14 февраля.

Канон святому мученику Трифону Апамейскому.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Стихи́ры свята́го, гла́с 1.

Три́фоне всехва́льне, / сла́дости нетле́нныя / прича́стник на небесе́х бы́л еси́ светле́йший, / до́блественными по́двиги / пострада́л еси́, сла́вне, / и свиде́тель и́стины бы́в, / Христа́ моли́, / дарова́ти душа́м на́шим / ми́р и ве́лию милоcть.

Три́фоне пресла́вне, / Све́та присносу́щнаго сия́ньми / светови́ден ве́сь бы́л еси́, / испрове́рг всю́ мра́чную пре́лесть, / и мироде́ржца тмы́ низложи́в / Божеcтвенною благода́тию. / Те́мже моли́, / дарова́ти душа́м на́шим / ми́р и ве́лию ми́лость.

Три́фоне всеблаже́нне, / ра́дости и весе́лия Ангельскаго сподо́бился еси́, / отве́рглся кра́сных жития́, / и душе́вною кре́постию вся́ в ничто́же вмени́в, / терпели́внейше соверши́л еси́ муче́ние, / и мо́лишися о душа́х на́ших.

Сла́ва, гла́с 2:

Преоби́дел еси́ су́щая на земли́, всеблаже́нне Три́фоне честны́й, к суди́щу му́жески потща́ся, и боре́ния кро́вию ты́ худо́жне, мучениче, го́рдаго низложи́в, прия́л еси́ побе́ды вене́ц; Христа́ Бо́га на́шего моля́ о на́с, не оскуде́й, страстоте́рпче, спасти́ся душа́м на́шим.

И ны́не, гла́с то́йже:

Дне́сь Симео́н на ру́ки Го́спода сла́вы прие́млет, Его́же под мра́ком пе́рвее Моисе́й ви́де, на горе́ Сина́йстей скрижа́ли даю́ща ему́. Се́й е́сть И́же во проро́цех глаго́ляй, и зако́на Творе́ц; Се́й е́сть, Его́же Дави́д возвеща́ет, И́же все́м стра́шный, име́яй ве́лию и бога́тую ми́лоcть.

Тропа́рь, гла́с 4:

Му́ченик Тво́й, Го́споди, Три́фон, во страда́нии свое́м вене́ц прия́т нетле́нный от Тебе́, Бо́га на́шего: име́яй бо кре́пость Твою́, мучи́телей низложи́, сокруши́ и де́монов немощны́я де́рзости. Того́ моли́твами спаси́ ду́ши на́ша.

Кано́н свята́го му́ченика. Гла́с 8.

Пе́снь 1.

Ирмос: Во́ду проше́д, я́ко су́шу, и еги́петскаго зла́ избежа́в, изра́ильтянин вопия́ше: Изба́вителю и Бо́гу на́шему пои́м.

Припев: Святый мучениче Трифоне, моли Бога о нас.

Вои́стинну Боже́ственныя на небесе́х сла́дости наслажда́яся, я́ко непобеди́м страда́лец, твои́ми моли́твами ду́шу мою́ изба́ви от страсте́й смуще́ния.

Припев: Святый мучениче Трифоне, моли Бога о нас.

Глаго́лы Боже́ственными огласи́вся, соверши́л еси́ сия́, пресла́вне, де́ятельно, святы́ню возлюби́в, и целому́дрие облобыза́в.

Сла́ва Отцу́ и Сы́ну и Свято́му Ду́ху:

Бы́л еси́ и́стинно па́стырь, пасы́й души́ твоея́ в му́дрости помышле́ния, ду́ши обраща́я заблужда́ющия, и Бо́гу приводя́, сла́вне.

И ны́не и при́сно и во ве́ки веко́в. Ами́нь.

Богородичен: Просвеща́еши мя́ сия́нием мы́сленным, осия́ние сла́вы ро́ждшая О́тчее, Всенепоро́чная Отрокови́це, и мра́к грехо́вный разори́.

Пе́снь 3.

Ирмос: Ты́ еси́ утвержде́ние притека́ющих к Тебе́, Го́споди, Ты́ еси́ Све́т омраче́нных, и пое́т Тя́ ду́х мо́й.

Припев: Святый мучениче Трифоне, моли Бога о нас.

Притупи́л еси́ си́лу го́рдаго, сла́вный му́чениче Христо́в, свы́ше оде́явся си́лою.

Припев: Святый мучениче Трифоне, моли Бога о нас.

