ка тя́, просвеща́ти сия́нием мы́сленным ду́ши вопию́щих приле́жно: благослове́н еси́, Бо́же оте́ц на́ших.

Сла́ва Отцу́ и Сы́ну и Свято́му Ду́ху:

Скве́рны плотски́я и духо́вныя отмы́л еси́, блаже́нне, сле́з излия́ньми и, бы́в, богоно́сне, све́т су́щим на земли́, вся́ научи́л еси́ вопи́ти: благослове́н еси́, Бо́же оте́ц на́ших.

И ны́не и при́сно и во ве́ки веко́в. Ами́нь.

Богородичен: На недви́жимем ве́ры стоя́ще основа́нии, Тя́, Богома́терь Чи́стая, испове́дуем Богоро́дицу: Слов́о бо Бо́жие без се́мене родила́ еси́ на́м. Благослове́н, Пречи́стая, Пло́д чре́ва Твоего́.

Пе́снь 8.

Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́: вся́ бо твори́ши, Христе́, то́кмо е́же хоте́ти. Тя́ превозно́сим во вся́ ве́ки.

Припев: Преподобне отче Исидоре, моли Бога о нас.

Яко слове́сну же́ртву, о́тче, все́ житие́ твое́ в воню́ благово́ния прине́сл еси́ на Кресте́ тебе́ ра́ди пове́шеному Христу́, Его́же превозно́сим во вся́ ве́ки.

Припев: Преподобне отче Исидоре, моли Бога о нас.

Мно́жиши бога́тство и по сме́рти, одушевле́на словеса твоя́, я́коже многоце́нно все́м ве́рным насле́дие оста́вль, превознося́щим Христа́ во вся́ ве́ки.

Сла́ва Отцу́ и Сы́ну и Свято́му Ду́ху:

Украси́лся еси́, преблаже́нне, добро́тою слове́с твои́х, Свята́го бо Ду́ха яви́лся еси́ тро́сть, пиша́ благоче́стно ра́зум Боже́ствен превознося́щим Го́спода во вся́ ве́ки.

И ны́не и при́сно и во ве́ки веко́в. Ами́нь.

Богородичен: К Твоему́ кро́ву прибега́ю, Всенепоро́чная, и Предста́тельницу жи́зни моея́ Тя́ ны́не предлага́ю, Тя́, па́че ума́ Бо́га Сло́ва ро́ждшую. Его́же превозно́сим во вся́ ве́ки.

Песнь 9

Ирмос: Бо́га челове́ком невозмо́жно ви́дети, на Него́же не сме́ют чи́ни Ангельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и, Тя́ ублажа́ем.

Припев: Преподобне отче Исидоре, моли Бога о нас.

Якоже заря́ све́та, облиста́ в твою́ ду́шу благода́ти сло́во, преподо́бне, тобо́ю же вся́ земля́ испо́лнися того́ сия́ния. Ему́же причаща́ющиися, твоея́ му́дрости сокро́вищу, о́тче, удивля́емся.

Припев: Преподобне отче Исидоре, моли Бога о нас.

Тре́м Ли́цам во Еди́нстве Естества́, оте́ческим после́дуя уче́нием, богому́дренно покланя́тися научи́л еси́, чти́ти богосло́вящия Несозда́нную Безнача́льную Тро́ицу, все́м ве́рным просвеще́ние источа́ющую.

Сла́ва Отцу́ и Сы́ну и Свято́му Ду́ху:

Обре́т трудо́в твои́х воздая́ния на небесе́х, жи́знь безконе́чную прие́м, пою́щим, прему́дре, па́мять твою́ испроси́ спасе́ние, блаже́нне Иси́доре, престо́лу Бо́жию со Ангелы ны́не предстоя́.

И ны́не и при́сно и во ве́ки веко́в. Ами́нь.

Богородичен: Тле́нен, Сло́во Бо́жие нетле́нное, о́браз прие́м, челове́ки в нетле́ние облече́, благоволе́нием Отчим все́лься в Тя́, Обра́дованная. Те́мже, Пречи́стая, с небе́сными во́и Тя́ велича́ем.

Молитва

О свяще́нная главо́, преподо́бне о́тче, преблаже́нне а́вво Исидоре, не забу́ди убо́гих твои́х до конца́, но помина́й нас всегда́ во святы́х и благоприя́тных моли́твах к Бо́гу: помяни́ ста́до твое́, е́же сам упа́сл еси́, и не забу́ди посеща́ти чад твои́х моли́ за ны, о́тче свяще́нный, за де́ти твоя́ духо́вныя, я́ко име́яй дерзнове́ние к Небе́сному Царю́: не премолчи́ за ны ко Го́споду, и не пре́зри нас, ве́рою и любо́вию чту́щих тя: помина́й нас недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо те́лом и преста́вился еси́ от нас, но и по сме́рти жив сый пребыва́еши, не отступа́й от нас ду́хом, сохраня́я нас от стрел вра́жиих и вся́кия пре́лести бесо́вския и ко́зней диа́вольских, па́стырю наш до́брый. А́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ ду́ша со а́нгельскими во́инствы, со безпло́тными ли́ки, с небе́сными си́лами, у престо́ла Вседержи́телева предстоя́щи, досто́йно весели́тся, ве́дуще у́бо тя вои́стину и по сме́рти жи́ва су́ща, тебе́ припа́даем и тебе́ мо́лимся: моли́ся о нас Всеси́льному Бо́гу, о по́льзе душ на́ших, и испроси́ нам вре́мя на покая́ние, да невозбра́нно пре́йдем от земли́ на Не́бо, от мыта́рств же го́рьких, бесо́в возду́шных князе́й и от ве́чныя му́ки да изба́вимся, и Небе́снаго Ца́рствия насле́дницы да бу́дем со все́ми пра́ведными, от ве́ка угоди́вшими Го́споду на́шему Иису́су Христу́: Ему́ же подоба́ет вся́кая сла́ва, честь и поклоне́ние, со Безнача́льным Его́ Отце́м, и с Пресвяты́м и Благи́м и Животворя́щим Его́ Ду́хом, ны́не и при́сно, и во ве́ки веко́в. Ами́нь.