11 февраля.

Канон cобору святителей Герасима, Питирима и Ионы, епископов Великопермских.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, гла́с 8:

Равноапо́стольному святи́телю Стефа́ну насле́довавший/ и Правосла́вия све́том страну́ Зыря́нскую озари́вшии,/ святи́телие Христо́вы Гера́симе, Питири́ме и Ио́но,/ Престо́лу Пресвяты́я Тро́ицы ны́не предстоя́ще,/ моли́теся па́стве ва́шей от враго́в ненаве́тованней бы́ти/ и всем правосла́вным лю́дем в ми́ре спасти́ся.

Ин тропа́рь, глас 4:

Первопресто́льницы Пе́рмстии/ и и́стиннии храни́телие апо́стольских преда́ний,/ столпи́ непоколеби́мии,/ благоче́стия учи́телие, Пе́рмстии наста́вницы,/ Гера́симе, Питири́ме и Ио́но,/ Влады́ку всех моли́те мир вселе́нней дарова́ти/ и душа́м на́шим ве́лию ми́лость.

Тропа́рь, гла́с 8:

Правосла́вия наста́вницы,/ благоче́стия учи́телие и ми́лости сокро́вища,/ архиере́ом украше́ние,/ ду́ши своя́ за па́ству свою́ положи́вшии,/ Гера́симе, Питири́ме и Ио́но,/ святи́телие Це́ркве Пе́рмския,/ со равноапо́стольным Стефа́ном моли́те Христа́ Бо́га/ мир вселе́нней дарова́ти/ и душа́м на́шим ве́лию ми́лость.

Кано́н. Гла́с 8.

Пе́снь 1.

Ирмос: Пои́м Го́сподеви,/ прове́дшему лю́ди Своя́ скво́зе Чермно́е мо́ре,/ я́ко Еди́н сла́вно просла́вися.

Припев: Святителие Великопермстии, молите Бога о нас.

Сло́во благода́ти пода́ждь ми, Человеколю́бче Го́споди,/ я́ко да возмогу́ досто́йне просла́вити три святи́тели,/ и́хже Ты Сам до́бре просла́вил еси́.

Припев: Святителие Великопермстии, молите Бога о нас.

Вы в ми́ре просия́ете, прему́дрии святи́телие,/ исполне́нием Боже́ственных веле́ний Царя́ ца́рствующих,/ того́ ра́ди от Него́ просла́вистеся.

Сла́ва Отцу́ и Сы́ну и Свято́му Ду́ху:

Просия́вшия в ми́ре благоче́стия све́том/ и нече́стия тьму в земли́ Зыря́нстей разгна́вшия,/ три святи́тели, ве́рнии, просла́вим.

И ны́не и при́сно и во ве́ки веко́в. Ами́нь.

Богородичен: Я́ко заче́ншую Предве́чное Сло́во/ и пло́тию па́че сло́ва Того́ ро́ждшую,/ Тя, Пречи́стая, по до́лгу вси ро́ди земни́и прославля́ют.

Пе́снь 3.

Ирмос: Утвержде́й в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́, Еди́не Человеколю́бче.

Припев: Святителие Великопермстии, молите Бога о нас.

Воздержа́нием и́стинным и моли́твою непреста́нною,/ прему́дрии святи́телие Гера́симе, Питири́ме и Ио́но,/ возшли́ есте́ в Вы́шний град, вопию́ще:/ несть свят, па́че Тебе́, Еди́не Человеколю́бче.

Припев: Святителие Великопермстии, молите Бога о нас.

Я́ко иму́щие дерзнове́ние к Бо́гу, святи́телие преподо́бнии,/ моли́те спасти́ся нам, ве́рою почита́ющим па́мять ва́шу и Христу́ вопию́щим:/ несть свят, па́че Тебе́, Еди́не Человеколю́бче.

