Шрифт

13 февраля.

Канон святым чудотворцам и безсребреникам Киру и Иоанну.

Святым чудотворцам и безсребреникам Киру и Иоанну
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 5:

Чудеса́ святы́х Твои́х му́ченик сте́ну необори́му на́м дарова́вый, Христе́ Бо́же, те́х моли́твами сове́ты язы́ков разори́, ца́рства ски́птры укрепи́, я́ко Еди́н Бла́г и Человеколю́бец.

Канон святы́х, гла́с 4.

Пе́снь 1.

Ирмос: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зными Моисе́овыма рука́ма Амали́кову си́лу в пусты́ни победи́л е́сть.

Припев: Святии безсребренницы Кире и Иоанне, молите Бога о нас.

Вла́сть на ле́сть восприя́л еси́, Ки́ре блаже́нне, сострада́льца боле́зней име́в Иоа́нна сла́внаго. Те́м сла́дости лу́чшия на небесе́х наслажда́етеся.

Припев: Святии безсребренницы Кире и Иоанне, молите Бога о нас.

Во́инством духо́вным препоя́сався, Ки́ре всече́стне, земно́е же во́инство оста́вив, Иоа́нне всехва́льне, на де́моны взя́сте от Христа́ победи́тельная.

Сла́ва Отцу́ и Сы́ну и Свято́му Ду́ху:

Фе́клине доброде́тели поревнова́вше, жены́ боже́ственныя, в де́вственную равноа́нгельную оде́жду благоче́стно оде́яшася, му́ченическим же жела́нием к подвиго́м совлеко́шася.

И ны́не и при́сно и во ве́ки веко́в. Ами́нь.

Богородичен: Безсе́менно Отчею во́лею от Боже́ственнаго Ду́ха Бо́жияго зачала́ еси́ Сы́на и пло́тию породила́ еси́, из Отца́ безма́терня, на́с ра́ди из Тебе́ безо́тча.

Пе́снь 3.

Ирмос: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Припев: Святии безсребренницы Кире и Иоанне, молите Бога о нас.

Плотско́ю не́мощию, укрепля́еми Христо́выми страстьми́, благосла́внии му́ченицы человекоуби́йцу низложи́ша.

Припев: Святии безсребренницы Кире и Иоанне, молите Бога о нас.

Боле́зней пло́ти и нетле́нныя сла́дости Ду́хом Христо́вы му́ченицы прие́млюще, ра́довахуся.

Сла́ва Отцу́ и Сы́ну и Свято́му Ду́ху:

Укрепи́ся немощно́е же́нскаго кресто́м естества́, те́мже врага́ зми́я му́жески победи́ша.

И ны́не и при́сно и во ве́ки веко́в. Ами́нь.

Богородичен: Ты́ еди́на земны́м па́че естества́ благи́х хода́таица, Ма́ти Бо́жия, была́ еси́, те́мже Ти́, — ра́дуйся, — взыва́ем.

Седа́лен, гла́с 4.

До́лу влеку́щия сла́сти попра́вше, к муче́ния страда́льцы Боже́ственней высоте́ све́тло взя́стеся благода́тию, Ки́ре и Иоа́нне, вселе́нныя свети́льницы. Те́мже мо́лимся омраче́ния греха́ и неду́гов изба́вити ны́, су́щаго над все́ми Бо́га моля́ще.

Сла́ва, и ны́не, Богородичен:

По Бо́зе в Тво́й, Богоро́дице, прибе́г, смире́нный, покро́в боже́ственный, припа́дая, молю́ся: поми́луй, Пречи́стая, я́ко превзыдо́ша главу́ мою́ греси́, и бою́ся, Влады́чице, му́к, и трепе́щу, моле́ние сотвори́, Чи́стая, к Сы́ну Твоему́ от си́х изба́вити мя́.

Пе́снь 4.

Ирмос: Вознесе́на Тя́ ви́девши Це́рковь на Кресте́, Со́лнце пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Припев: Святии безсребренницы Кире и Иоанне, молите Бога о нас.

Невече́рния благода́ти светозаре́ние враги́ низложи́ любомра́чныя льсти́, сея́ ратобо́рцы, свети́льники сия́ющия, Ки́ра и Иоа́нна показа́вши.

Припев: Святии безсребренницы Кире и Иоанне, молите Бога о нас.

Услади́шася Тро́ическим раче́нием, и от Нея́ му́ченицы зело́ возлю́блени бы́вше, Ки́р же и Иоа́нн, соедине́нием лу́чшим орга́ни Бо́жии показа́стеся.

Сла́ва Отцу́ и Сы́ну и Свято́му Ду́ху:

Яко че́стен ва́ш хра́м, отгони́телен лука́вых духо́в, отгоня́ет неду́ги все́х боля́щих, непобеди́мии му́ченицы, благода́ть исцеле́ния подава́ет.

И ны́не и при́сно и во ве́ки веко́в. Ами́нь.