Пло́тию обложе́н, шата́ния безпло́тнаго угаси́л еси́ врага́, и воплоще́ннаго Бо́га Сло́ва пропове́дал еси́.

Сла́ва Отцу́ и Сы́ну и Свято́му Ду́ху:

Еди́ным то́кмо прише́ствием твои́м ду́хи лука́вствия отгоня́ются, Ду́ха Свята́го гони́ми благода́тию.

И ны́не и при́сно и во ве́ки веко́в. Ами́нь.

Богородичен: Име́я Тя́ по́мощь, не постыжду́ся, Пречи́стая Ма́ти Бо́жия, име́я Тя́ предста́тельницу жи́зни моея́, спасу́ся.

И седа́лен, гла́с 4.

Боле́зньми, блаже́нне, наслажда́яся плотски́ми, боже́ственную и неболе́зненную пи́щу досто́йно восприя́л еси́, вене́ц безсме́ртия от Бо́га прие́м. Те́мже и исцеле́ний ре́ки источа́еши любо́вию прибега́ющим, му́чениче, в кро́в тво́й.

Пе́снь 4.

Ирмос: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божcтво́.

Припев: Святый мучениче Трифоне, моли Бога о нас.

Зря́щих удиви́л еси́ терпе́ния, блаже́нне, тве́рдостию: му́ки бо претерпе́л еси́, я́ко в чужде́м стражда́ телеси́, му́дре Три́фоне.

Припев: Святый мучениче Трифоне, моли Бога о нас.

Пита́лся еси́, блаже́нне, ра́нами боле́зней бие́мь, ны́не же наслажда́ешися чи́стее, присносу́щныя сла́вы насыща́яся.

Сла́ва Отцу́ и Сы́ну и Свято́му Ду́ху:

Стру́жему телеси́ твоему́ желе́зных ногте́й острото́ю, вжиля́шеся, чу́дне, твоея́ души́ кре́пость, Боже́ственною благода́тию.

И ны́не и при́сно и во ве́ки веко́в. Ами́нь.

Богородичен: На Тя́ упова́ние мое́ все́ возлага́ю, Ма́ти Де́во: ду́шу мою́ сохрани́, я́же Бо́га ро́ждшая, Спа́са моего́.

Пе́снь 5

Ирмос: Утренююще, вопие́м Ти́: Го́споди, спаси́ ны, Ты́ бо еси́ Бо́г на́ш, ра́зве Тебе́ ино́го не ве́мы.

Припев: Святый мучениче Трифоне, моли Бога о нас.

Куми́ры преле́стныя упраздни́л еси́, страстоте́рпче, то́кмо бо возлюби́л еси́ Христо́ву о́бразу покланя́тися.

Припев: Святый мучениче Трифоне, моли Бога о нас.

Разуме́в пресве́тлую, сла́вне страстоте́рпче, благода́ть Бо́га на́шего, тоя́ ра́ди пострада́л еси́.

Сла́ва Отцу́ и Сы́ну и Свято́му Ду́ху:

Боже́cтвенною озари́вся благода́тию, усе́рдно, страда́льче, Христа́ ра́ди пострада́л еси́.

И ны́не и при́сно и во ве́ки веко́в. Ами́нь.

Богородичен: Неизрече́нно бы́сть зача́тие Твое́, и рождество́ несказа́нно: пребыла́ бо еси́ Чи́стая Присноде́ва.

Пе́снь 6.

Ирмос: Очи́сти мя́, Спа́се, мно́га бо беззако́ния моя́, и из глубины́ зо́л возведи́, молю́ся, к Тебе́ бо возопи́х, и услы́ши мя́, Бо́же спасе́ния моего́.

Припев: Святый мучениче Трифоне, моли Бога о нас.

Изсуши́в ме́рзския же́ртвы, и приноше́ния скве́рная и неи́стовства и́дольская, твои́ми кровьми́, сла́вне, напои́л еси́ вся́ Церко́вная благоро́дная, Три́фоне, прозябе́ния.

Сла́ва Отцу́ и Сы́ну и Свято́му Ду́ху:

Стру́пи му́ченичестии я́ко мѵ́ро благоуха́ют, кро́вь страда́лец источа́ет исцеле́ния, оста́нцы же те́ла ду́ши освяща́ют ве́рою каса́ющихся и́м.

И ны́не и при́сно и во ве́ки веко́в. Ами́нь.