Сла́ва Отцу́ и Сы́ну и Свято́му Ду́ху:

Я́ко со́лнце, просия́ете доброде́тельми ва́шими, святи́телие,/ и тьму идолобе́сия от люде́й, вам вве́ренных, отгна́вше,/ всех научи́сте взыва́ти/ несть свят, па́че Тебе́, Еди́не Человеколю́бче.

И ны́не и при́сно и во ве́ки веко́в. Ами́нь.

Богородичен: Не́бо и престо́л Бо́жий Тя почита́ем вси, Богороди́тельнице Де́во,/ и немо́лчно Тебе́ вопие́м:/ несть Пречи́стыя, па́че Тебе́, еди́на Богома́ти.

Седа́лен, гла́с 3.

Сосу́ди честни́и воздержа́ния/ и бога́тство некра́домое благоче́стия яви́стеся вои́стинну, блаже́ннии,/ безстра́стием жизнь просвети́вше и неве́дущих Бо́га Богопозна́нием обогати́вше,/ отцы́ преподо́бнии, Христа́ Бо́га моли́те/ и нам всем в правове́рии и благоче́стии сохране́нными бы́ти.

Сла́ва, и ны́не, Богородичен:

Ки́йждо, иде́же спаса́ется, та́мо пра́ведно и притека́ет,/ и ко́е ино́е таково́е прибе́жище, я́ко Ты, Богоро́дице,/ покрыва́ющее ду́ши на́ша.

Пе́снь 4.

Ирмос: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Припев: Святителие Великопермстии, молите Бога о нас.

Прему́дростию, во усте́х ва́ших излия́вшеюся, святи́телие,/ ко Христо́ву позна́нию наста́висте лю́ди,/ и́же и просла́виша Того́ Божество́.

Припев: Святителие Великопермстии, молите Бога о нас.

Спасти́ся моли́те лю́дем, и́хже уче́нии ва́шими ко Влады́це приведо́сте/ и научи́сте прославля́ти Того́ Божество́.

Сла́ва Отцу́ и Сы́ну и Свято́му Ду́ху:

Преподо́бнии отцы́, Гера́симе, Питири́ме и Ио́но,/ приле́жно моли́те и нам всем дела́ Бо́жии разуме́ти/ и просла́вити Того́ Божество́.

И ны́не и при́сно и во ве́ки веко́в. Ами́нь.

Богородичен: Безневе́стная Неве́сто и Неискусобра́чная Чи́стая Ма́ти Христа́ Бо́га,/ моли́ спасти́ся душа́м прославля́ющих Того́ Божество́.

Пе́снь 5

Ирмос: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.

Припев: Святителие Великопермстии, молите Бога о нас.

Апо́стольски лю́ди от тьмы и́дольския просвети́вше, научи́сте вся взыва́ти:/ Го́споди, спаси́ ны, кро́ме бо Тебе́, ино́го не ве́мы.

Припев: Святителие Великопермстии, молите Бога о нас.

От Бо́га прие́мше свяще́нства избра́ние, Боже́ственною си́лою свы́ше оде́яни,/ род Зыря́нский научи́ли есте́ испове́дати:/ кро́ме Еди́наго Бо́га, ино́го не ве́мы.

Сла́ва Отцу́ и Сы́ну и Свято́му Ду́ху:

Ревни́телю Илии́ и Моисе́ю Богови́дцу возревнова́вше, отцы́ всечестни́и,/ посрами́сте идолослужи́телей, не восхоте́вшия пе́ти:/ кро́ме Еди́наго Бо́га, ино́го не ве́мы.

И ны́не и при́сно и во ве́ки веко́в. Ами́нь.

Богородичен: Я́ко Цари́цу, всех Царя́ ро́ждшую,/ прииди́те, ве́рнии вси, Благослове́нную почти́м,/ кро́ме бо Ея́, Помо́щницы таковы́я не ве́мы.

Пе́снь 6.

Ирмос: Ри́зу мне пода́ждь све́тлу,/ оде́яйся све́том, я́ко ри́зою,/ Многоми́лостиве Христе́ Бо́же наш.

Припев: Святителие Великопермстии, молите Бога о нас.