Богородичен: Неискусобра́чно родила́ еси́, о Де́во, и по рождестве́ яви́лася еси́ де́вствующи па́ки; те́мже немо́лчными гла́сы, — ра́дуйся, — Тебе́, Влады́чице, ве́рою несомне́нною взыва́ем.

Пе́снь 5

Ирмос: Ты́, Го́споди, мо́й Све́т, в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Припев: Святии безсребренницы Кире и Иоанне, молите Бога о нас.

Тя́, Спа́се, дво́ица му́чеников возжеле́, Ты́, Святы́й во святы́х, Ки́ра и Иоа́нна досто́йно поче́л еси́.

Припев: Святии безсребренницы Кире и Иоанне, молите Бога о нас.

Твое́ де́ло, Бла́же, врага́ потребле́ние, Ты́ му́ченики благоче́стия Кресто́м соде́лал еси́ и сла́вою венча́л еси́.

Сла́ва Отцу́ и Сы́ну и Свято́му Ду́ху:

Тя́ еди́наго люби́ти небоя́зненным мудрова́нием, пома́завшеся де́вством, Иоа́нн и Ки́р му́жество соде́лаша.

И ны́не и при́сно и во ве́ки веко́в. Ами́нь.

Богородичен: Тя́ ору́жие непобеди́мое на враги́ предлага́ем, Тя́ тве́рдость и наде́жду на́шего спасе́ния, Богоневе́сто, и́мамы.

Пе́снь 6.

Ирмос: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.

Припев: Святии безсребренницы Кире и Иоанне, молите Бога о нас.

Пожре́тися му́ченицы за Христа́ изво́лиша, не́жели и́долом пожре́ти, лука́ваго же мучи́теля привести́, за милосе́рдие за ны́ поже́ршагося, я́ко овча́.

Припев: Святии безсребренницы Кире и Иоанне, молите Бога о нас.

Изнемого́ша и́же неща́дно му́ченики стру́жущии, стру́жемым же стре́лы я́звы младе́нец быва́ху: пресла́вно бо утвержда́хуся Боже́ственным Ду́хом.

Сла́ва Отцу́ и Сы́ну и Свято́му Ду́ху:

Го́спода и Царя́ всея́ тва́ри испове́давшая ве́рою дво́ица единому́дренная и единострада́льная беззако́нным да́же до кро́ве сопроти́вишася.

И ны́не и при́сно и во ве́ки веко́в. Ами́нь.

Богородичен: О, чу́до, все́х чуде́с нове́йшее! Яко Де́ва во утро́бе вся́ческая Содержа́щаго, неискусому́жно заче́нши, не тесновмести́.

Конда́к, гла́с 3.

От Боже́ственныя благода́ти да́р чуде́с прие́мши, святи́и, чудоде́йствуете непреста́нно, вся́ на́ша стра́сти рукоде́йством секу́ще неви́димым, Ки́ре богому́дре со Иоа́нном сла́вным: вы́ бо Боже́ственнии вра́чеве есте́.

Икос:

Са́ми себе́ Бо́гу возло́жше, святи́и, вся́кое искуше́ние лю́тых Его́ ра́ди претерпе́сте, уме́рше усе́рдно, му́ченицы до́блии, и по кончи́не все́м источа́ете Боже́ственная дарова́ния, су́щим в разли́чных неду́зех, и от мно́гих исцеля́юще зо́л, от ни́хже еди́н и пе́рвый е́смь а́з, окая́нный. Те́лом бо и душе́ю от я́зв лю́тых боле́зную и ве́рою ва́м вопию́: исцели́те мя́, вы́ бо Боже́ственнии вра́чеве есте́.

Пе́снь 7.

Ирмос: В пещи́ авраа́мстии о́троцы перси́дстей, любо́вию благоче́стия па́че, не́жели пла́менем, опаля́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии безсребренницы Кире и Иоанне, молите Бога о нас.

Изве́сивше я́ко в преклоне́нии ме́рила мудрова́ние, тягото́ю пречи́стыя сла́вы страда́льцы возвыша́еми, взыва́ху: благослове́н еси́ в хра́ме сла́вы Твоея́, Го́споди.

Припев: Святии безсребренницы Кире и Иоанне, молите Бога о нас.

Не неве́дуще супоста́тнаго умышле́ний, вся́к ра́н ви́д и ласка́ний поплева́вше, му́ченицы: благослове́н еси́, — вопия́ху, — в хра́ме сла́вы Твоея́, Го́споди.

Сла́ва Отцу́ и Сы́ну и Свято́му Ду́ху:

Терпе́нием ра́н венча́еми, Иоа́нн же и Ки́р, защи́тницы, Тро́ице взыва́ху: благослове́н еси́ в хра́ме сла́вы Твоея́, Го́споди.

И ны́не и при́сно и во ве́ки веко́в. Ами́нь.

Богородичен: Вы́шняго освяще́нное Боже́ственное селе́ние, — ра́дуйся, — Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

Пе́снь 8.

Ирмос: Ру́це распросте́р, Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели, о́троцы, взыва́юще: благослови́те, вся́ дела́ Госпо́дня, Го́спода.

Припев: Святии безсребренницы Кире и Иоанне, молите Бога о нас.