Богородичен: Я́ко одушевле́н киво́т, прия́ла еси́ Сло́во Безнача́льное, я́ко Свято́е Святи́лище Зижди́теля вмести́ла еси́, я́ко Престо́л огнезра́чен но́сиши Влады́ку, Богома́ти, всея́ тва́ри.

Конда́к му́ченика, гла́с 8.

Тро́ическою тве́рдостию многобо́жие разруши́л еси́ от коне́ц, всесла́вне, че́стен во Христе́ бы́в, и, победи́в мучи́тели во Христе́ Спаси́теле, вене́ц прия́л еси́ му́ченичества твоего́ и дарова́ния Боже́ственных исцеле́ний, я́ко непобеди́мь.

Пе́снь 7.

Ирмос: От Иуде́и доше́дше, о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же, благослове́н еси́.

Припев: Святый мучениче Трифоне, моли Бога о нас.

Венцено́сец лику́еши с ли́ки му́ченик веселя́ся, пре́лесть бо победи́в сло́вом и́стинным, воспева́еши ра́дуяся: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху:

Влады́ка вся́ческих Свои́ми страда́ньми венча́ет му́ченика, и сего́ водворя́ет в се́лех небе́cных, зову́ща и глаго́люща: оте́ц на́ших Бо́же, благослове́н еси́.

И ны́не и при́сно и во ве́ки веко́в. Ами́нь.

Богородичен: Мла́да нося́щи Младе́нца, пре́жде все́х ве́к Бо́га, Всенепоро́чная, из Тебе́ воплоще́нна, не преста́й моля́щи спасти́ пою́щия: оте́ц на́ших Бо́же, благослове́н еси́.

Пе́снь 8.

Ирмос: Седмери́цею пе́щь халде́йский мучи́тель, Богочести́вым неи́стовно разжже́; си́лою же лу́чшею спасе́ны сия́ ви́дев, Творцу́ и Изба́вителю вопия́ше: о́троцы, благослови́те, свяще́нницы, воспо́йте, лю́дие, превозноси́те во вся́ ве́ки.

Припев: Святый мучениче Трифоне, моли Бога о нас.

Да́же до усекнове́ния и опале́ния, да́же до кровепроли́тия, да́же и до сме́ртныя кончи́ны пострада́л еси́, сопротивля́яся проти́ву греху́, му́чениче Христо́в, ны́не же жи́знь во Христе́ сокрове́нную прие́м, взыва́еши: свяще́нницы, благослови́те, лю́дие, превозноси́те во вся́ ве́ки.

Припев: Святый мучениче Трифоне, моли Бога о нас.

На земли́ подвиза́лся еси́, с нечести́выми боря́ся, проти́ву ле́стней и богобо́рней ле́сти, го́рце ну́дящим; на небесе́х же, Три́фоне, наслажда́ешися, вене́ц нося́, и со Ангелы лику́еши поя́: о́троцы, благослови́те, свяще́нницы, воспо́йте, лю́дие, превозноси́те Го́спода во ве́ки.

Сла́ва Отцу́ и Сы́ну и Свято́му Ду́ху:

Мучи́тельское изобличи́л еси́ безбо́жие, всему́дре, и де́монское богобо́рство угаси́л еси́ струя́ми крове́й твои́х; в Тро́ице Еди́наго Бо́га достоле́пне и чи́сте возвеща́я и честву́я, взыва́л еси́: о́троцы, благослови́те, свяще́нницы, воспо́йте, лю́дие, превозноси́те, во вся́ ве́ки.

И ны́не и при́сно и во ве́ки веко́в. Ами́нь.

Богородичен: Глаго́лом Твои́м после́дующе, ублажа́ем, Пречи́стая, Тя́ Блаже́нную, пло́тию ро́ждшую вои́стинну Блаже́ннаго, Све́та живу́щаго незаходи́маго, и Светонаста́вника, и Светода́вца Влады́ку. Его́же о́троцы благословя́т, свяще́нницы воспева́ют и превозно́сят во вся́ ве́ки.

Песнь 9

Ирмос: Тя́ неискусобра́чную Ма́терь Бо́га Вы́шняго, Тя́ па́че ума́ ро́ждшую сло́вом вои́стинну Бо́га, вы́шшую Пречи́cтых си́л, немо́лчными славословле́нии велича́ем.

Припев: Святый мучениче Трифоне, моли Бога о нас.

Па́че ви́димых му́ченическое ча́яние, по́лно безсме́ртнаго наслажде́ния: ви́дится си́х наде́жда полна́ благоуха́ния, и ра́дости и све́тлости неизрече́нныя. Те́мже досто́йно ублажа́ются.