Це́рковь Правосла́вную украси́сте, отцы́ блаже́ннии,/ доброде́тельными ва́шими дея́нии/ и нече́стие из ко́рене изсуши́ли есте́.

Припев: Святителие Великопермстии, молите Бога о нас.

Ри́зою благода́ти оде́яннии,/ покро́вом моли́тв свои́х осеня́йте при́сно па́ству ва́шу/ и всю зе́млю Ру́сскую.

Сла́ва Отцу́ и Сы́ну и Свято́му Ду́ху:

Вме́сто ору́жия сло́во взе́мше, святи́телие,/ и язы́ческая посе́кли есте́ уче́ния вся/ и изъясни́ли есте́ Тро́ицу лю́дем зыря́нским я́вственно.

И ны́не и при́сно и во ве́ки веко́в. Ами́нь.

Богородичен: Роди́вся от Де́вы, мир просвети́л еси́, Христе́ Бо́же,/ и мене́ све́том лица́ Твоего́ озари́ и спаси́ мольба́ми Ро́ждшия Тя.

Конда́к, гла́с 4.

Во святи́телех благоче́стно пожи́вше/ и Пе́рмския лю́ди к Богоразу́мию наста́вивше,/ до́бре Бо́гу угоди́сте./ Сего́ ра́ди Устьвы́мь и земля́ Зыря́нская хва́лятся,/ име́юще мо́щи ва́ша/ я́ко исто́чник исцеле́ний/ всем, с ве́рою притека́ющим к вам,/ вы бо чудесы́ просла́вистеся,/ я́ко ученицы́ Бо́жия благода́ти.

Икос:

Равноапо́стольнаго Стефа́на прее́мницы и Великопе́рмстии святи́телие,/ трие́ свети́лъницы пресве́тлии, Гера́симе, Питири́ме и Ио́но,/ Тро́ицы побо́рницы, Правосла́вию наста́вницы,/ в ми́ре благоче́стно пожи́сте и новокреще́нныя лю́ди уче́нием свои́м просвети́сте./ Сего́ ра́ди Ца́рствию Небе́сному насле́дницы бы́сте/ и от него́ чудесы́ просла́вистеся,/ я́ко ученицы́ Бо́жия благода́ти.

Пе́снь 7.

Ирмос: В нача́ле зе́млю основа́вый/ и Небеса́ сло́вом утверди́вый,/ благослове́н еси́ во ве́ки, Го́споди, Бо́же оте́ц на́ших.

Припев: Святителие Великопермстии, молите Бога о нас.

И́стинныя святи́тели Боже́ственный ста́ду Твоему́ па́стыри показа́вый,/ благослове́н Бог оте́ц на́ших.

Припев: Святителие Великопермстии, молите Бога о нас.

Страсте́й пла́мень погаси́сте, святи́телие,/ и ду́ши благочести́вых Боже́ственне ороси́сте, вопию́щих:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Воздержа́нием, и бде́нием, и ве́рою и́стинною труди́вшеся, святи́телие, взыва́сте:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Нас ра́ди рожде́йся от Де́вы и от врага́ изба́вивый мир,/ благослове́н Бог оте́ц на́ших.

Пе́снь 8.

Ирмос: На горе́ святе́й просла́вльшася/ и в купине́ огне́м Присноде́вы Моисе́ови та́йну я́вльшаго,/ Го́спода по́йте/ и превозноси́те во вся ве́ки.

Припев: Святителие Великопермстии, молите Бога о нас.

Еле́ем Боже́ственнаго ра́дования я́ко святи́телие пома́зани бы́вше,/ но́вые лю́ди ко Христо́ву позна́нию приведо́сте и всех научи́сте взыва́ти:/ благослове́н Бог оте́ц на́ших.

Припев: Святителие Великопермстии, молите Бога о нас.

Бе́гают побежде́ннии ва́ми нача́льницы идолонеи́стовства,/ мудрова́ния же их и зло́бы изба́вльшиися вопию́т Христу́:/ благослове́н Бог оте́ц на́ших.