Ко отверже́нию у́бо нечести́вии естество́м су́щаго Бо́га призыва́ху лю́те; но непобе́днии му́ченицы тва́рию явля́ху все́х Зижди́теля су́ща, взыва́юще: благослови́те, вся́ дела́ Госпо́дня, Го́спода.

Припев: Святии безсребренницы Кире и Иоанне, молите Бога о нас.

Неи́стовствующиися ле́стию гне́вно, земна́я му́дрствующии мучи́телие и́же житие́ иму́щия на небесе́х неразори́мо сме́ртию к жи́зни отсыла́ху, взыва́ющия: благослови́те, вся́ дела́ Госпо́дня, Го́спода.

Сла́ва Отцу́ и Сы́ну и Свято́му Ду́ху:

Мо́щи му́чеников блиста́ния чудес явишася вселенней, Христе, злодемона мечтанную ле́сть посрамля́юще, вопию́щим же благоле́пно исцеле́ния подава́юще: благослови́те, вся́ дела́ Госпо́дня, Го́спода.

И ны́не и при́сно и во ве́ки веко́в. Ами́нь.

Богородичен: Без ма́тере из Отца́ Сло́во Сы́й, пе́рвее, без отца́ бы́сть из Тебе́, второ́е, Всечи́стая, вопло́щся пе́рвее Безпло́тный, за благоутро́бие восхоте́в спасти́ пою́щия: благослови́те, вся́ дела́ Госпо́дня, Го́спода.

Песнь 9

Ирмос: Ка́мень нерукосе́чный от несеко́мыя горы́, Тебе́, Де́во, краеуго́льный отсече́ся — Христо́с, совокупи́вый разстоя́щаяся естества́. Те́м, веселя́щеся, Тя́, Богоро́дице, велича́ем.

Припев: Святии безсребренницы Кире и Иоанне, молите Бога о нас.

Послушли́ва до сме́рти дво́ица непобеди́мых му́чеников яви́ся, Иоа́нна и Ки́ра, Влады́чним Боже́ственным веле́нием, те́мже в ру́це Зижди́теля своя́ ду́ши преда́ша.

Припев: Святии безсребренницы Кире и Иоанне, молите Бога о нас.

Свети́ла сия́ют два́, чуде́с сия́ния, от Исто́чника еди́наго светоно́снаго, немощны́м источа́юща нетле́нную благода́ть, я́же досто́йно велича́ем.

Сла́ва Отцу́ и Сы́ну и Свято́му Ду́ху:

Еди́ницу у́бо Боже́ственнаго существа́, но ипоста́сьми Тро́ицу, непобеди́мых му́ченик дво́ица му́жески богосло́вяше: воплоще́ннаго же Сло́ва, Еди́наго Христа́ во двою́ естеству́.

И ны́не и при́сно и во ве́ки веко́в. Ами́нь.

Богородичен: Пощади́ мя, Христе́, егда́ прии́деши суди́ти ми́р со сла́вою, разреши́ мглу́ страсте́й мои́х, мольба́ми ро́ждшия Тя́ и честны́х му́ченик Твои́х, я́ко Бла́г и Многоми́лостив.

Свети́лен.

Чудоде́йственнии свети́льницы, Ки́ре со Иоа́нном, душе́вныя на́ша неду́ги и теле́сныя исцели́те, от Го́спода прие́мше благода́ть исцеле́ний.

Сла́ва, и ны́не, Богородичен:

От Бо́га ми́рови пода́нных благи́х Ты́ вина́ была́ еси́, Богоро́дице, но и ны́не моли́ о о́бщем спасе́нии благопреме́ннаго Бо́га.

Молитва бессребреникам мученикам Киру и Иоанну

О, святи́и уго́дницы Бо́жии, му́ченицы и безсре́бреницы Ки́ре и Иоа́нне! По́двигом до́брым подвиза́вшася на земли́, восприя́ли еста́ на Небесе́х вене́ц пра́вды, его́же угото́вал есть Госпо́дь всем лю́бящим Его́. Те́мже взира́юще на святы́й ваш о́браз, ра́дуемся о пресла́внем сконча́нии жи́тельства ва́шего и чтим святу́ю па́мять ва́шу. Вы же, предстоя́ Престо́лу Бо́жию, приими́те моле́ния на́ша и ко Всеми́лостивому Бо́гу принеси́те, о е́же прости́ти нам вся́кое прегреше́ние и по́мощи нам ста́ти проти́ву ко́знем диа́вольским, да изба́вльшеся от скорбе́й, боле́зней, бед и напа́стей и вся́каго зла, благоче́стно и пра́ведно поживе́м в ны́нешнем ве́це и сподо́бимся предста́тельством ва́шим, а́ще и недосто́йни есмы́, ви́дети блага́я на земли́ живы́х, сла́вяще Еди́наго во святы́х Свои́х сла́вимаго Бо́га, Отца́ и Сы́на и Свята́го Ду́ха, ны́не и во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Святым чудотворцам и безсребреникам Киру и Иоанну