Припев: Святый мучениче Трифоне, моли Бога о нас.

Све́т бы́л еси́ вторы́й, к Све́ту пе́рвому прибли́жився, заре́ю Его́ просвеща́емь и вообража́емь, Три́фоне му́дре, и Того́ пода́тельными светлостьми́ сия́я; те́м тя́ вси́ ублажа́ем.

Сла́ва Отцу́ и Сы́ну и Свято́му Ду́ху:

Яви́лся еси́ неужа́сен в по́двизех, страстоте́рпче, яви́лся еси́ и́стинно тезоимени́т боже́ственней и святе́й пи́щи, ея́же ны́не восприе́мля, и я́сно наслажда́яся, спасе́ние чту́щим тя́ на́м испроси́.

И ны́не и при́сно и во ве́ки веко́в. Ами́нь.

Богородичен: Умертви́ мудрова́ние, Богороди́тельнице, пло́ти моея́, и оживи́ душе́вное умерщвле́ние, де́йством Истинныя Жи́зни, из Тебе́ ро́ждшияся пло́тию, за неизрече́нное благоутро́бие и спасе́ние пою́щих Тя́.

Свети́лен.

Пи́щи наслажда́яся пресла́вныя и боже́cтвенныя, Ангелом единожи́тель бы́л еси́, блаже́нне: гу́си пасы́й в лузе́х, от Бо́га прия́л еси́ благода́ть исцеле́ний, Три́фоне великому́чениче, исцеля́ти челове́ческия не́мощи и неду́ги.

Молитва мученику Трифону Апамейскому

О, святы́й му́чениче Христо́в Три́фоне, ско́рый помо́щниче и всем к тебе́ прибега́ющим и моля́щимся пред святы́м твои́м о́бразом скоропослу́шный предста́телю! Услы́ши ны́не и на вся́кий час моле́ние нас, недосто́йных рабо́в твои́х, почита́ющих святу́ю па́мять твою́ во всечестне́м хра́ме сем, и предста́тельствуй о нас пред Го́сподем на вся́ком ме́сте. Ты бо, уго́дниче Христо́в, в вели́ких чудесе́х возсия́вый, источа́яй цельбы́ притека́ющим к тебе́ с ве́рою и су́щия в ско́рбех челове́ки заступа́яй, сам обеща́лся еси́ пре́жде исхо́да твоего́ от жития́ сего́ тле́ннаго моли́тися за ны ко Го́споду и испроси́л еси́ у Него́ дар сей: а́ще кто в како́й-ли́бо ну́жде, печа́ли и боле́зни душе́вней или́ теле́сней призыва́ти на́чнет свято́е и́мя твое́, той да изба́влен бу́дет от вся́каго прило́га зла́го. И я́коже ты иногда́ дщерь царе́ву, в Ри́ме гра́де от диа́вола му́чиму, исцели́л еси́, си́це и нас от лю́тых его́ ко́зней сохрани́ во вся дни живота́ на́шего, наипа́че же в день после́дняго на́шего издыха́ния предста́тельствуй о нас. Бу́ди нам тогда помо́щник и ско́рый прогони́тель лука́вых духо́в, и к Ца́рствию Небе́сному предводи́тель. И иде́же ты ны́не предстои́ши с ли́ки святы́х у Престо́ла Бо́жия, моли́ Го́спода, да сподо́бит и нас прича́стники бы́ти присносу́щнаго весе́лия и ра́дости, да с тобо́ю ку́пно прославля́ем Отца́ и Сы́на и Свята́го Уте́шителя Ду́ха во ве́ки. Ами́нь.

Молитва вторая мученику Трифону Апамейскому

О, святы́й му́чениче Христо́в Три́фоне, услы́ши ны́не и на вся́кий час моле́ние нас, раб Бо́жиих (имена), и предста́тельствуй о нас пред Го́сподем. Ты не́когда дщерь царе́ву, во гра́де Ри́ме от диа́вола му́чиму, исцели́л еси́: си́це и нас от лю́тых его́ ко́зней сохрани́ во вся дни жития́ на́шего, наипа́че же в день после́дняго на́шего издыха́ния предста́тельствуй о нас. Моли́ Го́спода, да сподо́бит и нас прича́стники бы́ти присносу́щнаго весе́лия и ра́дости, да с тобо́ю ку́пно удосто́имся сла́вити Отца́ и Сы́на и Свята́го Уте́шителя Ду́ха во ве́ки веко́в. Ами́нь.