Сла́ва Отцу́ и Сы́ну и Свято́му Ду́ху:

Ва́ми дре́вле просвеще́нных ча́да/ к вам, я́ко живы́м су́щим, глаго́лют:/ не оста́вите и нас ко благоче́стию путеводи́ти, да с ва́ми вопие́м:/ благослове́н Бог оте́ц на́ших.

И ны́не и при́сно и во ве́ки веко́в. Ами́нь.

Богородичен: Все́льшемуся в чре́во Святы́я Де́вы/ и па́че сло́ва ве́тхаго Ада́ма обно́вльшему, Го́споду пое́м:/ благослове́н Бог оте́ц на́ших.

Песнь 9

Ирмос: Проявле́нное на горе́ законополо́жнику во огни́ и купине́/ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Припев: Святителие Великопермстии, молите Бога о нас.

Безстра́стием и ве́рою, наде́ждою и любо́вию/ путь к жи́зни ве́чной нам показа́вшии, прему́дрии святи́телие,/ пе́сньми немо́лчными вас велича́ем.

Припев: Святителие Великопермстии, молите Бога о нас.

Я́ко упа́сших лю́ди жезло́м Ду́ха Свята́го/ и от Бо́жия Це́ркве отгна́вших во́лки лю́тыя,/ вас, трие́ святи́телие всечестни́и, пе́сньми велича́ем.

Сла́ва Отцу́ и Сы́ну и Свято́му Ду́ху:

Мо́щи ва́ша честны́я, блаже́ннии святи́телие Гера́симе, Питири́ме и Ио́но, с любо́вию обстоя́ще,/ пе́сньми достодо́лжными вас велича́ем.

И ны́не и при́сно и во ве́ки веко́в. Ами́нь.

Богородичен: Ра́дуйся, присноживо́тный Исто́чниче нетле́ния,/ ра́дуйся, всесве́тлый со́лнца О́блаче./ Ра́дуйся, Ма́ти Бо́жия, Ю́же немо́лчно велича́ем.

Свети́лен.

Оте́чество свое́ и род оста́вльшия,/ страну́ же Зыря́нскую све́том ве́ры Правосла́вный просвети́вшия/ и ко Христо́ву позна́нию лю́ди неве́рныя приве́дшия,/ Богоно́сных восхва́лим отце́в.

Сла́ва, и ны́не, Богородичен:

Тебе́ пе́сньми немо́лчными ублажа́ем, Де́во,/ Я́же от Тро́ицы Еди́наго во чре́ве прие́мши, Богоро́дице,/ Боже́ственными рука́ми Пресу́щно Сло́во носи́вшая, непрело́жно и неизме́нно.

Молитва

О святи́телие Христо́вы, Гера́симе, Питири́ме и Ио́но! К вам я́ко ча́до ко отце́м, в смире́нии се́рдца с ве́рою и любо́вию вси притека́ем и умиле́нно мо́лимся: предста́тельством ва́шим со равноапо́стольным Стефа́ном испроси́те у Го́спода нам покая́ние и проще́ние всех во́льных и нево́льных согреше́ний на́ших, да, преуспева́юще в и́стинней ве́ре и благоче́стии, яви́мся досто́йни ми́лости Его́ неизрече́нныя. Бу́дите, святи́телие Христо́вы, те́плии о нас пред Бо́гом засту́пницы, да умири́т и укрепи́т Госпо́дь Святу́ю Це́рковь Свою́, да просвети́т лю́ди, седя́­щия во тьме и се́ни сме́ртней. Огражда́йте хода́тайствы ва́­шими зе́млю Росси́йскую, да ти́хое и безмо́лвное житие́ поживе́м в ве́це сем, христиа́нскую кончи́ну и до́брый отве́т на Стра́шнем суде́ Бо́жи­ем полу́чим и насле́дницы бу́дем Небе́снаго Его́ Ца́рствия во ве́ки веко́в. Ами́нь.